“Con este acordo reforzamos a colaboración institucional para contribuír a un mellor coñecemento realidade no que ten que ver coa diversidade sexual e de xénero, ao tempo que potenciamos a visibilización de mulleres destacadas no campo da cultura e contribuímos á eliminación da discriminación por mor de xénero” explicou Rosario Álvarez trala sinatura do acordo. Pola súa banda, a Conselleira de Emprego e Igualdade, María Jesús Lorenzana destacou que supón “un paso máis na moi necesaria visión integral e actuación conxunta que debemos adoptar no eido da loita contra a violencia de xénero e en prol da igualdade”.

O acordo asinado esta mañá ten unha dotación económica de 22.000 euros e busca realizar accións conxuntas nestes ámbitos de actuación que comparten a Consellería, a través da secretaría xeral de igualdade e o Consello da Cultura Galega a través do Centro de Documentación en Igualdade e Feminismo e a Sección de Pensamento. O acordo está centrado en tres liñas de actuación: a diversidade sexual, a eliminación da violencia de xénero e a visibilización de mulleres destacadas do ámbito do pensamento.

As accións
A primeira das acción concrétase nunha exposición que pretende achegar unha reflexión sobre os conceptos básicos do movemento LGTBIQ+. A mostra, de carácter informativo, pretende facer historia e contar as reivindicacións deste movemento nas últimas décadas e os logros conseguidos. O cometido final desta mostra é buscar a concienciación nas persoas máis novas que en moitas ocasións descoñecen a traxectoria do propio movemento LGBTIQ+. Enrique de la Torre e Daniela Erranz son os comisarios deste proxecto que se inaugurará en xuño deste ano.
Outra das accións é a elaboración dunha Guía-Itinerario de carácter informativo destinada a mulleres que queren denunciar unha situación de violencia de xénero ou solicitar algún tipo de axuda nesta materia. Tal e como explicou María Xosé Porteiro, directora do CDIF, estará dispoñible no mes de novembro e está a ser elaborada por un equipo de vinte profesionais de ámbitos que van desde a sanidade (atención primaria, psicoloxía, pediatría....), xustiza (xulgados, asistentes sociais....), ata a comunicación. “É a primeira vez que existe unha guía completa para a muller para que coñeza todo o proceso” explicou a conselleira.

A terceira das accións é a realización dun proxecto audiovisual titulado “As filósofas”. Consiste nunha serie de vídeos divulgativos encamiñados a visibilizar a figura de filósofas destacadas que se encadrará no marco da segunda edición do Festival de Filosofía . Un certame que organizará a Sección de Pensamento do CCG no mes de setembro. O proxecto, que explicou Carme Adán, pretende fornecer de materiais audiovisuais a público xeral pero tamén materiais para as ámbito educativo.

Un chanzo máis nun camiño continuado
O Consello da Cultura Galega e a Consellería de Emprego e Igualdade comparten unha preocupación pola promoción da Igualdade e a eliminación da discriminación entre mulleres e homes. O acordo asinado hoxe é outro máis nunha liña de colaboracións que van desde publicacións como a editada en 2021 a propósito de Jimena Fernández de la Vega, co fin de dar a coñecer o traballo de científicas galegas destacadas; ou o realizado en 2017 que baixo o título, “A muller na cultura galega: condicións sociolaborais no ámbito cultural con perspectiva de xénero”, permitiu coñecer a situación da muller no sector cultural, nomeadamente no sector das artes escénicas e audiovisuais.