Opinón Gallega é unha publicación que seguiu o ronsel de El Orensano, como órgano oficial do Centro Orensano e do Centro Pontevedrés de Bos Aires. Valeriano Saco e Rodolfo Prada foron os directores deste xornal que informaba da vida societaria das devanditas entidades, incluíndo noticias da colectividade, sobre todo no eido cultural e nas actividades das asociacións galeguistas. Complétabase con informacións sobre Galicia, principalmente das súas provincias de referencia, e artigos que abordan a realidade galega dende diferentes ámbitos, nos que colaboran intelectuais galeguistas como Castelao, Plácido Castro, Ben-Cho-Sey entre moitos outros.
Unha parte destacada deste fondo chegou ao AEG da man de Chema Rei Lema, que facilitou varios números que se conservan na “Biblioteca Roberto Veloso-Carmen Balboa”, da Asociación de Veciños de Baio (Zas). Roberto Veloso foi emigrante en Arxentina de 1950 ata 1959, e estivo moi implicado nas actividades societarias da colectividade galega deses anos, chegando a ser presidente de Mocedades Galeguistas de Bos Aires. Legou a súa biblioteca á asociación de Baio quen a custodia e difunde entre os seus veciños.