----

Unha xornada profunda na musealización do patrimonio cultural do exilio

O Consello da Cultura Galega (CCG) celebra mañá, 25 de outubro, a xornada Musealizar a arte do exilio galego. Nela, afondarase no papel que desempeñan os museos e as fundacións a prol da conservación, salvagarda e difusión do patrimonio cultural procedente do exilio galego. A iniciativa está coordinada por Inmaculada Real López e conta coa colaboración da Secretaría Xeral de Emigración e da Universidad Complutense de Madrid. A presidenta do CCG, Rosario Álvarez, e a subdirectora de Coordinación Administrativa da Secretaría Xeral da Emigración, María Baleato, inauguran esta sesión presencial que tamén se poderá seguiren directo a través das redes sociais da institución.

O exilio da Guerra Civil ocasionou un éxodo sen precedentes da intelectualidade galega e a dispersión dun patrimonio artístico que tardou anos en ser parcialmente recuperado. Buscar un lugar onde depositar ese legado cultural e persoal foi un dos principais obstáculos que se tiveron que afrontar no regreso, ao seu lugar de orixe, das coleccións creadas na diáspora. Historiadores e diversos representantes de museos e fundacións analizarán o panorama museístico galego e as súas coleccións nunha xornada que busca abrir a porta a futuros proxectos relacionados coa conservación da memoria histórica.

O programa
A cita comezará coa conferencia Retornar, musealizar e conservar, a cargo de Inmaculada Real López, da Universidad Complutense de Madrid. A continuación, darase paso á primeira das sesións, que ten como fío condutor o papel chave dos museos monográficos para rescatar, poñer en valor e homenaxear a artistas relevantes do pasado. Participarán Silvia Longueira, Javier Pérez Buján e Natalia Fernández, directores das fundacións Luís Seoane, Laxeiro e Eugenio Granell, respectivamente. A sesión matinal concluirá coa historiadora e xestora cultural María América Díaz Pampín, que nos achegará ao labor que fan as galerías de arte a través dunha intervención titulada As galerías, a mercantilización e a apertura de espazos: a Galería Sargadelos.

A segunda sesión desenvolverase pola tarde e estará dedicada a analizar a presenza que os artistas do exilio teñen nos principais museos galegos, o proceso de integración nas coleccións e a súa presenza no discurso expositivo. Así, o historiador da arte Carlos López Bernárdez falará sobre a colección de ABANCA, após o cal intervirá a directora do Museo de Belas Artes da Coruña, Ángeles Pena Truque. Pola súa banda, Ángeles Tilve, conservadora do Museo de Pontevedra, e Aurelia Balseiro, directora do Museo Provincial de Lugo, afondarán na representación que a arte galega do exilio ten nestes dous centros. A sesión concluirá co relatorio Os artistas do exilio na colección do Museo Francisco Fernández del Riego, a cargo da comisaria de exposicións Beatriz Liz de Cea.

Outras noticias que che poden interesar