Veñen de fallarse os premios Inventa en Galego e Novos Poliedros, convocados por Igaciencia co gallo do Día da Ciencia en Galego.

O primeiro, que requiría a elaboración dunha app que reflectise os lugares interesantes e turísticos da zona na que o alumnado reside, foi para o IES Plurilingüe Eusebio da Guarda, polos proxectos Buscando a María Pita e Club dos famosos mortos.

No certame Novos Poliedros, centrado na xeometría e a simetría, resultaron gañadores o instituto IES Ramón Menéndez Pidal, da Coruña, por partida dobre cunha clase de Bacharelato e outra de terceiro da ESO; o IES Carlos Casares, de Vigo; o IES de Meaño e o CPI Plurilingüe Dr. López Suárez, de Friol.