Novas da lingua. CURSOS E CONGRESOS

Rexistros31 a 60 de 744
  1. Inicio
  2. CDSG-CCG
  3. Novas da lingua
  4. CURSOS E CONGRESOS
05/10/2022. CURSOS E CONGRESOS

Fran da Lobeira e Nee Barros conversan cos participantes dos XXIV Encontros

O vindeiro 20 de outubro de 2022 terá lugar no Consello da Cultura Galega a vixésimo cuarta edición dos Encontros para a Normalización Lingüística, a nosa cita anual para o debate e a reflexión arredor da normalización do idioma galego. Nesta ocasión o fío condutor será “a arte e a lingua como ferramentas de construción masiva”, polo que terás ocasión de escoitar a diferentes creadoras e creadores do país ofrecendo o seu punto de vista sobre como tecer redes no sector artístico para potenciar a lingua de xeito cooperativo.

Con antelación á xornada presencial, Nee Barros Neeumatiko e mais Fran da Lobeira A Lobeira Today conversaron cos convidados/as desta edición, que nos ofrecen un pequeno adianto dos temas que tratarán o 20 de outubro nas respectivas mesas de debate.
05/10/2022. CURSOS E CONGRESOS

Obradoiro de recursos educativos en galego para nais e pais

O Departamento de Lingua Galega do Concello de Santiago de Compostela organiza un obradoiro de carácter práctico, de tres horas de duración, dirixido a nais e pais que desexen coñecer e probar materiais educativos útiles para a crianza en galego. As sesións terán lugar os días 10 e 24 de outubro de 2022, de 17:30 a 19 h, no Espazo Apego, en Santiago. Para obter máis información sobre a iniciativa, así como sobre os trámites de inscrición, preme aquí.
03/10/2022. CURSOS E CONGRESOS

Xa podes inscribirte nos XXIV Encontros para a Normalización Lingüística

O vindeiro 20 de outubro de 2022 terá lugar no Consello da Cultura Galega a vixésimo cuarta edición dos Encontros para a Normalización Lingüística, a nosa cita anual para o debate e a reflexión arredor da normalización do idioma galego. Nesta ocasión o fío condutor será “a arte e a lingua como ferramentas de construción masiva”, polo que terás ocasión de escoitar a diferentes creadoras e creadores do país ofrecendo o seu punto de vista sobre como tecer redes no sector artístico para potenciar a lingua de xeito cooperativo. Con antelación á xornada presencial, difundiremos catro vídeos (os dous primeiros, hoxe mesmo) nos que os/as convidados/as conversan con Nee Barros Neeumatiko e mais con Fran da Lobeira A Lobeira Today para ofrecernos un adianto dos temas que tratarán o 20 de outubro nas respectivas mesas de debate. A matrícula é de balde e as prazas cubriranse por rigorosa orde de inscrición. Podes ampliar información premendo aquí.
27/09/2022. CURSOS E CONGRESOS

Ábrese o prazo de inscrición para as xornadas Enreguéifate

Os servizos de normalización lingüística dos concellos de Ames, Carballo, Santiago, Pontevedra e Teo organizan, no marco do proxecto Enreguéifate, un curso de formación para docentes que queiran comezar ou continuar coa regueifa como ferramenta educativa. As sesións terán lugar no Espazo Apego de Santiago de Compostela o 14 de outubro de 2022. O prazo de inscrición remata o vindeiro 6 de outubro. Podes obter máis información sobre o programa do curso e os trámites de inscrición premendo aquí.
22/09/2022. CURSOS E CONGRESOS

O galego na xornada do Día Europeo das Linguas en Frankfurt

Con motivo da celebración do Día Europeo das Linguas, o Consello de Cultura Galega, o Instituto Etzxepare, o Institut Ramon Llull e o Instituto Cervantes organizan a xornada Todas as voces a voz. Poesía en español, catalán, eúscaro, galego e alemán, que se realizará na sede do Instituto Cervantes de Frankfurt o próximo día 26 de setembro de 2022.
19/09/2022. CURSOS E CONGRESOS

Xornada "Realidade e perspectivas de futuro dos medios de comunicación en galego en soporte papel"

O Consello da Cultura Galega organiza a xornada "Realidade e perspectivas de futuro dos medios de comunicación en galego en soporte papel", durante a que se abordarán a súa situación actual, a súa resistencia e a súa adaptación nun contexto fortemente marcado pola dixitalización e pola crise económica. Tamén haberá espazo para presentar diversos modelos xornalísticos e outros tipos de publicacións en papel promovidas polas novas xeracións.

Para esta actividade, que vai ter lugar o 10 de outubro, a inscrición é gratuíta e as prazas limitadas.
19/09/2022. CURSOS E CONGRESOS

A comunidade educativa da Universidade de Vigo ten ao seu dispor cursos para mellorar o dominio da lingua galega

A Área de Normalización Lingüística da Universidade de Vigo convoca, para o primeiro cuadrimestre do curso 2022-2023, seis cursos de temáticas diversas: iniciación á lingua galega para o alumnado estranxeiro, outro de nivel avanzado para perfeccionar o dominio da lingua, outro para mellorar a calidade lingüística nos TFG ou TFM, un sobre corrección da escrita coas TIC, outro de linguaxe administrativa e xurídica e un sexto que xirará arredor dos erros máis frecuentes na lingua galega.

Estes cursos están abertos tanto ao persoal docente e investigador, como ao persoal de administración e servizos e o estudantado. O prazo de matrícula remata o 23 de setembro. Máis información aquí.
19/09/2022. CURSOS E CONGRESOS

Curso de habilidades comunicativas na USC

O Servizo de Normalización Lingüística da USC abre a matrícula da 1ª convocatoria do seu Curso de Habilidades Comunicativas para o período lectivo 2022-2023. O curso diríxese a alumnado que prepara o seu TFG, TFM ou tese e pode cursarse íntegro ou por módulos: A redacción científica, Falar en público e Presentacións eficientes.

Máis información sobre o contido e a inscrición na súa páxina web.
14/09/2022. CURSOS E CONGRESOS

Segunda edición da Aula Aberta de Educación da Universidade de Vigo

A Facultade de Educación e Traballo Social do campus de Ourense continúa coa proposta Aula Aberta de Educación, un programa posto en marcha o curso pasado co dobre obxectivo de fomentar o uso do galego e a reflexión crítica sobre temas de interese social.

Por unha parte, este espazo contribúe a desenvolver o plan de normalización do uso da lingua galega que ten a Facultade de Educación e Traballo Social nos seus graos de Educación Infantil e de Educación Primaria. Pola outra, pon o foco en aspectos moitas veces invisibilizados na sociedade que, como futuros educadores e educadoras, o alumnado da facultade vai atopar nas aulas.

Podes consultar o programa e as datas das sesións premendo aquí.
12/09/2022. CURSOS E CONGRESOS

Curso sobre márketing e as potencialidades do idioma como elemento diferenciador

A Coordinadora de Traballadores/as de Normalización da Lingua organiza o curso "Fundamentos de márketing e comunicación. O idioma como elemento diferenciador", dirixido especialmente a técnicos/as de SNL; docentes ou responsables de EDNLG; traballadores/as de empresas, asociacións e outras entidades relacionadas coa normalización da lingua; e, en xeral, persoas interesadas en traballar na normalización do galego. O curso, impartido por Xosé Luís Reza, terá lugar en Santiago de Compostela os días 29 de setembro e 6 de outubro de 2022. O prazo de inscrición remata o vindeiro 25 de setembro. Podes ampliar información sobre os contidos e mais os trámites de inscrición premendo aquí.
09/09/2022. CURSOS E CONGRESOS

I Xornadas Vasco-Galegas de Lingüística

O Instituto da Lingua Galega, o Centro Ramón Piñeiro para a Investigación en Humanidades, Euskaltzaindia e a Real Academia Galega organizan estas xornadas académicas que poñen o foco en diferentes cuestións da lingüística galega e vasca. As sesións terán lugar o vindeiro luns, 12 de setembro de 2022, na Facultade de Filoloxía da Universidade de Santiago de Compostela. A asistencia é libre. Podes consultar o programa premendo aquí.
05/09/2022. CURSOS E CONGRESOS

Xornada de análise sobre a nova Lei do Audiovisual

O Grupo de Estudos Audiovisuais da USC organiza, coa colaboración da Mesa pola Normalización Lingüística, organiza as xornadas "Perante a nova Lei do Audiovisual: análise e perspectivas", onde se analizarán as repercusións que esta lei terá no tecido cinematográfico e audiovisual galego dende a óptica cultural, lingüística e económica. As sesións desenvolveranse o vindeiro 15 de setembro de 2022 no Auditorio da Facultade de Ciencias da Comunicación da USC. A asistencia é de balde, sen necesidade de inscrición previa. Podes obter máis información sobre esta iniciativa, así como consultar o programa completo da xornada, premendo aquí.

01/09/2022. CURSOS E CONGRESOS

Obradoiro de acollemento lingüístico en Santiago de Compostela

O Departamento de Lingua Galega do Concello de Santiago de Compostela organiza un novo obradoiro de acollemento lingüístico, dirixido principalmente a persoas adultas procedentes doutras comunidades lingüísticas, mais aberto a calquera persoa que queira iniciarse na aprendizaxe do galego. O curso, de 36 horas de duración, estrutúrase en 24 sesións presenciais de hora e media cada unha, que terán lugar todos os luns e mércores entre o 21 de setembro e o 14 de decembro de 2022. Podes obter máis información sobre os trámites de inscrición premendo aquí.
01/09/2022. CURSOS E CONGRESOS

Formación lingüística para o persoal dos entes instrumentais do sector público autonómico

A Escola Galega de Administración Pública anuncia a convocatoria de actividades de formación continua para o persoal ao servizo dos entes instrumentais do sector público autonómico. No que respecta á formación de carácter lingüístico, ofértanse os seguintes cursos: “A calidade da redacción administrativa. Técnicas para unha boa redacción dos documentos administrativos” (teleformación); “A normativa do galego estándar: actualización gramatical, ortográfica e léxica” (teleformación e telepresenza); “Redacción de documentos técnico-xurídicos en galego” (teleformación); “Técnicas para falar en público” (presencial). O prazo de presentación de solicitudes comeza o día seguinte ao da publicación da convocatoria no DOG e remata o 12 de setembro de 2022. Para consultar o texto completo da convocatoria, preme aquí.
29/08/2022. CURSOS E CONGRESOS

Cursos Celga e de linguaxe administrativa nas escolas oficiais de idiomas


A Consellería de Cultura, Educación, Formación Profesional e Universidades convoca cursos de linguaxe administrativa galega (niveis medio e superior en liña) e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2022/2023. Os cursos de linguaxe administrativa están dirixidos a empregados/as públicos/as das administracións autonómica e local galegas, e da Administración periférica do Estado en Galicia, exceptuando o persoal docente e sanitario. Aos cursos preparatorios dos Celga poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 1 ata o 10 de setembro de 2022, para os cursos do primeiro cuadrimestre; e desde o 3 ata o 13 de xaneiro de 2023, para os cursos do segundo cuadrimestre. Para consultar o texto completo da convocatoria, preme aquí.
29/07/2022. CURSOS E CONGRESOS

III Encontro da mocidade investigadora en ciencias farmacéuticas

O 20 de outubro, a Facultade de Farmacia da USC acollerá o III Encontro da mocidade investigadora en ciencias farmacéuticas, unha xornada organizada pola Comisión de Normalización Lingüística e Difusión Cultural da propia Facultade.

Para participar en calquera das tres modalidades, flash, oral ou póster, a data límite de entrega de resumos é o 30 de setembro. A aceptación de comunicacións darase a coñecer o 7 de outubro. Toda a información, na web do Servizo de Normalización Lingüística da USC.
28/07/2022. CURSOS E CONGRESOS

Aprende en galego o que queiras "Na Utopía"

Vén de crearse a plataforma de cursos en liña Na Utopía, unha proposta para a autoaprendizaxe en lingua galega a través de materiais audiovisuais de calidade preparados por profesionais acreditados.

A oferta abrangue ámbitos creativos, técnicos ou divulgativos moi diversos, co propósito de unir o idioma aos intereses das persoas, sobre todo da xente máis nova, desmontando tópicos sobre o seu uso.
13/07/2022. CURSOS E CONGRESOS

VII Xornada de Onomástica Galega

A Real Academia Galega, coa colaboración da Deputación Provincial de Pontevedra e o Museo de Pontevedra, organiza a sétima edición da Xornada de Onomástica Galega, que nesta ocasión terá como fío condutor a onomástica literaria, que estuda a función e a significación dos nomes propios na literatura. A xornada terá lugar o 15 de outubro de 2022 no Museo de Pontevedra, e tamén será emitida en directo a través do sitio web institucional da RAG. O prazo de inscrición remata o 12 de outubro. Podes consultar o programa completo premendo aquí.
05/07/2022. CURSOS E CONGRESOS

Congreso Internacional de Toponimia no Camiño de Santiago

A Real Academia Galega organiza, coa colaboración do Instituto da Lingua Galega e a Asociación Galega de Onomástica, un congreso internacional de toponimia no que o camiño de Santiago será o fío condutor dos diferentes relatorios. As sesións terán lugar os días 21, 22 e 23 de setembro de 2022 na Facultade de Filoloxía da Universidade de Santiago de Compostela. A matrícula é gratuíta. Para consultar o programa completo do congreso e obter máis información sobre os trámites de inscrición, preme aquí.
30/06/2022. CURSOS E CONGRESOS

Obradoiro de regueifa en vídeo

O Servizo de Normalización Lingüística do Concello de Vigo difunde na súa páxina web unha serie de pezas audiovisuais de carácter didáctico sobre a regueifa, unha técnica de improvisación en verso característica da nosa tradición oral. Nos vídeos, dirixidos a alumnado de ensino secundario, Luís “O Caruncho” e Pinto D´Herbón explícannos a historia da regueifa e as súas características técnicas, e ensínannos a facer as coplas (coas súas características métricas e recursos da improvisación).

Para acceder ao obradoiro en liña preme aquí.

15/06/2022. CURSOS E CONGRESOS

Curso de verán "Tecnoloxías da linguaxe: as linguas na sociedade e na economía dixitais"

O Centro Singular de Investigación en Tecnoloxías Intelixentes (CiTIUS) e o Instituto da Lingua Galega da Universidade de Santiago de Compostela organizan un curso de verán que ten como obxectivo divulgar as múltiples posibilidades que ofrecen as tecnoloxías da linguaxe para a creación de aplicacións e servizos de uso cotián baseados nas linguas. As sesións terán lugar entre o 12 e o 15 de xullo de 2022, na sede da Escola Técnica Superior de Enxeñaría da USC, en Santiago de Compostela. O prazo de matrícula estará aberto ata o 1 de xullo. Para coñecer o programa completo do curso ou obter máis información sobre a iniciativa, preme aquí.
07/06/2022. CURSOS E CONGRESOS

Cursos de linguaxe administrativa galega para o persoal da seguridade pública

A Academia Galega de Seguridade Pública convoca un curso superior e dous cursos medios de linguaxe administrativa galega, dirixidos a policías locais de Galicia e demais persoal da seguridade pública que traballa nesta Comunidade Autónoma (Garda Civil, Policía Nacional e Unidade da Policía Autonómica). O prazo de presentación de solicitudes remata o 23 de xuño de 2022. Para consultar o texto completo da convocatoria, preme aquí.
03/06/2022. CURSOS E CONGRESOS

Xornada "Aquí medra a lingua. Experiencias de dinamización do galego no ensino"

O luns 13 de xuño de 2022, o Consello da Cultura Galega organiza a xornada "Aquí medra a lingua. Experiencias de dinamización do galego no ensino". Trátase da presentación dun documental producido a partir da serie de audiovisuais realizados co mesmo nome sobre seis proxectos de centros escolares de Galicia. O encontro servirá tamén para a reflexión sobre prácticas, metodoloxías e formas de avanzar na normalización lingüística desde o ámbito educativo.

Xa está aberta a inscrición. As prazas son limitadas.
03/06/2022. CURSOS E CONGRESOS

Nova edición de 'Conexões', encontro da mocidade dos territorios lusófonos

O 17 de xuño de 2022 vai ter lugar na Casa da lusofonía de Vigo un novo colóquio entre xente nova de oito territorios de fala portuguesa ou lusófona. O obxectivo é dinamizar o intercambio lingüístico e cultural para afortalar o coñecemento mutuo entre as diversas comunidades que os integran.

A iniciativa parte da Juventude Unida dos Países de Lingua Portuguesa e nela participa unha representación de Galicia, que se uniu ao proxecto en novembro de 2021.
03/05/2022. CURSOS E CONGRESOS

Facer xornalismo en galego. É posible

A reflexión sobre a lingua galega e os medios de comunicación vai centrar a segunda mesa da xornada "Censuras e silencios nos medios de comunicación", unha actividade do Consello da Cultura Galega que terá lugar este xoves, 5 de maio. No debate participan Luís Álvarez Pousa, director da revista Tempos Novos, Víctor Freixanes, xornalista e presidente da Real Academia Galega, e María Obelleiro, directora de Nós Diario. Accede ao programa completo e á ficha de inscrición aquí.
22/04/2022. CURSOS E CONGRESOS

Ferramentas para mellorar a comunicación nas redes sociais

O Centro de Terminoloxía TERMCAT e Realiter presentan unha nova edición ampliada do seu Vocabulario de redes sociais, con 173 termos e as denominacións equivalentes en seis linguas románicas (catalán, castelán -variantes de Europa e de México-, francés, galego, italiano e portugués -variantes de Europa e do Brasil). O Servizo de Normalización Lingüística da USC contribuíu coas propostas de nomes en galego para os novos conceptos. Este mesmo SNL e a Comisión de Normalización Lingüística da Facultade de Ciencias da Comunicación da USC organizan o obradoiro "Escribir para as redes sociais", dirixido ao alumnado dos graos de Comunicación Audiovisual e Xornalismo. As sesións terán lugar os días 3, 4, 9 e 10 de maio do 2022 e o prazo de inscrición remata o vindeiro 30 de abril.

29/03/2022. CURSOS E CONGRESOS

XXXI Xornadas de Lingua e Literatura

A Asociación Socio-Pedagóxica Galega e a CIG-Ensino organizan unha nova edición das Xornadas de Lingua e Literatura co obxectivo de ofrecer ferramentas didácticas útiles para a docencia da lingua e a literatura galegas, así como reflexionar sobre o proceso de normalización lingüística no ámbito do ensino. A xornada, dirixida ao colectivo de profesorado non universitario de Galicia, terá lugar o 23 de abril de 2022 no IES As Fontiñas (Santiago de Compostela). O prazo de matrícula remata o 22 de abril.
29/03/2022. CURSOS E CONGRESOS

A Deputación de Pontevedra convoca un curso de linguaxe administrativa

A Deputación de Pontevedra convoca, ao abeiro do Plan agrupado de formación continua para o ano 2022, un curso de linguaxe administrativa galega (nivel medio), dirixido ao persoal ao servizo desta deputación provincial así como ao persoal dos concellos da provincia adheridos a este plan formativo. O prazo de inscrición comezará a partir do día seguinte ao da publicación das bases no BOP de Pontevedra e rematará 20 días antes do comezo da acción formativa.
21/03/2022. CURSOS E CONGRESOS

II xornadas a sobre lingua galega e a filosofía na USC

A Comisión de Cultura e Normalización Lingüística da Facultade de Filosofía da USC organiza a segunda edición das súas Xornadas de Normalización Lingüística, co propósito de promover unha reflexión sobre as accións precisas para normalizar o uso da lingua galega na creación filosófica e na docencia. As sesións, que terán lugar os días 28 de marzo e 4 de abril, poden seguirse de balde a través de Zoom ou ben inscribíndose na Secretaría Virtual da Universidade ata o 28 de marzo.
14/03/2022. CURSOS E CONGRESOS

Obradoiro de apoderamento lingüístico na USC

A Comisión de Normalización Lingüística da Facultade de Formación do Profesorado da USC, co apoio do Servizo de Normalización Lingüística, organiza un Obradoiro de apoderamento lingüístico. Consta de dúas sesións teórico-prácticas centradas na introdución de chaves para “a comprensión do actual escenario de conflito lingüístico” e “na procura de novas iniciativas coas que reforzar o galego no e a través do ensino”. O obradoiro está dirixido, de xeito preferente, ao estudantado da materia Educación e linguas en Galicia, ao alumnado dos graos en Mestre/a en Educación Infantil e Mestre/a en Educación Primaria.Conta con 30 prazas e o prazo de inscrición remata o 24 de marzo. A matrícula pode formalizarse nesta ligazón.