Novas da lingua. AXUDAS E PREMIOS

Rexistros31 a 60 de 835
06/11/2023. AXUDAS E PREMIOS

Resoltos os Premios á Calidade Lingüística da USC

A Universidade de Santiago de Compostela publica a listaxe de estudantes recoñecidos pola calidade lingüística dos seus traballos de curso de grao, fin de grao e fin de mestrado, ao abeiro do premio organizado polo Servizo de Normalización Lingüística da Universidade e que cumpre xa a súa decimonovena edición.

Aos Premios presentáronse un total de 101 propostas. Podes consultar toda a información na acta do xurado.
03/11/2023. AXUDAS E PREMIOS

Premio Ramón Piñeiro Facer País para a cantautora Sés

A Asociación Val de Láncara outorgou a María Xosé Silvar, Sés, o XXI Premio Ramón Piñeiro Facer País, recoñecendo así o labor a prol da lingua e da cultura galega que realiza a través da súa música.

En palabras da secretaria da asociación: "É unha muller que pisa forte sobre os escenarios, moi fiel ás súas ideas que, sen se cinguir a un estilo concreto, mestura ritmos pero sempre en galego e a atender á identidade do pobo". Podes comprobalo navegando pola súa discografía.

03/11/2023. AXUDAS E PREMIOS

Resolución das axudas a publicacións periódicas en galego

A Secretaría Xeral de Medios da Xunta de Galicia publica a resolución da convocatoria de subvencións para o ano 2023 destinadas a empresas que realizan publicacións periódicas escritas integramente en galego.

Podes consultar a listaxe de empresas beneficiarias premendo aquí.
27/10/2023. AXUDAS E PREMIOS

Resólvense os Premios San Martiño de Normalización Lingüística 2023

O Padroado dos Premios San Martiño de Normalización Lingüística fixo públicos os/as galardoados/as da súa trixésimo segunda edición. Na categoría “Comarca de Tabeirós-Terra de Montes”, o premio foi para a Pastelería Mimela, xestionada por Antonio Sanmartín Chao. Na categoría “Galicia enteira” recibe o premio desta edición o programa da Televisión de Galicia (TVG) Dígocho eu. Por último, o obradoiro de gaitas García de Riobó foi o galardoado na categoría “Toda unha vida”.

O acto de entrega destes premios que promove o Concello da Estrada, terá lugar o 15 de novembro, ás 20:30 h, no Teatro Principal da Estrada.
27/10/2023. AXUDAS E PREMIOS

Resolución provisional das axudas da Deputación da Coruña para o audiovisual en galego

A Deputación da Coruña publica a resolución pola que se aproban de xeito provisional as subvencións para a distribución, comercialización e exhibición audiovisual en lingua galga na provincia da Coruña durante o ano 2023.

A partir do día seguinte ao da publicación desta resolución, abrirase un prazo de 10 días hábiles para que os solicitantes poidan comunicar, se é o caso, a desistencia da solicitude, presentar solicitude de reformulación, alegacións ou emenda de erros. [Ver a resolución definitiva].
20/10/2023. AXUDAS E PREMIOS

Axuntar premia a Rodrigo Cuevas pola súa defensa do galego

A Xunta Directiva de Axuntar, asociación prá normalización del galego de Asturias, acordou o pasado mes de setembro crear os Premios Folgueira, co ánimo de recoñecer publicamente as persoas, institucións ou iniciativas que traballan a prol da dignificación do galego en Asturias. Nesta primeira edición, o galardoado co Premio Folgueira 2023 foi o artista multidisciplinar Rodrigo Cuevas. Así mesmo, Axuntar acordou premiar na categoría Folgueira Dixital a Juan Carlos Riopedre Villa, responsable do equipo informático que elaborou o sitio web axuntar.eu; e recoñecer como Socio de Honor a Benigno Fernández Braña.

Os galardóns entregaranse o vindeiro 28 de outubro de 2023 na Casa da Cultura de Boal, ás 16:00 h, no transcurso do acto público de presentación do II Informe sobre a lingua del Eo-Navia. Bilingüismo en Asturias.

Podes obter máis información sobre esta iniciativa premendo aquí.
18/10/2023. AXUDAS E PREMIOS

Premio da Cultura Galega para Ponte... nas ondas! e para os Cursos de Verán Galego sen Fronteiras

O xurado dos Premios da Cultura Galega fixo públicas as persoas, colectivos ou iniciativas que son recoñecidas este ano 2023 polo seu labor no ámbito da creación, conservación e difusión cultural. Nesta edición a entidade galardoada na categoría de Lingua foi Ponte... nas ondas!, unha iniciativa transfronteiriza que promove o
intercambio lingüístico entre centros educativos da Eurorrexión Galicia – Norte de Portugal. Así mesmo, tamén resultaron galardoados os Cursos de Verán Galego sen Fronteiras, organizados pola Real Academia Galega desde 1988, na categoría de Proxección Exterior.

Nas restantes categorías, os/as premiados/as son Yolanda Castaño (Letras), o Museo do Gravado á Estampa Dixital (Artes Visuais), PistaCatro (Artes Escénicas), a Banda de Música Unión de Guláns (música), a produtora Portocabo (Audiovisual) e Eduardo Pardo de Guevara (Patrimonio Cultural).

Para ampliar esta información, preme aquí.
18/10/2023. AXUDAS E PREMIOS

Resólvense as axudas para a tradución do libro galego

A Consellería de Cultura, Educación, Formación Profesional e Universidades publica, no DOG do 17 de outubro de 2023, a listaxe de entidades beneficiarias das axudas dirixidas á tradución para outras linguas de obras publicadas orixinariamente en galego e á tradución para o galego de obras publicadas orixinariamente noutras linguas.

Podes consultar o texto completo da resolución premendo aquí.
11/10/2023. AXUDAS E PREMIOS

A Deputación da Coruña publica as bases que rexerán as axudas aos SNL municipais en 2024

A Deputación da Coruña publica as bases reguladoras da convocatoria de subvencións dirixidas aos concellos, agrupacións de concellos, mancomunidades e outras entidades locais da provincia da Coruña para a creación, mantemento e reforzo dos servizos de normalización lingüística durante o ano 2024.

Poderán participar todos os concellos da provincia da Coruña de 5000 ou máis habitantes, ou agrupacións de concellos e mancomunidades que, entre eles, cheguen a esa cifra mínima. Así mesmo, tamén poden solicitar as axudas os concellos da Coruña, Santiago de Compostela e Ferrol, mais unicamente para persoal técnico de reforzo do SNL xa creado.

O prazo de presentación de solicitudes remata o 21 de novembro de 2023 ás 14:00 horas, segundo se recolle no anuncio do extracto da convocatoria que se publica no BOP do 18 de outubro, por conduto da Base de Datos Nacional de Subvencións.
05/10/2023. AXUDAS E PREMIOS

Música e poesía galego-portuguesas na gala ari[t]mar 2023

O vindeiro 10 de outubro, a partir das 20:30 horas, terá lugar no Auditorio de Galicia de Santiago de Compostela, a gala ari[t]mar 2023, na que se fará entrega dos premios da música e da poesía galego-portuguesas. Os galardoados desta edición son Fillas de Cassandra, Retimbrar, Arancha Nogueira, Maria Isabel Fidalgo e a Associação José Afonso.

A cerimonia, de entrada libre ata completar o aforo, contará coas actuacións musicais do dúo vigués Fillas de Cassandra e os portuenses Retimbrar.

Ari[t]mar é un proxecto didáctico e cultural organizado polo Equipo de Dinamización da Lingua Galega da EOI de Santiago, en colaboración cos Departamentos de Galego e de Portugués da escola. O seu obxectivo é divulgar a música e a poesía galego-portuguesas actuais, e achegar a cultura e a lingua dos dous países, no marco do desenvolvemento da Lei Valentín Paz-Andrade.
02/10/2023. AXUDAS E PREMIOS

A CTNL convoca os V Premios Mil Primaveras

A Coordinadora de Traballadores/as de Normalización da Lingua (CTNL) convoca a quinta edición dos Premios Mil Primaveras, co obxectivo de recoñecer e difundir exemplos de boas prácticas no ámbito da normalización lingüística. Poden optar a estes galardóns as accións, campañas, programas e proxectos que teñan como obxectivo principal fomentar a lingua e incrementar o seu uso e/ou prestixio e que foran desenvolvidos total ou parcialmente en 2020, 2021, 2022 ou 2023.
O prazo para a inscrición dos proxectos, que debe ser realizada pola propia entidade ou persoa organizadora da iniciativa, remata o 31 de xaneiro de 2024.

Para consultar o texto completo das bases da convocatoria, ou obter máis información sobre esta iniciativa, preme aquí.
02/10/2023. AXUDAS E PREMIOS

“O Corno”, un filme rodado en galego, obtén a Cuncha de Ouro en San Sebastián

O xurado da 71 edición do Festival de Cine de San Sebastián outorgou a Cuncha de Ouro, o seu máximo galardón, a “O corno”, unha longametraxe rodada en galego; escrita e dirixida por Jaione Camborda. Este premio constitúe un fito histórico tanto para o audiovisual en lingua galega, como para o audiovisual dirixido por mulleres. Por un lado, “O corno” convértese no primeiro filme rodado en galego que é premiado nun certame internacional de clase A e, ao mesmo tempo, a cineasta Jaione Camborda é a primeira directora española que consegue a Cuncha de Ouro no Festival de Cine de San Sebastián.

"O corno" está ambientada na Illa de Arousa en 1971 e conta a historia de María, unha muller que traballa como mariscadora pero tamén é coñecida polo seu labor de parteira.

A película poderá verse nas salas de cine a partir do vindeiro 11 de outubro.
29/09/2023. AXUDAS E PREMIOS

VI Premio Lingua e Empresa do Concello de Ames

O Servizo de Normalización Lingüística do Concello de Ames publica as bases da sexta edición do Premio Lingua e Empresa, que ten como obxectivo fomentar o uso do galego na actividade económica municipal e recoñecer publicamente a contribución do sector empresarial no incremento do uso social da lingua. O certame inclúe dúas categorías: unha para aquelas entidades que veñen realizando un uso continuado da lingua galega desde hai máis de dous anos, e outra para as que incorporaron o galego nos últimos dous anos. Na valoración das candidaturas terase en conta a utilización do galego na comunicación interna e externa, tanto oralmente como por escrito, medindo o impacto que a actividade da empresa poida ter en sectores especialmente relevantes para o proceso de normalización lingüística.

O prazo de presentación de candidaturas remata o 26 de outubro de 2023.

Na páxina web do Concello de Ames tes toda a información sobre os trámites necesarios para a presentación das candidaturas.
22/09/2023. AXUDAS E PREMIOS

Chega Youtubeiras 2023 reivindicando unha rede en galego aberta e diversa

Nove concellos galegos, a Deputación da Coruña e as universidades da Coruña, Santiago de Compostela e Vigo presentan as bases dos Premios Youtubeiras 2023, un certame deseñado para fomentar a produción de contidos en galego en Internet e darlle visibilidade á comunidade youtubeira. Poden optar a estes premios todas as persoas maiores de 14 anos con canles de YouTube autoproducidas. As canles deben ter a maioría dos seus vídeos en galego e, como mínimo, un deles subido a partir do 15 de novembro do 2022 co cancelo #youtubeiras, sen restricións de privacidade. Os títulos, as descricións e os subtítulos permanentes (de habelos) teñen que estar en galego. O xurado outorgará 8 premios: 7 deles valorados en 1000 € e un en 500 €.

O prazo de inscrición das canles remata o 17 de novembro de 2023.

Na páxina web do proxecto podes consultar as bases completas desta sétima edición, visitar os recusos formativos que hai dispoñibles en liña e coñecer as canles gañadoras da pasada edición de 2022.

11/09/2023. AXUDAS E PREMIOS

Resólvense os Premios Bacelos de Prata 2023

A Asociación Álvaro das Casas fixo públicos os galardoados da décimo quinta edición dos Premios Bacelos de Prata, que teñen como obxectivo recoñecer o labor de empresas que apostan polo galego como marca de calidade na etiquetaxe dos seus produtos. As entidades galardoadas nesta edición de 2023 son a Adega Tapias Mariñán, da denominación de orixe Monterrei; e a sociedade de gandeiros galegos Leite Noso, comercializadora de marcas como Deleite ou Muuu.

Podes consultar a acta do xurado premendo aquí.

O acto de entrega dos premios terá lugar o 7 de outubro de 2023, no Pazo dos Ulloa (Esposende, Ribadavia).
06/09/2023. AXUDAS E PREMIOS

Bernardo Penabade, Premio Meendinho 2023

O vindeiro sábado, 9 de setembro, terá lugar o acto público de entrega do Premio Meendinho 2023, un galardón que outorga anualmente a Fundaçom Meendinho a persoas e entidades que destacan no eido da dinamización cultural e lingüística, tendo en conta a dimensión internacional do idioma galego. O homenaxeado nesta décimo cuarta edición é Bernardo Penabade Rei, docente no IES Perdouro de Burela. Entre os moitos méritos que o fan merecente do galardón, a Fundaçom Meendinho destaca o seu traballo no eido do reintegracionismo e tamén o feito de ter sido un dos principais impulsores do Modelo Burela, un proxecto de intervención educativa e sociolingüística que botou a andar en 2003 e que recolleu xa múltiples recoñecementos e galardóns.

O acto terá lugar a partir das 12:00 h na sala “A Arca da Noe”, en Vilar de Santos.

No xornal Cronica3 A Mariña atoparás máis información sobre a iniciativa, así como un perfil biográfico do homenaxeado.
01/09/2023. AXUDAS E PREMIOS

V Premio Daniel Domínguez de Guión en Galego para Longametraxe

A Asociación Sindical de Guionistas Galegos (AGAG) convoca a quinta edición deste premio deseñado para potenciar a lingua galega no audiovisual e promover os autores e autoras que escriben no noso idioma. Os guións presentados deberán estar escritos en lingua galega, ser orixinais e inéditos, e estar elaborados para longametraxes de ficción. O/a autor/a do guión gañador recibirá un premio cunha dotación económica de 2.000 euros.
O prazo de presentación dos traballos remata o 1 de novembro de 2023.

Podes obter máis información premendo aquí.
01/09/2023. AXUDAS E PREMIOS

Axudas á investigación en galego na Universidade de Vigo

A Universidade de Vigo publica unha convocatoria de axudas, dirixidas ao seu alumnado, para incentivar o uso do galego nas teses de doutoramento, nos traballos de fin de grao e nos traballos de fin de mestrado universitario oficial, así como para premiar a calidade lingüística nestes traballos de investigación. As persoas interesadas en redactaren e defenderen a tese de doutoramento, TFG ou TFM oficial en lingua galega contan co apoio lingüístico e asesoramento da Área de Normalización Lingüística da UVigo.
O prazo de presentación das solicitudes para optar a estas axudas remata o 15 de setembro de 2023.

Para consultar o texto completo da convocatoria, preme aquí. Tamén podes obter máis información sobre esta iniciativa no Diario da Universidade de Vigo.
31/08/2023. AXUDAS E PREMIOS

Agadic convoca novas axudas para o audiovisual galego

A Axencia Galega das Industrias Culturais (Agadic) convoca unha liña de axudas para o desenvolvemento de proxectos audiovisuais galegos para o ano 2023, na que estarían incluídos aqueles en versión orixinal en lingua galega. En concreto, serán subvencionables: Proxectos de longametraxe cinematográfica previstos para ter unha duración mínima de 60 minutos, de ficción, animación ou documental de carácter creativo; Proxectos de series de ficción previstos para ter unha duración total mínima de 150 minutos; Proxectos de series de animación previstos para ter unha duración total mínima de 100 minutos; e Proxectos de series documentais previstos para ter unha duración total mínima de 100 minutos.
Entre os requisitos esixidos sinálase que os proxectos deben ter como versión orixinal calquera das linguas oficiais en España. No caso das coproducións con empresas estranxeiras, a longametraxe poderá ter como versión orixinal algunha das linguas oficiais da Unión Europea.

O prazo de presentación de solicitudes remata o 11 de setembro de 2023.

No DOG do 9 de agosto podes consultar o texto completo da convocatoria.
[modificación das bases no DOG do 1 de setembro]
31/08/2023. AXUDAS E PREMIOS

Resolución das axudas para a edición en galego de recursos didácticos

A Consellería de Cultura, Educación, Formación Profesional e Universidades publica a resolución da convocatoria para o ano 2023 de subvencións destinadas á edición en lingua galega de recursos didácticos curriculares e complementarios para os niveis non universitarios.

Podes consultar a listaxe de entidades beneficiarias premendo aquí.

11/07/2023. AXUDAS E PREMIOS

Resolución das axudas para o fomento do galego nos centros de ensino privados

A Consellería de Cultura, Educación, Formación Profesional e Universidades publica a resolución da convocatoria de subvencións, dirixidas a centros de ensino non universitario de titularidade privada, para proxectos de fomento do galego durante o curso escolar 2022/2023.

Podes consultar a listaxe de centros beneficiarios premendo aquí.
10/07/2023. AXUDAS E PREMIOS

Entrega oficial dos premios do VI Concurso de microrrelatos organizado pola RAG e PuntoGal

Hoxe, 10 de xullo de 2023, terá lugar ás 17:30 h, na Fundación Luis Seoane (A Coruña), o acto de entrega de premios do VI Concurso de microrrelatos organizado pola Real Academia Galega e a asociación PuntoGal, en colaboración coa revista Luzes. A entrada é libre ata completar a capacidade do auditorio.

Os/as autores/as dos nove relatos gañadores son Nel Vidal Barral, Nada Misa, Mónica Fraga Rodríguez, Andrea Bravo López, Mencía Jorge Cabaleiro, Beatriz Martínez García, Ainhoa Valverde Silva, Arwen Fernández García e Mai Lemmen.

Na páxina web da RAG xa está accesible a publicación cos relatos gañadores desta edición.
06/07/2023. AXUDAS E PREMIOS

Xa están na rede os traballos gañadores do “Nós tamén creamos! 2023”

A Secretaría Xeral de Política Lingüística e a Dirección Xeral de Ordenación e Innovación Educativa da Xunta de Galicia fixeron pública a resolución da XI edición de Nós tamén creamos!, un certame que ten como obxectivo fomentar a creatividade en galego e o uso das TIC entre o alumnado de educación infantil e primaria. Nesta edición recibiron o 1º premio os seguintes traballos: Tonino. Un pingüín en Ames (EEI do Milladoiro, Ames), O cascabel da gata (CEIP Plurilingüe Feliciano Barrera, Ponteareas) e Sígueme (CEIP Padre Feijoo, Allariz). Así mesmo, foron recoñecidos cun accesit: Non fai falta a voz (CEE A Barcia, Santiago de Compostela), A princesa do Caurel (CEIP A Canicouva, Vigo) e A Princesa do Caurel (CEIP Plurilingüe Virxe do Carme, Sober).

Podes ampliar información sobre esta iniciativa premendo aquí.
05/07/2023. AXUDAS E PREMIOS

Resolución das axudas da Xunta de Galicia aos concellos para a promoción do galego

A Secretaría Xeral de Política Lingüística da Xunta de Galicia publica a resolución das subvencións ás entidades locais para o ano 2023, destinadas á creación, mantemento ou reforzamento dos seus servizos de normalización lingüística; así como ao desenvolvemento de programas de dinamización lingüística. Podes consultar a listaxe de entidades beneficiarias premendo aquí.
30/06/2023. AXUDAS E PREMIOS

Resólvese a convocatoria para a realización de proxectos de innovación educativa en dinamización lingüística

A Secretaría Xeral de Política Lingüística e a Dirección Xeral de Ordenación e Innovación Educativa da Xunta de Galicia resolveron a convocatoria para a realización de proxectos de innovación educativa en dinamización lingüística durante o curso académico 2022/2023, dirixida a centros de ensino de titularidade pública. Os cinco proxectos aos que se lle outorgou a consideración de excelentes, e polo tanto recibirán unha dotación económica de 2.000 euros, son: "A literatura galega a escena", do IES Martaguisela (O Barco de Valdeorras); “3,2,1... Acción!”, do CEIP Plurilingüe de Reboreda (Redondela); “Rachando roles”, do CIFP Rodolfo Ucha Piñeiro (Ferrol), o IES Ricardo Carvalho Calero (Ferrol) e o CEIP A Solaina (Narón); “Luces, cámara... A falar!”, do IES Ramón Cabanillas (Cambados); e “Musigalíza-te”, do CPI Plurilingüe Antonio Orza Couto (Boqueixón). A maiores, recibiu tamén unha Mención de Honra o proxecto "Comer e ler en galego", do CIFP Paseo das Pontes (A Coruña). Todos estes proxectos serán difundidos na páxina web da Secretaría Xeral de Política Lingüística.

Podes consultar o texto completo da resolución premendo aquí.
27/06/2023. AXUDAS E PREMIOS

A Deputación de Pontevedra publica as axudas concedidas aos concellos para a promoción do galego

A Deputación de Pontevedra publica, no BOP do 27 de xuño de 2023, a resolución das axudas concedidas durante o primeiro semestre deste ano a diferentes concellos da provincia de Pontevedra para o mantemento de servizos de normalización lingüística, así como para o desenvolvemento de actividades de dinamización e promoción do idioma galego.
Podes consultar a listaxe de entidades beneficiarias premendo aquí.

26/06/2023. AXUDAS E PREMIOS

Luís Davila recibe o Premio Trasalba 2023

Por primeira vez, a Fundación Otero Pedrayo outorgou o Premio Trasalba a un ilustrador, pintor e viñetista. Trátase de Luís Davila, o Bichero, que ve recoñecida, deste xeito, a "súa implicación coa defensa da nosa lingua e a nosa cultura a través do humor e dunhas mensaxes moi próximas á sociedade galega", un referente na reivindicación sociolingüística.

A laudatio, nun acto organizado na Casa Grande de Cimadevila, correspondeulle a Carlos Blanco, amigo e compañeiro de Davila na súa faceta de creador de espectáculos teatrais.
22/06/2023. AXUDAS E PREMIOS

Margarita Ledo, Premio Luís Porteiro Garea 2023

O xurado do VI Premio Luís Porteiro Garea acordou por unanimidade outorgar este galardón a Margarita Ledo Andión, promotora da creación da actual Facultade de Ciencias da Comunicación da USC, da que foi a súa primeira decana no período de 1992 a 1996. O xurado pon de relevo o seu compromiso “incuestionable coa lingua galega”, que “atravesa de parte a parte a súa traxectoria vital e profesional”. A entrega pública do premio terá lugar o 29 de setembro de 2023 no Paraninfo da USC.

O premio Luís Porteiro Garea, que leva o nome do profesor de dereito civil e membro das Irmandades da Fala que en 1915 pronunciou a primeira lección en galego na USC, ten como finalidade recoñecer o traballo de persoas, entidades ou colectivos que traballan, ou traballaron, a prol do galego na universidade.

No Xornal da USC atoparás máis información sobre esta iniciativa.
22/06/2023. AXUDAS E PREMIOS

Axudas para a tradución do libro galego

A Consellería de Cultura, Educación, Formación Profesional e Universidades da Xunta de Galicia publica a convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas. O prazo de presentación de solicitudes é dun mes, contado a partir do día seguinte ao da publicación da convocatoria.

20/06/2023. AXUDAS E PREMIOS

A UVigo recoñecerá co distintivo “Gal Ego” os centros que promovan o noso idioma

A partir do vindeiro curso 2023-2024, a Universidade de Vigo recoñecerá co distintivo de galeguización “Gal Ego” a facultade ou escola universitaria que máis promova o emprego do galego. O recoñecemento outorgarase a través dunha convocatoria pública anual e os distintivos outorgados terán unha vixencia de catro anos. Ademais dunha insignia deseñada para a exposición pública, os centros que obteñan o "Gal Ego" recibirán tamén unha contía de 3.000 euros, que poderán destinar a actividades de promoción lingüística. O prazo de solicitude desta primeira convocatoria remata o 30 de setembro de 2023.

Se precisas máis información, preme aquí.