22/03/2021

O Consello da Cultura Galega remodela a web do Arquivo Sonoro de Galicia para achegar os fondos á cidadanía

Uns 10.000 exemplares en diferentes formatos que conforman unha nutrida parte da produción musical galega, sexa editada en Galicia ou sexa fóra, preto de 6.000 voces de figuras senlleiras da nosa cultura ou as primeiras gravacións sonoras que se conservan son algúns dos materiais que custodia o Arquivo Sonoro de Galicia (ASG), centro dependente do Consello da Cultura Galega (CCG), que estrea hoxe novo espazo web. A remodelación constitúe a primeira fase dun proxecto que pretende contribuír progresivamente á visibilización do material que custodia a institución. Xosé Ramón Pousa é o actual director do arquivo, que foi creado en 1992.
21/03/2021

O Consello da Cultura Galega funde a poética de Xela Arias coa das novas voces no Día da Poesía

Este domingo 21 de marzo, Día Mundial da Poesía, o Consello da Cultura Galega (CCG) presenta “O equilibrio dos extremos”, un recital que pon en diálogo a obra poética de Xela Arias (Sarria,1962-Vigo, 2003), homenaxeada este ano co Día das Letras Galegas, coa das novas xeracións de poetas. Nel, doce escritores e escritoras escollen un poema da autora de “Intempériome” que fan dialogar con outro que elaboraron expresamente para a ocasión. A presidenta do CCG, Rosario Álvarez, destacou que “é unha sorte de festa poética que por mor das circunstancias actuáis sería complicado realizar con público e que levamos á rede para darlle unha maior difusión”. Está acompañado dunha videocreación elaborada pola produtora Miramemira a partir das novas obras creadas para este recital.
11/03/2021

A biografía de Luis Taibo incorpórase ao Álbum de Galicia

Luis Taibo tivo dúas grandes paixóns na súa vida: a música e a medicina. Fixo carreira profesional en ambas as dúas e aínda que naceu en Santiago pasou a maior parte da súa vida en México. A súa entrada acaba de incorporarse ao Álbum de Galicia.
20/12/2020

Difúndese, por primeira vez, unha gravación do Orfeón El Eco, un dos rexistros sonoros máis antigos conservados no noso país

A gravación que o Orfeón El Eco realizou en 1904 da Alborada gallega de Pascual Veiga é, ademais dun dos primeiros rexistros sonoros documentados que se conservan, un dos materiais máis importantes que custodia o Arquivo Sonoro de Galicia. O Consello da Cultura Galega (CCG) pon, por primeira vez, a disposición da cidadanía esta peza fundamental do noso patrimonio sonoro. Faino hoxe, 20 de decembro, cando que cumpren anos do primeiro rexistro fonográfico en Galicia. Esta gravación pecha o Proxecto Lousas, co que a institución visibiliza o fondo histórico rexistrado en pedra.
16/12/2020

Un concerto e unha nova publicación con partituras inéditas axuda a recuperar a figura de José Arriola

José Arriola (Betanzos, 1885-Barcelona, 1954) foi un neno prodixio que tocou o piano antes de que soubese ler. Pasou á historia por ser un virtuoso pianista e, aínda que había indicios da súa faceta compositiva, pensábase que todo se perdera cando o seu estudo de Berlín foi bombardeado na Segunda Guerra Mundial. Quixo a casualidade que no rocho dunha residencia de anciáns de Ferrol, onde finou unha das irmáns de Arriola, aparecesen unhas partituras que abriron o horizonte de recuperación da súa figura. O Consello da Cultura Galega (CCG) editou parte dese material en 2010 e agora completa ese traballo cunha nova publicación. A presentación deste novo volume, Arriola. Obra musical II, terá lugar mañá (19:00 horas) e estará acompañado dun concerto sobre pezas de Arriola a cargo da soprano Lucía Iglesias e do pianista Brais González. Por mor da situación sanitaria, cómpre inscribirse a través do sitio web da institución para asistir ao evento.
13/10/2020

Unhas xornadas reivindican o papel da muller na transmisión do patrimonio

Baixo o título “Arquivos, mulleres e tradición” arrincaron hoxe unhas xornadas organizadas polo Arquivo Sonoro de Galicia (ASG) do Consello da Cultura Galega (CCG). O director do Arquivo, Xosé Ramón Pousa, puxo de relevo na inauguración desta cita que “as mulleres tiveron un protagonismo fundamental como portadoras e xeradoras de materiais de arquivo”. Xulia Feixoo é a coordinadora desta cita que só se pode seguir a través da rede.
13/02/2020

A identidade sonora de Compostela xa está no Mapa Sonoro de Galicia

A campá da Berenguela é un dos sons máis significativos de Santiago de Compostela. E por ese motivo é o elemento vertebrador da identidade sonora desta cidade e xa se pode consultar no Mapa Sonoro de Galicia. A experiencia gravouse como parte da xornada “Os arquivos sonoros: memoria e patrimonio”, que organizou o Consello da Cultura Galega a principios de febreiro. A iniciativa foi coordinada por Xosé Ramón Pousa e pretendía poñer o foco na relevancia do patrimonio sonoro.
06/02/2020

Unha xornada do Consello da Cultura Galega alerta das dificultades do patrimonio sonoro

“Hoxe xa non é doado explicar por que o meu carro canta, nin por que o son é fino como un asubío. Para facelo necesitariamos moito tempo e unhas gravacións sonoras” explicou a presidenta do Consello da Cultura Galega (CCG), Rosario Álvarez ao presentar unhas xornadas nas que se falou da importancia de comprender o son como ben patrimonial; das dificultades para a súa conservación, da disparidade de mapas sonoros existentes e na que se cuestionaron que criterios se miden para discriminar os ruídos permitidos legalmente do que non. Os expertos participantes nesta cita chamada “Os arquivos sonoros: memoria e patrimonio”, alertaron da necesidade do rexistro, difusión e maior sensibilización do patrimonio sonoro. Xosé Ramón Pousa foi o coordinador desta cita que rexistrou a “identidade sonora de Compostela”.
19/12/2019

O cancioneiro de Oencia incorpórase ao Mapa Sonoro de Galicia

Son preto de trescentas pezas nas que hai romances, milicias, cregos, seituras, berces, parrafeos e outros cantares xunto con contos e relatos que revelan a diversidade cultural do concello de Oencia (León), considerado tradicionalmente como un dos 48 concellos da Galicia estremeira. O traballo de recolleita deste patrimonio oral foi realizado por Xosé Lois Foxo e agora incorpórase ao Mapa Sonoro de Galicia.
20/11/2019

As zarzuelas destacan na nova entrega do proxecto “Lousas”

“La Meiga” , “Maruxa”, “Los Gavilanes”, “Los Claveles”, “La del Soto del Parral” son algunhas das zarzuelas que se poden escoitar na nova entrega do proxecto “Lousas”. Esta proposta do Consello da Cultura Galega pon na rede o patrimonio sonoro rexistrado en pedra que custodia o Arquivo Sonoro de Galicia. Nesta ocasión súbense 18 novos rexistros entre os que se poderá escoitar a soprano estradense Mary Isaura, ou pezas dos coros: Aires d’a Terra de Pontevedra e de Coral de ruada de Ourense.
09/10/2019

O proxecto “Lousas” sube á rede novos rexistros do noso patrimonio en pedra

Non son nin compositores nin músicos son galegos, con todo teñen unha fonda relación co pais. Esta é unha das características comúns dalgunhas das gravacións que poñemos na rede nunha nova entrega da proxecto Lousas. Esta proposta do Consello da Cultura Galega fai público o patrimonio sonoro rexistrado en pedra que custodia o Arquivo Sonoro de Galicia.
09/10/2019

O Consello da Cultura Galega inaugura mañá no Museo do Pobo a mostra que recoñece o labor dos coros galegos

Estivo na Coruña onde xurdiu a formación Cántigas da Terra hai máis de cen anos. Despois foi a Ferrol, berce de Toxos e Froles; pasou por Ourense, onde se xestou a coral De Ruada e despois fixo recalada en Pontevedra e Vigo. A mostra Son de Galicia chega agora a Santiago, á cidade que viu nacer a Cantigas e Agarimos, un dos catro coros cuxa traxectoria nos permite construír o relato de como a música e o baile contribuíron á creación da nosa identidade. A mostra organizada polo Consello da Cultura Galega (CCG) inaugúrase este xoves (20:00 horas) no Museo do Pobo galego. Alí estará a presidenta do CCG, Rosario Álvarez; a vicepresidenta do Padroado do Museo, Concha Losada; Antón Fernández, representante do coro Cantigas e Agarimos; e o comisario, Miguel Anxo Seixas. A exposición poderase ver ata o 3 de decembro.
09/09/2019

O Consello da Cultura Galega e Afundación inauguran en Vigo Son de Galicia, a mostra que recoñece o labor dos coros galegos

Toxos e Froles, Cántigas da Terra, De Ruada e mais Cantigas e Agarimos son os catro coros históricos que permanecen activos hoxe en día. Dos seus arquivos constrúese o relato narrativo da exposición Son de Galicia, que recolle o espírito dunha época que sentou a través da música e do baile a nosa identidade. A mostra, organizada polo Consello da Cultura Galega (CCG) coa colaboración de Afundación-Obra Social ABANCA e mais as catro sociedades corais históricas, chega agora a Vigo. Este martes inaugúrase ás 19:30 horas coa presenza da presidenta do CCG, Rosario Álvarez; Paloma Vela, coordinadora adxunta da Área de Cultura de Afundación, e o comisario, Miguel Anxo Seixas. A exposición poderase ver na sede Afundación Vigo ata o 28 de setembro.
03/09/2019

Presentamos “Radiodifusión galega na emigración” unha listaxe das emisións radiofónicas da diáspora

O 3 de setembro 1950 comezou a emitirse en Montevideo "Sempre en Galicia", o programa de radio máis antigo de emisión totalmente en galego que aínda pervive. Aproveitamos esta efeméride para dar a coñecer “Radiodifusión galega na emigración”, un repertorio histórico das actividades radiofónicas realizadas e protagonizadas polos emigrantes galegos fundamentalmente en América e Europa, pero tamén noutros destinos menos frecuentes con presenza galega.
02/09/2019

O Consello da Cultura Galega e o Concello de Pontevedra rememoran o concerto homenaxe a Perfecto Feijoo cen anos despois

A praza da Ferraria acolleu este sábado un gran concerto que xuntou aos catro coros históricos que permanecen activos: Coral de Ruada de Ourense, Cántigas da Terra da Coruña, o Real Coro Toxos e Froles de Ferrol e Cantigas de Agarimos de Santiago. Asistiron a presidenta do Consello da Cultura Galega, Rosario Álvarez, e a concelleira de festas, Carme da Silva, que foron as dúas entidades que organizaron esta actividade. O acto rememorou o concerto que estas formacións (agás Cantigas e Agarimos, creada en 1921) celebraron hai cen anos para render homenaxe a Perfecto Feijoo, fundador do xa desaparecido coro Aires da Terra (1983-1914) de Pontevedra.
25/07/2019

O Consello da Cultura Galega pon na rede tres gravacións históricas do himno galego no Día Nacional de Galicia

Co gallo da celebración do Día Nacional de Galicia, o Consello da Cultura Galega ofrece tres versións do Himno Galego. Foron realizadas entre 1919 e 1928 e correron a cargo de Toxos e Froles de Ferrol, a Banda Municipal de Barcelona e Cántigas de Terra. Unha iniciativa que se insire no proxecto "Lousas" que pon na rede o patrimonio sonoro rexistrado en pedra.
22/07/2019

O Consello da Cultura Galega acolleu a presentación dun cancioneiro popular que xunta trescentas pezas musicais de Manzaneda e Terras de Trives

Son 300 pezas musicais que compilan a tradición musical de Manzaneda e das Terras de Trives, que Xosé Lois Foxo, director da Real Banda de Gaitas da Deputación de Ourense, recompilou ao longo de corenta anos de recollida tradicional. O Consello da Cultura Galega acolleu esta mañá a presentación do libro Cancioneiro da seitura de Manzaneda e Terras de Trives, unha extensa compilación e estudo antropolóxico dos cánticos agrarios e festivos desta comarca ourensá. O acto, encabezado por Rosario Álvarez, presidenta do Consello da Cultura Galega, contou coa participación de Amable Fernández, alcalde de Manzaneda, Patricia Domínguez, alcaldesa de Trives e Patricia Torres, deputada de Cultura da Deputación de Ourense, ademais do propio Xosé Lois Foxo.
07/06/2019

“No bico un cantar” reúne en Tui a mocidade galega e portuguesa

O vicepresidente do Consello da Cultura Galega, Xosé Manuel Núñez Seixas; a conselleira de Educación, Universidade e Formación Profesional, Carmen Pomar; e o alcalde en funcións de Tui, Carlos Vázquez asistiron esta tarde en Tui ao concerto da sétima edición de No Bico un Cantar no que preto de 560 rapazas e rapaces acompañados duns 50 docentes lle renderon homenaxe á tradición musical da Raia. Tanto Pomar como Núñez Seixas salientaron a importancia de iniciativas coma esta que, ademais de afondar na nosa tradición oral e musical, fomentan o esforzo e a convivencia entre as alumnas e alumnos participantes no concerto. Ademais, aproveitaron para anunciar que a vindeira edición renderá homenaxe á Xeración Nós e terá lugar en Allariz.
23/05/2019

O Consello da Cultura Galega e o Ateneo Republicano dixitalizarán a memoria sonora da transición na Coruña

Foi un dos focos culturais máis representativos de Galicia no inicio da democracia. Polo Ateneo da Coruña Curros Enríquez desfilaron políticos, escritores e boa parte da intelectualidade galega e española da época. Todos eses actos culturais foron gravados e repousan en 502 casetes que gardaba o Ateneo Republicano de Galicia (ARGA) e lle acaba de ceder ao Consello da Cultura Galega (CCG) para a súa dixitalización e posta en valor. O acordo asinárono esta mañá os presidentes das dúas entidades, Rosario Álvarez, do CCG, e Juan Luis Pérez Alvajar, de ARGA, que destacaron o valor de conservación e difusión deste legado.
20/05/2019

O Consello da Cultura Galega analiza mañá cun parladoiro o papel dos coros na divulgación dos símbolos de Galicia

Ferrol acolle estes días a exposición do Consello da Cultura Galega (CCG) Son de Galicia, na que se recolle o espírito dunha época que sentou a través da música e do baile a nosa identidade. Como complemento do discurso expositivo, mañá terá lugar un parladoiro no que se afondará no labor que xogaron os coros na divulgación dos símbolos de Galicia. Esta cita contará coa presenza da presidenta do CCG, Rosario Álvarez, e nela participarán Javier Jurado, Eduardo Pardo de Guevara y Valdés, Belén Sáenz-Chas Díaz e o comisario da mostra, Miguel Anxo Seixas. A sesión comeza ás 19:30 horas na sede de Toxos e Froles.
29/03/2019

O proxecto Lousas do Consello da Cultura Galega pon na rede o patrimonio sonoro rexistrado en pedra

Chamáronse “discos de pedra” ou de “pizarra”, polo composto terroso e escuro, que lembraba os encerados de colexio, pero en realidade estaban integrados por goma, resina, celuloide, lousas ou capas de papel. As lousas desapareceron coa chegada dos vinilos e gravaban un máximo de catro minutos en cada cara. O Consello da Cultura Galega, a través do seu Arquivo Sonoro de Galicia, garda este material que desde hoxe está en rede. “Lousas” é o proxecto web que presentou esta mañá a secretaria da institución, Dolores Vilavedra, quen destacou a relevancia deste proxecto que “pon á disposición do público unha parte importante e delicada do noso patrimonio e faino con valor engadido, como son os textos explicativos e as imaxes”. Canda ela estaban a coordinadora técnica do Arquivo Sonoro, Cristina Pujales, e o director do Arquivo Sonoro de Galicia, Xosé Ramón Pousa, quen fixo un chamamento á cidadanía para que contribúa a conservar este patrimonio.
21/12/2017

O Consello da cultura presenta o Mapa Sonoro de Galicia, unha web para explorar a diversidade cultural de Galicia a través do audio

O Mapa Sonoro de Galicia (mapasonoro.consellodacultura.gal) é un novo proxecto web do Consello da Cultura Galega (CCG) que nace co obxectivo de ofrecer unha perspectiva xeográfica a coleccións sonoras xa custodiadas pola institución (no Arquivo Sonoro de Galicia) ou por outras entidades e particulares. Está especializado en coleccións de recollida antropolóxica, etnográfica, lingüística ou de sons da natureza, ambiente ou de actividade humana.
13/02/2017

O CCG lembrará a figura de Carlos Casares como intelectual comprometido coa sociedade

Carlos Casares foi o terceiro presidente do Consello da Cultura Galega (1996-2002), e unha figura comprometida coa potencialidade da cultura e da lingua galegas para construír unha Galicia mellor. É por iso que, co gallo do Día das Letras Galegas 2017, o CCG vai prestar unha atención importante á dimensión de Carlos Casares como intelectual público a través dunha programación de actos que se prolongará ao longo do ano 2017.
08/10/2014

O Consello da Cultura Galega pon na rede unha gravación de Otero Pedrayo sobre B. J. Feijoo

Este ano cúmprense 250 anos do pasamento de Benito Jerónimo Feijoo, un referente da recuperación da identidade galega do século XIX. Para conmemoralo, o Consello da Cultura Galega leva a cabo mañá xoves en Ourense un seminario encamiñado a pór de manifesto a vixencia do seu pensamento. Relacionado con esta efeméride, acaba de poñer a disposición dos usuarios na rede unha conferencia que outro ilustre ourensán, Ramón Otero Pedrayo, pronunciou en 1964 detallando a relevancia histórica e perfil de Feijoo.
09/11/2001

EL CONSELLO DA CULTURA GALEGA PONE EN RED LAS VOCES DE
MANUEL RIVAS Y SUSO DE TORO, ENTRE OTROS ESCRITORES GALLEGOS

El libro Poetas e Narradores nas súas voces, editado por el Arquivo Sonoro de Galicia el pasado mes de junio ya es accesible a través de la Red gracias al especial que el portal cultural del Consello da Cultura Galega (CCG), www.culturagalega.org, acaba de publicar en Internet. Gracias a este trabajo, todas aquellas personas interesadas en la literatura gallega contemporánea podrán disponer de esta obra, en la que se incluyen los textos, en ocasiones inéditos, y las voces de estos poetas y narradores gallegos contemporáneos en la lectura de sus propias creaciones.
28/09/2012

A Federación de Asociacións da Prensa de Galicia entregou a gravación dun discurso de Valentín Paz-Andrade ao Consello da Cultura Galega

A Federación de Asociacións da Prensa de Galicia (FEGAPE) fixo entrega hoxe ao Consello da Cultura Galega dunha gravación inédita do discurso pronunciado por Valentín Paz-Andrade, o 10 de xullo de 1984 no Pazo de Fonseca, en Santiago de Compostela, con motivo da constitución da FEGAPE, en calidade de presidente de honor da mesma. O Presidente do CCG, Ramón Villares, agradeceu a donación, que incorpora ao Arquivo Sonoro de Galicia unha testemuña máis de Valentín Paz-Andrade, a quen Luís Menéndez, presidente da Asociación da Prensa de Santiago, glosou como “mestre de xornalistas”.
27/04/2012

Xornada “As coleccións sonoras de Galicia ante o presente dixital en rede”, organizada polo Arquivo Sonoro de Galicia do Consello da Cultura

O Arquivo Sonoro de Galicia, do Consello da Cultura Galega, organizou o venres 27 de abril unha xornada de reflexión e debate “V Encontro o son da Memoria” sobre “As grandes coleccións sonoras de Galicia ante o presente dixital en rede”. A xornada celebrouse, en sesións de mañá e tarde, no auditorio da Biblioteca da Cidade da Cultura de Galicia e ocupouse da situación dos arquivos sonoros na radiodifusión, nas universidades, nas institucións galegas e nos grupos de recompilación etno-musical. Consideráronse novas formas de coordinación e cooperación entre posuidores e/ou xestores de coleccións de gravacións sonoras ao abeiro das posibilidades abertas polo traballo en rede.
14/02/2012

O CCG dixitaliza a conferencia "Orixe e formación da cidade de Ourense" de Xesús Ferro Couselo

Publicada orixinalmente en 1996 polo Arquivo Sonoro de Galicia co gallo do Día das Letras Galega dedicado ao polígrafo Xesús Ferro Couselo, e dentro da súa iniciativa de dixitalización da colección As Nosas Voces, poden consultar dentro da Mediateca do CCG a conferencia "Orixe e formación da cidade de Ourense", impartida por este autor en 1968.

Acceda á Mediateca
01/02/2012

Dieste, Piñeiro, Suárez Picallo e Meilán nas novas dixitalizacións da colección As Nosas Voces

O Consello da Cultura Galega incorporou nestes días á Mediateca da institución a dixitalización de novos volumes da colección As Nosas Voces, que editou o Arquivo Sonoro de Galicia na década dos 90. Son valiosas achegas sonoras coa voz de Rafael Dieste, Ramón Piñeiro, Ramón Suárez Picallo e Manuel Meilán que pode consultar na Mediateca do CCG.
19/01/2012

O Consello da Cultura Galega dixitaliza as conferencias de Ramón Otero Pedrayo en América

Dentro da iniciativa para a dixitalización da colección As nosas voces, editada nos 90 polo CCG en cassete, é a quenda de Ramón Otero Pedrayo en América (I), publicada polo Arquivo Sonoro de Galicia en 1993. O volume recolle a intervención de Don Ramón Otero Pedrayo nun acto con emigrantes da colectividade galega de Bos Aires, e pódese descubrir a vibrante oratoria do profesor ourensán.


Escoite a conferencia na Mediateca