Noticias

AEG-CCG. Rexistros31 a 60 de 99
31/03/2021

O Consello da Cultura Galega recibe unha doazón sobre Urbano Feijóo de Sotomayor

A figura de Urbano Feijóo de Sotomayor (1808-1898) é bastante controvertida. Foi un empresario e político galego que promoveu a creación dun plan de colonización que facilitase, en termos xurídicos, económicos, filantrópicos e prácticos a chegada a Cuba de galegos. Un operativo que se iniciou en 1854 e rematou dous anos despois nunha crise motivada polo trato denigrante dispensado aos traballadores. Algúns dos documentos que axudan a comprender esta época están no fondo documental que o profesor Luis T. González del Valle acaba de doar ao Arquivo da Emigración Galega do Consello da Cultura Galega (CCG) con intermediación da Secretaría Xeral da Emigración.
19/03/2021

O papel das mulleres na emigración ocupa a sexta entrega do especial “Historias de ida e volta”

Rosalía de Castro chamoulles "viúvas de vivos", mulleres que quedaron na terra para o coidado do fogar e dos fillos. Canda elas tamén están as que emigraron en busca dunha vida mellor e que no camiño se atoparon con numerosas dificultades na súa integración, non só como inmigrantes senón tamén polo seu xénero. A sexta entrega do especial “Historias de ida e volta”, un proxecto web realizado polo Consello da Cultura Galega en colaboración coa Secretaría Xeral da Emigración, amosa o incuestionable papel que a muller galega desempeñou no fenómeno migratorio do noso país. Esta iniciativa pretende contribuír á difusión de materiais que custodia o Arquivo da Emigración Galega (AEG) para visibilizar o fenómeno migratorio.
11/03/2021

A biografía de Luis Taibo incorpórase ao Álbum de Galicia

Luis Taibo tivo dúas grandes paixóns na súa vida: a música e a medicina. Fixo carreira profesional en ambas as dúas e aínda que naceu en Santiago pasou a maior parte da súa vida en México. A súa entrada acaba de incorporarse ao Álbum de Galicia.
19/02/2021

O especial “Historias de ida e volta” dedica esta entrega a amosar o lecer na emigración

Festas, xantares, competicións deportivas, representacións teatrais..., foron moitas e moi variadas as formas de socialización dos nosos emigrantes. Integrábanse en colectividades e sociedades a través das que organizaban actividades para pasar o tempo libre á vez que mantiñan vivos os vínculos coa terra. A quinta entrega do especial “Historias de ida e volta”, un proxecto web realizado polo Consello da Cultura Galega en colaboración coa Secretaría Xeral da Emigración, documenta as formas de lecer. Esta iniciativa pretende contribuír á difusión de materiais que custodia o Arquivo da Emigración Galega (AEG) para visibilizar o fenómeno migratorio.
18/12/2020

O Consello da Cultura Galega sube á rede nova documentación sobre o fenómeno migratorio

“De Galicia a América: a chegada a un novo mundo” é o título dunha nova entrega do especial “Historias de ida e volta”, un proxecto web realizado polo Consello da Cultura Galega (CCG), en colaboración coa Secretaría Xeral da Emigración, que pretende difundir material sobre o fenómento migratorio. Nesta ocasión, difúndense unha vintena de fotografías e documentos sobre o momento da chegada dos galegos e galegas a América no século XX.
09/12/2020

A colección “Clásicos da emigración” suma unha nova obra que amosa a Luís Seoane como poeta

Luís Seoane (Bos Aires, 1910-A Coruña, 1979) foi un dos intelectuais máis completos da cultura galega. A súa figura, máis coñecida polo seu destacado traballo no ámbito das artes plásticas, cultivou moitas outras facetas. Hoxe, no marco da colección “Clásicos da emigración” que promoven o Consello da Cultura Galega (CCG) e a Secretaría Xeral da Emigración, preséntase Fardel de eisilado, que amosa tamén a súa faceta poética. O profesor de lingua e literatura Gregorio Ferreiro Fente é o encargado do detallado estudo desta obra. Ademais, o CCG enriquece a publicación deste volume, que xa se pode descargar no sitio web da institución, con fotografías procedentes do Arquivo da Emigración Galega.
04/12/2020

O Consello da Cultura Galega e a Secretaría Xeral da Emigración lembran o vínculo de Celanova con Cuba na inauguración da mostra “O soño cubano da emigración galega”

A Casa dos Poetas de Celanova acolleu esta mañá a inauguración da mostra “O soño cubano da emigración galega”, unha proposta do Consello da Cultura Galega (CCG), coa colaboración da Secretaría Xeral da Emigración, que ilustra a fortaleza, a continuidade e a visibilidade da presenza galega na Habana. A presidenta do CCG, Rosario Álvarez, destacou no acto o “intenso vínculo entre Cuba e Celanova e que ten un dos seus máximos expoñentes na figura de Curros Enríquez”. Unha relación na que incidiu tamén o secretario xeral da Emigración, Antonio Rodríguez Miranda, quen lembrou que “na actualidade viven neste país americano máis de 13.000 descendentes de ourensáns”. O alcalde de Celanova, Antonio Puga, dixo na súa intervención que “sen a emigración galega en Cuba é moi posible que hoxe non só non existise a Fundación Curros Enríquez, senón que probablemente nin existiría a propia casa que hoxe acolle esta mostra”. A exposición estará aberta ata o 24 de xaneiro.
11/09/2020

O Consello da Cultura Galega inaugura na Coruña “Inventio mundi”, a mostra que afonda na historia da navegación galega

Acidade da Coruña puido desempeñar un papel histórico na navegación marítima. Noséculo XV,Carlos V quixo abrir desde a cidade herculina unha nova ruta para chegar asillas Molucas sen depender do porto de Sevilla. Para iso creou na Coruña a Casada Especiaría e con ela escribiuse a historia dun fracaso. Esta vía político-marítimaxestou catro expedicións que acabaron todas en desastre e da que non queda ningúnrastro na cidade herculina. Este é o relato que se narra en  “Inventio Mundi”, a mostra organizada polo Consello da Cultura Galega e pola Secretaría Xeral de Emigración. Esta exposición, comisariada por Ofelia Rey, inaugúrase este venres 11 na Fundación Barrié.
21/08/2020

O Consello da Cultura Galega colabora na difusión do legado da emigración na terceira edición de Ares Indiano

Esta fin de semana terá lugar unha nova edición do Ares Indiano, unha celebración encamiñada a recuperar, dun xeito lúdico, o pasado emigrante da vila. O Consello da Cultura Galega (CCG) participa nesta cita o sábado 22 coa inauguración da exposición “O soño cubano da emigración galega” e a presentación da edición facsimilar da novela “Como se llega a millonario” do aresá Miguel Bendamio (1873-1938). Ademais, o web do CCG ofrecerá un roteiro por esta localidade seguindo edificios e espazos moi vencellados á emigración.
10/07/2020

A colección “Clásicos da emigración” incorpora unha novela de Antón Paz Míguez

“Da emigración. Notas d’un galego” é unha novela na que Antón Paz Míguez proxectou as duras condicións vitais e laborais dos galegos e galegas que sobrevivían lonxe da terra. É tamén o cuarto volume da colección Clásicos da emigración coa que o Consello da Cultura Galega (CCG) e a Secretaría Xeral da Emigración recuperan, en edición facsimilar e con estudos introdutorios, obras fundamentais para entender o fenómeno migratorio. O profesor e investigador Xavier Castro Rodríguez é o encargado de facer o estudo preliminar. Xunto coa publicación, o CCG presenta a entrada de Paz Míguez no Álbum de Galicia.
28/06/2020

Poñemos na rede unha edición de "O estatuto de Galiza” no aniversario do seu plebiscito

O 28 de xuño de 1936 celebrouse o plebiscito do primeiro Estatuto de Autonomía para Galicia. Doce anos despois, a Federación de Sociedades Galegas, os catro centros provinciais, o ABC de Corcubión, o Centro Betanzos e a Irmandade Galega, conmemoraron esa efeméride coa publicación do texto do Estatuto. Aproveitamos o aniversario para difundir o texto editado pola colectividade galega en Arxentina en 1948 que contén, ademais do Estatuto, unha historia do autonomismo galego.
03/04/2020

O Consello da Cultura Galega amplía a colección Clásicos da emigración con “Cousas gallegas” de Fortunato Cruces

Detrás de “Cousas gallegas” hai poemas, discursos e outros materiais que o xornalista e avogado Fortunato Cruces publicou en 1923. É tamén o terceiro volume da colección Clásicos da emigración coa que o Consello da Cultura Galega (CCG) e a Secretaría Xeral da Emigración recuperan, en edición facsimilar e con estudos introdutorios, obras fundamentais para entender o fenómeno migratorio. Nesta ocasión o historiador e vicepresidente do CCG, Xosé Manoel Núñez Seixas, é o encargado da análise da obra. Ademais da publicación, o CCG presenta a entrada de Fortunato Cruces no Álbum de Galicia, así como a difusión de diferentes exemplares de “Nova Galicia”, o xornal que dirixiu e que tivo bastante repercusión en Arxentina.
10/01/2020

O Consello da Cultura Galega e a Secretaría Xeral da Emigración reeditan o “Estudio sobre emigración”

En pleno éxodo migratorio a América, Eduardo Vincenti y Reguera publicou un texto que ofrecía informacións precisas e útiles para orientar aos que xa decidiran marchar. “Estudio sobre migración” foi un texto innovador no formato e atípico no seu contexto que agora o Consello da Cultura Galega e a Secretaría Xeral da Emigración reeditan en formato facsimilar dentro da colección Clásicos da Emigración. A presentación tivo lugar esta mañá a cargo dos responsables desas dúas entidades, Rosario Álvarez e Antonio Rodríguez Miranda, respectivamente, que destacaron a relevancia de poñer á disposición da sociedade unha obra que axuda a entender o fenómeno migratorio. Canda eles estaban o director do Arquivo da Emigración Galega, Xosé Manoel Núñez Seixas, e o autor do prólogo, Raúl Soutelo. A publicación xa se pode descargar deste o web do Consello da Cultura Galega.
10/12/2019

O Consello de Comunidades Galegas insta a poñer en marcha dúas propostas do Consello da Cultura Galega

O informe coas directrices para a posta en marcha do Museo das Migración Galegas e o Plan Director do Patrimonio Documental das Sociedades Galegas no Exterior son dúas iniciativas elaboradas polo Consello da Cultura Galega e presentadas no XII Pleno do Consello das Comunidades Galegas, celebrado en Santiago de Compostela entre os días 3 e 4 de decembro. Estes dous informes, relevantes para o estudo, preservación e difusión da memoria da emigración galega, figuran como prioritarios nas conclusións elaboradas pola ponencia de cultura deste organismo.
12/11/2019

O Consello da Cultura Galega homenaxea os navegantes galegos en “Inventio mundi”

A presidenta do Consello da Cultura Galega (CCG), Rosario Álvarez, inaugurou esta tarde no Museo de Pontevedra a última exposición producida pola institución. Chámase «Inventio Mundi. Galicia nas viaxes transoceánicas. Séculos XV-XVII» e tal e como explicou a presidenta “ten unha dobre condición, a de traer á memoria unha parte importante da historia de Galicia e de homenaxear aos esforzados navegantes galegos que abriron os camiños do mar, atopasen ou non gloria na empresa”. Pola súa parte, o director do museo, José Manuel Rey, destacou que “poucas cidades como Pontevedra terán un pasado tan estreitamente vinculado co mar e darían á Historia tantos navegantes; e poucos museos terán aos mariños e navegantes tan presentes entre as súas coleccións”. A mostra toma un punto de partida, a primeira circunnavegación do planeta, a expedición Magalhães/Elcano cando se cumpren 500 anos da súa partida. Ofelia Rey é a comisaria desta mostra que se pode ver ata o 14 de xaneiro.
07/11/2019

Expertos destacan no Consello da Cultura Galega a profunda relación histórica coa Habana

“Hai un vínculo que nos une dunha maneira especial coa Habana” indicou a presidenta do Consello da Cultura Galega, Rosario Álvarez, na inauguración do congreso “A Habana galega: Historia e memorias cruzadas”. A primeira sesión serviu para coñecer a historia galega desta cidade e a pegada cubana na nosa literatura. A cita continúa este venres 8 coa análise dos movementos migratorios entre ambos territorios e as influencias culturais mutuas da man de Pilar Cagiao, Xosé Manoel Núñez Seixas, Cira Romero ou Luis Toledo Sande. Como complemento do congreso, no serán deste xoves inaugurouse no Museo do Pobo a mostra “O soño cubano da emigración galega” (aberta ata o 22 de decembro) que recupera a fortaleza, continuidade e visibilidade da presenza galega na capital cubana. Ademais, o Auditorio de Galicia acolleu o concerto “Foliada Habaneira” a cargo de Alejandro Vargas Trío e Rosa Cedrón.
07/11/2019

Un especial web pon en valor o labor social e cultural do Centro Galego da Habana

O Arquivo da Emigración Galega acaba de facer público o especial “Centro Galego da Habana”, no que destaca o labor social e cultural deste centro, referente da colectividade galega residente en Cuba. A iniciativa dase a coñecer na semana na que o Consello da Cultura Galega revisa a conexión galega coa cidade da Habana a través dun congreso e unha exposición, ao tempo que se celebra o aniversario da creación deste centro en novembro de 1879.
06/11/2019

Un congreso, unha exposición e un concerto profundan desde Santiago na conexión galega coa Habana

Galicia ten unha conexión histórica moi especial coa cidade da Habana. Un vínculo que o Consello da Cultura Galega analiza cun programa de actividades que terá lugar mañá en Santiago de Compostela. Pola mañá comeza o congreso “A Habana galega: Historia e memorias cruzadas”; pola tarde, o Museo do Pobo (19:00 horas) acolle a inauguración dunha exposición que recupera a fortaleza, a continuidade e a visibilidade da presenza galega na capital cubana. Pola noite, soarán muiñeiras e danzóns na Foliada habaneira que terá lugar no Auditorio de Galicia (21:00 horas) a cargo de Alejandro Vargas Trío e Rosa Cedrón. Xosé Manoel Núñez Seixas e María Xosé Porteiro son os coordinadores deste programa que chega agora a Santiago pero que arrincou na Habana o pasado mes de outubro.
04/11/2019

A exposición “Os Adeuses” inaugúrase hoxe en Florida no marco dun congreso sobre hispanistas

É a mostra que documenta os últimos momentos da emigración galega a América. “Os adeuses” narra a partida a través de 51 fotografías realizadas por Alberto Martí nos portos de Vigo e A Coruña entre 1957 e 1963. Despois de itinerar en numerosos destinos de España, Portugal e Brasil, chega agora ao Schmidt Center Gallery Public Space da Florida Atlantic University (FAU) onde estará ata o 13 de decembro. A inauguración terá lugar hoxe (5:30 PM, hora local) e estará presente a profesora da Hofstra University, Benita Sampedro Vizcaya.
31/10/2019

A presidenta do Consello da Cultura Galega reuniuse coa cónsul de Cuba en Galicia

A presidenta do Consello da Cultura Galega, Rosario Álvarez, reuniuse esta mañá no seu despacho coa cónsul de Cuba en Galicia, Yahima Martínez Millán. Na xuntanza estableceron colaboracións no marco da revisión histórica que o Consello da Cultura Galega está a realizar sobre a relación entre Galicia e a Habana. A presidenta informouna das vindeiras actividades que revisan esta conexión no momento en que se celebra o 500 aniversario da creación da cidade da Habana.
18/10/2019

O Consello da Cultura Galega participou en Boal nun simposio que analiza a prensa da emigración

Cúmprese o centenario do nacemento do xornal “Progreso de Asturias”, unha efeméride que o concello de Boal (Principado de Asturias) quixo conmemorar dedicando a III edición do seu habitual simposio sobre emigración á prensa. O Consello da Cultura Galega participou nel esta mañá cun relatorio que se centrou en explicar a imaxe de Galicia na prensa da emigración.
14/10/2019

Dispoñible na rede a versión actualizada do Repertorio da prensa galega da emigración

A emigración galega foi moi frutífera na creación de boletíns, xornais, revistas... e diferentes tipos de publicacións periódicas. O Repertorio deste tipo de prensa xestado na emigración suma preto de 756 referencias hemerográficas. A listaxe é froito dun proxecto de investigación dirixido por Vicente Peña a finais dos noventa e que agora se actualiza.

14/10/2019

O Consello da Cultura Galega recupera a relación histórica coa Habana no quinto centenario da súa creación

O 16 de novembro de 2019, a cidade da Habana cumprirá cinco séculos. Unha efeméride que o Consello da Cultura Galega (CCG) celebrará cun intenso programa que arrinca mañá na capital cubana coa inauguración dunha exposición. “O soño cubano da emigración galega é moito máis que unha mostra, é o percorrido que ilustra a fortaleza, a continuidade e a visibilidade da presenza galega na Habana” explica o vicepresidente do CCG, Xosé Manoel Núñez Seixas. Xunto con María Xosé Porteiro son os comisarios desta aposta que percorre por primeira vez a relación histórica que Galicia mantivo coa Habana, onde se xestou a Galicia moderna e na que naceron os nosos símbolos: a bandeira, o himno e o escudo. O programa deseñado para conmemorar esta cita inclúe, alén da mostra, conferencias e un congreso que se realizará en novembro en Santiago.
03/10/2019

O Consello da Cultura Galega leva a Redondela a mostra que recolle o legado educativo da emigración

O vicepresidente do Consello da Cultura Galega, Xosé Manoel Núñez Seixas, e a alcaldesa de Redondela, Digna Rivas, inauguran mañá en Redondela a mostra “Luces de alén mar”, unha exposición que recolle o legado educativo da emigración galega. A exposición poderase ver na sala de exposicións do Multiusos da Xunqueira ata o día 31 de outubro.
02/10/2019

O Consello da Cultura Galega participa en Bélxica na xuntanza anual da Asociación Europea de Institucións Migratorias (AEMI)

A vixésimo novena xuntanza anual da Asociación Europea de Institucións Migratorias (AEMI), que reúne institucións relacionadas con temática migratoria, arrinca mañá no Red Star Line de Antwerpen (Bélxica). O Consello da Cultura Galega (CCG) participa nesta cita a través do Arquivo da Emigración Galega, cun relatorio no que abordará as singularidades da nosa emigración. A cita deste ano, que durará ata o sábado, está centrada en coñecer como se documenta a memoria dos movementos migratorios.
16/07/2019

O Consello da Cultura Galega presenta a reedición de “La Emigración en Galicia”

Cada emigrante ten o seu propio relato e a suma de todos eles conforma a imaxe do que foi o feito migratorio no noso país. No marco do traballo de investigación sobre este fenómeno relevante para a historia de Galicia, o Consello da Cultura Galega (CCG) presentará mañá a reedición de “La emigración en Galicia”, a obra que Ramón Castro López publicou en 1923 e que reconstrúe unha visión atípica, caracterizada por ser máis positiva da imaxe habitual. A presidenta do CCG, Rosario Álvarez; o secretario xeral de Emigración, Antonio Rodríguez Miranda; xunto con Xosé Manoel Núñez Seixas, director do Arquivo da Emigración Galega; e Ramón Villares, autor do prólogo da obra que abre a colección "Clásicos da Emigración", participarán no acto de presentación deste volume. Na rolda darán conta da relevancia deste traballo no conxunto da emigración galega.
07/07/2017

O Consello da Cultura Galega recupera material da emigración no marco do Ribadeo Indiano

Ribadeo é un exemplo do legado deixado pola emigración visible nun rico patrimonio arquitectónico. Escolas, fontes, igrexas e casas evidencian a pegada dunha época e, durante esta fin de semana, tamén serven de escenario para a recreación da vida no século XIX. Esta festividade, coñecida como Ribadeo Indiano, marca o contexto no que o Consello da Cultura Galega (CCG) e o Concello local asinarán un convenio que permita recuperar fondos particulares da emigración. Ademais, o CCG estará presente coa exposición “Os adeuses” e cunha conferencia que ofrecerá mañá sábado o presidente da institución, Ramón Villares, arredor do fenómeno migratorio.
30/09/2016

A 26 Conferencia Anual da AEMI conclúe coa reivindicación das migracións como elemento clave da Historia da Humanidade

Ramón Villares, presidente do Consello da Cultura Galega e Maddalena Tirabassi, vipresidenta da AEMI, clausuraron o encontro no que destacaron a necesidade de preservar o legado das migracións e a importancia da existencia de institucións que conserven a súa memoria histórica para entender mellor a sociedade contemporánea.
23/09/2015

O Consello da Cultura Galega participa na xuntanza anual da Asociación Europea de Institucións Migratorias (AEMI) en Turín

“Europa e as migracións no terceiro milenio” é o título da xuntanza anual da Asociación Europa de Institucións Migratoria (AEMI) que se desenvolve ata o sábado en Turín, Italia. Nesta cita estará presente o Consello da Cultura Galega, a través do seu Arquivo da Emigración Galega, cun relatorio que ofrecerá unha visión das novas mobilidades de migración en Galicia.
14/11/2014

Un seminario destaca o carácter simbólico do Consello de Galiza, no setenta aniversario da súa creación

“O Consello de Galicia foi a alternativa dun grupo pequeno de exiliados galeguistas e republicanos necesaria para poder actuar na recuperación da democracia en España”. Así perfilou Ramón Villares esta entidade presidida por Castelao cando se cumpren 70 anos da súa creación. Esta efeméride dalle sentido a un seminario do Consello da Cultura Galega (CCG), Os exilios ibéricos en clave comparada, que remata mañá sábado coa análise doutros exilios coetáneos, os de Cataluña, País Vasco e Portugal.