noticias

Rexistros 31 a 60 de 1474
09/03/2018

O Consello da Cultura Galega e a Consellería de Cultura recuperan os alalás na sexta edición de “No bico un cantar”

A biblioteca do Consello da Cultura Galega (CCG) acolleu hoxe a presentación da sexta edición do programa lúdico-musical “No bico un cantar”. Unha iniciativa do Consello da Cultura Galega e a Consellería de Cultura, coa colaboración do Concello de Betanzos nesta edición, que xunta poesía e mocidade. Alí estaban presentes Rosario Álvarez, presidenta do CCG; Anxo Lorenzo, secretario xeral de Cultura; María Barral, concelleira de Cultura de Betanzos, e Maximino Zumalave. A proposta mantén o formato de concerto coral formado por voces procedentes de toda Galicia, pero inclúe unha novidade, xa que escolle unha temática de tradición popular no canto de figuras da literatura galega. O vindeiro 1 de xuño cantaranse en Betanzos os alalás das Mariñas, Muxía e Camariñas e haberá tamén oco para a estrea do "Alalá á vella maneira", de Manuel Rivas. Esta obra constitúe un pequeno fito na traxectoria deste programa xa que é a primeira vez que se pon música á obra dun autor vivo.
02/03/2018

A publicación do Consello da Cultura que revisa o legado de Anna Turbau sobre Galicia é finalista dos premios do libro

“Anna Turbau. Galicia, 1975-1979” é unha publicación que recolle unha parte significativa do legado que a fotógrafa Anna Turbau (Barcelona, 1949) cedeu ao Consello da Cultura Galega. A publicación, editada por Natalia Poncela, é finalista da III Gala do Libro Galego na categoría de mellor iniciativa bibliográfica. Os gañadores saberanse na gala que terá lugar o sábado 19 de maio de 2018 no Teatro Principal de Santiago de Compostela.
26/02/2018

A recuperación do edificio da Panificadora de Vigo centra mañá unha xornada no Consello da Cultura

Está situado nun espazo urbano privilexiado, ten un gran número de elementos que conservar, de aí a dificultade da súa preservación íntegra; a perda de funcionalidade.... son moitos os factores que converten a rehabilitación da Panificadora de Vigo nun grande reto. Dos criterios de conservación, das características de edificio, entre outras cuestións, falarase mañá martes nunha nova edición dos Encontros co Patrimonio do Consello da Cultura Galega (CCG). A cita poderase seguir en directo a través do web da institución.
22/02/2018

O Consello da Cultura Galega leva á Coruña a exposición “A intimidade da imaxe”

O Consello da Cultura Galega (CCG) e o concello da Coruña inauguran mañá ás 19:30 horas no Kiosco Alfonso “A intimidade da imaxe”, a exposición que revisa a Galicia da transición a través das fotografías de Anna Turbau (Barcelona, 1949). A mostra, que se poderá ver ata o 1 de abril, contará coa presenta de Rosario Álvarez, vicepresidenta do Consello da Cultura Galega; o alcalde da Coruña, Xulio Ferreiro; o concelleiro de Culturas, Deporte e Coñecemento, Xosé Manuel Sande; a comisaria da mostra, Margarita Ledo, e a fotógrafa catalá, Anna Turbau. Na exposición exhíbense un centenar de imaxes retratan os conflitos sociais, políticos e humanos cos que a fotógrafa se atopou a finais dos anos setenta.
21/02/2018

Os dereitos de autor centran mañá a actividade do Consello da Cultura Galega

O noso contexto tecnolóxico transformou o noso xeito de crear e compartir os contidos. As normas que regulan a propiedade intelectual víronse na necesidade de se adaptaren ao novo escenario. Sobre o ámbito normativo e de cara a ofrecer ferramentas de carácter práctico coas que afrontar a nova realidade, o Consello da Cultura Galega organiza a xornada "Dereitos de autor, lei aplicable e percepción social". A cita conta con todas as prazas cubertas pero poderá seguirse en directo a través do sitio web da institución.
16/02/2018

Unha xornada do Consello da Cultura alerta da fuga de talento científico por mor do exilio

Son refuxiados, comparten os motivos que os levaron a exiliarse e a súas historias gardan numerosos paralelismos aínda que os separan catro décadas e un océano. Son o profesor chileno Eleuterio Toro e o estudante sirio Kamal Aldalati. Os dous participaron na xornada “Persoas refuxiadas ConCiencia. Análise da problemática das persoas refuxiadas desde a Ciencia e como persoas xeradoras de coñecemento” que se celebrou hoxe no Consello da Cultura Galega (CCG). “Unha oportunidade para aproximarse ao exilio, unha liña de traballo habitual do Consello, pero desde unha maneira máis específica e cunha ollada presente” indicou o presidente da institución, Ramón Villares, na inauguración.
15/02/2018

Unha xornada do Consello da Cultura reflexiona mañá sobre os exilios desde a ciencia

Un profesor chileno que foi torturado e perseguido, un estudante sirio que chegou a España como refuxiado, un fotógrafo que fixou coa súa cámara numerosas migracións. Son algúns dos perfís dos participantes da xornada “Persoas refuxiadas ConCiencia. Análise da problemática das persoas refuxiadas desde a Ciencia e como persoas xeradoras de coñecemento” que se celebra mañá xoves no Consello da Cultura Galega. A cita poderase seguir en directo desde o web da institución.
15/02/2018

O Consello da Cultura presenta mañá en Ourense a publicación “Ofrenda lírica á nena Silvia Santiago Conde”

O sete de setembro de 1960, a nena Silvia Santiago Conde facía a primeira comuñón na Coruña. Seu pai, o escritor e empresario Silvio Santiago, convocou amigos, poetas e escritores galegos a participaren nunha “Ofrenda lírica” en forma de libro e celebraren, así, o acontecemento. O Consello da Cultura Galega (CCG) deulle forma de publicación a este particular agasallo e preséntase mañá venres, ás 20:00 horas, no liceo de Ourense. Alí estarán presentes Ramón Villares, presidente do CCG, xunto con Alfonso Vázquez-Monxardín e Patricia Arias. O acto contará coa presenza de José Luis Fernández Carnicero, que interpretará varias pezas musicais.
14/02/2018

O Consello da Cultura presenta o “Dicionario enciclopédico de termos escénicos”

Acoutación, agol, analepse, madrigal, theatron.... son só algúns dos 300 termos que recolle o “Dicionario enciclopédico de termos escénicos”, unha proposta investigadora e normalizadora referida ao teatro pero tamén ás outras artes escénicas. O proxecto foi presentado esta mañá en rolda de prensa por Ramón Villares, presidente do Consello da Cultura Galega (CCG), quen destacou que forma parte dunha estratexia da institución de fornecer de ferramentas para os profesionais arredor da cultura galega. Canda el estaban Dolores Vilavedra, membro da Comisión Executiva, mais Inma López Silva e Roberto Pascual, como membros do proxecto. Todos eles destacaron a necesidade e a pertinencia desta obra, que constitúe un fito no teatro galego. O dicionario xa se pode consultar desde o web do CCG.
09/02/2018

Aberta a inscrición da xornada que aborda a recuperación do edificio da Panificadora de Vigo

Está situado nun espazo urbano privilexiado, ten un gran número de elementos que conservar, está en desuso..., son moitos os factores que converten o edificio da Panificadora de Vigo nun gran reto. Dos criterios de conservación ou rehabilitación, das características do edificio e da diversidade de criterios falarase na xuntanza que terá lugar o vindeiro 27 de febreiro. É unha nova edición dos Encontros co Patrimonio que xa ten aberta a súa inscrición a través da web do Consello da Cultura Galega.
07/02/2018

O Consello da Cultura aborda nunha xornada a xestión de datos masivos desde Galicia

Datos de formularios e enquisas, correos electrónicos, mensaxes en redes sociais, sinais de móbil, arquivos de audio, sensores, imaxes dixitais..., a sociedade en rede deixou gran cantidade de volume de datos. Á súa xestión e análise chámaselle Big Data. Sobre este tema tratará a xornada do Consello da Cultura Galega (CCG) “A cultura dixital en Galicia: viaxe de ida e volta ao Big Data, á verificación e á mobilidade”, que terá lugar o vindeiro 15 de marzo. A cita ten aberto o prazo de inscrición a través do web da institución.
29/01/2018

O Consello da Cultura inaugura mañá Illa rota, mostra que documenta a sociedade coruñesa de principios do século XX

O Consello da Cultura Galega (CCG) inaugura mañá martes, 30 de xaneiro de 2018, a exposición “Illa rota. Da II República ao franquismo”. A mostra, que se pode ver ata o 30 de marzo na sala de exposicións do Concello da Coruña, amosa a transformación e evolución da sociedade coruñesa entre o período que vai da II República ata o franquismo a través da ollada do fotoxornalista Juan Cancelo. A inauguración terá lugar ás 19:30 horas e contará coa presenza de Ramón Villares, presidente do CCG, e de Xulio Ferreiro, alcalde da Coruña.
26/01/2018

Refuxiados, patrimonio e dereitos de autor centran as próximas actividades da institución

O Consello da Cultura Galega (CCG) acaba de abrir a inscrición das próximas actividades. A primeira delas terá lugar o vindeiro martes 30 de xaneiro cun novo encontro sobre o patrimonio, desta volta centrado no castro de San Lourenzo, revitalizado pola comunidade veciñal. Tamén está aberto o prazo para anotarse a unha xornada sobre dereitos de autor prevista para o 22 de febreiro e para outra cita (15 de febreiro) que aborda a situación dos refuxiados desde o ámbito científico. A inscrición pode facerse a través do sitio web da institución.
19/01/2018

Expertos apuntan á desestruturación do mundo rural entre as causas dos incendios forestais

Unha política forestal que pon a prioridade na extinción e non na orixe do problema; unha escasa prevención estrutural e un ordenamento forestal inadecuado son algunhas das causas que explican a virulencia e magnitude dos últimos incendios. Así o destacaron varios expertos no coloquio “Unha nova xeración de incendios” que se celebra no Consello da Cultura Galega. A cita, que xunta a expertos de Galicia e Portugal, remata mañá venres cunha mesa redonda que propoñerá medidas para atenuar os eventuais impactos dos lumes.
19/01/2018

Un coloquio do Consello da Cultura constata a existencia dun novo tipo de incendios forestais

Son megaincendios, que afectan a unha superficie maior de 30.000 hectáreas; son máis severos e provocan un maior dano ao chan e á vexetación; pon en perigo a máis persoas e propiedades e están moi condicionados polo cambio climático. Estas son algunhas das características dos novos incendios forestais bosquexadas por expertos e profesionais no marco do coloquio “Unha nova xeración de incendios” que se celebrou no Consello da Cultura Galega. A cita tamén puxo sobre a mesa a necesidade de actuar cunha maior decisión en prevención e na orixe estrutural para paliar a situación.
17/01/2018

Expertos analizan desde mañá no Consello da Cultura as novas características dos incendios forestais

Unha vaga de lumes arrasou en outubro de 2017 unhas 50.000 hectáreas en dous días no noso país. Nese mesmo ano en Portugal, o Instituto de Conservação da Natureza e das Florestas (ICNF) contabilizou unhas 418.000 hectáreas queimadas. Son lumes cada vez máis virulentos contra persoas e edificacións. Sobre as características desta nova vaga de incendios trata o coloquio que comeza mañá no Consello da Cultura Galega. Durante dous días, expertos de Galicia e Portugal analizarán a situación actual e discutirán que medidas se deberían adoptar para atenuar os seus eventuais impactos. A cita, que ten as prazas esgotadas, poderá seguirse en directo a través do sitio web da institución.
10/01/2018

O plenario do Consello da Cultura Galega pide o máximo grado de protección para o Centro Gallego de Bos Aires e o Museo Carlos Maside

O Consello da Cultura Galega celebrou no serán deste martes unha sesión plenaria ordinaria na que se aprobou un informe sobre o Centro Gallego de Bos Aires, no que considera que merece o máis algo grado de protección xurídica sobre o patrimonio cultural que custodia. Ademais, tamén aprobou outro sobre o Museo Carlos Maside a que insta ao goberno galego á declaración de BIC e a manter unida a súa colección. Na sesión presentouse o programa de actividades para este 2018 no que pecha o ciclo sobre as Irmandades da Fala, recupera a figura de María Victoria Moreno e fará unha exposición que condensa o discurso “Alba de Gloria” que Castelao pronunciou na capital arxentina hai 70 anos. A sesión contou coa presenza do Presidente de Honra da institución, o presidente da Xunta de Galicia, Alberto Núñez Feijóo.
26/12/2017

O Consello da Cultura presenta no Museo de Pontevedra a edición de “Chucurruchú” de Antonio Iglesias Vilarelle

É unha obra con forte arraigamentoo na memoria musical de Pontevedra. “Chucurruchú” de Antonio Iglesias Vilarelle é unha suite en tres movementos que plasma musicalmente a procesión que se celebraba nesta cidade unha semana despois do Corpus. Agora, o Museo de Pontevedra acolle a presentación da edición, revisión e estudo desta peza elaborada polo Consello da Cultura Galega. A cita terá lugar o vindeiro díaa 27 coa presenza da vicepresidenta, Rosario Álvarez, do profesor Luís Costa e do autor do estudo crítico, José Antonio Cantal.
21/12/2017

O Consello da cultura presenta o Mapa Sonoro de Galicia, unha web para explorar a diversidade cultural de Galicia a través do audio

O Mapa Sonoro de Galicia (mapasonoro.consellodacultura.gal) é un novo proxecto web do Consello da Cultura Galega (CCG) que nace co obxectivo de ofrecer unha perspectiva xeográfica a coleccións sonoras xa custodiadas pola institución (no Arquivo Sonoro de Galicia) ou por outras entidades e particulares. Está especializado en coleccións de recollida antropolóxica, etnográfica, lingüística ou de sons da natureza, ambiente ou de actividade humana.
15/12/2017

Unha mesa redonda e unha publicación do Consello da Cultura completan a revisión do legado de Anna Turbau sobre Galicia

O presidente do Consello da Cultura Galega (CCG), Ramón Villares, e a editora da obra, Natalia Poncela, presentaron esta mañá “Anna Turbau. Galicia, 1975-1979”, a publicación que recolle unha parte significativa do legado que a fotógrafa Anna Turbau (Barcelona, 1949) cedeu ao CCG. A publicación, xunto coa exposición, comisariada por Margarita Ledo (Pazo de Fonseca, ata o 16 de xaneiro), permiten ver os conflitos sociais, políticos e humanos cos que a fotógrafa se atopou a finais dos anos setenta. O volume deuse a coñecer no marco dunha serie de actividades en que tamén houbo unha mesa redonda na que participaron, ademais de Anna Turbau, César Portela, Cristina Zelich e Margarita Ledo.
14/12/2017

Alberto Núñez Feijóo é investido Honoris Causa pola Universidade Trás os Montes cunha laudatio de Ramón Villares

A Universidade de Trás-Os-Montes e Alo Douro (UTAD) recoñeceu neste serán ao presidente da Xunta, Alberto Núñez Feijoo, co título Doutor Honoris Causa. O acto contou coa participación do presidente do Consello da Cultura Galega (CCG), Ramón Villares, que leu a laudatio do homenaxeado na que destacou a historia recente das relacións e conexións entre Galicia e Portugal.
12/12/2017

O Consello da Cultura xunta mañá a poesía galega e catalá nunha nova edición de “Poetas Itinerantes”

Mañá mércores terá lugar no Consello da Cultura Galega unha nova edición do recital “Poetas Itinerantes”, un encontro promovido por esta institución xunto co Instituto Ramón Llul e o Etxepare para exhibir o que se está a facer en Galicia, Cataluña e o País Vasco a nivel poético. A cita, que estaba previsto que se celebrase en outubro, tivo que ser adiada pola imposibilidade de se desprazar da comitiva catalá. Nela participan Anna Gual, Blanca Llum Vidal, Joan Pons, Marilar Aleixandre, Yolanda Castaño e Rosalía Fernández Rial.
30/11/2017

O uso de técnicas variadas e aliaxe de prata e ouro caracterizan a ourivaría castrexa

O Tesouro de Recouso é o conxunto de ourivaría castrexa estudado cun maior número de técnicas analíticas. Sobre el falouse na última sesión do ano dos Encontros co patrimonio que organiza o Consello da Cultura Galega. A cita serviu para explicar a variabilidade tecnolóxica, a aliaxe de materiais e a diversidade de usos da ourivaría dos castros. A coordinadora deste encontro, Rebeca Blanco Rotea, aproveitou para facer balance deste tipo de encontros que suma xa 15 sesións ás que asistiron unhas 750 persoas e que serviron para dar a coñecer á cidadanía a situación actual do patrimonio.
29/11/2017

O Consello da Cultura aborda mañá a ourivaría castrexa nunha xornada

En 1920 atopouse no concello de Oroso un conxunto composto por 16 arracadas, diversos elementos de suspensión, tres lingotes e unha masa de fundición. É coñecido como o Tesouro de Recouso o conxunto de ourivaría castrexa estudado cun maior número de técnicas analíticas. Sobre el, pero tamén sobre ourivaría da cultura castrexa, tratará a xornada que o Consello da Cultura Galega (CCG) organiza mañá. A cita insírese dentro do ciclo “Encontros co patrimonio”, que cumpre dous anos, e será retransmitida en directo desde o web da institución.
29/11/2017

A xornada “Bo uso e mal uso do mar” analizará mañá a relación das mulleres co medio mariño

Mañá comeza en Pontevedra a cuarta edición da xornada “Bo e mal uso do mar”, que este ano pon o foco nas mulleres que se dedicaron aos oficios do mar, á investigación en ciencias mariñas e en educación para a sustentabilidade oceánica. A cita está organizada polo Consello da Cultura Galega e a Universidade de Vigo, a través do Campus do Mar. A xornada, que conta con douscentos asistentes inscritos, poderase seguir en directo desde o web da Universidade de Vigo.
27/11/2017

Expertos abordan mañá no Consello da Cultura a relación entre arte e pensamento

O Consello da Cultura Galega (CCG) estrea novo ciclo de xornadas que se chama “Entre... e a arte”. A primeira das paradas céntrase en analizar a relación existente entre o fenómeno artístico e o pensamento, e, polo tanto, titúlase “Entre o pensamento e a arte”. A cita, coordinada por Miguel Fernández-Cid, Asunta Rodríguez e Jesús Pastor Bravo, reunirá diferentes tipos de pensamentos filosóficos ou intelectuais que tratan sobre estas materias.
23/11/2017

Expertos instan no Consello da Cultura a introducir cambios para paliar a degradación ambiental

Once expertos debullaron ao longo do día de hoxe como está a afectar acción do home no medio en cuestións concretas como a enerxía, os residuos urbanos, a auga ou a nosa propia diversidade. A nivel global, pero tamén a nivel galego, todos incidiron nos efectos negativos que está a sufrir o medio pola acción humana e instaron a introducir cambios. Así se falou na xornada “O Antropoceno e Grande Aceleración. Unha ollada desde Galicia” que coordinou o profesor Francisco Díaz-Fierros no Consello da Cultura Galega.
22/11/2017

Mañá comeza no Consello da Cultura unha xornada que analiza a acción do ser humano na degradación da terra

1950 é un ano determinante para a xeoloxía. É cando se marcou o inicio dunha nova época xeolóxica coñecida como o Antropoceno. Nese ano tamén se fixa o comezo da “Grande Aceleración”. Estas dúas nocións poñen en evidencia que a acción do home ten repercusións negativas no Sistema Terra. Sobre esta problemática xira a xornada “O Antropoceno e a ‘Grande Aceleración’. Unha ollada desde Galicia”, que terá lugar mañá no Consello da Cultura Galega. A cita será inaugurada polo coordinador, Francisco Díaz Fierros e retransmitirase en directo desde o web da institución.
21/11/2017

O Consello da Cultura Galega e a Xunta acordan estudar a situación laboral da muller na cultura galega

O presidente do Consello da Cultura Galega (CCG), Ramón Villares; o vicepresidente, Alfonso Rueda; e mais o conselleiro de Cultura, Educación e Ordenación Universitaria, Román Rodríguez, asinaron este serán un acordo de colaboración para a elaboración do informe “A muller na cultura galega: condicións sociolaborais no ámbito cultural con perspectiva de xénero”. Un documento que pretende servir para coñecer cal é a situación da muller no sector cultural e que permitirá ao goberno galego implementar as accións políticas que sexan necesarias.
20/11/2017

Aberto o prazo de inscrición da xornada que analiza a relación da arte co pensamento

O Consello da Cultura Galega estrea novo ciclo de xornadas que pretenden afondar na arte conectándoo con outras perspectivas. A primeira das paradas centrase en analizar a relación da arte co pensamento e, polo tanto, leva por título “Entre o pensamento e a arte”. A cita ten aberto o prazo de inscrición no web do CCG e xuntará, o vindeiro martes 28 de novembro, diferentes tipos de pensamentos filosóficos ou intelectuais arredor da arte. Miguel Fernández-Cid, Asunta Rodríguez e Jesús Pastor Bravo son os coordinadores desta proposta.