noticias

Rexistros 31 a 60 de 1574
21/03/2019

Un informe do Consello da Cultura Galega pide un Plan de Arquivos de Galicia articulado desde perspectivas de xénero e feministas

Non son só depósitos que xuntan documentación administrativa, senón que son centros que atesouran a memoria colectiva dun país. Deles poderiamos saber datos como o número e características de profesionais dun sector, quen solicita licenzas de obra, quen compra unha vivenda ou quen paga impostos. O material que gardan 15 dos 313 concellos galegos supoñen preto de trece quilómetros de material, o que dá conta da súa dimensión. E nel as mulleres –como “categoría” documental– están completamente invisibilizadas. Así figura no Informe sobre os arquivos públicos en Galicia. Unha perspectiva de xénero e feminista que acaba de presentar a presidenta do Consello da Cultura Galega (CCG), Rosario Álvarez; a coordinadora da Comisión de Igualdade, María Xosé Porteiro; e as autoras do informe, Dolores Pereira, Olimpia López e Mariám Mariño. O texto indica que a presenza das mulleres nos criterios de ordenación, clasificación e difusión é inexistente; que se incumpren as leis de igualdade, de arquivos e de transparencia e que urxen medidas de planificación, descrición e xestión desde esta profesión ocupada no seu 78,6% por mulleres.
15/03/2019

O Consello da Cultura Galega inicia contactos con fundacións de ámbito literario para futuras colaboracións

A biblioteca do Consello da Cultura Galega (CCG) acolleu esta semana un encontro de carácter informal cunha serie de fundacións galegas de ámbito literario para coñecer da súa situación, intereses e necesidades de cara a futuras colaboracións. A xuntanza encadrouse no marco dunha rolda de contactos que a actual Executiva do CCG está a desenvolver con entidades de ámbito cultural.
13/03/2019

Isabel Burdiel presenta no Consello da Cultura Galega a súa biografía de Emilia Pardo Bazán

O Consello da Cultura Galega acollerá o venres 15 de marzo, ás 12:00 horas, a presentación de "Emilia Pardo Bazán" (Taurus, 2019), a biografía da escritora galega asinada por Isabel Burdiel. A presidenta do Consello da Cultura Galega, Rosario Álvarez, acompañará á autora da publicación xunto cos profesores da Universidade de Santiago de Compostela (USC), José Manuel González Herrán, Ramón Máiz, e Ramón Villares.
13/03/2019

Preséntase a táboa periódica en galego na xornada que celebra os 150 anos da súa publicación

Cal é a relación da táboa periódica con Youtube? E coa música? Ou coas mulleres? E que achegou Galicia ao sistema periódico? As respostas a estas preguntas están na xornada que terá lugar mañá no Consello da Cultura Galega e que se titula “O ano internacional do sistema periódico: reflexións desde Galicia”. A cita está coordinada por Manuel Bermejo, Ana González e Marcelino Maneiro e inclúe un fito importante: a presentación da táboa periódica en galego. Rosario Álvarez, presidenta do Consello da Cultura Galega, vai inaugurar esta cita xunto con Valentín García, secretario xeral de Política Lingüística. A xornada retransmitirase en directo no noso web.
11/03/2019

A sétima edición de “No bico un cantar” reúne na raia a mocidade galega e portuguesa

A localidade pontevedresa de Tui acollerá o vindeiro 7 de xuño a sétima edición do concerto “No bico un cantar”, unha proposta que xunta música, poesía e mocidade. A cita foi presentada esta mañá por Rosario Álvarez, presidenta do Consello da Cultura Galega quen destacou o valor da proposta deste ano no que “convidamos a nenos galegos e portugueses a cantar para establecer vínculos por riba da raia”. Canda ela estaban Carmen Pomar, conselleira de Educación, Universidade e Formación Profesional; Anxo Lorenzo, director xeral de Políticas Culturais, xunto co alcalde de Tui, Carlos Vázquez, e o director artístico desta proposta, Maximino Zumalave. A cita xuntará un gran coro de cincocentos nenos e nenas chegados dos conservatorios profesionais e das escolas de música da zona. Nela estrearase a versión musical do poema de Xosé María Álvarez Blázquez “No rego do prado!” a cargo do compositor Alexis Rozas.
11/03/2019

A situación actual e a memoria da cultura galega estarán presentes en Nova York en dúas mesas redondas

O Instituto Cervantes de Nova York e a City University of New York acollen este martes 12 e mércores 13, respectivamente, dúas mesas redondas para achegar novas perspectivas sobre a cultura galega. A primeira delas falará sobre a memoria e a segunda sobre o contexto histórico e perspectivas de futuro da cultura galega. Nelas participa a profesora Dolores Vilavedra, acompañada de personalidades do mundo académico e institucional da galeguidade en Estados Unidos, como Alex Alonso, José del Valle ou John Patrick Thompson. A cita insírese dentro do programa de actos paralelos á exposición “Os adeuses” que se pode ver no Museo da Inmigración de Ellis Island ata o 5 de maio.
08/03/2019

O Consello da Cultura Galega sube á rede nova documentación das publicacións feministas

Co gallo do Día Internacional da Muller traballadora a Comisión de Igualdade do Consello da Cultura Galega programou varias actividades arredor desta data. En colaboración co CGAI está a celebrar a oitava edición do ciclo “Olladas de muller. Creadoras galegas de imaxe”, que pretende dar conta da produción audiovisual feita por mulleres de Galicia e Portugal. Ademais, no marco do proxecto de recuperación documental “A Saia”, subiu tres novas cabeceiras a este repositorio que concentra as publicacións que deixou tras de si o movemento feminista no noso país.
07/03/2019

Mañá comeza en Rennes un congreso que explora as conexións entre Galicia e Bretaña

Galicia e Bretaña son dúas rexións de contrastes: mar e bosque, rías do norte e do sur, acantilados e montañas... Estas son tamén algunhas características definitorias de ambos os territorios que permiten establecer certos paralelismos. Sobre eles falarán especialistas galegos e franceses en Rennes. A cita titúlase “Les paysages Bretagne Galice” e está organizada conxuntamente polo Consello da Cultura Galega (CCG) e a Université Rennes 2. A presidenta da institución, Rosario Álvarez, intervirá coa laudatio a Xesús Alonso Montero, no marco da homenaxe que lle fai a universidade bretoa.
05/03/2019

O Consello da Cultura prorroga ata o 17 de marzo “Alba de Gloria”, a mostra que recrea o mítico discurso de Castelao

“Alba de Gloria. Unha experiencia” é a mostra coa que o Consello da Cultura Galega recrea o último gran discurso que pronunciou Castelao. A mostra terá as súas portas abertas ata o vindeiro 17 de marzo. Ata o momento pasaron pola exposición preto de 15.000 persoas mais 2.500 escolares no marco do programa didáctico.
05/03/2019

O Consello da Cultura Galega e o CGAI achegan desde mañá a creación feminina no ciclo “Olladas de muller”

“A nosa intención era dar soporte de difusión a este traballo inmenso de creación audiovisual que estaban a facer as mulleres” explica Encarna Otero, alma máter do ciclo “Olladas de muller. Creadoras galegas de imaxe”, que cumpre neste 2019, oito edicións. A cita arrinca mañá no CGAI (rúa Durán Loriga, ) coa proxección do filme “Arte + muller+Galicia” de Rosario Sarmiento e remata o sábado coa proxección de catro curtametraxes que dan conta da boa saúde da creación audiovisual feminina no noso país. Haberá sesións de debate coas propias creadoras e este ano, como novidade, exhíbese a creación feita en Portugal. A entrada é de balde.
01/03/2019

O Consello da Cultura Galega e a Universidade de Rennes exploran nun congreso as conexións entre Galicia e Bretaña

Especialistas galegos e franceses analizarán os vindeiros días 8 e 9 de marzo as conexións entre as paisaxes galegas e bretoas. A cita, que ten lugar en Rennes, titúlase “Les paysages Bretagne Galice” e está organizada conxuntamente polo Consello da Cultura Galega (CCG) e a Université Rennes 2. A presidenta da institución, Rosario Álvarez, intervirá coa laudatio a Xesús Alonso Montero, no marco da homenaxe que lle fai a universidade bretoa.
27/02/2019

Lluis Bassets e Francisco Castro falarán mañá de fascismos dixitais no Consello da Cultura Galega

Lluis Bassets (Barcelona, 1950) é un coñecido xornalista pero tamén un destacado pensador. Mañá estará no Consello da Cultura Galega (CCG) para falar de fascismos dixitais. Insírese no ciclo “Pensarmos”, unha proposta da Sección de Pensamento que pretende reflexionar sobre temas de actualidade nun formato dialogado. Nesta ocasión, o interlocutor do convidado será o editor Francisco Castro. A presidenta do CCG, Rosario Álvarez, e a coordinadora do ciclo, Carme Adán, inaugurarán esta cita que se poderá seguir en directo a través do sitio web da institución.
27/02/2019

Preséntase en Sicilia unha nova reedición en italiano do cómic “Vivir no solo”

Este xoves e venres, o Parque de Nebrodi, un dos catro parques que existen na illa de Sicilia, conmemora o seu vixésimo aniversario. Unha celebración que se xunta con outra efeméride, a Década internacional do Suelo 2015-2024. No marco destes acontecementos están previstos dous actos nos que se presentará a reedición do cómic "Vivire nel Suolo", a adaptación ao italiano da banda deseñada xestada polo Consello da Cultura Galega (CCG) no ano 2000. En total imprimiranse en italiano 10.000 novos exemplares, que se suman aos 10.000 xa editados en 2015 pola Sociedade Italiana da ciencia do solo.
27/02/2019

A Cónsul da República Arxentina visita o Consello da Cultura Galega

O vicepresidente do Consello da Cultura Galega (CCG) e responsable do Arquivo da Emigración Galega (AEG), Xosé Manoel Núñez Seixas, e o xerente da institución, Marcelino Fernández, recibiron esta mañá a visita da Cónsul da República Arxentina en Galicia, Asturias, León e Zamora, Silvina Montenegro. No transcurso da xuntanza analizaron posibles vías de colaboración entre ambas entidades relativas á recuperación documental de materiais relacionados coa emigración galega na Arxentina, ademais de explorar diferentes vías de difusión de fondos existentes.
26/02/2019

Miguel Fernández-Cid, membro da Sección de Creación e Artes Visuais Contemporáneas, é o novo director do MARCO

Miguel Fernández-Cid (Pontevedra, 1956) é o novo director do Museo de Arte Contemporánea de Vigo, MARCO. O padroado da Fundación MARCO elexiuno por unanimidade logo da proposta de nomeamento realizada pola Comisión Técnica de Valoración para o posto de director. Esta comisión estaba formada por catro expertos de recoñecido prestixio: Miguel Zugaza, director do Museo de Bellas Artes de Bilbao; Juan Manuel Bonet, director do Instituto Cervantes; Antón Castro, profesor da Universidade de Vigo; e Lucas García Guirao, subdirector adxunto de Museos Estatais do Ministerio de Cultura e Deporte.
25/02/2019

Mañá pecha en Compostela In situ, o ciclo que analiza os cascos históricos

Vigo, Ferrol, Ourense e Ribadavia contan con cascos históricos que teñen modelos de xestión, problemáticas e plans especiais diferenciados. Desde o mes de setembro, tres xornadas permitiron coñecer como eran e as súas propias especificidades. Forman parte do foro In situ. Cascos históricos, que organiza a Sección de Patrimonio e Bens Culturais do Consello da Cultura Galega (CCG) e que chega á súa fin cun gran debate en Santiago. Esta última cita terá lugar mañá, cando todos os expertos consultados se xuntarán na sede do CCG para debater se é posible conciliar os intereses da cidadanía coa rehabilitación e coa xestión destes espazos. A presidenta do CCG, Rosario Álvarez, xunto coas coordinadoras da xornada, Rebeca Blanco-Rotea e Teresa Nieto, inaugurarán esta cita que se poderá seguir en directo a través do sitio web da institución.
22/02/2019

Un concerto e unha publicación, entre as actividades do Consello da Cultura Galega para o Día das Letras Galegas.

O Museo do Pobo Galego acolleu esta mañá un gran acto que xuntou a todas as institucións e entidades implicadas na celebración do Día das Letras Galegas e que este ano pon os ollos en Antonio Fraguas. Nel participou a presidenta do Consello da Cultura, Rosario Álvarez, quen destacou o incansable labor do homenaxeado no tempo que permaneceu no Consello da Cultura Galega ao dicir que “foi un membro activo e, á fronte da Sección de Antropoloxía, amosou una gran capacidade e dispoñiblidade para conectar, para servir de ponte coa cultura tradicional”. Ademais, indicou as actividades que a institución prepara para este ano entre as que destaca unha publicación e un concerto.
21/02/2019

O Consello da Cultura Galega achégase á poliédrica figura de Plácido Castro cunha xornada

“Era un rara avis, unha persoa de clase alta fondamente comprometida por Galicia que xogou un papel fundamental ao trazar os eixes básicos dunha política exterior de vocación universalista” explica Xulio Ríos, coordinador da xornada “Vocacións e ideais en Plácido Castro”, que o Consello da Cultura Galega (CCG) organiza mañá en Cambados (a partir das 16:00 horas en Exposalnés). Formado en Londres, políglota, falou en galego na BBC pero tamén traballou no portugués Jornal de Notícias, no arxentino La Nación e en publicacións galegas. Ademais de xornalista, foi tamén tradutor. Sobre todas estas facetas xira esta cita que inaugura a presidenta da institución, Rosario Álvarez, xunto coa alcaldesa de Cambados, Fátima Abal, e con Xulio Ríos.
20/02/2019

O Consello da Cultura felicita a Manuel Gallego polo Premio Nacional de Arquitectura

Non é a primeira vez que recibe o Premio Nacional de Arquitectura. Manuel Gallego Jorreto (O Carballiño, 1936) recibiuno en 1997 polo edificio do Museo de Belas Artes na Coruña e agora repite galardón pero por toda a súa traxectoria. Das súas cinco décadas de carreira profesional destacan obras como a residencia oficial do presidente da Xunta en Montepío (Santiago) ou centro de saúde de Viveiro. Foi membro da desaparecida Sección de Arquitectura do Consello da Cultura Galega, onde participou en numerosas actividades. Hoxe recuperamos unha conferencia que ofreceu no marco do ciclo “Palestras maxistrais” (fai scroll na seguinte páxina) titulada “40 anos de arquitectura”

Escoita a conferencia
19/02/2019

Unha publicación escolma trinta figuras científicas relevantes do Álbum da Ciencia

Buscaron figuras relevantes, de diferentes épocas, de distintas disciplinas, que compartisen un denominador común: ser figuras relevantes para a ciencia en Galicia. O resultado é Álbum da ciencia. 30 nomes e as súas achegas, unha publicación que escolma trinta nomes do proxecto homónimo que mantén o Consello da Cultura Galega (CCG) en rede. “Unha santa compaña de inmortais da ciencia e os seus froitos para o país” indicou a presidenta da institución, Rosario Álvarez, durante a presentación. Con ela estaban os coordinadores do libro, Francisco Díaz Fierros, Xosé A. Fraga e Alfonso Mato, xunto con Elena Vázquez Cendón, coordinadora da Sección de Ciencia, Natureza, Tecnoloxía e Sociedade, que considera que “as vidas destes personaxes son un espello onde mirarse”. A publicación está dispoñible para descarga desde o web do CCG.
17/02/2019

Contactos de alto nivel na visita aos Estados Unidos con proxectos de futuro institucionais e culturais

A Delegación do Consello da Cultura Galega (CCG) ven de abrir novas vías para incrementar a presenza da cultura galega en Estados Unidos mediante contactos e acordos de alto nivel institucional. É o caso da exposición "Os Adeuses", que permanecerá no Museo de Ellis Island até o 5 de maio, como recordatorio da historia da emigración galega nos Estados Unidos. Diana R. Pardue, directora deste centro de referencia para as migracións no mundo, mantivo un proveitoso encontro coa representación do CCG, no que se estudou a posibilidade de facer futuras itinerancias. Na xuntanza falouse, asemade, da definición e concepción do proxecto do Museo das Migracións Galegas que está a ser desenvolvido no seo do Consello.
13/02/2019

Aberta a inscrición da conferencia de Lluis Bassets no Consello da Cultura Galega para falar de fascismos dixitais

Lluis Bassets é un coñecido xornalista pero tamén un destacado pensador. É o próximo convidado do ciclo “Pensarmos”, unha proposta da Sección de Pensamento do Consello da Cultura Galega (CCG), que coordina Carme Adán. A inscrición a esta conferencia, que terá lugar o vindeiro 28 de febreiro, pódese facer a través do sitio web da institución.
08/02/2019

A presidenta do Consello da Cultura presenta hoxe en Nova York un portal sobre a diáspora galega

O King Juan Carlos I Center, espazo dependente da Universidade de Nova York, acolle hoxe unha xuntanza de traballo na que se dará a coñecer o proxecto dunha plataforma de Internet mantida pola diáspora. A presidenta do Consello da Cultura Galega (CCG), Rosario Álvarez, dará conta desta iniciativa diante dun grupo de galegos e galegas que residen en Nova York e Nova Jersey. Pola tarde, xunto co presidente da Xunta, Alberto Núñez Feijóo, co vicepresidente do CCG, Xosé Manuel Núñez Seixas, e co recoñecido hispanista James Fernández presentarán o acto de inauguración da exposición “Os adeuses” no Museo de Ellis Island (sábado 9 ás 12:00, hora local) e as mesas redondas que terán lugar nos vindeiros días.
06/02/2019

Un encontro coa colectividade de Newark abre a axenda da presidenta do Consello da Cultura Galega en Nova York

A reunión de traballo coa comunidade de Newark abre mañá xoves as actividades da visita institucional que a presidenta do Consello da Cultura Galega (CCG), Rosario Álvarez, inicia esta semana en Nova York. Nela destaca a inauguración da exposición “Os adeuses” nun lugar emblemático para a emigración como é o Museo de Ellis Island (sábado 9 ás 12:00 horas). “É unha axenda ambiciosa que marca un fito na presenza exterior e visibilidade da cultura galega”, en palabras do vicepresidente do CCG, Xosé Manoel Núñez Seixas. A presidenta reunirase coas colectividades presentes en Nova York pero tamén con destacados responsables de centros académicos e de recoñecido prestixio. No marco desta viaxe darase a coñecer o proxecto dunha plataforma virtual para que os integrantes da diáspora galega partillen as súas experiencias de desenvolvemento profesional e creativo. Ademais, haberá mesas redondas en lugares destacados como son a Universidade de Columbia ou o Instituto Cervantes.
30/01/2019

Aberta a inscrición da xornada que recupera a figura do tradutor e humanista Plácido Castro

A tradución, o xornalismo e o universalismo son os tres eixes que marcaron a vida de Plácido Castro (1902-1967). Sobre estas tres facetas do galeguista discorrerá a xornada “Vocacións e ideais en Plácido Castro” que a Comisión de Acción Exterior do Consello da Cultura Galega (CCG) e o Concello de Cambados, en colaboración coa Fundación Plácido Castro, celebrarán o vindeiro venres 22 de febreiro en Cambados. A cita está coordinada por Xulio Ríos e acaba de abrir o seu prazo de inscrición no web do CCG.
29/01/2019

O Consello da Cultura Galega reflexiona sobre o coleccionismo e a educación no sector artístico

Arte+coleccionismo e Arte+educación son dúas publicacións que achegan novas lecturas sobre o sector da arte e en relación con outras disciplinas. Son dous textos que recollen as intervencións de dous congresos realizados en 2015 e 2016, respectivamente, pero que teñen total vixencia. “Primeiro porque hai temas como o coleccionismo sobre o que non hai case nada publicado, e segundo porque a situación a día de hoxe aínda está bastante peor que daquela” apuntou Marisa Sobrino, editora dun dos textos e responsable da Sección do Consello da Cultura Galega (CCG) que programou aquelas citas. A presidenta da institución, Rosario Álvarez, apuntou a pertinencia de abordar este tipo de reflexións que contribúen a coñecer a situación actual, ao tempo que anunciou que “este ano prestaremos atención ao mecenado artístico, aínda que explorando outro tipo de formatos”. Ambos os dous volumes xa se poden descargar desde o sitio web corporativo.
23/01/2019

Javier Echeverría abre mañá o ciclo Pensarmos cunha reflexión sobre a sociedade e a tecnoloxía

“Entre cavernas: tecnopersonas e tecnomundos” é o título do relatorio que ofrecerá mañá no Consello da Cultura Galega (CCG) o filósofo e matemático Javier Echeverría (Pamplona, 1948). Con el ábrese o ciclo Pensarmos, coordinado por Carme Adán e que consiste en charlas, debates e intercambio de ideas que pretende abordar problemas actuais. A cita, organizada pola Sección de Pensamento do CCG, poderá seguirse en directo a través do web da institución.
17/01/2019

O Consello da Cultura Galega estrea o ciclo Pensarmos para reflexionar sobre a actualidade

A Sección de Pensamento do Consello da Cultura Galega (CCG) acaba de botar a andar o ciclo ”Pensarmos”, unha proposta de charlas, debates e intercambio de ideas que pretende abordar os problemas da actualidade. Posverdade, fascismos dixitais, tecnopersoas, precarización da vida, perda de liberdades… son algunhas das temáticas que se tratarán no marco deste foro, que comeza o día 24 de xaneiro coa participación do filósofo Javier Echevarría. A cita está coordinada por Carme Adán e celebrarase o cuarto xoves de cada mes. A primeira das citas xa ten aberto o prazo de inscrición no web do CCG.
15/01/2019

O Consello da Cultura Galega e o ILG recollen en Antroponimia e lexicografía a riqueza dos apelidos galegos

Rodríguez é o apelido máis común en Galicia con 237.000 usuarios. Hai máis de 21.100 apelidos que teñen un único portador. Láncara, Sanfíns, Miñor, Santradán ou Manselle son algúns apelidos en perigo de extinción. Son cuestións que recolle Antroponimia e lexicografía, a publicación que elaboraron o Consello da Cultura Galega (CCG) e o Instituto da Lingua Galega (ILG) e que se deu a coñecer esta mañá. A presentación contou coa presenza da presidenta do CCG, Rosario Álvarez, quen destacou a calidade das diferentes contribucións. Canda ela estaban o director do ILG, Xosé Luís Regueira, e a editora do texto, Ana Isabel Boullón. Esta monografía, que xa se pode descargar desde o web do CCG, pretende contribuír a afondar no coñecemento dos apelidos en Galicia.
11/01/2019

O Consello da Cultura reforzará en 2019 a acción exterior e a renovación institucional

O Consello da Cultura Galega (CCG) celebrou no serán deste xoves unha sesión plenaria ordinaria na que se aprobou o programa de actividades para 2019. Entre elas figura o Concerto das Letras Galegas, que este ano correrá a cargo da orquestra SondeSeu; a colaboración institucional para a recuperación da figura de Antón Fraguas; unha maior innovación nos formatos de actividades así como o reforzo das actuacións en acción exterior e emigración. Nesta última liña, sitúase a exposición “Os adeuses”, en Ellis Island (Nova York), que se inaugura o vindeiro de 9 de febreiro e irá acompañada dun variado programa cultural. A sesión contou coa presenza do Presidente de Honra da institución, o presidente da Xunta de Galicia, Alberto Núñez Feijóo, quen destacou na súa intervención a relevancia do papel asesor do CCG.