noticias

Rexistros 31 a 60 de 1699
10/01/2020

O Consello da Cultura Galega e a Secretaría Xeral da Emigración reeditan o “Estudio sobre emigración”

En pleno éxodo migratorio a América, Eduardo Vincenti y Reguera publicou un texto que ofrecía informacións precisas e útiles para orientar aos que xa decidiran marchar. “Estudio sobre migración” foi un texto innovador no formato e atípico no seu contexto que agora o Consello da Cultura Galega e a Secretaría Xeral da Emigración reeditan en formato facsimilar dentro da colección Clásicos da Emigración. A presentación tivo lugar esta mañá a cargo dos responsables desas dúas entidades, Rosario Álvarez e Antonio Rodríguez Miranda, respectivamente, que destacaron a relevancia de poñer á disposición da sociedade unha obra que axuda a entender o fenómeno migratorio. Canda eles estaban o director do Arquivo da Emigración Galega, Xosé Manoel Núñez Seixas, e o autor do prólogo, Raúl Soutelo. A publicación xa se pode descargar deste o web do Consello da Cultura Galega.
09/01/2020

Presentado o Álbum de Galicia, a colección biográfica do país

Rosalía de Castro, Castelao, Concepción Arenal e Manuel Antonio son figuras destacadas da cultura galega e tamén algúns dos persoeiros que se poden atopar no Álbum de Galicia. O Consello da Cultura Galega presentou esta tarde este proxecto que pon na rede a biografía de 504 figuras representativas da cultura galega xa finadas, acompañada de 1846 fotografías e 1392 documentos. “O Álbum de Galicia permite poñerlle rostro aos homes e mulleres que construíron a historia do país” explicou a presidenta Rosario Álvarez. Canda ela estaban a secretaria da institución, Dolores Vilavedra, e o técnico, Manuel Gago, que destacaron o rigor na elaboración e a potencialidade de divulgación desta proposta. O Álbum deuse a coñecer aos membros do Plenario do Consello da Cultura Galega, no marco dunha sesión que contou coa asistencia do seu Presidente de Honra, Alberto Núñez Feijoo e na que expuxo a memoria de actividades de 2019 e o avance para o primeiro trimestre do ano.
30/12/2019

O Consello da Cultura Galega lamenta o pasamento de Andrés Fernández-Albalat Lois, un referente da arquitectura en Galicia

Andrés Fernández-Albalat Lois (A Coruña, 1924-2019) foi o responsable da fábrica de Sargadelos en Cervo, do estadio municipal Vero Boquete, das facultades de Bioloxía e Matemáticas da Universidade de Santiago (USC) así como de numerosos proxectos por toda Galicia. O arquitecto foi membro do plenario desta institución e participou en actividades encamiñadas a desenvolver un papel dinamizador entre profesionais da arquitectura e da política a propósito da arquitectura pública. Obtivo numerosos recoñecementos profesionais, entre os que destacan a Medalla Castelao, a Medalla de Ouro da Universidade da Coruña ou o Premio ARQano no 2008.
30/12/2019

Un proxecto do Consello da Cultura Galega difunde e contextualiza as primeiras longametraxes do audiovisual galego

Urxa, Continental e Sempre Xonxa son moito máis que as tres películas que en 1989 se estrearon en salas de cinema. Son un fito da cultura galega contemporánea. Baixo esta premisa o Consello da Cultura Galega (CCG) e a Corporación Radio e Televisión de Galicia (CRTVG) botaron a andar esta iniciativa que pon a disposición do público este patrimonio audiovisual, contextualizado con outros recursos e materiais didácticos que permite comprender a relevancia desta efeméride.
19/12/2019

O cancioneiro de Oencia incorpórase ao Mapa Sonoro de Galicia

Son preto de trescentas pezas nas que hai romances, milicias, cregos, seituras, berces, parrafeos e outros cantares xunto con contos e relatos que revelan a diversidade cultural do concello de Oencia (León), considerado tradicionalmente como un dos 48 concellos da Galicia estremeira. O traballo de recolleita deste patrimonio oral foi realizado por Xosé Lois Foxo e agora incorpórase ao Mapa Sonoro de Galicia.
18/12/2019

O Consello da Cultura Galega participa no Comité Consultivo de Filoloxía que realizou a súa primeira xuntanza

A presidenta do Consello da Cultura Galega, Rosario Álvarez, participou esta semana na primeira xuntanza do Comité Consultivo de Filoloxía. Trátase dun órgano de asesoramento constituído no mes de xullo que pretende debater as tendencias e cambios nas demandas sociais que resulten de interese para o desenvolvemento da actividade docente e investigadora deste centro, prestar apoio na elaboración e implantación do seu plan estratéxico e trasladar á sociedade información sobre a Facultade.
17/12/2019

Unha visita guiada e un parladoiro afondarán mañá na investigación histórica dos navegantes galegos no Museo de Pontevedra

Datas, nomes propios, fontes de información, mapas...., o parladoiro “A Galicia navegante na investigación histórica” pretende afondar nos aspectos históricos que rodean o relato que se constrúe en “Inventio Mundi” (Museo de Pontevedra, ata o 14 de xaneiro). Esta exposición do Consello da Cultura Galega está comisariada por Ofelia Rey e pretende dar a coñecer as repercusións que tivo para Galicia a primeira circunnavegación da Terra, a expedición de Magalhães-Elcano, cando se conmemora o quinto centenario da súa partida. Como complemento da exposición, mañá mércores realizarase unha visita guiada (18:30 horas) a cargo da comisaria e un parladoiro (19:30 horas) no que participan Pilar Cagiao, José Manuel Vázquez Lijó e Anxo Rodríguez Lemos.
11/12/2019

O xoves preséntase no Consello da Cultura Galega o libro-CD “Antonio Fraguas e a memoria musical de Cotobade”

“Antonio Fraguas e a memoria musical de Cotobade” é o libro-CD que mañá xoves (19:00 horas) se presenta no Consello da Cultura Galega. A secretaria da institución, Dolores Vilavedra, participa neste acto que pretende dar a coñece o traballo realizado por Xavier Groba e editado pola Central Folque no que se recolle a primeira achega á música de transmisión oral do concello de Cotobade. Tamén estarán presentes Ramón Castromil e Ramon Pinheiro Almuinha.
10/12/2019

O Consello de Comunidades Galegas insta a poñer en marcha dúas propostas do Consello da Cultura Galega

O informe coas directrices para a posta en marcha do Museo das Migración Galegas e o Plan Director do Patrimonio Documental das Sociedades Galegas no Exterior son dúas iniciativas elaboradas polo Consello da Cultura Galega e presentadas no XII Pleno do Consello das Comunidades Galegas, celebrado en Santiago de Compostela entre os días 3 e 4 de decembro. Estes dous informes, relevantes para o estudo, preservación e difusión da memoria da emigración galega, figuran como prioritarios nas conclusións elaboradas pola ponencia de cultura deste organismo.
10/12/2019

Un parladoiro reflexiona mañá en Pontevedra sobre a presenza do mar na literatura galega

A cultura popular galega está poboada de heroes lendarios e seres mitolóxicos que chegaron ou saíron do mar. Está o Teucro, o Urco, a Serea de Sálvora, a Maruxaina... ou o propio mar personificado que podemos ler en novelas como como “O triángulo da circunferencia” de Víctor Freixanes, “As luces do Norte” de Pemón Bouzas ou “Os nenos da varíola” de María Solar, entre moitos outros. Estes tres autores, baixo a coordinación de Dolores Vilavedra, participarán mañá (Museo de Pontevedra, 19:30 horas) no parladoiro “A Galicia navegante no imaxinario literario” organizado polo Consello da Cultura Galega (CCG). A cita pretende reflexionar sobre a importancia do mar e das navegacións na literatura ao fío da exposición “Inventio mundi” (Museo de Pontevedra, ata o 14 de xaneiro) coa que o CCG pretende dar a coñecer as repercusións que tivo para Galicia a primeira circunnavegación da Terra, a expedición de Magalhães-Elcano.
05/12/2019

Subidos á rede cen novos exemplares do semanario A Nosa Terra

A manifestación contra a cota láctea de 1994 é un dos tema de portada do número 606 do semanario A Nosa Terra. Con este exemplar ábrese a oitava entrega da difusión do fondo deste xornal que o Consello da Cultura Galega sube periodicamente ao web institucional desde 2018. Nesta ocasión, súbense cen novos números que comprenden os anos 1994 e 1995.
02/12/2019

Unha xornada analiza a creación cultural nunha contorna dixital

Iniciativas culturais que necesitan de Internet ben no proceso de creación, ben como soporte de difusión ou exhibición. No fondo esta é a idea sobre a que xira a xornada ”Contidos e prácticas culturais e artísticas na contorna dixital” que mañá se desenvolve no Consello da Cultura Galega (CCG). Bani Brusadin ou Esther Pérez-Amat son algunhas das persoas que participarán neste encontro no que tamén se exporán proxectos como @elbarroquista ou Faládeme de San Sadurniño. A presidenta da institución, Rosario Álvarez, e a coordinadora da Sección de Lingua, Literatura e Comunicación, Carme García Mateo, inaugurarán esta cita que se poderá seguir en directo a través de Internet.
27/11/2019

O Fraguas docente, xeógrafo, arqueólogo e etnógrafo centra a segunda xornada do Simposio das Letras Galegas

O Simposio Antonio Fraguas continúa hoxe e mañá no Museo do Pobo Galego con máis dunha ducia de relatorios que profundarán nas achegas do protagonista do Día das Letras Galegas ao campo da etnografía e do folclore, o que cultivou con maior intensidade, mais tamén á xeografía e á arqueoloxía, ás que contribuíu igualmente dende os anos de mocidade como membro do Seminario de Estudos Galegos. Nestes dous últimos eidos centrarase o programa deste mércores, que incidirá no labor de enlace de don Antonio entre o SEG e as novas xeracións de investigadores galeguistas. Haberá ademais ocasión de lembrar o Fraguas docente da man da catedrática emérita da Universidade de Vigo Camiño Noia, alumna de don Antonio no Instituto Rosalía de Castro de Santiago de Compostela nos anos 60.
27/11/2019

A trata de seres humanos centra a última sesión do ano do ciclo Pensarmos

Teresa García Montañés é especialista en violencia de xénero pero tamén en delitos de perigo, delincuencia económica, criminalidade empresarial, terrorismo, tortura, aborto, liberdade de expresión e tráfico de seres humanos desde un punto de vista teórico e práctico. E mañá abordará no Consello da Cultura Galega estes asuntos baixo o título "A trata de seres humanos e escravitudes do século XXI". Será a última sesión do ciclo Pensarmos que coordina Carme Adán. A presidenta da institución, Rosario Álvarez, será a encargada de inaugurar esta cita que se poderá seguir en directo a través do web do CCG.
26/11/2019

O Consello da Cultura Galega publica un centenar de cartas que Otero Pedrayo lle envíou a Fraguas

Son un total de 104 cartas que Ramón Otero Pedrayo lle enviou a Antonio Fraguas entre 1928 a 1976. Delas falan de historia, de antropoloxía, de xeografía e tamén de si mesmos. Co gallo do Simposio sobre Antonio Fraguas poñemos a disposición do público este lote de misivas que responde á colaboración entre a Fundación Otero Pedrayo e o Consello da Cultura Galega (CCG).
26/11/2019

O Simposio Antonio Fraguas convida a reflexionar sobre as raíces populares da lingua e da cultura galegas

A Real Academia Galega acolle este serán a primeira das tres xornadas do Simposio Antonio Fraguas, que continuará o mércores e o xoves no Museo do Pobo Galego (Santiago de Compostela). A música e as coplas da terra natal do protagonista do Día das Letras Galegas 2019, Cotobade, soarán da man do gaiteiro Oscar Ibáñez e a súa banda nesta primeira cita do encontro que lle porá o ramo á celebración do ano dedicado ao etnógrafo, historiador e xeógrafo. María Xosé Fernández Cerviño, colaboradora de Antonio Fraguas (1905-1999) no Museo do Pobo Galego durante décadas, trazará o perfil biográfico daquel rapaz da aldea de Insuela que chegou a ocupar na Real Academia Galega a cadeira de Castelao; Antonio Reigosa profundará no universo da Galicia máxica que tanto estudou, chea de mitos, ritos e figuras sobrenaturais que deixou documentados con detalle; e o académico Francisco Díaz-Fierros deterase na súa visión avanzada da paisaxe
25/11/2019

O ensino de moda e de deseño centra mañá unha xornada no Consello da Cultura Galega

Cal é o papel que están a desenvolver os centros formativos no ámbito da moda e do deseño? Sobre este asunto falarán mañá no Consello da Cultura Galega (CCG) responsables de empresas, axentes do ámbito da creación e da docencia nunha xornada titulada “A dialéctica da moda: deseño, arte, industria e mercados na Galicia do século XXI”. A presidenta do CCG, Rosario Álvarez, e o coordinador da Sección de Creación e Artes Visuais Contemporáneas, Quintana Martelo, inaugurarán esta cita coordinada por Sofía Santos e Rosario Sarmiento que se poderá seguir en directo a través do web da institución.
21/11/2019

A presidenta do Consello da Cultura Galega inaugura en Vilalba as Xornadas da Muller

A presidenta do Consello da Cultura Galega (CCG), Rosario Álvarez; a presidenta do Instituto de Estudos Chairegos (IESCHA), Marisa Barreiro; e a alcaldesa de Vilalba, Elba Veleiro, inauguran este venres na casa da cultura de Vilalba as “Xornadas da muller”. Unha iniciativa promovida polo CCG e o IESCHA que, durante dous días, pretende destacar o papel das mulleres na cultura a través de conferencias, debates e música.
20/11/2019

As zarzuelas destacan na nova entrega do proxecto “Lousas”

“La Meiga” , “Maruxa”, “Los Gavilanes”, “Los Claveles”, “La del Soto del Parral” son algunhas das zarzuelas que se poden escoitar na nova entrega do proxecto “Lousas”. Esta proposta do Consello da Cultura Galega pon na rede o patrimonio sonoro rexistrado en pedra que custodia o Arquivo Sonoro de Galicia. Nesta ocasión súbense 18 novos rexistros entre os que se poderá escoitar a soprano estradense Mary Isaura, ou pezas dos coros: Aires d’a Terra de Pontevedra e de Coral de ruada de Ourense.
19/11/2019

Galicia é a quinta comunidade en emprego cultural segundo o Observatorio da Cultura

Galicia conta con 35 000 persoas empregadas no ámbito da cultura, cifra que nos sitúa en quinto lugar por detrás de Madrid (161 900), Cataluña (147 500), Andalucía (94 400) e Valencia (68 100). Con todo, son 1500 menos que en 2017, e amosa unha tendencia contraria ao que acontece no resto de España, onde medrou o emprego en 3100 persoas. Son cifras do último Documento de traballo do Observatorio da Cultura Galega (DT-OCG) que analiza fontes da EPA, de afiliacións da Seguridade Social, de contratación e de paro rexistrado.
19/11/2019

Unha xornada do Consello da Cultura Galega analiza exemplos e prácticas de economía circular que se desenvolven en Galicia

Empresas que se dedican a reparar obxectos, alugalos ou intercambialos. Programas deseñados para aproveitar o lixo orgánico dos fogares. Iniciativas encamiñadas a lle dar un novo uso ao refugallo derivado das obras de reparación das vivendas. Todas estas iniciativas comparten un denominador común: reutilizar. Sobre isto fala a xornada “Camiñando cara a unha economía circular en Galicia”, que mañá mércores se desenvolve no Consello da Cultura Galega (CCG). A proposta pretende expoñer proxectos e modelos de empresas e iniciativas sociais que poñen en práctica unha nova forma de entender a economía: a da reciclaxe. Dolores Vilavedra, secretaria do CCG, e Elena Vázquez Cendón, coordinadora da Sección de Ciencia, Natureza, Tecnoloxía e Sociedade, inaugurarán este encontro que se pode seguir en directo a través do web da institución.
15/11/2019

Presentamos o “Foro Patrimonio e Sociedade”

A presidenta do Consello da Cultura Galega (CCG), Rosario Álvarez; a responsable da Sección de Patrimonio e Bens Culturais, Rebeca Blanco-Rotea e o Secretario Xeral de Política Lingüística, Valentín García presentan hoxe o Foro “Patrimonio e Sociedade”. Na rolda de prensa darán conta desta iniciativa do CCG que pretende facer unha reflexión profunda sobre o patrimonio cultural que permita a elaboración dunhas liñas estratéxicas de xestión do mesmo. Ademais, explicarán o formato pioneiro deste gran foro que implicará á sociedade, expertos e políticos. A presentación celébrase como antesala do Día do Patrimonio que ten lugar cada 16 de novembro.
15/11/2019

O Consello da Cultura Galega inicia un gran foro para facer unha proposta integrada sobre o patrimonio

O 16 de novembro celébrase o Día Internacional do Patrimonio Mundial. Unha efeméride que o Consello da Cultura Galega (CCG) toma como punto de arranque dunha iniciativa pioneira. Trátase do “Foro Patrimonio e Sociedade” que presentaron esta mañá a presidenta do CCG, Rosario Álvarez; a responsable da Sección de Patrimonio e Bens Culturais, Rebeca Blanco-Rotea, e representante da consellería de Cultura e Turismo, Valentín García. A iniciativa pretende facer unha análise profunda da situación actual do patrimonio cultural que dará lugar á elaboración dunhas liñas estratéxicas para a súa xestión. Está, segundo destacou a presidenta, “integrado no marco da función asesora da institución de elaborar informes e documentos para a disposición da cidadanía e dos que teñen capacidade de goberno”. Este gran foro artéllase en tres mesas de debate participativas que se estenderán ao longo de oito meses de traballo. Esa reflexión e análise culminarán nunhas xornadas de presentación das conclusións que se celebrarán no Día Internacional do Patrimonio de 2020.
12/11/2019

O Consello da Cultura Galega homenaxea os navegantes galegos en “Inventio mundi”

A presidenta do Consello da Cultura Galega (CCG), Rosario Álvarez, inaugurou esta tarde no Museo de Pontevedra a última exposición producida pola institución. Chámase «Inventio Mundi. Galicia nas viaxes transoceánicas. Séculos XV-XVII» e tal e como explicou a presidenta “ten unha dobre condición, a de traer á memoria unha parte importante da historia de Galicia e de homenaxear aos esforzados navegantes galegos que abriron os camiños do mar, atopasen ou non gloria na empresa”. Pola súa parte, o director do museo, José Manuel Rey, destacou que “poucas cidades como Pontevedra terán un pasado tan estreitamente vinculado co mar e darían á Historia tantos navegantes; e poucos museos terán aos mariños e navegantes tan presentes entre as súas coleccións”. A mostra toma un punto de partida, a primeira circunnavegación do planeta, a expedición Magalhães/Elcano cando se cumpren 500 anos da súa partida. Ofelia Rey é a comisaria desta mostra que se pode ver ata o 14 de xaneiro.
11/11/2019

Unha xornada aborda mañá as formas da “cultura da violación”

“Nin unha menos”, “Non é non“, “Non é abuso, é violación“ ou “Esta é a miña manda“ son algunhas das campañas que se rebelaron contra sentenzas xudiciais e decisións administrativas en casos moi marcados socialmente. A isto engádeselle que as estatísticas constatan un incremento da violencia sexual contra as mulleres máis novas, mesmo menores de idade. Sobre as moitas e variadas manifestacións ou accións que inciden no aumento da chamada “cultura da violación” falarán mañá martes no Consello da Cultura Galega (CCG) especialistas como Miguel Lorente, Ana de Miguel Álvarez ou Rosa Cobo, entre outros. É a Terceira Xornada Formas de Violencia de Xénero, que este ano se centra na violencia sexual. A presidenta do CCG, Rosario Álvarez, e a directora do Centro de Documentación en Igualdade e Feminismos (CDIF), María Xosé Porteiro, serán as encargadas de abrir esta cita, que ten todas as prazas cubertas. As intervencións poderán seguirse en directo a través da rede.
07/11/2019

Un especial web pon en valor o labor social e cultural do Centro Galego da Habana

O Arquivo da Emigración Galega acaba de facer público o especial “Centro Galego da Habana”, no que destaca o labor social e cultural deste centro, referente da colectividade galega residente en Cuba. A iniciativa dase a coñecer na semana na que o Consello da Cultura Galega revisa a conexión galega coa cidade da Habana a través dun congreso e unha exposición, ao tempo que se celebra o aniversario da creación deste centro en novembro de 1879.
07/11/2019

Expertos destacan no Consello da Cultura Galega a profunda relación histórica coa Habana

“Hai un vínculo que nos une dunha maneira especial coa Habana” indicou a presidenta do Consello da Cultura Galega, Rosario Álvarez, na inauguración do congreso “A Habana galega: Historia e memorias cruzadas”. A primeira sesión serviu para coñecer a historia galega desta cidade e a pegada cubana na nosa literatura. A cita continúa este venres 8 coa análise dos movementos migratorios entre ambos territorios e as influencias culturais mutuas da man de Pilar Cagiao, Xosé Manoel Núñez Seixas, Cira Romero ou Luis Toledo Sande. Como complemento do congreso, no serán deste xoves inaugurouse no Museo do Pobo a mostra “O soño cubano da emigración galega” (aberta ata o 22 de decembro) que recupera a fortaleza, continuidade e visibilidade da presenza galega na capital cubana. Ademais, o Auditorio de Galicia acolleu o concerto “Foliada Habaneira” a cargo de Alejandro Vargas Trío e Rosa Cedrón.
06/11/2019

Un congreso, unha exposición e un concerto profundan desde Santiago na conexión galega coa Habana

Galicia ten unha conexión histórica moi especial coa cidade da Habana. Un vínculo que o Consello da Cultura Galega analiza cun programa de actividades que terá lugar mañá en Santiago de Compostela. Pola mañá comeza o congreso “A Habana galega: Historia e memorias cruzadas”; pola tarde, o Museo do Pobo (19:00 horas) acolle a inauguración dunha exposición que recupera a fortaleza, a continuidade e a visibilidade da presenza galega na capital cubana. Pola noite, soarán muiñeiras e danzóns na Foliada habaneira que terá lugar no Auditorio de Galicia (21:00 horas) a cargo de Alejandro Vargas Trío e Rosa Cedrón. Xosé Manoel Núñez Seixas e María Xosé Porteiro son os coordinadores deste programa que chega agora a Santiago pero que arrincou na Habana o pasado mes de outubro.
04/11/2019

A exposición “Os Adeuses” inaugúrase hoxe en Florida no marco dun congreso sobre hispanistas

É a mostra que documenta os últimos momentos da emigración galega a América. “Os adeuses” narra a partida a través de 51 fotografías realizadas por Alberto Martí nos portos de Vigo e A Coruña entre 1957 e 1963. Despois de itinerar en numerosos destinos de España, Portugal e Brasil, chega agora ao Schmidt Center Gallery Public Space da Florida Atlantic University (FAU) onde estará ata o 13 de decembro. A inauguración terá lugar hoxe (5:30 PM, hora local) e estará presente a profesora da Hofstra University, Benita Sampedro Vizcaya.
31/10/2019

A presidenta do Consello da Cultura Galega reuniuse coa cónsul de Cuba en Galicia

A presidenta do Consello da Cultura Galega, Rosario Álvarez, reuniuse esta mañá no seu despacho coa cónsul de Cuba en Galicia, Yahima Martínez Millán. Na xuntanza estableceron colaboracións no marco da revisión histórica que o Consello da Cultura Galega está a realizar sobre a relación entre Galicia e a Habana. A presidenta informouna das vindeiras actividades que revisan esta conexión no momento en que se celebra o 500 aniversario da creación da cidade da Habana.