noticia

Rexistros 31 a 60 de 1882
09/11/2020

O documental “Eu máis” de Ángel Montero, bolseiro do Consello da Cultura Galega, seleccionado en varios festivais

“Eu máis” é o proxecto documental que Ángel Montero fixo como resultado da bolsa de creación convocada polo Consello da Cultura Galega (CCG) e a Casa de Velázquez. Este traballo acaba de ser seleccionado en varios certames como o festival Zinebi de Bilbao, o festival L'Alternativa de Cataluña e o DocLisboa. O proxecto ten un marcado carácter poético que lle serve a Montero para explorar sobre a identidade a través do corpo e das sensacións.
09/11/2020

O Consello da Cultura Galega lamenta o pasamento do xurista José Antonio García Caridad

Este domingo finou o recoñecido xurista e presidente da Real Academia Galega de Xurisprudencia e Lexislación José Antonio García Caridad. O Consello da Cultura Galega (CCG) lamenta a perda do que foi o seu vicepresidente entre 1989 e 1996 e desenvolveu un importante labor no ámbito do Dereito Civil galego.
06/11/2020

A análise da repercusión internacional de Concepción Arenal pecha un ciclo que puxo de manifesto a vixencia do seu legado

“A proxección internacional de Concepción Arenal Ponte” é o título da última das mesas do ciclo “O mundo do porvir: no bicentenario de Concepción Arenal Ponte” co que o Consello da Cultura Galega (CCG) analiza o legado e vixencia desta escritora. Celia Pereira e Xosé Manoel Núñez Seixas trazaron nos seus relatorios a repercusión internacional da súa obra e da súa figura. A presidenta do CCG, Rosario Álvarez, quixo destacar no peche deste ciclo que Concepción Arenal foi “unha figura singular no século XIX, pero moito máis excepcional pola vixencia no seu pensamento na sociedade contemporánea”.
05/11/2020

O Consello da Cultura Galega emite mañá a última sesión do foro que analizou o legado de Concepción Arenal

“A proxección internacional de Concepción Arenal Ponte” é o título da última das mesas coas que o Consello da Cultura Galega analiza o legado e vixencia desta escritora. As medidas adoptadas por mor da crise sanitaria fixeron que a última das mesas redondas tivera que adaptar o formato inicialmente previsto, ás 18:00 horas subiranse ao sitio web da institución os vídeos das intervencións. Nesta sesión, Celia Pereira e Xosé Manoel Núñez Seixas darán conta da repercusión e acollida que tivo o pensamento de Concepción Arenal fóra de Galicia sen ter nunca saído do país. A presidenta Rosario Álvarez intervirá nesta cita para facer unha valoración deste ciclo que arrincou en setembro en Ferrol.
05/11/2020

A prestixiosa editorial Brill dá ao prelo o volume The First World War and the Nationality Question in Europe

The First World War and the Nationality Question in Europe é o título do volume que compila os traballos presentados no simposio “O contexto internacional das Irmandades da Fala e a cuestión de nacionalidade na Europa de entreguerras”, que organizou o Consello da Cultura Galega (CCG) en outubro de 2016. O volume, que edita a recoñecida editorial Brill, xa está dispoñible. O texto está en inglés e ten como coordinador ao historiador e actual vicepresidente da institución, Xosé Manoel Núñez Seixas
04/11/2020

Un documental do Consello da Cultura Galega recupera a Ricardo Portela no aniversario do seu nacemento

Desde Viascón ata a Bretaña pasando por moitos outros lugares e coa gaita como pano de fondo. Diferentes personalidades do mundo da gaita participan no documental “Ricardo Portela: un canto de estima”, que dá conta da vida, obra e legado do gran gaiteiro Ricardo Portela (1920-1992). Foi producido por aCentral Folque para o Consello da Cultura Galega (CCG) e estréase hoxe, 4 de novembro, o día en que naceu esta figura imprescindible para a gaita galega.
04/11/2020

Adiado ao 12 de novembro o debate de Alicia Puleo co público sobre o ecofeminismo

“O ecofeminismo é a intersección do pensamento ecolóxico e do feminista, dúas grandes teorías que son fundamentais para o século XXI se queremos un futuro”. Así de claro fala Alicia Puleo a filósofa que participa no ciclo “Pensarmos” do Consello da Cultura Galega (CCG). Esta cita, que coordina Carme Adán acaba de adaptar o seu formato por mor da crise sanitaria. A intervención de Puleo foi gravada e xa está disponible na rede para que o público a poida ver antes do debate, que tivo que ser adiada ata o xoves 12 de novembro (18:00 horas) en directo a través da rede.
03/11/2020

O Consello da Cultura Galega visibiliza os contidos do fondo sonoro de Radio Nacional de España en Galicia

Son preto de sete mil rexistros sonoros que abranguen noticias, reportaxes, entrevistas e música a través dos que se pode reconstruír a historia recente de Galicia. O Consello da Cultura Galega (CCG) pon á disposición da cidadanía desde hoxe unha ferramenta de busca sobre o contido do arquivo de Radio Nacional de España (RNE). A presidenta da institución, Rosario Álvarez, destacou “a importancia da visibilización dese material que permite exhibir a riqueza do patrimonio sonoro e súa relevancia para a documentación e coñecemento da nosa historia recente”. Pola súa parte o director do centro territorial de TVE en Galicia, Rafael Cid, destacou que “o arquivo sonoro de RNE en Galicia atesoura documentos únicos, porque durante anos foi a única emisora de radio aberta en Galicia. A través dos centos de bobinas e casetes podemos coñecer, e ata descubrir, aspectos sorprendentes da nosa historia”. A en rede desta base de datos é o resultado dun acordo de colaboración entre o CCG e a Corporación RTVE e permite buscar nos rexistros sonoros da delegación de Galicia desta emisora que se depositan no Arquivo Sonoro de Galicia (CCG).
03/11/2020

Unha mesa redonda analizará mañá a identidade cultural galega na globalización

O Consello da Cultura Galega (CCG) e o Instituto de Estudo das Identidades do Museo do Pobo Galego organizan mañá mércores, 4 de novembro, a primeira mesa redonda do VI Foro “A identidade galega no mundo da globalización. Sociedade, Lingua e cultura”. Esta cita, que se pode seguir en directo a través do web do CCG, está coordinada por Paulo Carlos López, que participará xunto con Ramón Villares, Antía Pérez Caramés e Olga Castro.
02/11/2020

O proxecto hispano-arxentino “Un océano de cartas” analiza hoxe o epistolario entre Díaz Pardo e Seoane

O epistolario cruzado entre Isaac Díaz Pardo e Luís Seoane que fixo público o Consello da Cultura Galega (CCG) analizarase esta noite no marco do proxecto “Un océano de cartas”, unha iniciativa que mantén a Embaixada de España en Bos Aires e o Centro Cultural de España en Bos Aires en colaboración co Centro de Documentación Epistolar para a conservación da memoria epistolar da emigración española en Arxentina. O historiador e expresidente do CCG, Ramón Villares, participa esta noite (21:00 horas) nunha conversa con Ruy Farías, baixo a moderación de Luis Marina e na que analizarán a relevancia e vixencia desta correspondencia.
30/10/2020

O Consello da Cultura Galega homenaxeou a Carballo Calero na edición máis atípica do Concerto das Letras Galegas

A décima edición do Concerto das Letras Galegas foi bastante diferente do que inicialmente estaba previsto. Un Auditorio de Galicia completamente baleiro foi o escenario desta proposta literaria e musical convocada polo Consello da Cultura Galega (CCG) como anticipo festivo da celebración do Día das Letras. A pandemia trasladouna do 16 de maio ao 30 de setembro e a segunda vaga da crise sanitaria obrigou a pechar o escenario ao público. Con todo, o Taller Atlántico Contemporáneo interpretou o concerto, que foi retransmitido en directo a través do web do CCG. O concerto supuxo a estrea absoluta da composición que Nani García fixo do poema “Danza” de Ricardo Carbalo Calero. A voz de Esperanza Mara e a coreografía de Janet Novás arrouparon esta cita.
29/10/2020

O Consello da Cultura Galega retransmitirá na rede a décima edición do Concerto das Letras Galegas

A décima edición do Concerto das Letras Galegas terá lugar na rede. O concerto, que se ía celebrar en Ferrol, por ser a localidade de nacemento de Ricardo Carballo Calero, tivo que ser adaptado por mor da crise sanitaria actual. O Consello da Cultura Galega (CCG) decidiu manter esta cita e difundila na rede. Será mañá venres, día en que a figura homenaxeada neste ano cumpriría 110 anos, ás 19:30 horas e retransmitirase en directo desde o web do Consello da Cultura Galega. A proposta desta edición correrá a cargo do Taller Atlántico Contemporáneo. A presidenta da institución, Rosario Álvarez, destaca que malia o cambio “seguirá fiel á súa esencia e ofrecerá un diálogo entre a música e a literatura galega, cun claro aceno á cultura da localidade escollida para a súa celebración, aínda que non se puidese celebrar como estaba previsto”. Cada edición do concerto ofrece a estrea absoluta dunha peza e nesta ocasión Nani García ponlle música ao poema “Danza” de Carballo Calero.
28/10/2020

O Observatorio da Cultura Galega asegura que o sector está lonxe dos niveis anteriores á pandemia, malia a melloría na desescalada

O confinamento motivou as cifras máis baixas da última década da actividade cultural da cidadanía. Só o 20,1% da poboación galega puido saír cear, a cafetarías, ir ao cine e ao teatro en Galicia entre abril e xuño. Ademais, os plans de lecer dos fogares galegos de cara ao futuro tamén están nos niveis máis baixos desde 2011. Estes son algúns dos indicadores da “Conxuntura estatística do ámbito cultural. Outubro de 2020” que acaba de facer pública o Observatorio da Cultura Galega, servizo dependente do Consello da Cultura Galega. O documento tamén explica que, superado o confinamento, o sector da cultura mantivo unha pequena recuperación pero está lonxe dos niveis anteriores ao inicio da pandemia.
27/10/2020

O Consello da Cultura Galega leva a Ferrol a exposición que afonda na historia da navegación galega

«Inventio mundi. Galicia nas viaxes transoceánicas. Séculos XV-XVII» é unha exposición do Consello da Cultura Galega (CCG) que recupera unha parte importante da historia de Galicia e, ao mesmo tempo, homenaxea os navegantes galegos que abriron os camiños do mar. A mostra, que conta co apoio da Secretaría Xeral de Emigración, toma como punto de partida a primeira circunnavegación do planeta, a expedición Magalhães/Elcano, que celebrou os 500 anos da súa partida en 2019. Por mor da situación sanitaria non haberá inauguración tal e como estaba previsto, pero a exposición poderase visitar na sede de Exponav en Ferrol desde mañá mércores e ata o 30 de novembro.
26/10/2020

Unha mesa redonda analiza en Vigo o legado xurídico de Concepción Arenal

O Museo de Arte Contemporánea de Vigo (MARCO) acollerá este xoves (18:00 horas) a terceira cita do ciclo do Consello da Cultura Galega (CCG) “O mundo do porvir: no bicentenario de Concepción Arenal Ponte”, orientado a analizar a vixencia da obra e o pensamento desta intelectual. Nesta ocasión, a mesa redonda leva por título “Xustiza, dereito e liberdade” e pon o foco no legado xurídico de Concepcion Arenal. A actividade conta coa participación de Celia Pereira, Gonzalo Quintero e Eloy Gayan.
23/10/2020

O Consello da Cultura Galega aprobou a programación de actividades do bienio 2021-2022

O Consello da Cultura Galega (CCG) celebrou no serán deste xoves unha sesión plenaria ordinaria na que se aprobou o proxecto de actividades para o próximo bienio. A presidenta, Rosario Álvarez, trazou as liñas estratéxicas que contaron co apoio, por unanimidade dos membros do plenario. A proxección exterior da cultura galega, a igualdade de xénero, hábitat ou idioma xunto co fomento da cultura científica, tecnolóxica e ambiental son algunhas das liñas transversais que abordará a institución nos próximos dous anos. Para 2021 está previsto, entre outras iniciativas, unha exposición sobre Afonso X O Sabio. Na sesión arcordouse tamén a incorporación de Rebeca Blanco-Rotea á Comisión Executiva da institución.
20/10/2020

O ciclo sobre Concepción Arenal analiza na Coruña a súa faceta como visitadora de mulleres nas cadeas

A Coruña acollerá o vindeiro venres 23 de outubro (Fundación Luís Seoane, ás 18:00 horas) unha mesa redonda que analizará o labor de activismo social de Concepción Arenal en relación coas presas. Esta sesión, que ten como título “Alianza entre mulleres dentro e fóra do cárcere”, é a segunda cita dun ciclo do Consello da Cultura Galega (CCG) orientado a analizar a vixencia da obra e o pensamento desta intelectual. A actividade insírese nos actos organizados pola institución para celebrar o bicentenario do nacemento de Concepción Arenal.
19/10/2020

A presidenta do Consello da Cultura Galega reúnese co presidente da Deputación da Coruña

A presidenta do Consello da Cultura Galega, Rosario Álvarez, reuniuse este luns co presidente da Deputación da Coruña, Valentín González Formoso. É a primeira xuntanza entre ambas as dúas institucións e contou coa participación de Xurxo Couto, deputado responsable da área de Cultura.
15/10/2020

A presidenta do Consello da Cultura Galega recibe a visita institucional do presidente da Deputacion de Ourense

A presidenta do Consello da Cultura Galega, Rosario Álvarez, recibiu esta mañá a visita do presidente da Deputación de Ourense, José Manuel Baltar Blanco. Era a primeira visita institucional do titular da Deputación ourensá e enmárcase dentro da rolda de colaboracións que a presidenta está a desenvolver con entidades públicas e privadas no marco do seu mandato.
15/10/2020

O Consello da Cultura Galega inicia en Ferrol un ciclo de conferencias arredor de Concepción Arenal

O 31 de xaneiro de 1820 nacía en Ferrol a pensadora e escritora Concepción Arenal Ponte. O Consello da Cultura Galega (CCG) celebra este ano o bicentenario do seu nacemento a través de varias actividades que están en consonancia co seu pensamento. O vindeiro venres 16 comeza no Ateneo de Ferrol (18:00 horas) un ciclo de conferencias que baixo o título "O mundo do porvir: bicentenario do nacemento de Concepción Arenal Ponte (1820-2020)" revisa a vixencia do seu legado. A primeira cita leva por título “Amor, educación e igualdade para o progreso” e supón tamén a primeira actividade fóra de Santiago do Centro de Documentación en Igualdade e Feminismos (CDIF), que dirixe María Xosé Porteiro.
14/10/2020

O Consello da Cultura Galega homenaxea a Carballo Calero na súa cidade natal

O Teatro Jofre de Ferrol acolleu esta tarde un acto de homenaxe a Ricardo Carballo Calero. Unha cita organizada polo Consello da Cultura Galega (CCG) que serviu para amosar a faceta polifacética e creadora do autor homenaxeado este ano co Día das Letras Galegas. A presidenta do CCG, Rosario Álvarez destacou na súa intervención que “presentamos dúas pezas que, en dous contextos distintos, evocan a cidade de Ferrol”. No acto tivo lugar a presentación da publicación institucional “Farsa das zocas” coa que a institución recuperou esta obra teatral de Carballo Calero, acompañada dun estudo introdutorio de Carlos Biscainho. Rematou co concerto “Ferrol 1916” no que se estreou a peza que o compositor Miguel Brotóns realizou a partir dun poema homónimo de Carballo.
13/10/2020

O Consello da Cultura Galega amosa mañá en Ferrol a faceta creadora de Carballo Calero

O Teatro Jofre de Ferrol é o escenario elexido polo Consello da Cultura Galega (CCG) para lembrar mañá a figura de Ricardo Carballo Calero, autor homenaxeado neste 2020 co Día das Letras Galegas. A cita ten un carácter dobre, xa que se presentará a publicación institucional “Farsa das zocas” coa que a institución recupera esta obra teatral de Carballo Calero, acompañada dun estudo introdutorio de Carlos Biscainho. Ademais, terá lugar o concerto “Ferrol 1916” no que se estreará a peza que o compositor Miguel Brotóns realizou a partir dun poema homónimo de Carballo.
13/10/2020

Unhas xornadas reivindican o papel da muller na transmisión do patrimonio

Baixo o título “Arquivos, mulleres e tradición” arrincaron hoxe unhas xornadas organizadas polo Arquivo Sonoro de Galicia (ASG) do Consello da Cultura Galega (CCG). O director do Arquivo, Xosé Ramón Pousa, puxo de relevo na inauguración desta cita que “as mulleres tiveron un protagonismo fundamental como portadoras e xeradoras de materiais de arquivo”. Xulia Feixoo é a coordinadora desta cita que só se pode seguir a través da rede.
09/10/2020

O Consello da Cultura Galega presenta en Ferrol un concerto e unha publicación en homenaxe a Ricardo Carballo Calero

O vindeiro mércores 14 de outubro, o Consello da Cultura Galega (CCG) celebrará no teatro Jofre de Ferrol (19:30 horas) un acto de homenaxe a Ricardo Carballo Calero. Esta proposta, adiada a outono por mor da pandemia, supón a estrea da peza “Ferrol, 1916”, unha composición que o alacantino Miguel Brotóns fixo a partir dun poema do autor ferrolán. O acto servirá tamén de presentación da publicación “Farsa das zocas” coa que a institución recupera esta obra teatral do autor homenaxeado neste ano co Día das Letras Galegas, acompañada dun estudo introdutorio de Carlos Biscainho. A presidenta da institución, Rosario Álvarez, asistirá a este acto de homenaxe que ten entrada gratuíta.
07/10/2020

O Consello da Cultura Galega presenta un estudo que radiografía o teatro galego

O público galego puntúa o seu teatro cun 9,11. Este sobresaliente é para actores, actrices, persoal de dirección e posta en escena. A nota baixa a un 6,88 cando o que se valora é a programación habitual e as instalacións dos nosos teatros e auditorios suman un 7,55. Son algúns dos datos do “Informe sobre o teatro galego”, un documento elaborado polo Observatorio da Cultura Galega, servizo dependente do Consello da Cultura Galega (CCG), que traza a radiografía dos tres piares do sistema do teatro galego: público, creadores e xestores. É o primeiro informe deste tipo que analiza o sistema teatral desde unha perspectiva global e que, ademais, ofrece as primeiras cifras de como lle afectou a COVID-19. O documento presentouse no marco do I Congreso Internacional do Teatro Galego co que a Academia Galega de Teatro pretende sentar a planificación estratéxica deste sector para os vindeiros anos.
05/10/2020

O mundo da gaita rende homenaxe a Ricardo Portela no Consello da Cultura Galega

“Aspiramos á dignificación da gaita e do gaiteiro porque a gaita é a expresión da alma de Galicia” aseguraba Ricardo Portela (Viascón, 1920-1992). As súas palabras resoaron no Salón de Actos do Consello da Cultura Galega (CCG) no marco dun encontro en que o sector da gaita lembrou a figura do gran mestre cando se cumpren cen anos do seu nacemento. A presidenta do CCG, Rosario Álvarez, destacou de Portela “a súa inmensa contribución á cultura compartida, do seu pulo ao respecto e afianzamento da nosa identidade”. Carlos Núñez, autor de “De gaiteiro a gaiteiro”, libro que se senta o legado porteliano, foi enfiando os testemuños dos asistentes para trazar a faceta máis humana do gaiteiro de Viascón.
01/10/2020

Un roteiro revisa a pegada do enxeñeiro Andrés Comerma en Ferrol

Andrés Comerma foi un enxeñeiro e arquitecto naval, farmacéutico, escritor e divulgador e tamén a figura homenaxeada co Día da ciencia en Galicia neste ano. Aínda que non era galego, viviu boa parte da súa vida aquí e moitos dos seus méritos tiveron estreita relación coa cidade de Ferrol, onde morreu en 1917. O Consello da Cultura Galega (CCG) fixou nun roteiro os lugares que marcan a traxectoria vital e profesional deste recoñecido científico. Rosario Álvarez, presidenta da institución, presentou esta tarde en Ferrol o itinerario “Paseo por lugares emblemáticos de Comerma en Ferrol” que tamén se pode consultar na rede.
01/10/2020

Preséntase a web do Centro de Documentación en Igualdade e Feminismos

Este 1 de outubro cúmprense 89 anos da aprobación do dereito das mulleres ao voto. Unha efeméride na que o Consello da Cultura Galega (CCG) pon en rede a web do Centro de Documentación en Igualdade e Feminismos, o CDIF, o cuarto arquivo que o CCG creou en 2019. É un “Arquivo que, ademais de inventariar, documentar, preservar e dispoñeros fondos, debe actuar como incitador á reflexión, divulgador de contidos e dinamizador da sociedade galega” destaca a presidenta, Rosario Álvarez. O centro, que ten a súa orixe nunha comisión temporal creada en 2005, ten como coordinadora a María Xosé Porteiro.
30/09/2020

O Consello da Cultura Galega presenta mañá en Ferrol o roteiro Andrés Comerma

A Andrés Comerma debémoslle a instalación da primeira liña telefónica de Galicia, que comunicou a Capitanía e o Arsenal de Ferrol en 1878; e tamén as primeiras experiencias en Galicia con raios X. Foi un enxeñeiro e arquitecto naval pero tamén un farmacéutico, escritor e divulgador que estivo moi vinculado á cidade de Ferrol, onde morreu en 1917. A presidenta do Consello da Cultura Galega (CCG), Rosario Álvarez, presentará mañá nesta cidade (17:00 horas) un roteiro que percorre os lugares emblemáticos de Ferrol seguindo a traxectoria deste recoñecido enxeñeiro.
28/09/2020

O Consello da Cultura Galega afonda na relación entre Galicia e Bretaña cun libro e cun coloquio

Galicia e a Bretaña están marcadas por moitas semellanzas xeográficas e culturais que se estableceron desde a prehistoria e aínda se manteñen. O Consello da Cultura Galega (CCG) revisa esta relación cun especial web que inclúe “Galicia-Bretaña. Olladas Comparadas” a edición das actas dun congreso realizado en 2017 que xuntou a investigadores de ambos os dous territorios para reflexionar sobre esta relación en clave de identidade cultural. Para acompañar a publicación, inclúese o coloquio “Galicia-Bretaña: dúas nación culturais en conversa”. A presidenta do CCG, Rosario Álvarez, presenta o diálogo entre Ramón Villares e Christine Rivalan Guégo.