noticia

Rexistros 61 a 90 de 1392
30/11/2023

Unha xornada en Lourenzá pecha os actos en homenaxe a Fernández del Riego

O Consello da Cultura Galega (CCG) pecha un ano de actividade arredor da figura de Francisco Fernández del Riego, cunha xornada no seu Lourenzá natal. Diferentes especialistas afondarán nas relacións do homenaxeado no Día das Letras Galegas desta edición coa emigración e o seu papel como colaborador nas publicacións da colectividade galega en América. A alcaldesa do concello de Lourenzá, Rocío López García, e o vicepresidente do CCG, Xosé M. Núñez Seixas, inauguran este venres, 1 de decembro (19:00 horas), a cita titulada “Fernández del Riego: de Lourenzá a América”.
29/11/2023

Unha xornada sobre cultura e autonomía pecha as actividades conmemorativas do 40º aniversario

Cultura e autonomía é o título da xornada con que o Consello da Cultura Galega (CCG) pon o ramo ás actividades deseñadas para celebrar o 40º aniversario da súa creación. A cita, que se desenvolve este xoves 30 de novembro (10:00 horas), pretende analizar as relacións entre o proceso de creación da autonomía e a institucionalización da cultura. Pablo González Mariñas ou Víctor Vázquez Portomeñe son algúns dos participantes nesta xornada, que se poderá seguir en directo dende o web e as redes sociais da institución.
29/11/2023

A biografía da escritora Elena Quiroga entra no Álbum de Galicia

Elena Quiroga (Santander, 1921 – A Coruña, 1995) foi unha escritora independente e innovadora. Sobresaíu cunha extensa obra narrativa, coa que contribuíu ao auxe da novela española nos anos cincuenta e sesenta do século XX. Galardoada co Premio Nadal en 1950 pola súa novela Viento del Norte, foi designada académica numeraria da Real Academia Española “polo valor da súa obra literaria, pola súa orixinalidade e polo dominio da arte de novelar”. Así o explica Xosé Ramón Fandiño na entrada que asina para o Álbum de Galicia, a colección dixital de biografías que mantén o Consello da Cultura Galega (CCG).
27/11/2023

Diferentes expertas e investigadoras reflexionan sobre o acoso sexual nunha xornada

O acoso sexual é unha realidade que está presente en moitos ámbitos da vida das mulleres desde a súa infancia. Co fin de afondar na súa concepción e nas diversas formas en que este se manifesta, o Centro de Documentación en Igualdade e Feminismos (CDIF) do Consello da Cultura Galega (CCG), en colaboración coa Sección de Artes Escénicas, Musicais e Audiovisuais da institución, organiza mañá martes (28 de novembro, 10:00 horas) a xornada Que é “si”? Sobre o acoso sexual. Na inauguración intervirán a presidenta do Consello da Cultura Galega, Rosario Álvarez; a coordinadora do CDIF, Carme Adán, e a da Sección de Artes Escénicas, Musicais e Audiovisuais, Cristina Domínguez. A xornada é presencial, pero poderá seguirse en directo a través do sitio web e as redes sociais da institución.
26/11/2023

O ciclo Revisando a nosa arte analiza en Vigo a obra artística de Rafael Baixeras

Rafael Baixeras consolidouse como un dos pintores máis respectados polos artistas do grupo Atlántica. Cando se fan 34 anos do seu pasamento, a Sección de Creación e Artes Visuais Contemporáneas do Consello da Cultura Galega (CCG) analiza a súa traxectoria artística nunha nova xornada do ciclo Revisando a nosa arte. A cita, coordinada por Miguel Fernández-Cid, terá lugar mañá, 27 de novembro (17:00 horas), no Museo de Arte Contemporánea de Vigo. A sesión é presencial e non se poderá seguir en directo, pero será gravada e subida posteriormente á hemeroteca do CCG.
23/11/2023

O Consello da Cultura Galega celebra o seu 40º aniversario coa estrea de Terra, de Juan Durán, a cargo da Orquestra Sinfónica de Galicia

O Palacio da Ópera da Coruña acolle este venres 24 de novembro (20:00 horas) un concerto conmemorativo polo 40º aniversario do Consello da Cultura Galega (CCG). A Orquestra Sinfónica de Galicia (OSG), dirixida por Víctor Pablo Pérez, interpretará un programa no que destaca a estrea da cantata Terra, do compositor Juan Durán. O concerto será gravado para a súa futura edición.
23/11/2023

A Orquestra Sinfónica de Galicia estrea Terra, de Juan Durán, no concerto conmemorativo da institución

O Palacio da Ópera da Coruña acolle este venres 24 de novembro (20:00 horas) un concerto conmemorativo polo 40º aniversario do Consello da Cultura Galega (CCG). A Orquestra Sinfónica de Galicia (OSG), dirixida por Víctor Pablo Pérez, interpretará un programa no que destaca a estrea da cantata Terra, do compositor Juan Durán. O concerto será gravado para a súa futura edición.
22/11/2023

Sarah Babiker analiza no ciclo Pensarmos a influencia dos alicerces materiais na democracia

A Sección de Pensamento do Consello da Cultura Galega (CCG) organiza mañá, 23 de novembro (18:00 horas), unha nova sesión do ciclo Pensarmos. Nesta ocasión, a convidada é a xornalista Sarah Babiker, quen falará dos fundamentos materiais que son necesarios para garantir a existencia dunha democracia efectiva e real. A cita é presencial, pero poderá seguirse en directo a través do sitio web e das redes sociais da institución.
22/11/2023

O Álbum de Galicia suma a biografía de Xoán González-Millán

O docente e investigador Xoán González-Millán (O Grove, 1951 – Nova York, 2002) centrou a súa liña de traballo na narrativa galega contemporánea, un ámbito en que destacou por renovar substancialmente os estudos literarios galegos no posfranquismo. A súa traxectoria profesional desenvolveuse na cidade de Nova York, desde onde articulou a Galicia da diáspora. “O seu compromiso coa difusión da cultura galega nos ámbitos académicos internacionais foi incansable”, subliñan Dolores Vilavedra e Alejandro Alonso Nogueira. Eles son os autores da súa entrada no Álbum de Galicia, a colección dixital de biografías que mantén o Consello da Cultura Galega (CCG).
22/11/2023

Lembranza do Seminario de Estudos Galegos recupera do fondo de Lois Tobío dous textos fundamentais

Lembranza do Seminario de Estudos Galegos é a nova publicación do Consello da Cultura Galega (CCG) que rescata do fondo de Lois Tobío dous textos que dan conta de acontecementos importantes para a historia do país, como o nacemento do Seminario e as circunstancias da redacción do Estatuto de Galicia. A presidenta do CCG, Rosario Álvarez; a filla de Lois Tobío, Constanza Tobío; e o editor e principal da publicación, Ramón Villares, presentan esta publicación coa que a institución pon o ramo á conmemoración do centenario do Seminario de Estudos Galegos (SEG). O libro xa está dispoñible para descarga no web do CCG.
21/11/2023

As xeracións do Montserrat achégase á emigración galega ao Reino Unido

Pilar, Mary, Andrés e Tito son algúns dos protagonistas do fluxo migratorio que levou máis de douscentos mil galegos e galegas cara ao Reino Unido entre 1960 e 1974. As súas historias, narradas a través de documentos, fotografías e outros obxectos desa diáspora, poden verse na mostra As xeracións do Monserrat. Memoria emocional da emigración galega ao Reino Unido organizada polo Consello da Cultura Galega (CCG), coa colaboración do Concello da Coruña e da Xunta de Galicia. A presidenta do CCG, Rosario Álvarez, destacou na inauguración a importancia de coñecer o fenómeno migratorio para comprender a Galicia contemporánea e concretamente no período que conta a exposición “na segunda metade do século XX cando o fluxo virou cara a Europa (neste caso ao Reino Unido), e que de aí viñeron outros aires de frescura, outras novidades, outras tendencias de cambio”. Canda a ela o concelleiro da Área de Fomento e Promoción da Cidade, Gonzalo Castro, puxo de relevo a importancia da conservación do patrimonio vivo “as imaxes e relatos son fundamentais para comprender a historia da nosa terra”. Antonio Rodríguez Miranda, secretario xeral da Emigración, incidiu en que “non son só unha colección de imaxes e obxectos, senón un testemuño do sacrificio, da valentía e da esperanza dos emigrantes galegos que deixaron Galicia en busca dun futuro mellor”. O vicepresidente do CCG e director do Arquivo da Emigración Galega, Xosé M. Núñez Seixas situou a exposición no marco da área de traballo da institución do estudo e difusión do fenómeno migratorio. O escritor e xornalista Xesús Fraga é o comisario deste proxecto, que se pode ver no Kiosko Alfonso ata o día 14 de xaneiro.
21/11/2023

Paula Carballeira e Sofia Santos Silva protagonizan a sexta edición do ciclo Dramaturxias itinerantes

O Consello da Cultura Galega (CCG), a Escola Superior de Arte Dramática (ESAD) de Galicia e a Escola Superior de Música e Artes do Espetáculo (ESMAE) de Porto, en colaboración co Camões-Centro Cultural Português de Vigo, presentan unha nova edición de Dramaturxias itinerantes. O ciclo, que busca promover un maior coñecemento sobre a escrita teatral feminina máis contemporánea de Galicia e Portugal, xunta nesta edición ás creadoras Paula Carballeira e Sofia Santos Silva. A cita arrinca hoxe (18:00 horas), no Teatro Helena Sá e Costa (Porto), e repite mañá, mércores 22 (17:30 horas) na ESAD de Vigo.
20/11/2023

Manuel Balboa protagoniza a nova entrega de Caligrafías musicais

“Teatro lírico gallego” é o título da conferencia que Manuel Balboa (1958-2004) pronunciou no Ateneo Republicano na Coruña en 1979. A intervención é a nova entrega do proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimensualmente conferencias destacadas de prestixiosos estudosos do eido musical galego.
20/11/2023

Francisco María de la Iglesia e Salvador Golpe entran no Álbum de Galicia

O Álbum de Galicia, a colección dixital de biografías que mantén o Consello da Cultura Galega (CCG), incorpora as entradas de Francisco María de la Iglesia (Santiago de Compostela, 1827 – A Coruña, 1897) e Salvador Golpe Varela (San Pedro de Oza, A Coruña, 1850 – A Coruña, 1909). Malia diferir na súa formación, ambos foron escritores e desenvolveron unha importante actividade xornalística como colaboradores e directores de diferentes cabeceiras. Ademais, foron activos militantes políticos cun marcado compromiso coa lingua galega. Asina as súas entradas Xurxo Martínez González.
17/11/2023

Presentada Keltia, obra inédita de Jose Antonio Iglesias Vilarelle

O director do Arquivo Sonoro de Galicia, Alejo Amoedo, a directora do Museo de Pontevedra, Ángeles Tilve, e o autor, Jose Antonio Cantal Mariño, presentaron esta tarde no Edificio Castelao do Museo de Pontevedra o libro Keltia. Preludio sinfónico, de Antonio Iglesias Vilarelle. "Unha obra que- en palabras do editor- é unha homenaxe a Galicia, á súa tradición, á súa identidade e á súa orixe”. A publicación xa está dispoñible para descarga desde o web do CCG.
17/11/2023

Comeza en Vilalba unha xornada sobre as mulleres das Irmandades da Fala

“Arredor das irmandiñas: mulleres para a historia de noso” é o título das xornadas que terán lugar ata mañá no salón de actos da Casa da Cultura de Vilalba. A actividade forma parte das xornadas anuais que o Consello da Cultura Galega (CCG) organiza co Instituto de Estudos Chairegos (IESCHA). Nesta edición, diferentes especialistas, como Carme Adán, directora do Centro de Documentación en Igualdade e Feminismos do CCG, reúnense para falar do papel que tiveron as mulleres no seo das Irmandades da Fala.
16/11/2023

O Repertorio da prensa da emigración galega incorpora dúas cabeceiras editadas pola Unión Mugardesa de Instrucción

A Unión Mugardesa de Instrucción foi unha asociación integrada pola numerosa colonia de emigrantes mugardeses residentes en Cuba. No ano 1912, puxo en marcha a revista La Unión Mugardesa como medio para informar sobre o funcionamento da entidade e as actividades que esta organizaba. Posteriormente, editou o boletín Unión Mugardesa de Instrucción cun fin similar ao da anterior cabeceira. O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora neste mes de novembro dous números da primeira cabeceira e tres da segunda.
16/11/2023

A mostra As xeracións do Monserrat, que relata a memoria emocional da emigración, inaugúrase o día 21 na Coruña

O Consello da Cultura Galega (CCG), coa colaboración do Concello da Coruña e da Xunta de Galicia, inaugurará o vindeiro martes 21 de novembro no Kiosco Alfonso da Coruña a mostra As xeracións do Monserrat. Memoria emocional da emigración galega ao Reino Unido. O escritor e xornalista Xesús Fraga (Londres, 1971) é o comisario deste proxecto, que relata a través de obxectos e outros documentos as historias dos seus protagonistas. Na Coruña tamén terá lugar o concerto conmemorativo do 40º aniversario do CCG. Será o venres 24 de novembro a cargo da Orquestra Sinfónica de Galicia, dirixida por Víctor Pablo Pérez e cun programa no que destaca a estrea absoluta de Terra, de Juan Durán.
16/11/2023

Unha mostra exhibe a forza do patrimonio cultural da última década

No Día Internacional do Patrimonio Cultural, o Consello da Cultura Galega (CCG) inaugurou a exposición Olladas #EMPC. Olladas #INSITU, que recolle a evolución do patrimonio cultural galego na última década a partir de medio centenar de experiencias. Desde a intervención do illote de Guidoiro Areoso, que rematou con límites de protección, ata a análise de casos para habitar o rural, pasando pola Cova Eirós, exemplo de diálogo entre as diferentes partes, estas actuacións permiten ver a saúde do patrimonio cultural. “En moitísimos aspectos, Galicia está á cabeza do patrimonio cultural”, asegurou Rebeca Blanco-Rotea, que comisaría esta mostra xunto con Rosa Benavides. A exposición estará aberta ao público nas instalacións do CCG ata o vindeiro 30 de novembro, cando se trasladará a Braga para comezar as itinerancias. Ten tamén unha versión en liña que xa se pode consulta no web da institución.
15/11/2023

O Álbum de Galicia incorpora a biografía do trobador Afonso Eanes do Cotón

O poeta e músico medieval Afonso Eanes do Cotón foi o autor de numerosas cantigas de amor, de amigo e de escarnio e maldicir. Contemporáneo dos mestres da lírica medieval compostelá, “destacou polo atrevido das súas composicións, sobre todo cargadas de sátira, erotismo e rexouba”, subliña Xosé Amancio Liñares Giraut. El é o autor da entrada que incorporamos ao Álbum de Galicia, a colección dixital de biografías que mantén o Consello da Cultura Galega (CCG).
15/11/2023

Un informe do Observatorio da Cultura Galega destaca o bo momento do audiovisual en Galicia

Aos premios recentes acadados polo sector audiovisual galego acompañan tamén as cifras. Na última década medrou o emprego, os ingresos de explotación, a asistencia ás salas de cine e o consumo televisivo, segundo o documento de traballo O sector audiovisual en Galicia 2023, que acaba de facer público o Observatorio da Cultura Galega, servizo dependente do Consello da Cultura Galega (CCG). O documento conclúe que “os datos amosan que o audiovisual se atopa nun ciclo expansivo, con indicadores que apuntan a que se superou a crise sanitaria de 2020 e 2021 en moitos dos ámbitos que o compoñen”. O documento de traballo xa está dispoñible desde o web da institución.
14/11/2023

Presentado Federico Mediante, el Salgari español que contribúe ao mellor coñecemento do fenómeno migratorio

Federico Mediante era asturiano pero sentíase fondamente galego. “ A súa historia sitúase dentro do noso interese por documentar e coñecer os nomes que conforman a emigración galega” explicou a presidenta do Consello da Cultura Galega (CCG), Rosario Álvarez, quen, xunto co secretario xeral da Emigración, Antonio Rodríguez Miranda; o vicepresidente do CCG e director do Arquivo da Emigración Galega, Xosé M. Núñez Seixas; e o ribadense Francisco Díaz-Fierros, acompañaron á autora, Ana Rosa Martínez Loredo, na presentación da obra Federico Mediante, el Salgari español. O libro fai un percorrido pola biografía e historia deste home e que tamén se pode consultar no Álbum de Galicia.
13/11/2023

Tui acolle unha xornada de homenaxe ao filósofo Francisco Sánchez

O Teatro Municipal de Tui acolle este martes a xornada “Francisco Sánchez no IV centenario da súa morte”, unha cita organizada polo Consello da Cultura Galega e o Concello de Tui co obxectivo de visibilizar e dar a coñecer a figura de Francisco Sánchez, auténtico prototipo do home do Renacemento que deixou unha obra predecesora da revolución filosófica dos séculos XVII e XVIII.
13/11/2023

Recuperamos a intervención de David Chipperfield sobre a importancia do planeamento

O reputado arquitecto británico, David Chipperfield, participou na xornada “A cultura do mecenado” que se desenvolveu no Consello da Cultura Galega (CCG) en febreiro de 2020. Nela abordou un relatorio no que afondou na “complexa relación público privado” en calidade de presidente fundador da Fundación RIA. É unha das intervencións que destacamos no marco do proxecto que visibiliza 12 intervencións destes 40 anos da institución.
10/11/2023

Profesionais inciden no valor da cultura máis alá dos fluxos económicos

“As fallas de Valencia son o máis antieconómico que un pode imaxinar. Todo un ano traballando para queimalo nunha noite. Pero é o froito dunha historia, ten un vector identitario e ideosincrásico que poucos poñerían en cuestión” afirmou Luis Cesar Herrero, Universidad de Valladolid, presidente da Association for Cultural Economics International no marco do foro “Modelos para unha economía da cultura”. A cita coordinada por Xosé Carlos Arias puxo sobre a mesa que a cultura é medible e reivindicaron o seu papel máis alá do puramente económico. “O mundo que coñecemos será radicalmente diferente dentro de dez anos e con xornadas como esta axudamos a situar a cultura nese novo escenario” apuntou Arias na inauguración. Canda a el estaba Xosé M. Núñez Seixas, vicepresidente do Consello da Cultura Galega (CCG) e coordinador do foro Pensar o mundo dende Galicia no que se insire esta cita e co que a institución celebra o seu corenta aniversario. Núñez Seixas anunciou que haberá unha última xornada (o 30 de novembro) ”que situará a cultura e a propia institución dentro do contexto autonómico, que está coordinada por Ramón Villares e onde intervirán algúns dos seus protagonistas”.
09/11/2023

A presidenta do Consello da Cultura Galega inaugura no Río de Xaneiro a mostra Afonso X e Galicia

Afonso X e Galicia, o proxecto expositivo organizado polo Consello da Cultura Galega (CCG) coa colaboración da Xunta de Galicia e as deputacións de Ourense e Lugo, continúa a súa itinerancia polo Brasil. Nesta ocasión chega ao Río de Xaneiro, onde foi inaugurado pola presidenta do CCG, Rosario Álvarez; o decano do Centro de Letras e Artes, Afranio Gonçalves Barbosa; a vicerreitora da Universidade Federal do Rio de Janeiro (UFRJ), Cássia Turci; o director da Escola de Música da UFRJ, Ronal Silveira, e o vicedirector da Escola de Música da UFRJ, Marcelo Jardim. Coa apertura da mostra comeza un programa cultural no que participan expertos vinculados ás universidades públicas das cidades do Río de Xaneiro e de Niterói, así como outros convidados á instancia destes colaboradores.
09/11/2023

Unha xornada analiza os retos actuais dos museos

A pandemia da COVID-19 e o confinamento ocasionaron importantes transformacións sociais que repercutiron tamén no modo en que a cidadanía accede e se relaciona cos museos. Profundar neses cambios e analizar os desafíos actuais que deben afrontar as entidades museísticas son os obxectivos da xornada Museos pospandemia. Para que(n)? A actividade levarase a cabo mañá, 10 de novembro (10:00 horas), na sede institucional do Consello da Cultura Galega (CCG). Na súa inauguración participarán Dolores Vilavedra, membro do plenario do CCG; Ángeles Penas Truque, membro do plenario do CCG en representación do Consello Galego de Museos, e Esperanza Gigirey Liste, presidenta do Consello Galego de Museos. A xornada é presencial, pero poderá seguirse en directo a través do web e das redes sociais corporativas.
08/11/2023

A entrada do arquitecto e compositor Eduardo Rodríguez-Losada incorpórase ao Álbum de Galicia

A vida de Eduardo Ramón Rodríguez-Losada (A Coruña, 1886–1973) centrouse en dous ámbitos: a arquitectura e a composición musical. No eido arquitectónico, foi considerado como un dos máis importantes arquitectos rexionalistas galegos. No campo musical, compuxo máis de setenta obras de diferentes xéneros, aínda que foi recoñecido principalmente polas súas óperas. Nelly Iglesias é a autora da entrada que sumamos hoxe ao Álbum de Galicia, a colección dixital de biografías que mantén o Consello da Cultura Galega (CCG).
08/11/2023

Acordo para a dixitalización de materiais de Paz-Andrade do arquivo de Paulo Rónai

A presidenta do Consello da Cultura Galega, Rosario Álvarez, visitou o arquivo do escritor e tradutor brasileiro Paulo Rónai (1907-1992), no inicio da súa viaxe institucional a Río de Xaneiro (Brasil). Alí foi recibida pola súa viúva, Nora Tausz, e a súa filla, Laura Rónai, que acordaron conceder permiso para dixitalizar as cartas do epistolario do pai que recibiu de Valentín Paz Andrade. Esta visita abre a axenda institucional na que destaca a inauguración, hoxe mércores, da mostra Afonso X e Galicia na Universidade Federal do Río de Xaneiro (UFRJ).
08/11/2023

Remata o foro Pensar o mundo dende Galicia cunha reflexión sobre economía e cultura

A última sesión do foro Pensar o mundo dende Galicia, co que o Consello da Cultura Galega (CCG) celebra o seu corenta aniversario, reflexionará sobre a relación entre a economía e a cultura. “Modelos para unha economía da cultura” é o título desta xornada, que está coordinada por Xosé Carlos Arias e na que participan, entre outros, Josep Ramoneda e Luis César Herrero. O coordinador do foro, Xosé Manoel Núñez Seixas, mais o coordinador da xornada inauguran a actividade, que se pode seguir en directo dende o web e as redes sociais do CCG.