noticia

Rexistros 61 a 90 de 1765
08/04/2020

Completamos o proxecto “Trinta anos de audiovisual galego” co filme “Urxa”

“30 anos de audiovisual galego” é unha iniciativa do Consello da Cultura Galega (CCG) en colaboración coa Corporación Radio e Televisión de Galicia para dar a coñecer os tres filmes fundacionais do cinema galego. O proxecto culmina hoxe poñendo na rede "Urxa", o filme de Carlos Piñeiro e Alfredo García Pinal que abriu un novo capítulo no audiovisual galego. Está dividido en tres capítulos ou relatos breves, ideados orixinalmente como curtametraxes independentes, que narran tres momentos na vida de Urxa (Luma Gómez), unha muller con poderes sobrenaturais que representa o estereotipo da bruxa na tradición galega.
07/04/2020

As voces femininas centran a novena entrega do proxecto Lousas

Mari Isaura, Ángeles Ottein, Ofelia Nieto e Matilde Vázquez son catro intérpretes galegas que protagonizan a novena entrega da colección de lousas do fondo do Arquivo Sonoro de Galicia do Consello da Cultura Galega (CCG). Esta selección permite escoitar as voces destas sopranos galegas que gozaron dunha frutífera carreira durante a primeira metade do século XX.
05/04/2020

Recuperamos unha publicación que analiza o uso do galego na liturxia

Neste Domingo de Ramos recuperamos este estudo do ano 1987 sobre o uso e actitude da igrexa católica diante do galego. Xesús Ferro Ruibal fai unha análise sociolingüística sobre a progresiva castelanización da Igrexa, o que a motivou, e as diferentes actitudes do clero en canto lingua vehicular. Incide na comparación do caso galego co doutras linguas minorizadas principalmente tras o Concilio de Trento, no que a Igrexa animou aos párrocos a utilizaren as linguas vernáculas para evanxelizar.
03/04/2020

O Consello da Cultura Galega amplía a colección Clásicos da emigración con “Cousas gallegas” de Fortunato Cruces

Detrás de “Cousas gallegas” hai poemas, discursos e outros materiais que o xornalista e avogado Fortunato Cruces publicou en 1923. É tamén o terceiro volume da colección Clásicos da emigración coa que o Consello da Cultura Galega (CCG) e a Secretaría Xeral da Emigración recuperan, en edición facsimilar e con estudos introdutorios, obras fundamentais para entender o fenómeno migratorio. Nesta ocasión o historiador e vicepresidente do CCG, Xosé Manoel Núñez Seixas, é o encargado da análise da obra. Ademais da publicación, o CCG presenta a entrada de Fortunato Cruces no Álbum de Galicia, así como a difusión de diferentes exemplares de “Nova Galicia”, o xornal que dirixiu e que tivo bastante repercusión en Arxentina.
03/04/2020

Antoni Rossell será o comisario da exposición que o Consello da Cultura Galega prepara sobre Afonso X O Sabio

O 4 de abril de 1284 morreu Afonso X, coñecido como O Sabio. Pasou á historia como o rei de Castela entre 1252 e 1284 pero tivo unha intensa relación coa cultura galega. Precisamente sobre esta relación afondará unha exposición que o Consello da Cultura Galega está a preparar para 2021 e que contará co comisariado de Antoni Rossell. Aproveitamos o cabodano para recuperar algúns materiais que dan conta desa singular figura. Entre eles, a edición facsimilar e a transcrición do códice de Toledo das Cantigas de Santa María; cortes de audio coa interpretación musical e a reprodución en 3D da virxe abrideira de Allariz, que se considera pertenceu á muller do monarca, a raíña Violante.
02/04/2020

O equilibrio entre emoción e razón centran a segunda proposta do ciclo virtual “(Re)pensamos”

“O lugar das emocións na política” é o título do relatorio que Victoria Camps, catedrática emérita de Filosofía moral e política da Universidade Autónoma de Barcelona impartiu no Consello da Cultura Galega. A súa conferencia intégrase no ciclo virtual “(Re)pensamos” que reflexionan sobre un aspecto da actualidade. Ofrecemos o vídeo da intervención que tivo lugar na sede da institución e mais o texto que cada autor preparou sobre esa materia e que integra a publicación “Cultura, sentido e política”.
02/04/2020

Compilamos unha serie de publicacións no Día Internacional do Libro Infantil e xuvenil

O día 2 de abril celébrase en todo o mundo o Día Internacional do Libro Infantil e Xuvenil. Con tal motivo, o Consello da Cultura Galega preparou unha escolma de varios títulos editados pola institución e dirixidos a público infantil e xuvenil cos que unirnos á conmemoración. “As laranxas máis laranxas de todas as laranxas”, “Mar adiante”, “Os dados do reloxeiro” ou “Pó de estrelas” son algunhas das propostas deixamos a disposición da cidadanía.
01/04/2020

Presentamos un percorrido virtual pola obra de Domingo de Andrade no Día das Artes Galegas

O 1 de abril é o día que a Academia Galega de Belas Artes Nosa Señora do Rosario celebra o Día das Artes Galegas. Este ano a figura homenaxeada é Domingo de Andrade. Aínda que os actos convocados para recuperar o legado deste fecundo arquitecto están adiados por mor da situación actual que vivimos, o Consello da Cultura Galega (CCG) propón un percorrido por cinco obras clave da súa arquitectura seleccionados e comentados por Alfredo Vigo Trasancos, membro da Sección de Patrimonio e Bens Culturais da institución.
31/03/2020

Presentamos cun audiovisual a tradución da obra de Concepción Arenal “A muller do porvir”

En 1869 Concepción Arenal publicou “A muller do porvir”, unha obra que ofrecía unha lectura inusual sobre as mulleres. No marco das celebracións do centenario do nacemento desta revolucionaria muller, o Consello da Cultura Galega traduce esta obra para o galego nun formato especial. Ademais do prólogo da especialista María Dolores Ramos, inclúe outros materiais que axudan a contextualizar a autora e a significatividade desta publicación. Por mor da cancelación da actividade presencial para conter a pandemia do coronavirus, o Consello da Cultura Galega adaptou para a rede o formato de presentación desta publicación. Faino a través dun audiovisual en que a presidenta da institución, Rosario Álvarez, xunto con María Xosé Porteiro, Inma López Silva, Mabel Rivera, Isabel Naveira e Celia Pereira prestan as súas voces nunha lectura colectiva deste texto para difundir o pensamento desta muller irrepetible.
31/03/2020

O Consello da Cultura Galega lamenta a perda do escritor e avogado Franco Grande

Xosé Luís Franco Grande foi unha figura imprescindible no galeguismo de posguerra. O escritor e avogado finou esta madrugada aos 84 anos de idade e deixa tras de si unha ampla traxectoria como activista cultural desde múltiples ámbitos. O Consello da Cultura Galega lamenta a perda desta figura fundamental para a cultura galega e destaca o seu labor regaleguizador durante a posguerra. Franco Grande tivo unha participación decisiva na creación da Editorial Galaxia; formaba parte de institucións como a Real Academia Galega e foi autor, entre moitos outros textos, do “Diccionario galego-castelán”, publicado en 1968, que serviu de base para aprender o idioma a moitas xeracións.
27/03/2020

O Consello da Cultura Galega avanza datos do sector teatral galego no Día Mundial do Teatro

As mulleres ocupan un papel importante no teatro galego. No Día Mundial do Teatro, que se celebra cada 27 de marzo, o Consello da Cultura Galega (CCG) avanza cifras dun estudo encamiñado a analizar a realidade do tecido teatral no noso país. Os primeiros resultados destacan que a maior parte dos xestores de teatro son mulleres e confirman que o público segue a ser eminentemente feminino. Engade tamén que o galego é a lingua maioritaria de representación e que os espectáculos infantís son os máis demandados. O CCG celebra este día con outras novidades: a publicación do epistolario entre Ricard Salvat e Luís Seoane, que dá conta das relacións entre o dramaturgo catalán e a cultura galega, e mais a incorporación de 35 novos termos ao “Dicionario de termos escénicos”.
26/03/2020

O ciclo virtual "(Re)pensamos" propón unha reflexión coa actualidade

Jorge Riechmann é un recoñecido filósofo, poeta e ecoloxista. Nas súas continuadas intervencións fala sobre a sustentabilidade e tamén alerta que nos encamiñamos cara a un planeta inhóspito. O seu pensamento non pode estar máis de actualidade e por iso a conferencia que impartiu no Consello da Cultura Galega abre o ciclo virtual “(Re)pensamos”. Cada xoves, o web institucional recuperará un relatorio de recoñecidas figuras do pensamento que reflexionan sobre un aspecto da actualidade. Ofrecemos o vídeo da intervención que tivo lugar na sede da institución e mais o texto que cada autor preparou sobre esa materia e que integra a publicación “Cultura, sentido e política”.
25/03/2020

Un especial web afonda na figura de Carballo Calero

O 25 de marzo de 1990 morría en Santiago de Compostela Ricardo Carballo Calero. Con el desaparecía unha figura fundamental da cultura galega, un elo entre as vizosas manifestacións culturais, sociais e políticas anteriores a 1936 e a recuperación tras a democracia. Represaliado no franquismo, mantivo un continuado e intenso labor que canalizou a través do ensino, das colaboracións na prensa e da investigación sobre a lingua e a literatura. Neste especial ofrecemos audios, imaxes, un roteiro e un perfil biográfico que axuda a entender a dimensión desta figura á que se lle dedica este ano o Día das Letras Galegas.
24/03/2020

O Consello da Cultura Galega homenaxeará a Ricardo Portela no centenario do seu nacemento

Este 24 de marzo cúmprense anos do pasamento do ilustre gaiteiro Ricardo Portela. O Consello da Cultura Galega está a preparar, coa complicidade de Carlos Núñez, unha homenaxe para o un dos grandes defensores da dignidade deste instrumentoque procurou fuxir da consideración da gaita como instrumento para amenización e exhibición patriótica. Neste 2020 cúmprense cen anos do nacemento desta figura clave para a gaita. Alén da preparación dese libro-homenaxe, en breve incorporaremos a súa biografía no noso Álbum de Galicia.
23/03/2020

Unha xornada do Consello da Cultura Galega propón un marco lexislativo que favoreza o mecenado

“A cultura do mecenado” é o título dunha xornada desenvolvida polo Consello da Cultura Galega (CCG) que analizou a situación do mecenado en Galicia da man de representantes de institucións e organismos públicos e privados que ofrecen ou precisan este recurso. A organización, compartida polo CCG, Concomitentes e a Fundación Daniel y Nina Carasso, contou coa coordinación de Fran Quiroga e María Xosé Porteiro. Desta cita sae un documento con recomendacións para potenciar o mecenado.
19/03/2020

Un especial web difunde material inédito que documenta a historia das esculturas mateanas

Non son só as esculturas que o Mestre Mateo deseñou para as entradas exteriores do Pórtico da Gloria e que se separaron do seu espazo orixinal polas modificacións posteriores da fachada da Catedral. Son tamén un espello da evolución política, histórica e cultural de Galicia, e mais un reflexo do esforzo de figuras fundamentais para a cultura galega na concepción de país e na defensa do noso patrimonio, como Fermín Bouza Brey, Manuel Chamoso Lamas, Xosé Filgueira Valverde e Xesús Carro. O Consello da Cultura Galega pon a disposición do público un especial web, “Os profetas do Pórtico e a cultura galega. Unha viaxe que non cesa”, que contén unha extensa documentación histórica que permite trazar a traxectoria, desde a súa creación ata o presente, de cinco esculturas da fachada do Pórtico da Gloria: as efixies dos profetas Enoc, Elías, Ezequiel e Xeremías, e a figura de Santiago cabaleiro.
17/03/2020

Os fondos hemerográficos enriquécense coa dixitalización de novos números de “A Nosa Terra”

Informou, en clave galega, da realidade social, histórica e política. “A Nosa Terra”, desaparecido en 2011, é un semanario de referencia para comprender a historia recente do país. O Consello da Cultura Galega publica hoxe o último lote cun centenar de exemplares que culmina o proxecto de dixitalización e difusión dunha etapa desta cabeceira. A dixitalización de mil números deste semanario entre os anos 1977 e 2001 responde a un convenio entre a institución e a Fundación A Nosa Terra para facilitar a preservación e difusión desta cabeceira desde a súa etapa histórica de principios do século XX, o período no exilio e a máis próxima no tempo. Esta iniciativa insírese nunha área de traballo da institución de pór a disposición da cidadanía unha ampla hemeroteca.
16/03/2020

O Consello da Cultura Galega reforza a súa vertente dixital para poñer a disposición do público contidos culturais

Información da actualidade cultural, difusión do seu fondo documental (recursos sonoros, epistolarios, materiais dixitalizados sobre patrimonio, emigración ou lingua, entre outras temáticas), primeiras aproximacións estatísticas sobre o impacto do coronavirus no tecido cultural.... son algúns ámbitos nos que traballa o Consello da Cultura Galega (CCG) estes días para pór a disposición do público contidos culturais galegos e en galego. A semana pasada a institución procedeu á necesaria suspensión e adiamento da súa actividade presencial do mes de marzo para conter a pandemia do coronavirus e decidiu reforzar a difusión dixital. Nos vindeiros días, a través das webs corporativas (consellodacultura.gal e culturaglega.gal) e das redes sociais, difundiranse novos contidos (publicacións, especiais, proxectos...) e adaptaranse para a rede algúns dos formatos co obxectivo de ofertar á cidadanía novos contidos culturais.
13/03/2020

O Consello da Cultura Galega adía a súa actividade presencial por mor do coronavirus

A Comisión Executiva do Consello da Cultura Galega acordou o peche ao público dos seus arquivos e a biblioteca; adiar as actividades públicas da institución para as vindeiras semanas e manter a difusión dos seus proxectos a través das súas plataformas web (o web corporativo consellodacultura.gal e o portal de divulgación cultural culturagalega.gal). Todas estas medidas están encamiñadas a conter a pandemia do coronavirus.
11/03/2020

O alumnado de secundaria experimenta coa ciencia nunha xornada do Consello da Cultura Galega

Son novos, gustan da ciencia e dos experimentos e cursan secundaria nun dos máis de douscentos centros que existen en Galicia. Este é o perfil do centenar de estudantes que durante a xornada de hoxe se converteron en improvisados relatores na cita do Consello da Cultura Galega chamada “Dos gabinetes de ciencias dos institutos históricos aos clubs de ciencia e o STEMBach”. O salón de actos do Consello da Cultura Galega (CCG) e a praza do Obradoiro foron improvisados laboratorios nos que se visibilizaron algunhas actividades que se fan no marco dos programas de STEMBach e dos Clubes de Ciencia.
10/03/2020

Estudantes de secundaria mostran os seus experimentos nunha xornada do Consello da Cultura Galega

A praza do Obradoiro converterase mañá nun improvisado laboratorio científico no que estudantes de diferentes centros galegos de ensino medio nos mostrarán varios experimentos científicos. “Queremos que os profesionais do futuro fagan ciencia e o fagan nun dos puntos máis emblemáticos de Galicia como é a praza do Obradoiro” explica Elena Vázquez Cendón, coordinadora da Sección de Ciencia, Tecnoloxía, Natureza e Sociedade do Consello da Cultura Galega (CCG), que promove a xornada “Dos gabinetes de ciencias dos institutos históricos aos clubs de ciencia e o STEMBach”. A cita pretende visibilizar a ciencia que se fai no ensino secundario con experimentos en directo e, ao mesmo tempo, renderlles homenaxe aos gabinetes de ciencia, antecedentes do ensino científico experimental, que aínda existen nos institutos históricos. A presidenta do CCG, Rosario Álvarez, inaugurará esta xornada que poderá seguirse en directo a través da rede.
09/03/2020

Un convenio permite poñer na rede o epistolario cruzado entre Carballo Calero e Otero Pedrayo

Son 167 cartas nas que se pode ler sobre a Real Academia Galega, a literatura galega e as preocupacións comúns entre Ramón Otero Pedrayo e Ricardo Carballo Calero. Un material fundamental para profesionais da investigación ou persoas interesadas na cultura galega e que xa se poden consultar na rede. A iniciativa é resultado da colaboración institucional entre o Consello da Cultura Galega (CCG), a Fundación Otero Pedrayo. Esta fin de semana asinouse en Trasalba un convenio que posibilita esta iniciativa e que permite coñecer figuras esenciais da cultura galega a través das súas propias cartas.
09/03/2020

Subimos á rede tres documentos de Martín Sarmiento no día do seu nacemento

“A noite do 9 de marzo nacín e o día 19 bautizáronme co nome de Pedro Joseph” escribiu o propio Martín Sarmiento no “Catálogo dos pregos”, o documento no que condensa a súa propia vida. Aproveitamos que se cumpren 325 anos do seu nacemento para dar a coñecer tres autógrafos dun dos máis importantes e orixinais legados intelectuais da Ilustración española e promotor do desenvolvemento do galeguismo contemporáneo.
06/03/2020

O Consello da Cultura Galega incorpora unha nova cabeceira ao proxecto “A Saia”

“Deliberadamente. Folha informativa de activismo feminista” é o título dunha publicación que Mulheres Nacionalistas Galegas (MNG) editou en dúas datas moi marcadas para o feminismo: o 8 de marzo e 25 de xullo. Nela recollían debates e denuncias do movemento desde unha ollada nacionalista. Os dezaseis números que se editaron entre 1996 e 2004 acaban de subirse á rede no marco do proxecto “A Saia”, colección dixitalizada de publicacións periódicas feministas que manteñen o Centro de Documentación en Igualdade e Feminismos (CDIF) do Consello da Cultura Galega (CCG) e ADHUC Teoria, Gènere, Sexualitat da Universitat de Barcelona.
06/03/2020

Aberta a inscrición para a XXII edición dos Encontros para a Normalización Lingüística

Migrantes, galegos e galegas que retornan, conveciños e conveciñas que non teñen o galego como lingua familiar ou colectivos non galegofalantes de orixe. Sobre todos eles se centra a XXII edición dos Encontros para a Normalización Lingüística que organiza o Centro de Documentación Sociolingüística de Galicia (CDSG) do Consello da Cultura Galega (CCG). A cita ten como título “A integración lingüística como ferramenta de cohesión social” e desenvolverase os días 16 e 17 de abril. Hai cen prazas e a inscrición está aberta a través do web.
05/03/2020

Aberta a inscrición dunha xornada que analiza o desenvolvemento turístico da costa do solpor

“A costa do solpor europea: unha irmandade atlántica” é o nome dunha xornada do Consello da Cultura Galega (CCG), coordinada por Jorge Mira, que pon os ollos nas posibilidades de desenvolvemento turístico duns espazos moi singulares. Son os que unen Cabo de São Vicente e Cabo da Roca (Portugal), Costa da Morte (Galicia) e Aglapsvik e Måsøy (Noruega). Estes lugares son o último punto no que atardece en Europa se temos que conta que a iluminación solar do planeta muda durante o ano. Profesionais de diferentes ámbitos analizarán as posibilidades turísticas conxuntas destes territorios nunha xornada que terá lugar o día 24 de marzo. A inscrición está aberta e pódese facer a través do sitio web da institución.
04/03/2020

Experimentos en directo e conferencias visibilizarán a ciencia no ensino secundario

Satélites feitos con latas de refrescos, alteracións das cores das moedas, foguetes de azucre, fototrampeos... son algúns dos experimentos que preparan os clubs de ciencia dos centros de secundaria de Galicia. Algunhas desas iniciativas poderemos velas e escoitalas en directo o vindeiro día 11 de marzo no Consello da Cultura Galega (CCG) dentro na xornada “Dos gabinetes de ciencias dos institutos históricos aos clubs de ciencia e o STEMBach”. A cita, organizada pola Sección de Ciencia, Tecnoloxía, Natureza e Sociedade, daralles voz aos escolares e aos seus docentes para divulgar estas experiencias interactivas. Ademais, tamén afondará no legado patrimonial e científico dos gabinetes de ciencia, os antecesores destas iniciativas. A xornada non ten inscrición pero poderá seguirse en directo a través da rede.
03/03/2020

Unha mostra exhibe o resultado da bolsa de creación convocada polo Consello da Cultura Galega e a Casa de Velázquez

“Ce qui me regarde (O que me incumbe)” é unha instalación na que Ángel Montero Vázquez reflexiona sobre a identidade da súa avoa, o paso do tempo e as emocións a través do corpo e das sensacións. O seu traballo é froito dunha estadía de tres meses na Casa de Velázquez en Madrid como beneficiario da bolsa de creación convocada polo Consello da Cultura Galega e esta entidade. A instalación insírese na mostra “Casa&Co”, que exhibe os traballos resultantes de todas as estadías realizadas na Casa de Velázquez en 2019.
02/03/2020

Ana Domínguez abre mañá no CGAI o ciclo de cine “Olladas de muller”

“Os fillos da vide” é un documental no que a directora Ana Domínguez (A Rúa de Valdeorras) visita as súas raíces nun percorrido polos ciclos da vida e as estacións e no que cobran especial protagonismo os viñedos, a vendima e o viño. É tamén o filme inaugural da sétima edición do ciclo de cinema “Olladas de muller”, unha proposta organizada polo Consello da Cultura Galega (CCG) e o Centro Galego de Artes da Imaxe (CGAI) coa intención de difundir a creación audiovisual feita por mulleres. A presidenta do CCG, Rosario Álvarez, será a encargada de inaugurar esta proposta que se amplía a sete días de programación e se abre á cinematografía portuguesa. Canda ela estará presente a promotora desta iniciativa, Encarna Otero. As proxeccións terán lugar na sede do CGAI na Coruña e a entrada é de balde.
02/03/2020

María Xosé Porteiro, premio Ernestina Otero do Consello Municipal da Muller de Vigo

O Consello Municipal da Muller de Vigo decidiu, por unanimidade, conceder o premio Ernestina Otero a María Xosé Porteiro (Madrid, 1952). Porteiro ten unha ampla traxectoria como xornalista, política, escritora de novela e ensaio e actualmente é vicevaledora do pobo e ocupa diferentes postos na estrutura do Consello da Cultura Galega (é membro do Plenario, vogal da súa Comisión Executiva e directora do Centro de Documentación en Igualdade e Feminismos, Cedif).