noticia

Rexistros 1471 a 1484 de 1484
28/10/2015

O traballo fotográfico de Mary Quintero centra unha xornada do Consello da Cultura Galega

A luz que alumea a vida é o título da xornada coa que a Comisión de Igualdade do Consello da Cultura Galega (CCG) quere centrar o foco nunha fotógrafa viguesa tan descoñecida para o público como destacada foi na súa profesión. Mary Quintero (Melide, 1931) é unha das pioneiras da fotografía profesional en Galicia e unha retratista preocupada pola iluminación e uso de novas técnicas. A cita terá lugar mañá xoves en Santiago co obxectivo de visibilizar o traballo de mulleres que, como ela, están a pasar desapercibidas no mundo da imaxe. A xornada complétase cunha exposición nas instalacións do CCG que exhibe algunhas das fotografías e materiais que marcaron a súa traxectoria e que comentará a propia Quintero.
27/10/2015

Mellora a asistencia ao cine en Galicia, aínda lonxe da media estatal, segundo o Observatorio da Cultura

En 2014 foron ao cine 3,6 millóns de galegos e galegas. Son 600 000 máis que no ano anterior e, aínda que a cifra é positiva, Galicia segue a ocupar o último posto en asistencia en toda España. Só o 40,5% da poboación asistiu a unha proxección cinematográfica no último ano. Son cifras do Documento de Traballo do Observatorio da Cultura Galega (DT-OCG) titulado “O cine en Galicia 2014” e que analiza cifras de asistencia, produción e distribución así como de hábitos e prácticas culturais.
27/10/2015

O Consello da Cultura celebra en Vilanova de Arousa o nacemento de Valle-Inclán cunha mostra que recolle a repercusión internacional

Este mércores cúmprense 149 anos do nacemento de Ramón María del Valle-Inclán (1866-1936). Unha efeméride que o Consello da Cultura Galega celebra coa inauguración da exposición “Outros verbos, novas lecturas: Valle-Inclán traducido [1930-1936]”, que pretende dar conta da dimensión internacional deste escritor a través das traducións das súas obras a outras linguas. Será en Vilanova de Arousa, na súa Casa-Museo, onde estará o presidente do Consello da Cultura Galega, Ramón Villares, e a comisaria desta mostra, Rosario Mascato.
27/10/2015

Iván Llamazares abre o ciclo dos populismos cun relatorio sobre a situación en Europa

Como xorden os novos populismos en Europa e cales son os seus argumentarios? Estas dúas preguntas centran a conferencia coa que o profesor da Universidade de Salamanca Iván Llamazares abre mañá mércores o ciclo “O populismo hoxe, Europa e América Latina”. Este programa, coordinado polo profesor Ramón Máiz, pretende achegar este termo político do que se fala tanto nos últimos tempos desde múltiples perspectivas. Son catro relatorios sobre o tema que se estenden ata 11 de novembro.
25/10/2015

O Consello da Cultura Galega e a Universidade de Vigo organizan unha xornada para concienciar sobre a importancia dos océanos

A Facultade de Ciencias da Educación e do Deporte de Pontevedra acolle o vindeiro luns 26 a II edición da xornada «Bo uso e mal uso do mar». Un encontro organizado polo Consello da Cultura Galega e a Universidade de Vigo para concienciar a cidadanía da importancia da relación cos océanos. Investigadores de Cabo Verde, Reino Unido e Suecia ofrecerán relatorios e experiencias prácticas arredor da sustentabilidade do mundo mariño.
21/10/2015

O Consello da Cultura Galega dedica un ciclo a analizar os populismos

Alberto Fujimori, Hugo Chávez, Sarah Palin, Pablo Iglesias e os partidos Vlaams Belang ou o Front Nacional comparten o denominador común de ser etiquetados comunmente como populismo. O uso e abuso deste termo político centra o vindeiro ciclo do Consello da Cultura Galega. Baixo o título “O populismo hoxe, Europa e América Latina”, está coordinado polo profesor Ramón Máiz e consta de catro sesións. Entre todas elas preténdese reflexionar sobre o concepto con enfoques diferentes. A cita ábrese o vindeiro mércores 28 de outubro cunha conferencia de Iván Llamazares sobre os populismos en Europa.
17/10/2015

Conclúen os Encontros para a Normalización que demandan unha maior colaboración entre todas as entidades

A maioría da mocidade de Galicia (entre 15 e 24 anos) ten un dominio efectivo do galego, idioma no que cada vez se escribe máis e fala menos. As cifras así como as experiencias de normalización e planificación pensadas para os máis novos expuxéronse na XVII edición dos Encontros para a normalización lingüística. Unha cita de referencia que organiza anualmente o Consello da Cultura Galega (CCG) na que se puxo en evidencia a necesidade dun traballo colaborativo entre entidades e institucións que permita inverter a baixada de galegofalantes
02/10/2015

O Consello da Cultura Galega achégase á figura da retratista Mary Quintero cunha xornada

Os retratos que fixo no seu estudo permiten trazar a crónica dunha época das cidades de Lugo e de Vigo. Chámase Mary Quintero (Melide, 1931) e é unha das pioneiras da fotografía profesional en Galicia. O seu traballo e a súa traxectoria centran a xornada A luz que alumea a vida, que lle dedica a Comisión de Igualdade do Consello da Cultura Galega o vindeiro 29 de outubro. Profesionais dos medios de comunicación, da fotografía e do mundo da imaxe contextualizarán o seu traballo nunha sesión que servirá tamén de homenaxe. Un dos momentos máis destacados será o percorrido vital e profesional que Quintero realizará a través das súas obras nunha exposición montada para a ocasión. A inscrición é gratuíta e pódese facer a través da páxina web da institución.
30/09/2015

Profesionais reflexionan no Consello da Cultura sobre a situación actual do coleccionismo

O coleccionismo de arte en España, a pesar de ser unha parte fundamental do sistema artístico, caracterízase pola súa fraxilidade e a súa falta de tradición. Nas xornadas “Arte+Coleccionismo”, o Consello da Cultura Galega, a través da Sección de Creación e Artes Visuais Contemporáneas”, pretende reflexionar sobre esta realidade atendendo ao seu presente pero tamén aos seus retos de futuro. Responsables de entidades como o Museo Thyssen ou a colección Patricia Phelps de Cisneros, de feiras como ARCOmadrid, xunto con galeristas e coleccionistas (Pilar Citoler e José Blanco, entre outros) atenderán ao momento complexo que vive o coleccionismo. A cita desenvolverase en Santiago os días 4 e 5 de novembro e acaba de abrir o prazo de inscrición, que se pode formalizar a través da web da institución.
29/09/2015

O Observatorio da Cultura destaca a mellora do libro electrónico nuns fogares cada vez máis conectados

A relación dos galegos e galegas coas novas tecnoloxías é cada vez máis intensa. Os fogares están máis e mellor equipados e só as radios perden terreo no ámbito doméstico. Ademais, o seu uso é máis frecuente (sóbense máis contidos, empréganse máis redes sociais, medran os blogs…). Con todo, o uso cultural ten tamén outras lecturas. O libro electrónico constata un forte ascenso, un 70% no último ano, mentres que a compra de películas e música retrocede case sete puntos. Son as cifras de “As TIC, redes e cultura”, o último Documento de Traballo do Observatorio da Cultura Galega (DT-OCG).
25/09/2015

O Consello da Cultura acolle un encontro con axentes sociais de difusión do patrimonio cultural

O Consello da Cultura Galega acolle esta tarde un encontro de Patrimonio Cultural e Acción Social. Trátase dunha reunión de traballo de carácter informal á que foron convocadas diferentes entidades civís vinculadas coa defensa, promoción e investigación do patrimonio cultural para detectar situacións comúns. A iniciativa está promovida pola Sección de Patrimonio e Bens Culturais do Consello da Cultura Galega (CCG), coordinada por Iago Seara.
24/09/2015

O concepto migracións centrou o primeiro encontro Mateus DOC celebrado en Galicia

Mateus DOC é un exitoso programa que busca estimular o diálogo interdisciplinar entre investigadores novos que reflexionan arredor dun tema. Esta cita, organizada polo portugués Instituto Internacional Casa Mateus (IICM), tivo lugar esta fin de semana en Santiago. É a primeira vez que se realiza fóra de Portugal e foi posible grazas á colaboración do Consello da Cultura Galega. Esta edición pretendeu servir de reflexión sobre o concepto de Migración.
24/09/2015

O Consello da Cultura leva a literatura galega á feira do libro de Göteburgo

A cultura galega estará presente na Feira do libro de Göteburgo, que se desenvolve ata o domingo nesa cidade sueca. Faino a través do Consello da Cultura Galega, que conta cun espazo compartido con outras linguas peninsulares e coa participación nun programa cultural ao que asisten Dolores Vilavedra e Inma López Silva. Este encontro é o maior festival literario dos países escandinavos e está considerado como a segunda feira europea en relevancia, despois da de Frankfurt.
23/09/2015

O Consello da Cultura Galega participa na xuntanza anual da Asociación Europea de Institucións Migratorias (AEMI) en Turín

“Europa e as migracións no terceiro milenio” é o título da xuntanza anual da Asociación Europa de Institucións Migratoria (AEMI) que se desenvolve ata o sábado en Turín, Italia. Nesta cita estará presente o Consello da Cultura Galega, a través do seu Arquivo da Emigración Galega, cun relatorio que ofrecerá unha visión das novas mobilidades de migración en Galicia.
21/09/2015

Os retos do xornalismo cultural no contexto actual centraron a xornada do Consello da Cultura

A divulgación de propostas de museos como o do Prado, iniciativas coñecidas como Jot Down ou eldiario.es xunto co traballo consolidado de El Cultural puxeron o punto final a unha xornada encamiñada a coñecer como comunicar cultura no contexto actual, marcado pola mediación tecnolóxica, a crise e a transformación das identidades. A cita chamábase “Cultura e comunicación na Europa do século XXI” desenvolveuse ao longo do día de hoxe no Consello da Cultura Galega e foi coordinada por Xosé López, Xosé Rúas e Manuel Gago.
20/09/2015

Especialistas en comunicación cultural debaten nunha xornada do Consello da Cultura Galega

18/09/2015

Os XVII Encontros para a Normalización centraranse no uso da lingua pola mocidade e a infancia

Os Encontros para a normalización lingüística son unha cita de referencia para coñecer e debater a situación da lingua do país. A súa XVII edición atenderá este ano aos máis novos. Durante dous días exporanse estudos que axudarán a coñecer cales son as actitudes e as razóns polas que unha parte da mocidade non usa o galego, así como iniciativas públicas e privadas destinadas a fomentar a lingua nestas idades. Os Encontros, organizados polo Centro de Documentación Sociolingüística de Galicia dependente do Consello da Cultura Galega (CCG), desenvolveranse entre o 15 e o 16 de outubro e a inscrición pódese facer a través da páxina web da institución.
14/09/2015

O Consello da Cultura Galega leva a Roma a exposición que recolle a dimensión internacional de Valle-Inclán

“Altre parole, nuove letture: Valle-Inclán tradotto [1906-1936]” (“Outros verbos, novas lecturas: Valle-Inclán traducido”) é o título da exposición que pretende dar conta da dimensión internacional deste escritor a través das traducións das súas obras a outras linguas. A versión en italiano da mostra inaugúrase este martes 15 de setembro na Academia de España en Roma coa presenza do presidente do Consello da Cultura Galega, Ramón Villares, e a súa comisaria, Rosario Mascato. A mostra ten especial significación xa que foi o último destino profesional de Valle-Inclán antes da súa morte.
14/09/2015

O Consello da Cultura dedica unha xornada a analizar a comunicación cultural

“Cultura e comunicación na Europa do século XXI” é o título da xornada que abrirá o vindeiro 21 de setembro a programación do Consello da Cultura Galega para o último cuadrimestre do ano. Responsables de publicacións de ámbito cultural xunto con docentes e responsables de centros culturais estarán presentes para repensar o papel da cultura nos novos escenarios da industria cultural e da comunicación ao descubrir as oportunidades e dificultades de emprender neste ámbito. A cita, de carácter aberto, xa ten aberto o prazo de inscrición a través do web do Consello da Cultura Galega.
16/07/2015

Os alumnos dos cursos de verán de lingua e cultura galegas visitan o CCG

Os alumnos dos cursos de verán de lingua e cultura galegas que anualmente organiza a Real Academia Galega para non galegos visitaron onte o CCG. O nutrido grupo de estudantes estranxeiros e do Estado español que participan neste curso para coñecer mellor Galicia, a súa lingua e cultura, foi recibido pola vicepresidenta da institución, Rosario Álvarez Blanco, e posteriormente asistiron a unha conferencia de Manuel Gago sobre Internet e a cultura e sociedade galega.
14/07/2015

As cifras do Observatorio da Cultura destacan unha situación positiva para o libro en Galicia

A edición de libros en Galicia presenta indicadores á alza en diferentes ámbitos: en 2014 editáronse 383 libros máis que o ano anterior, medra o número de editores, aumenta o número de títulos en galego e tamén da edición dixital. A cara negativa chega da man das cifras de tradución do galego e para o galego, que rexistran notorias baixadas. Son algunhas variables que recolle o último Documento de Traballo do Observatorio da Cultura Galega (DT-OCG) que, co título “O libro e a edición en Galicia”, recolle datos estatísticos sobre esta realidade así como do sector empresarial e do mercado laboral.
06/07/2015

O Consello da Cultura presenta Setestrelo, a súa canle de divulgación científica en Internet

Erwin Schrödinger foi un físico austríaco con importantes contribucións no mundo da física cuántica. En 1934 converteuse no primeiro Premio Nobel que visitaba unha Galicia que espertaba á ciencia. Coa crónica desa histórica visita, que acabou en traxedia, e outros temas de actualidade preséntase Setestrelo, a canle de divulgación científica do Consello da Cultura Galega (CCG). Unha proposta da Sección de Ciencia, Natureza e Sociedade que presentou esta mañá en rolda de prensa o vicepresidente do CCG, Francisco Díaz Fierros, quen destacou “a preocupación do Consello na divulgación científica xa que entendemos que ten que haber ciencia para haber tamén cultura”. Canda el estaban presentes os membros da sección Marilar Aleixandre e Iolanda Casal, xunto con Manuel Gago, director do portal de divulgación cultural Culturagalega.gal, no que se difunde esta nova canle.
02/07/2015

Unha xornada do CCG destaca os cambios que terá o ensino da literatura no vindeiro curso

No vindeiro curso académico entra en vigor o novo currículo educativo fixado pola LOMCE para lingua e literatura. Iso suporá que haberá cambios na forma de avaliar, pero tamén se eliminarán repeticións nos contidos entre o castelán e o galego e viceversa. Algunhas desas mudanzas abordáronse na xornada “O ensino da literatura”, que se desenvolve ao longo do día de hoxe no Consello da Cultura Galega, e que conta coa coordinación de Dolores Vilavedra e Teresa López.
26/06/2015

Unha xornada do Consello da Cultura Galega analiza o papel da literatura no ensino

Non é só unha materia curricular máis, a educación literaria consiste no ensino e na aprendizaxe dos coñecementos e habilidades que necesita un lector. Ademais, serve para iniciar ao estudantado na emoción da literatura, un mundo que logo percorrerán de xeito autónomo. Como se está a facer, ademais de coñecer outras alternativas, é o obxectivo dunha xornada que se desenvolverá o vindeiro xoves 2 de xullo no Consello da Cultura Galega (CCG). A cita, coordinada por Dolores Vilavedra e Teresa López, chámase “O ensino da literatura a debate” e está orientada principalmente ao profesorado, para o que se reserva o 70% das prazas.
17/06/2015

O presidente do Consello da Cultura Galega, Ramón Villares, é investido Doutor Honoris Causa pola Universidade do Minho

A Universidade do Minho distingue esta tarde co seu grao de Doutor Honoris Causa en Historia a Ramón Villares, catedrático de Historia Contemporánea e presidente do Consello da Cultura Galega. Os membros da comisión científica do Senado Académico da Universidade portuguesa, por proposta do seu Instituto de Ciências Sociais, acordaron por unanimidade conceder esta distinción a Ramón Villares. Este recoñecemento concédese a “personalidades de mérito eminente, que se destaquen nos dominios da ciencia, da educación e da cultura, posuidores dun currículo de gran proxección internacional”.
16/06/2015

A transformación da industria e do mercado na cultura pecha o ciclo Desafíos do ecosistema cultural galego ante a Axenda Europa 2020

A situación do mercado e das industrias da cultura centraron a última sesión do ciclo Desafíos do ecosistema cultural galego ante a Axenda Europa 2020, unha proposta coordinada por Xosé López, encamiñada a coñecer o papel que desenvolve a cultura nas estratexias europeas. Nesta cita, José Teixeira, profesor de política cultural da Universidade de Sao Paulo debuxou, desde un punto de vista teórico o contexto actual das políticas culturais condicionadas pola mediación tecnolóxica transforma o mercado e a cidadanía cada vez máis saturada de contidos. Nesta última sesión, coordinada por Margarita Ledo, participaron Paz Castro da editorial Kalandraka, Emma Lustres da produtora Vaca Films e Asunta Rodríguez da Galeria Trinta que deron conta da súa propia experiencia práctica.
15/06/2015

O Consello da Cultura Galega recibe a doazón de documentación de Ramón Iglesia Parga

O presidente do Consello da Cultura Galega, Ramón Villares, recibiu esta mañá documentación de Ramón Iglesia Parga (Santiago de Compostela, 1905- Madison, Wisconsin, 1948), unha das figura destacadas da historiografía colonial americana da xeración do 27, entregado polo seu neto, Pablo San Juan Iglesia. O material está composto principalmente fichas bibliográficas deste descoñecido pero interesante historiador e bibliotecario antes do seu exilio americano en 1938.
15/06/2015

A análise da industria e o mercado pecha o ciclo Desafíos do ecosistema cultural galego ante a Axenda Europa 2020

"Os smartphones son o segundo cerebro dos habitantes do século 21 e o levan na man" afirma José Teixeira, profesor de política cultural da Universidade de Sao Paulo, quen estará mañá no Consello da Cultura Galega para falar do mercado e da industria cultural. A súa intervención insírese na xornada que pecha o ciclo Desafíos do ecosistema cultural galego ante a Axenda Europa 2020, unha proposta coordinada por Xosé López, encamiñada a coñecer a relevancia e o papel que desenvolve a cultura nas estratexias europeas. Nesta última sesión tamén participarán Paz Castro da editorial Kalandraka, Emma Lustres da produtora Vaca Films e Asunta Rodríguez da Galeria Trinta. Esta sesión está coordinada pola catedrática Margarita Ledo.
10/06/2015

A última sesión do ciclo Desafíos do ecosistema cultural galego ante a Axenda Europa 2020 centrarase na análise do mercado

A situación das industrias e do mercado cultural pecha o vindeiro martes 16 o ciclo Desafíos do ecosistema cultural galego ante a Axenda Europa 2020. Unha proposta coordinada por Xosé López, encamiñada a coñecer a relevancia e o papel que desenvolve a cultura nas estratexias europeas. Nesta última sesión, o profesor José Teixeira Coelho ofrecerá o marco teórico sobre o que se situarán os relatorios dos responsables da editorial Kalandraka, da produtora Vaca Films e da Galeria Trinta. Esta sesión está coordinada pola catedrática Margarita Ledo.
05/06/2015

A mocidade cantou a poesía de Ramón Cabanillas na terceira edición de No bico un cantar

Un concerto conformado por un coro de 350 nenos e nenas de toda Galicia puxo fin á terceira edición de “No bico un cantar”. Unha cita organizada polo Consello da Cultura Galega (CCG) e a Consellería de Cultura, Educación e Ordenación Universitaria que xunta poesía, música e mocidade. O poeta elixido foi Ramón Cabanillas (Cambados, 1876-1959) polo que o concerto se celebrou na súa localidade natal, nun espazo tan emblemático como son os xardíns do Pazo de Torrado. Maximino Zumalave repetiu como director deste gran coro infantil que tivo un dos seus momentos máis destacados na estrea absoluta da versión musical do poema “Fala unha laverca”, que o CCG lle encargou á compositora Margarita Soto Viso. No inicio do concerto, o vicepresidente Francisco Díaz-Fierros anunciou que a vindeira edición desta proposta estará dedicada ás cancións dos xograres e trobadores medievais e se desenvolverá na Ría de Vigo.