noticia

Rexistros 1591 a 1610 de 1610
10/10/2014

O Consello da Cultura Galega reúne a profesionais da industria musical para falar do seu financiamento

No contexto actual de crise económica non ten cabida a fórmula dos grandes concertos musicais financiados con cargo a fondos públicos. Isto obriga a repensar as fórmulas de investimento público á hora de organizar proxectos deste tipo. A xornada O financiamento de proxectos musicais a partir do patrocinio privado sentará na mesma mesa a profesionais da industria musical para analizar as necesidades deste novo escenario. A cita terá lugar no Consello da Cultura Galega (CCG) no serán do 16 de outubro e a inscrición xa pode facerse a través do web.
09/10/2014

O seminario sobre B. J. Feijoo pon de manifesto a vixencia do seu pensamento

A súa ansia de sabelotodo (libido sciendi), lector voraz, precursor en cuestións xurídico-sociais, a conciencia crítica da primeira metade do século XVIII. Foron moitos os aspectos do pensamento de Benito Jerónimo que saíron a relucir no marco do seminario seminario “BJ Feijoo. Renovador do pensamento da ilustración” que se desenvolveu na xornada de hoxe xoves no Liceo de Ourense. Unha cita organizada polo Consello da Cultura Galega e que se insire dentro das actividades previstas para conmemorar o 250 aniversario do pasamento deste ilustre ourensán. Ademais, Francisco Díaz-Fierros, coordinador desta cita, asegura que serviu para dar a coñecer o papel que “Benito Jerónimo Feijoo desempeñou dentro da recuperación da identidade galega do século XIX”.
08/10/2014

O Consello da Cultura Galega pon na rede unha gravación de Otero Pedrayo sobre B. J. Feijoo

Este ano cúmprense 250 anos do pasamento de Benito Jerónimo Feijoo, un referente da recuperación da identidade galega do século XIX. Para conmemoralo, o Consello da Cultura Galega leva a cabo mañá xoves en Ourense un seminario encamiñado a pór de manifesto a vixencia do seu pensamento. Relacionado con esta efeméride, acaba de poñer a disposición dos usuarios na rede unha conferencia que outro ilustre ourensán, Ramón Otero Pedrayo, pronunciou en 1964 detallando a relevancia histórica e perfil de Feijoo.
06/10/2014

O Consello da Cultura Galega reflexiona sobre o papel e a situación actual do teatro amador

O teatro amador é necesario para a formación dun sistema teatral completo. Pero tamén é fundamental que conviva xunto a unha práctica profesional. Durante anos, este tipo de teatro foi pouco recoñecido. Unha eiva que pretende corrixir o Consello da Cultura Galega con Teatro Amador, unha xornada pensada para reflexionar, dignificar e situalo como parte esencial do tecido teatral galego. A cita terá lugar na sede da institución o vindeiro 28 de outubro. Hai cen prazas e a inscrición pódese facer a través do sitio web.
03/10/2014

Unha xornada revisará o estado actual da publicidade en galego

As debilidades da publicidade no noso idioma son algúns dos temas que centran a xornada A Publicidade en Galego, unha cita que terá lugar no Consello da Cultura Galega o vindeiro día 23 de outubro. Publicistas, empresarios e expertos no ámbito da comunicación publicitaria participarán neste seminario, que ofrecerá un marco histórico actual desde todos os ámbitos implicados na materia. Está aberto o prazo de inscrición (100 prazas, de balde), que se pode facer a través da web.
02/10/2014

O Consello da Cultura Galega participa na Feira internacional do Libro, Liber 2014

Do 1 ao 3 de outubro ten lugar en Barcelona a trixésimo segunda edición da Feira Internacional do Libro. Unha cita á que o Consello da Cultura Galega levará a súas publicacións máis recentes a través de dous espazos. Un deles co Institut d´Estudis Catalans (stand A 164). O outro é coa UNE (Unión de Editoriais Universitarias Españolas). Precisamente esta entidade presenta hoxe, 2 de outubro, a súa plataforma de venda en liña, Unebook.es , na que se poden atopar as publicacións do Consello da Cultura Galega.
01/10/2014

Un seminario revisa a figura de B. J. Feijoo no 250 aniversario da súa morte

“Benito Jerónimo Feijoo foi un referente dentro da recuperación da identidade galega do século XIX e queremos destacar aspectos do seu pensamento que aínda teñen vixencia”. Francisco Díaz-Fierros sintetiza así a esencia do seminario B.J. Feijoo. Renovador do Pensamento da Ilustración que o Consello da Cultura Galega desenvolve o vindeiro 9 de outubro no Liceo de Ourense e que coincide co 250 aniversario do seu pasamento. Xa está aberto o prazo de inscrición (que se pode facer a través do web do CCG) e hai cen prazas.
30/09/2014

O Consello da Cultura Galega pon na rede a edición completa da revista Céltiga

Céltiga foi o punto de encontro da intelectualidade galega residente en Arxentina entre 1924 e 1932. Nela publicaron tanto notables intelectuais arxentinos como escritores, periodistas, poetas e artistas galegos de todas as disciplinas. Agora, cando se cumpren noventa anos da publicación do seu primeiro número, o Consello da Cultura Galega promove, en colaboración coa Fundación Penzol, coa Universidade de Santiago, coa Real Academia Galega e co Centro Ramón Piñeiro, Instituto Sarmiento a localización, dixitalización e posta a disposición da cidadanía a través do web institucional a edición completa.
29/09/2014

Unha xornada achégase ao traballo pioneiro de Elena Colmeiro

Foi unha pioneira no ámbito da escultura cunha obra chea de liberdade creativa, fóra de modas e modismos, cun estilo propio. O vindeiro 30 de outubro, o Consello da Cultura Galega (CCG) realizará na súa sede a xornada Espazos da materia, destinada a homenaxear a Elena Colmeiro (Silleda, Pontevedra, 1932). Profesionais da historia, das artes plásticas, do comisariado, dos medios de comunicación e da crítica participan nun encontro que servirá de homenaxe ao traballo pioneiro desenvolvido por esta artista na súa longa traxectoria. A xornada, na que participará a propia Elena Colmeiro, rematará cunha performance a cargo da artista Ana Gesto. A inscrición é gratuíta e pódese facer a través da páxina web da institución.
25/09/2014

Pechan os XVI Encontros para a Normalización apelando a un novo marco discursivo para o galego

Durante dous días, filólogos, sociolingüistas, politólogos, sociólogos e antropólogos estiveron no Consello da Cultura Galega analizando a realidade plurilingüística de España. Os XVI Encontros para a Normalización Lingüística, organizados Consello da Cultura Galega (CCG) a través do Centro de Documentación Sociolingüística de Galicia, conclúen este serán centrándose na situación do galego e na necesidade dun novo consenso. Esta edición abriu o seu marco de actuación e buscou contrastar as diferentes evolucións entre as linguas cooficiais das nacionalidades e reflexionar sobre a política lingüística de España.
25/09/2014

O Arquivo da Emigración Galega presenta o proxecto Epístola na xuntanza anual da AEMI que terá lugar en Riga

“Migracións e refuxiados: antes e agora” é o título baixo o que a Asociación Europea de Estudos Migratorios (AEMI) convocou os seus socios para a súa xuntanza anual. Unha cita que ten lugar en Riga (Letonia), do 25 ao 27 de setembro, e na que participa o Consello da Cultura Galega a través do Arquivo de Emigración Galega. Alí presentarase o Proxecto Epístola, iniciativa que se encarga da preservación dos fondos documentais de personalidades da emigración galega.
24/09/2014

A lingua na xustiza e nos medios pechan o xoves os XVI Encontros para a Normalización

O resultados do modelo de ensino do eúscaro nos últimos trinta anos, a significación da sentenza do Tribunal Superior de Justicia de Baleares que anula o decreto do Tratamento Integral de Lenguas (TIL) nas aulas e os retos actuais do asturiano son algúns dos asuntos que centraron a primeira das xornadas dos XVI Encontros para a Normalización Lingüística que organiza o Centro de Documentación Sociolingüística de Galicia. Ramón Villares, presidente do Consello da Cultura Galega, Henrique Monteagudo, coordinador dos XVI Encontros e Valentín García, secretario xeral de Política Lingüística, foron os encargados de inaugurar esta cita que conclúe este xoves coa análise da política lingüística de España en ámbitos concretos como son a xustiza ou os medios de comunicación.
23/09/2014

Os XVI Encontros para a Normalización arrincan o mércores comparando a situación das linguas cooficiais

A evolución, perspectivas, sociolingüística, decisións políticas que definen a situación actual das linguas cooficiais centran o primeiro día dos XVI Encontros de Normalización Lingüística. Unha cita que comeza mañá mércores e organiza o Centro de Documentación Sociolingüística de Galicia, dependente do Consello da Cultura Galega (CCG). Os encontros abren por primeira vez o seu foco de análise para abordar outras realidades lingüísticas como son o catalán, o vasco e o asturiano. Os encontros desenvolveranse o 24 e 25 de setembro na sede do Consello da Cultura Galega e poderanse seguir en directo a través do web da institución.
16/09/2014

O Observatorio da Cultura Galega destaca o descenso do consumo televisivo en Galicia

O 92,3% dos galegos confesa ver a televisión todos os días. Con todo, o consumo televisivo descendeu levemente en Galicia con respecto a 2012. Son 15 minutos diarios menos o tempo que os galegos confesan pasar diante da pequena pantalla. A expansión de Internet, a nosa particular demografía e as características socioeconómicas da estrutura poboacional galega condicionan o uso da radio e da televisión. Sobre estas cuestións céntrase Televisión e radio en Galicia, un Documento de Traballo elaborado polo Observatorio da Cultura Galega, servizo dependente do Consello da Cultura Galega.
10/09/2014

Os Encontros de Normalización analizarán a realidade plurilingüística de España

A XVI edición dos Encontros de Normalización Lingüística que organiza o Centro de Documentación Sociolingüística de Galicia, dependente do Consello da Cultura Galega (CCG), muda o seu esquema habitual e analizará a realidade plurilingüística de España. “Unha vez que saímos do marco galego, tentamos dar unha visión de conxunto diferente, e dar un panorama xeral comparando a evolución e sociolingüística das diferentes linguas de España, pero tamén da política das institucións españolas” explica Henrique Monteagudo, coordinador destes encontros, que se desenvolverán entre o 24 e o 25 de setembro. A inscrición, libre e gratuíta, pódese facer a través da páxina web do CCG.
31/07/2014

O Consello da Cultura Galega achégase á biografía de José Rubia Barcia cun libro-disco

O Consello da Cultura Galega (CCG) presentou este serán, na Galería Sargadelos de Ferrol, o libro-disco Jose Rubia Barcia: Unha vida contada. A publicación insírese dentro da colección As Nosas Voces, e recolle unha entrevista que González Herrán lle fixo a Rubia Barcia en 1985. Ramón Villares, presidente do Consello da Cultura Galega, o autor da publicación, e mais o seu sobriño, Xoán Rubia, participaron nesta presentación, que ofrece novos datos sobre este recoñecido hispanista no día en que se cumpren cen anos do seu nacemento.
30/07/2014

O Consello da Cultura e a Secretaría Xeral de Emigración inician a elaboración do Plan Director do Patrimonio Documental no exterior

Ramón Villares, presidente do Consello da Cultura Galega (CCG), e Antonio Rodríguez Miranda, secretario xeral de Emigración, asinaron esta mañá un convenio de colaboración para a realización de actividades encamiñadas á promoción, conservación e recuperación do patrimonio cultural da emigración galega. Entre elas, destaca a elaboración do Plan Director para a conservación do patrimonio documental das sociedades de emigrantes. O importe do convenio é de 42 500 euros.
29/07/2014

Os XVI Encontros de Normalización reflexionarán sobre a política lingüística de España

A XVI edición dos Encontros de Normalización Lingüística que organiza o Centro de Documentación Sociolingüística de Galicia, dependente do Consello da Cultura Galega (CCG), abre o seu foco de actuación para analizar a realidade plurilingüística de España. “Unha vez que saímos do marco galego, tentamos dar unha visión de conxunto diferente, e dar un panorama xeral comparando a evolución e sociolingüística das diferentes linguas de España, pero tamén da política das institucións españolas” explica Henrique Monteagudo, coordinador destes encontros, que se desenvolverán entre o 24 e o 25 de setembro. A inscrición, libre e gratuíta, pódese facer a través da páxina web da institución.
23/07/2014

A aplicación LEME incorpora 12 000 novos recursos

“Temón, sentido” é o significado de LEME, a aplicación web que o Consello da Cultura Galega (CCG) puxo en marcha para facilitar a descuberta do territorio. Desde teatros, auditorios ou galerías de arte ata castelos, castros ou espazos literarios, a aplicación permite localizar a cultura galega desde calquera dispositivo móbil. Esta ferramenta acaba de incrementar a súa potencialidade coa incorporación de 12 000 novos recursos, que se suman aos 6000 cos que comezou a andar hai un ano. Ademais, agora a aplicación tamén está dispoñible para Android.
22/07/2014

O Consello da Cultura Galega utilizará o dominio .gal a partir do 25 de xullo

O vindeiro 25 de xullo comezan a estar operativos os dominios .gal para as entidades acollidas ao Programa Pioneiros que convocou a Asociación puntoGal. O Consello da Cultura Galega forma parte dese programa, alén do compromiso coa iniciativa desde os seus inicios, e desde ese día comezará a empregar o dominio .gal no seu web corporativo.
18/07/2014

O Consello da Cultura homenaxeará o Consello de Galiza polo setenta aniversario da súa creación

O Consello da Cultura Galega (CCG) aprobou o calendario de actividades para o segundo semestre do ano no marco dunha sesión plenaria ordinaria que tivo lugar no serán deste xoves 17. Entre os asuntos que acometeu o máximo órgano de goberno da institución, destaca a realización dun simposio que abordará os exilios ibéricos en clave comparada e que servirá para homenaxear o 70 aniversario da creación do Consello de Galiza. Ademais, avanzóuselles aos membros do Plenario o proxecto Gallaecia Monumenta Historica, que supón a dixitalización da documentación sobre a Idade Media en Galicia e que será presentado en setembro. Por último, aprobouse a incorporación do director e pianista Maximino Zumalave á Comisión Executiva da entidade.
15/07/2014

Galicia é a novena comunidade en gasto público por habitante segundo un informe do Observatorio da Cultura

O Observatorio da Cultura Galega, servizo dependente do Consello da Cultura Galega, acaba de facer público o seu informe Gasto público en cultura. Un documento que analiza o destino e a natureza do gasto das diferentes administracións no eido cultural a partir dos datos do Ministerio de Facenda e Administracións Públicas; das Entidades Locais, e do Instituto Galego de Estatística. Os principais datos que ofrece este documento constatan o descenso dos orzamentos destinados á cultura en todas as administracións (autonómica, provincial e local). No caso galego, esta baixada supón un 58% dos orzamentos da Xunta entre 2007 e 2014 e sitúa o gasto por habitante en 34,4 euros, o que nos sitúa no noveno lugar do conxunto estatal.
09/07/2014

O Consello da Cultura Galega amosa a exposición Os Adeuses na localidade portuguesa de Fafe

Os Adeuses é a exposición que amosa, a través da ollada do fotógrafo Alberto Martí, os últimos momentos da emigración galega cara a América nos anos cincuenta. A mostra, elaborada polo Consello da Cultura Galega (CCG) e o Centro Galego de Artes da Imaxe (CGAI), continúa o seu periplo polo exterior e fai recalada en Fafe (Portugal). Ramón Villares, presidente do CCG, e Raul Cunha, presidente da Câmara Municipal de Fafe, inaugurarán este xoves (ás 16:00, hora portuguesa) a exposición, que estará aberta na Galería Municipal da Casa da Cultura ata finais de agosto.
08/07/2014

Unha xornada destaca a relevancia que tivo Valle-Inclán no exterior

A diferenza de moitos outros autores coetáneos, o legado e a figura de Ramón María del Valle-Inclán tivo moita relevancia a nivel internacional en vida do autor. Así o constataron os diferentes relatores na xornada “A difusión internacional da figura de Ramón María del Valle-Inclán no seu tempo” que se desenvolve no Consello da Cultura Galega (CCG). E sobre esa idea tamén incidiron Ramon Villares, presidente do CCG e Juan Viaño, reitor da Universidade de Santiago, no marco da inauguración desta sesión que conclúe no serán, coa apertura dunha exposición no Claustro Alto de Fonseca sobre esta dimensión internacional.
07/07/2014

O Consello da Cultura afonda no Valle-Inclán menos coñecido cun seminario e cunha mostra

O presidente do Consello da Cultura Galega (CCG), Ramón Villares, e o reitor da Universidade de Santiago de Compostela, Juan Viaño, inaugurarán mañá no CCG unha xornada destinada a dar a coñecer a faceta máis internacional de Ramón María del Valle-Inclán. Un seminario (A difusión internacional da figura de Ramón María del Valle-Inclán no seu tempo) e unha exposición (Outros verbos, novas lecturas: Valle-Inclán traducido [1906-1936]) son as actividades previstas para achegarse ao perfil poliédrico deste creador tendo en conta esta nova lectura.
04/07/2014

O Consello da Cultura destaca a relevancia do Sempre en Galiza polo 70 aniversario da súa publicación

“Hoxe recordamos un libro que marcou o pensamento de sucesivas xeracións galegas e un autor que foi un símbolo para os seus coetáneos e para a posteridade”. Deste xeito, Ramón Villares, presidente do Consello da Cultura Galega (CCG), destacou a orixe das diferentes actividades preparadas para conmemorar os setenta anos da publicación de Sempre en Galiza de Alfonso R. Castelao. O Consello da Cultura Galega, en colaboración coa Fundación Castelao, celebrou no Parlamento un acto institucional presidido por Alberto Núñez Feijóo, presidente da Xunta de Galicia, Pilar Rojo, presidenta do Parlamento de Galicia, Ramón Villares, presidente do CCG, e Carlos Mella, presidente da Fundación Castelao. Alén do acto institucional, xa está dispoñible na rede a aplicación para dispositivos móbiles elaborada polo CCG e a Editorial Galaxia que contén o texto completo enriquecido con contidos adicionais.
03/07/2014

O Consello da Cultura Galega celebrará no Parlamento un acto institucional polo setenta aniversario de Sempre en Galiza

No mes de xullo cúmprense 70 anos do banquete en que Alfonso R. Castelao presentou en Bos Aires a súa obra cimeira, Sempre en Galiza. Unha efeméride que o Consello da Cultura Galega, en colaboración coa Fundación Castelao, celebrará mañá, 4 de xullo (12:30 horas), cun acto institucional no Parlamento de Galicia e varias accións divulgativas. O acto estará presidido por Alberto Núñez Feijóo, presidente da Xunta de Galicia, Pilar Rojo, presidenta do Parlamento de Galicia, Ramón Villares, presidente do Consello da Cultura Galega, e Carlos Mella, presidente da Fundación Castelao.
03/07/2014

O Diario Oficial de Galicia publica o decreto do nomeamento do presidente do Consello da Cultura Galega

O Diario Oficial de Galicia de hoxe, xoves 3 de xullo, publica o Decreto
78/2014, do 26 de xuño, polo que se nomea a Ramón Villares Paz presidente do Consello da Cultura Galega (CCG).
02/07/2014

A concienciación social e política son claves na protección dos Conxuntos Históricos Costeiros

“Combarro sufriu un proceso de deterioración nos últimos vinte anos, cando o casco histórico xa estaba sometido á tutela legal das figuras de protección administrativa” explicou Iago Seara na segunda das xornadas destinadas a analizar a situación de conservación dos conxuntos históricos situados no litoral. Canda el, Rafael Vallejo presentou o informe “Urxente sobre Combarro. E agora ¿Que facer?”, elaborado pola asociación A Solaina. Era o último dos casos abordados no seminario “Os Conxuntos Históricos no Borde Marítimo”, realizado no Consello da Cultura Galega, que concluíu cun debate sobre a pertinencia e a eficacia das medidas de protección legal.
01/07/2014

O Consello da Cultura afonda na dimensión internacional de Valle-Inclán

A dimensión de escritor de Ramón del Valle-Inclán é por todos ben coñecida. Non o é tanto a súa faceta de intelectual preocupado por cuestións sociais, políticas, culturais, identitarias e académicas, que o levou a involucrarse en múltiples proxectos. Recuperar a súa figura tendo en conta esta nova lectura é o obxectivo dun seminario que o Consello da Cultura Galega (CCG) realizará o vindeiro 8 de xullo baixo o título A difusión internacional da figura de Ramón María del Valle-Inclán no seu tempo. Ademais, como complemento dos relatorios, ese mesmo día inaugurarase a exposición Outros verbos, novas lecturas: Valle-Inclán traducido [1906-1936] que permitirá dar conta das traducións realizadas en vida do autor.