noticia

Rexistros 1651 a 1651 de 1651
14/06/2002

PRESENTACIÓN DO MONOGRÁFICO DA REVISTA DE LITERATURA "QUIMERA" DEDICADO A CARLOS CASARES

O número 217, correspondente a xuño de 2002, da revista literaria Quimera, acolle o monográfico CARLOS CASARES: MEMORIA Y HOMENAJE. Ó longo de 36 páxinas esta revista editada en Barcelona recolle os artigos de doces escritores, especialistas e estudiosos, que percorren as diferentes significacións (literaria, cultural e de editor) dunha figura senlleira da literatura e da cultura galega.
13/06/2002

FARIÑA BUSTO: "AS CASAS - MUSEO DEBEN ATOPAR O EQUILIBRIO ENTRE O ÉXITO DE PÚBLICO E A CONSERVACIÓN DO PATRIMONIO"

"A segunda edición das Xornadas sobre Casas - Museo que se desenvolven hoxe e mañá no Consello da Cultura Galega comezaron esta mañá co establecemento dun marco no que inxerir o concepto de casas - museo, abordando os retos que se lle presentan a estas institucións no futuro. Neste sentido, o director do Museo Arqueolóxico de Ourense, Francisco Fariña Busto, expuxo a necesidade de que estas institucións "fagan fronte ós desafíos que se lle presentan, reorganizando o concepto e o rol que desenvolven na sociedade". Fariña Busto asegurou que "debemos loitar para que as nosas actividades culturais sexan consideradas como inversión e non como gasto", traballando por acadar o compromiso da Administración xa que "cada vez máis é preciso facer fronte a novas necesidades con menos recursos".
13/06/2002

DARÍO VILLANUEVA REXEITA UN MODELO DE ORGANIZACIÓN PARA AS CASAS - MUSEO, "QUE DEBEN AXUSTARSE A CADA ESCRITOR"

"Nun momento no que a literatura perde importancia fronte a outras forzas as casas - museo son coma faros que alumean un mar que doutro xeito sería inhóspito e podería levarnos á desconsideración da creación literaria". Así de expresaba o rector saínte da USC, Darío Villanueva, encargado de abordar o fenómeno das casas dos escritores desde o punto de vista da teoría literaria no marco das II Xornadas sobre Casas - Museo que se desenvolven ata mañá no Consello da Cultura Galega. Villanueva amosouse partidario da variedade de estructuras, organización interna e do perfil de cada casa, xa que "sería absurdo ofrecer un modelo ou patrón de casa cando os escritores, de seu, son personalidades irrepetíbles" polo que, segundo Villanueva, "o ideal é que as casas que recollen o seu legado se axusten ás circunstancias específicas do escritor e ós propios acontecementos que deron lugar ó nacemento desta persoa".
10/06/2002

GONZALO REY LAMA: "EN GALICIA AS CASAS - MUSEO MANTEÑEN UNHA GRANDE ACTIVIDADE AÍNDA QUE MOI POUCO ARTICULADA"

"En Galicia as as casas - museo, pese a falla de subvencións, manteñen unha grande actividade aínda que pouco articulada financeiramente falando". Así se expresou o presidente da Asociación Española de Casas - Museo y Fundaciones de Escritores, Gonzalo Rey Lama, quen ofreceu esta mañá unha rolda de prensa para presentar a segunda edición das Xornadas sobre Casas - Museo, da que é coordinador e que se desenvolverán no Consello da Cultura Galega os vindeiros xoves e venres, 13 e 14 de xuño.
07/06/2002

O CONSELLO DA CULTURA GALEGA ACOLLE A SEGUNDA EDICIÓN DUNHAS XORNADAS DEDICADAS ÁS CASAS-MUSEO

O vindeiro luns, 10 de xuño, ás 12h. terá lugar no Salón de Actos do Consello da Cultura Galega, unha rolda de prensa para presentar as II Xornadas sobre as Casas-Museo, que se desenvolverán no Consello da Cultura Galega os vindeiros días 13 e 14 de xuño. No acto de presentación contará coa presencia do coordinador das xornadas e membro da Comisión Técnica de Museos, Gonzalo Rey Lama, así como o secretario do CCG, Henrique Monteagudo.
07/06/2002

MIRAS PORTUGAL AFIRMA QUE AS NOVAS XERACIÓNS DEBEN RECUPERAR OS LAZOS DE GALICIA COA SÚA DIÁSPORA

Contando con mellor cadro de investigadores na temática da migración a Arxentina entre 1830 e 1930 e a partir de visións xerais en combinación con outras máis rexionais, seguindo as correntes eclécticas que dominan actualmente os estudios históricos, deu comezo esta mañá a primeira sesión das xornadas "Gallegos e Tanos. Xornadas sobre as migracións italianas e españolas a Arxentina (1830-1930)", que se desenvolven no Consello da Cultura Galega ata mañá sábado.
07/06/2002

XPERTOS ASEGURAN QUE AS MIGRACIÓNS MASIVAS A ARXENTINA COMEZARON NAS PROVINCIAS RICAS E COAS XENTES ACOMODADAS

Trala creación dun marco teórico xeral en torno ás diferencias e semellanzas que presentan as migracións italianas e españolas a Arxentina, o encontro "Gallegos e Tanos. Xornadas sobre as migracións italianas e españolas a Arxentina (1830-1930)" continuou na tarde afondando sobre as especificidades que poden atoparse dentro dos movementos de masa destes dous grupos étnicos.
06/06/2002

AS DIFERENCIAS ENTRE ESPAÑOIS E ARXENTINOS NA ARXENTINA DA MIGRACIÓN (1830-1930) CENTRAN UN CONGRESO DO CCG

A análise comparativa do fenómeno da migración a Arxentina que entre 1830 e 1930 afectou a españois e italianos centran "Gallegos e Tanos. Xornadas sobre as migracións italianas e españolas a Arxentina (1830 -1930)" que se desenvolverán no Consello da Cultura Galega a partir de mañá, venres 7 de xuño e ata o sábado 8, cando rematará cunha visita guiada ó parque 'Pasatempo', en Betanzos.
06/06/2002

FREIXANES REIVINDICA UNHA GALICIA QUE AFRONTE Ó DESAFÍO DAS NOVAS TECNOLOXÍAS, "PORQUE SE NON DEIXAREMOS DE EXISTIR"

Os desafíos que se lle presentan a Galicia para non quedar excluída da sociedade do coñecemento, os retos que presentan a incorporación ás novas tecnoloxías e a situación na que se atopa o noso país, centraron a presentación que do libro Información, tecnoloxía e territorio: Galicia fronte á sociedade do coñecemento", fixo o seu coordinador, Xosé Carlos Arias, nun acto que tivo lugar esta mañá no Consello da Cultura Galega.
05/06/2002

O CCG PRESENTA UN VOLUME EN TORNO Á SITUACIÓN DE GALICIA FRONTE Á SOCIEDADE DO COÑECEMENTO

O Consello da Cultura Galega acollerá mañá, xoves 6 de xuño, ás 13h., a presentación do libro "Información, tecnoloxía e territorio: Galicia ante a sociedade da información", unha publicación do CCG cunha edición bilingüe galego-inglés na que se recollen algúns das reflexións máis destacadas dunha ducia de expertos que participaron nun seminario sobre as novas tecnoloxías da información que tivo lugar o ano pasado en Vigo entre os que destacan Emilio Ontiveros, Joan Majó, Anibal R. Figueiras ou o propio coordinador da publicación, Xosé Carlos Arias.
04/06/2002

UN ESTUDIO SOBRE "O PRESTIGE NA PRENSA GALEGA NO 2002" SERÁ PRESENTADO MAÑÁ NO CONSELLO DA CULTURA GALEGA

Un estudio sobre "O PRESTIGE NA PRENSA GALEGA NO 2002" será presentado mañá, xoves, 5 de xuño, ás 13´00 horas, nunha rolda de prensa que terá lugar no salón de actos do Consello da Cultura Galega (CCG).
22/05/2002

UNHAS XORNADAS DO CCG ESTUDIARÁN A MIGRACIÓN A ARXENTINA DESDE UNHA PERSPECTIVA "COMPARATIVA" E "INTERREXIONAL"

Co obxectivo de estudiar o fenómeno da migración de distintos grupos étnicos da europa mediterránea a Arxentina pero coa novidade de aportar unha perspectiva comparativa, o profesor da Universidade de Vigo, Alejandro Vázquez e a directora do Arquivo da Emigración Galega (AEG), Pilar Cagiao, foron os encargados de facer a presentación dos encontros "Gallegos e Tanos. Xornadas sobre as migracións italiana e española a Arxentina (1830- 1930)".
21/05/2002

AS MIGRACIÓNS ITALIANAS E ESPAÑOLAS A ARXENTINA CENTRAN UNHAS XORNADAS ORGANIZADAS POLO AEG

A análise comparativa das migracións a Arxentina que entre 1830 e 1930 afectaron a españois e italianos centrará as xornadas "Gallegos e Tanos. Xornadas sobre as migracións italianas e españolas a Arxentina (1830 -1930)" que se desenvolverán no Consello da Cultura Galega os vindeiros días 7 e 8 de xuño e que mañá, mércores 22 de maio, teñen a súa presentación oficial nun acto que acolle o CCG ás 12 h.
20/05/2002

O IES "ROSALÍA DE CASTRO" ACOLLE A PRESENTACIÓN DUN LIBRO SOBRE FREI MARTÍN SARMIENTO

O martes, 21 de maio, ás 11, 30h., no IES "Rosalía de Castro", en Santiago, será presentado o libro PEQUENA ESCOLMA ILUSTRADA DE SARMIENTO, obra feita por alumnos do centro e editado polo Consello da Cultura Galega.
16/05/2002

O CCG PRESENTOU A EDICIÓN FACSMILAR DO "COLOQUIO EN MIL DUASCENTAS COPLAS GALEGAS" DE FREI MARTÍN SARMIENTO

"Este COLOQUIO EN MIL DUASCENTAS COPLAS GALEGAS é o texto máis importante do Padre Sarmiento (1695-1772) dende o punto de vista galego", afirmou o profesor Henrique Monteagudo, na presentación desta edición facsímile do orixinal autógrafo, preparada por iniciativa do Consello da Cultura Galega. A obra, unha mostra máis das accións levadas a cabo por esta institución na conmemoración do DÍA DAS LETRAS GALEGAS con Sarmiento como figura homenaxeada, foi presentada hoxe, na sede do Consello, nun acto presidido polo titular da entidade, Alfonso Zulueta de Haz.
15/05/2002

O CCG PRESENTA A EDICIÓN FACSMILAR DO "COLOQUIO EN MIL DUASCENTAS COPLAS GALEGAS" DE FRAI MARTÍN SARMIENTO

O Consello da Cultura Galega presentará mañá, xoves 16 de maio, ás 12:00 h. a edición facsimilar do "Coloquio en mil duascentas coplas galegas". No acto de presentación participarán Alfonso Zulueta, Presidente do Consello da Cultura Galega, e Henrique Monteagudo, secretario da institución e coordinador do Proxecto Sarmiento.
13/05/2002

O CCG MULTIPLICOU AS SÚAS ACTIVIDADES ARREDOR DO "DÍA DAS LETRAS GALEGAS" E A FIGURA DE FREI MARTÍN SARMIENTO

As actividades e iniciativas do Consello da Cultura Galega (CCG) multiplicáronse, en diferentes direccións, arredor do Día das Letras Galegas e a figura de Frei Martín Sarmiento (1695-1772), homenaxeado nesta edición. Libros, catálogos e facsímiles, unha exposición vista xa en distintos lugares de Galicia, e próximamente en Vilafranca do Bierzo, e o Proxecto Sarmiento. Obras completas, en colaboración coa Consellería de Cultura, Comunicación social e Turismo, que inclúe a dixitalización de fondos e a súa catalogación e gravación en CD-ROM. A todo esto debe engadirse a divulgación da figura e a obra de Sarmiento a través da web da institución www.consellodacultura.org.
10/05/2002

O CCG DÁ A COÑECER O PROGRAMA DE ACTOS PREVISTO PARA O DÍA DAS LETRAS GALEGAS

O vindeiro luns, 13 de maio de 2002, o Consello da Cultura Galega celebrará unha rolda de prensa aberta ós medios de comunicación co obxecto de informar detalladamente tanto das iniciativas e accións desenvolvidas como das que están en proceso de realización, con motivo da celebración do Día das Letras Galegas, o vindeiro venres, 17 de maio, que este ano está dedicado á figura de Frei Martín Sarmiento.
08/05/2002

O CCG ACOLLE A ESTREA DUNHA CURTA
DE ANIMACIÓN EN PLASTILINA SOBRE SARMIENTO

O Consello da Cultura Galega acollerá mañá o estrea dunha curtametraxe animada en plastilina, "A escola das areas", en torno á figura de Frei Martín Sarmiento (Vilafranca do Bierzo, 1695 - Madrid, 1772), persoeiro relevante da Ilustración española ó que este ano se lle dedica o Día das Letras Galegas. A curta, de 11 minutos de duración, estivo a cargo da productora Lúa Films, en colaboración con Algarabía Animación, a Consellería de Cultura e a Televisión de Galicia, que a emitirá o vindeiro 17 de maio.
08/05/2002

O CCG PRESENTA ACHADOS DOCUMENTAIS QUE ABREN NOVAS PERSPECTIVAS SOBRE O PADRE SARMIENTO

Afonso Zulueta, Presidente do Consello da Cultura Galega e Henrique
Monteagudo, secretario da institución e coordinador do Proxecto Sarmiento, presentarán o luns, 26 de agosto ás 12:00 h. no Salón de Actos da institución os últimos achados documentais que realizou este último no Arquivo da Orde Benedictina no mosteiro de Santo Domingo de Silos (Burgos).
30/04/2002

MANUEL RIVAS: "DEBEMOS CAMIÑAR CARA UN XORNALISMO DE CALIDADE E FEITO CON MOITO RESPECTO Ó PÚBLICO"

A contaminación de intereses na elaboración da información cultural, o cinismo que preside o actual discurso do xornalismo e a necesidade de canalizar a cultura nos medios cara novas propostas foron os eixes que centraron a primeira parte do encontro "A información cultural en Galicia: algunhas ideas para un cambio", unha xornada que acolle durante todo o día o Consello da Cultura Galega e que foi inaugurada esta mañá polo Director Xeral de Comunicación da Xunta, Xosé Ignacio Otero, o decano da Facultade de Ciencias da Comunicación, Xosé López, e o presidente do Consello da Cultura Galega, Alfonso Zulueta de Haz.
29/04/2002

OS NOVOS XEITOS DE COMUNICAR CULTURA CENTRAN UN ENCONTRO QUE SE DESENVOLVE MAÑÁ NO CCG

A especialización xornalística no eido da información cultural e a necesidade de establecer novas propostas para o tratamento deste tipo de información son algunhas das liñas de debate que se pretenden abrir durante o encontro A información cultural en Galicia: algunhas ideas para un cambio, que terá lugar mañá, martes, 30 de abril no Consello da Cultura Galega. Á xornada inaugurarase a partir das 10 horas e contará coa participación do Director Xeral de Comunicación, José Ignacio Otero, o decano da Facultade de Xornalismo, Xosé López, así como o presidente do Consello da Cultura Galega, Alfonso Zulueta de Haz.
16/04/2002

O CONSELLO DA CULTURA GALEGA ELIXE PRESIDENTE MAÑÁ NUN PLENO EXTRAORDINARIO

A elección da persoa chamada a substituír a Carlos Casares a fronte da presidencia do Consello da Cultura Galega está previsto que teña lugar mañá, mércores 17 de abril de 2002, a partir das 18,30 horas, a través dun pleno extraordinario que foi convocado a estes efectos. A esta reunión de carácter extraordinario asistirán os membros do plenario para proceder a designar ó presidente, un nomeamento que non será oficial ata que así quede refrendado coa súa publicación no Diario Oficial de Galicia.
12/04/2002

FERNANDO PEREIRA: "A RAZA É UN CONCEPTO NO QUE INTERVÉN O IMAXINARIO POLÍTICO, ÉTNICO E CULTURAL DE CADA ÉPOCA"

Na xornada da mañá de "Xenética e Historia no Noroeste Peninsular: unha perspectiva interdisciplinaria" foi a quenda da lingua e de que os lingüísticas que acudiron a este encontro que se celebra ata o sábado no Consello da Cultura Galega tentaran casar os seus coñecementos sobre linguas prerromanas coas achegas da xenéticas das poboacións. A idea da raza e a súa evolución histórica ata o século XIX foi o controvertido concepto co que se pechou a xornada da mañá.
11/04/2002

ANXO CARRACEDO: "OS XENES PÓDENNOS DAR AS CHAVES PARA ENTENDER O NOSO PASADO"

"Os xenes pódennos dar as chaves para entender o pasado", afirmou un dos coordinadores das xornadas "Xenética e Historia no Noroeste Peninsular", Anxo Carracedo, unha información útil "sobre todo naquelas épocas onde os historiadores non poden aplicar métodos válidos". O director do Instituto de Medicina Legal da USC quixo facer fincapé así da importancia que teñen encontros coma o que deu comezo esta mañá organizado polo Consello da Cultura Galega e que, ó longo dos dous próximos días, pretende unir os esforzos de xenetistas e historiadores nunha experiencia interdisciplinaria pioneira en Galicia.
10/04/2002

A ORIXE ÉTNICA E XENÉTICA DOS POBOS DO NORTE PENINSULAR CENTRAN NUNHAS XORNADAS DO CCG

Coa celebración de xornadas como "Xenética e historia no noroeste peninsular: unha perspectiva interdisciplinaria", encontro que comeza mañá no Consello da Cultura Galega e que se desenvolve ata o sábado, 13 de abril de 2002, os seus organizadores pretenden cando menos esbozar novas teorías que axuden a comprender os fenómenos culturais que caracterizan ós pobos.
04/04/2002

A CASA DE WENCESLAO FERNÁNDEZ FLÓREZ ACOLLERÁ 'A CELEBRACIÓN DA POESÍA E DA NATUREZA'

A Casa de Wenceslao Fernández Flórez en Cecebre (Cambre, A Coruña) acollerá mañá, venres 5 de abril, a partir das 12 horas, a Celebración da Poesía e da Natureza, un encontro de poetas es escritores organizado polo Consello da Cultura Galega, a Fundación Wenceslao Fernández Flórez e o Pen Clube Galicia.
03/04/2002

XENÉTICA E HISTORIA ÚNENSE NUNHA XORNADAS PARA ATOPAR NOVAS RESPOSTAS ÓS PROCESOS CULTURAIS DOS POBOS

Cuestións como o celtismo, o nacionalismo ou o fenómeno da globalización poderán atopar novas respostas a partir das teorías que se elaboren a partir de xornadas como "Xenética e historia no noroeste peninsular: unha perspectiva interdisciplinaria", un encontro que se desenvolverá no Consello da Cultura Galega durante os vindeiros días 11, 12 e 13 de abril de 2002. Os coordinadores do encontro, os profesores Anxo Carracedo e Xerardo Pereira Menaut, así como Francisco Díaz-Fierros, coordinador da sección de Ciencia, Tecnoloxía e Sociedade e organizador, foron os encargados de facer a presentación oficial das xornadas, que tivo lugar esta mañá.
03/04/2002

O CONSELLO DA CULTURA GALEGA ESTUDIA AS RELACIÓNS ENTRE XENÉTICA E HISTORIA NUNHAS XORNADAS

O Consello da Cultura Galega presenta hoxe, 3 de abril de 2002, ás 12:00 h., as xornadas "Xenética e historia no noroeste peninsular: unha perspectiva interdisciplinaria". Na presentación estarán presentes Francisco Díaz-Fierros, coordinador da sección de Ciencia e Tecnoloxía do Consello da Cultura Galega, Anxo Carracedo Álvarez e Xerardo Pereira Menaut, coordinadores das xornadas.
02/04/2002

AS NOVAS PROPOSTAS PARA A INFORMACIÓN CULTURAL CENTRAN UN ENCONTRO ORGANIZADO POLO CCG

A elaboración da información cultural nos medios de comunicación, a especialización xornalística neste eido e as novas propostas no tratamento deste tipo de información son algunhas das liñas de debate que se pretenden abordar durante o encontro A información cultural en Galicia: algunhas ideas para un cambio, que terá lugar o vindeiro día 30 de abril no Consello da Cultura Galega.