noticia

Rexistros 1711 a 1740 de 1765
27/09/2013

Villares reivindica para o CCG no seu 30 aniversario "unha cultura máis baseada no facer que no ser"

Ramón Villares, presidente do Consello da Cultura Galega, resaltou a gran diversidade de liñas de acción do Consello da Cultura Galega, reivindicando a memoria do Seminario de Estudos Galegos e a súa capacidade para conciliar todas as disciplinas do coñecemento como fonte de inspiración para o CCG. Para Villares, o Consello da Cultura Galega debe ser unha institución máis baseada "no facer que no ser", e polo tanto, con gran capacidade de iniciativa e de servir de vínculos entre a sociedade e as súas institucións.
23/09/2013

O Consello da Cultura Galega lamenta a morte de Ernesto Viéitez Cortizo

O Consello da Cultura Galega quere manifestar o seu pesar pola morte de Don Ernesto Viéitez Cortizo, finado o pasado 21 de setembro de 2013. Viéitez Cortizo foi representante no Plenario do Consello da Cultura Galega por parte da Real Academia Galega de Ciencias desde a fundación da nosa entidade. O CCG tamén editou unha das grandes obras deste destacado científico, O castiñeiro, unha vasta compilación do coñecemento sobre esta sobranceira árbore tan estendida en Galicia.
16/09/2013

O Consello da Cultura Galega participa na organización dos Encuentros en Verines

Santiago de Compostela, 16 de setembro de 2013. O Consello da Cultura Galega participará na organización dos Encuentros en Verines, unha tradicional cita literaria que desde o ano 1985 reúne na Casona de Verines, en Pendueles (Asturias) a destacados creadores das distintas literaturas e linguas do Estado español. Os Encuentros están organizados polo Ministerio de Cultura e contan coa colaboración do Instituto Etxepare, o Institut Ramón Llull, e o Consello da Cultura Galega. O evento foi presentado hoxe pola mañá no Ministerio de Cultura, en Madrid, e o acto contou coa presenza de Ramón Villares, presidente do Consello da Cultura Galega.
16/07/2013

A exposición “Nós mesmos. Asociacionismo galego na emigración” percorre Euskadi da man da Irmandade de Centros Galegos

A exposición “NÓS MESMOS. ASOCIACIONISMO GALEGO NA EMIGRACIÓN”, realizada polo Consello da Cultura Galega a través do seu Arquivo da Emigración Galega, está a percorrer Euskadi desde o pasado mes de xuño por iniciativa da Irmandade de Centros Galegos de Euskadi. Desde o 15 ao 22 de xullo pode verse no Centro Galego de Érmua (Vizcaya) e do 22 ao 29 de xullo na Agrupación Hijos de Galicia, de Sestao (Vizcaya). Con anterioridade estivo na Irmandade de Centros Galegos, na Casa Torre, en Santurce (Vizcaya), na Casa de Galicia en Elgoibar (Guipúzcoa) e no Centro Galego de Vitoria en Gernikako Arbola (Araba). A Irmandade de Centros Galegos, que preside Pilar Rodríguez Villar é una federación composta polos doce Centros e Casas de Galicia ubicados no País Vasco. Nos últimos dous anos esta exposición puido verse en diferentes países de Europa e América.
A exposición NÓS MESMOS. ASOCIACIONISMO GALEGO NA EMIGRACIÓN consta de sete bloques temáticos, desenvolvidos en 55 paneis, e permite seguir a evolución das sociedades microterritoriais e as dimensións mutualista, educativa, artística, cultural, sanitaria e política do asociacionismo galego na diáspora, lembra Pilar Cagiao, comisaria do proxecto xunto con Vicente Peña Saavedra. Esta iniciativa do Consello da Cultura Galega contou coa colaboración da Secretaría Xeral de Emigración da Xunta de Galicia.
04/07/2013

Patrizia Violi falou no Consello da Cultura Galega sobre “Os museos da memoria e o seu rol na construción das identidades culturais”

Patrizia Violi, profesora de Semiótica da Universidade de Bologna (Italia), falou hoxe no seminario “Os sentidos das culturas” do Consello da Cultura Galega sobre o tema “Recordar o futuro. Os museos da memoria e o seu rol na construcción das identidades culturais”. Centrouse na memoria colectiva de eventos tráxicos e conflictivos e aludiu a tres lugares significativos polas relacións diversas que establecen entre memoria e identidade: o Museo Tuol Sleng dos Crimes do Xenocidio de Phnom Penh,en Camboya (1975-1979); o Parque para a Paz de Villa Grimaldi, en Santiago de Chile (1973-1990), e o Memorial Hall das Víctimas da Masacre de Nanjing polos Invasores Xaponeses, en Nanjing (China) en 1937. En todos eles, ao conservar o existente ou construir ex novo “estanse definindo as formas da propia identidade colectiva pasada, presente e tamén futura”. Corenta persoas asistiron ao seminario, que puido seguirse tamén en directo a través de www.consellodacultura.org
04/07/2013

As Pontes de García Rodríguez acolle a exposición “Luces de alén mar. As escolas de americanos en Galicia" desde hoxe ata o 23 de xullo

A exposición “Luces de Alén Mar. As Escolas de Americanos en Galicia”, promovida polo Consello da Cultura Galega (CCG), a través do seu Arquivo da Emigración Galega, e coa colaboración da Secretaría Xeral de Emigración, será inaugurada hoxe ás 20 horas no CEIP “Santa María” (Praza de América, s/n) de As Pontes de García Rodríguez (A Coruña). A mostra, que salienta o instrutivo compromiso solidario dos emigrantes galegos, permanecerá nese espazo ata o 23 de xullo. No acto inaugural intervirán: Valentín González Formoso, alcalde de As Pontes; Marcelino Fernández Santiago, xerente do CCG; Antonio Castro, concelleiro de Servizos e atención ao medio rural, e Vicente Peña Saavedra, comisario da mostra e profesor da Universidade de Santiago de Compostela.
28/06/2013

Presentado o libro “Cuadernos de Rusia. Diario 1941-1942”, de Dionisio Ridruejo, editado e anotado por Xosé M. Núñez Seixas

O Consello da Cultura Galega acolleu hoxe a presentación do libro “Cuadernos de Rusia. Diario 1941-1942”, de Dionisio Ridruejo, editado e anotado por Xosé Manoel Núñez Seixas, catedrático de Historia Contemporánea da Ludwig-Maximilian-Universität München (Alemaña). Trátase, probablemente, no criterio do editor, “dunha das obras cimeiras da literatura memorialística sobre a División Española de Voluntarios ou División Azul, corpo de voluntarios reclutados de forma mixta polas milicias de Falange e o exército, que aportou de maneira exclusiva a oficialidade e boa parte tamén dos voluntarios, e que entre xullo de 1941 e febrero de 1944 movilizou perto de 47.000 combatentes españois no sector septentrional do Frente do Este”.
27/06/2013

Francisco Rodríguez salientou os compromisos patriótico, feminista e democrático da autora de “Follas Novas” no final do congreso rosaliano

Os compromisos patriótico, feminista e democrático, alén do lingüístico, de Rosalía de Castro foron especialmente subliñados na quinta e derradeira xornada do congreso internacional “Rosalía de Castro no século XXI. Unha nova ollada”, que se densenvolveu hoxe no Consello da Cultura Galega. Eses compromisos da autora de “Follas Novas” foron obxecto de análise por parte do profesor e ensaísta Francisco Rodríguez e complementados na mesa redonda “Rosalía á luz do pensamento feminista”, na que interviron María Xesús Nogueira, María Reimóndez e Carmen Blanco. Un achegamento ao mundo da emigración e as novas análises de “Cantares Gallegos” cerraron un programa iniciado o pasado mes de febrero e coordinado por Rosario Álvarez, Anxo Angueira, María do Cebreiro Rábade e Dolores Vilavedra. Nos meses vindeiros o CCG levará a cabo actividades difusoras da obra rosaliana en Madrid e Barcelona e publicará as actas do congreso, que incoporarán asemade os traballos presentados ao congreso virtual.
20/06/2013

Victoria Camps defendeu a necesidade de relativizar o “falso antagonismo razón-emoción” e apelou aos valores da liberdade e a igualdade

A filósofa e ensaísta Victoria Camps defendeu a necesidade de relativizar os que presentou como falsos antagonismos entre razón e emoción ou cosmopolitismo-nacionalismo, “procurando que as emocións sexan razonables e que as razóns non perdan a carga de emotividade imprescindible para que inflúan na acción, sempre da man da liberdade e da igualdade” e lembrou que “a desmesura pode perverter tanto a racionalidade como a emotividade”. A catedrática emérita de Filosofía Moral e Política da Universidade Autónoma de Barcelona reflexionou esta tarde sobre “O lugar das emocións na política”, no marco do seminario interdisciplinar “Os sentidos das culturas”, organizado e impulsado desde 2006 polo Consello da Cultura Galega e coordinado polo profesor Ramón Maiz. Oitenta persoas asistiron ao seminario, que, como é habitual no CCG, puido tamén seguirse en directo na Rede a través de www.consellodacultura.org
19/06/2013

Satisfacción do Consello da Cultura Galega pola aprobación do dominio Punto Gal

A Comisión Executiva do Consello da Cultura Galega expresou a súa satisfacción pola aprobación do dominio punto gal por parte do ICANN, organismo que goberna a Rede.
O Consello da Cultura, que foi parte activa e comprometida coa iniciativa da Asociación Punto Gal, felicítouse pola presenza diferenciada na Rede da lingua e a cultura de Galicia e polo novo impulso que esta decisión supoñerá a prol dunha maior presenza do idioma galego en Internet.
Salientou asemade o Consello da Cultura Galega o feito de que “esta noticia esperanzadora para o galego” chegue cando se cumplen trinta anos da Lei de Normalización Lingüística.
18/06/2013

O Consello da Cultura presentou LEME, aplicación gratuíta e aberta para móbiles, con acceso aos equipamentos e recursos culturais galegos

O Consello da Cultura Galega presentou hoxe na praza do Obradoiro, esquina Hostal dos Reis Católicos, LEME, unha nova aplicación gratuíta e aberta para teléfonos móbiles, ipad e iphone (no outono tamén para android) orientada á descuberta dos equipamentos e recursos culturais galegos. No acto interviron: Ramón Villares, presidente da institución, e Manuel Gago, director do portal cultural www.culturagalega.org, que ofreceu unha demostración práctica do uso da nova aplicación. LEME (temón, sentido) ponse en marcha con máis de seis mil localizacións e presentase como "un etiquetado cultural do territorio galego", afirmou Ramón Villares.
LEME (temón, sentido) nútrese dos contidos das bases de datos de información xeográfica do Consello da Cultura Galega, coma o Mapa de Equipamentos Culturais, os Roteiros da Cultura Galega e o proxecto As Escolas da Emigración, ofrecendo de partida máis de 6.000 localizacións ao longo de toda Galicia. Desde teatros, auditorios ou galerías de arte ata castelos, castros ou espazos literarios. "É un etiquetado cultural lemedo territorio galego", dixo Ramón Villares. LEME pode baixarse en:
http://www.culturagalega.org/opinion/leme
14/06/2013

Máis de 500.000 descendentes de emigrantes e exiliados españois en Iberoamérica solicitaron a nacionalidade española da man da Lei da Memoria Histórica

Máis de medio millón de fillos de emigrantes e exiliados españois en Iberoamérica (uns 150.000 descendentes de galegos) solicitaron a concesión da cidadanía española de orixe, acolléndose á Disposición Adicional 7 da Lei 52/2007, coñecida como Lei da Memoria Histórica. Dese total, ata o momento, resolvéronse positivamente 253.405 expedientes. Os datos déronse a coñecer hoxe no curso do Seminario internacional “Migracións e memoria histórica”, que veu celebrándose desde onte no Consello da Cultura Galega, en Santiago de Compostela. Antonio Izquierdo Escribano, catedrático de Socioloxía e responsable do Equipo de Socioloxía das Migracións Internacionais (ESOMI) deu conta deses datos no inicio da sesión, que rexistrou tamén a intervención de Javier García Diego, director do Colegio de México, “a máis importante institución creada polos exiliados españois”, en palabras de Ramón Villares, presidente do Consello da Cultura, que foi o encargado de clausurar o seminario.
14/06/2013

Siga en directo o Seminario "Migracións e memoria histórica"

13/06/2013

O exministro de Xustiza, Francisco Caamaño, lamentou “a caída no olvido das políticas públicas impulsadas pola Lei da Memoria Histórica”

O exministro de Xustiza e deputado socialista Francisco Caamaño, defendeu a oportunidade da Lei da Memoria Histórica e lamentou que as políticas públicas que xenerou “estean hoxe en boa parte no olvido”. Caamaño interviú como relator no seminario internacional “Migracións e memoria histórica”, iniciado hoxe no Consello da Cultura Galega e organizado por esta institución, a través do seu Arquivo da Emigración Galega, e o Grupo de Estudos de Migracións e Memoria Histórica da Universidade da Coruña. A xornada foi inaugurada por Ramón Villares, presidente do CCG, e Antonio Izquierdo Escribano, coordinadores do programa, e Antonio Rodriguez Miranda, Secretario Xeral de Emigración da Xunta de Galicia. O primeiro relatorio estivo ao cargo de Aurelio Miras Portugal, Director Xeral de Migracións do Goberno de España, que falou sobre “As institucións e asociacións dos españois no mundo”. O seminario concluirá mañá, venres, coa intervención, entre outras, de Joaquín Garcíadiego, director do Colegio de México, e a presentación dos resultados da investigación sobre “Inmigración e memoria histórica” realizado polo xa citado grupo investigador da Universidade da Coruña.
07/06/2013

Máis de catrocentas voces soaron en Bonaval-Compostela na xornada “NO BICO UN CANTAR. NENOS E NENAS CANTAN A ROSALÍA”

Foi un concerto único, cálido e particularmente emotivo arredor da figura de Rosalía de Castro. O Consello da Cultura Galega e a Consellería de Cultura da Xunta de Galicia, xunto coa Fundación Cidade da Cultura de Galicia, organizaron a xornada “No bico un cantar. Nenos e nenas cantan a Rosalía” celebrada esta tarde nunha ateigada igrexa de San Domingos de Bonaval en Santiago de Compostela. Máis de catrocentos nenos e nenas de 8 a 12 anos dos centros de ensino musical (conservatorios, escolas municipais e coros infantís) cantaron os poemas “Maio longo”, “Rosa de abril”, “En Cornes” e “Negra sombra”, acompañados polo grupo de metais “Hércules Brass” e dirixidos por Maximino Zumalave. A xornada veu sumarse aos actos conmemorativos do 150 aniversario da publicación de “Cantares gallegos” (1863). Pola mañá os nenos e nenas participantes visitaron a Cidade da Cultura, onde realizaron o ensaio xeral. O concerto debía celebrarse na Praza da Quintana, mais as previsións meteorolóxicas aconsellaron levalo a Bonaval fuxindo da chuvia que, cumpridora da predicción, non faltou á cita.
06/06/2013

Presentado o informe “Recuperación da documentación e memoria do Movemento Feminista Organizado en Galicia”

O Consello da Cultura Galega presentou hoxe o informe “Recuperación da documentación e memoria do Movemento Feminista Organizado en Galicia”, da autoría de Carmen Pérez Pais e Mariam Mariño Costales, por iniciativa da Comisión de Igualdade do CCG.
No acto, que tivo lugar na Biblioteca da institución, interviron: Rosario Álvarez, vicepresidenta do CCG; María Xosé Agra, coordinadora da Comisión de Igualdade; e as autoras do informe.
O informe é parte dun pioneiro proxecto, non só en Galicia, de recuperación de fondos e da memoria do movemento feminista de terceira onda e ven consolidar unha iniciativa da Comisión de Igualdade do CCG “para a reunificación parcial, conservación, posta en valor e difusión da documentación e materiais xerados por diferentes grupos e colectivos identificados co feminismo e que desenvolveron e/ou seguen a desenvolver a súa actividade en Galicia”.
03/06/2013

O Consello da Cultura Galega publica o informe “A comunicación en Galicia 2013”, o último en formato papel

O Consello da Cultura Galega ven de publicar o informe “A comunicación en Galicia 2013”, que fai o número sete dunha serie iniciada en 1993. Coordinado por Xosé López, Manuel Rivas e Rosa Aneiros, o informe reúne en 260 páxinas 17 contribucións de investigadores da comunicación e xornalistas sobre diferentes aspectos da comunicación e da cultura en Galicia en tempos de “crise económica con forte impacto no ámbito comunicativo cunha especial e dramática virulencia nestes dous últimos anos” e resume “os cambios sustanciais que estas dúas décadas supuxeron para o sector”. Trátase do derradeiro volume desta serie en papel, xa que os seguintes verán a luz só en edición dixital. O contido pode descargarse en: http://www.consellodacultura.org/mediateca/documento.php?id=1900
30/05/2013

Congreso "Rosalía no século XXI". A autora de “Cantares Gallegos, definida como “precursora da poesía moderna” e “poeta europea de primeira orde”

“Unha precursora da poesía moderna”, na visiópn de Javier Gómez Montero. “Unha poeta europea da primeira orde”, segundo o profesor Arturo Leyte. A cuarta xornada do congreso internacional “Rosalía de Castro no século XXI. Unha nova ollada”, coordinada por Rosario Álvarez, vicepresidenta da institución, abordou o tema “Rosalía no contexto internacional; paralelismos e influencias; difusión e actualidade”. O programa analizou a obra rosaliana á luz dos paradigmas estéticos do seu tempo e a súa actualidade como expoñente da cultura galega, con atención especial á tradución. O congreso, organizado polo CCG, comezou en febreiro e rematará en xuño, cinco sesións ao longo de cinco meses, que poden seguirse en directo en www.consellodacultura.org e contan asemade cunha importante dimensión virtual.
30/05/2013

Siga en directo o Congreso Internacional Rosalía de Castro



29/05/2013

O Consello da Cultura Galega acollerá en xuño un seminario internacional sobre “Migracións e memoria histórica”

Os primeiros resultados da investigación sobre inmigración e memoria histórica daranse a coñecer no curso do Seminario Internacional “Migracións e Memoria Histórica”, que se celebrará no Consello da Cultura Galega os días 13 e 14 do vindeiro mes de xuño. Medio millón de descendentes de emigrantes españois (só un 7 por cento de exilados), o cincuenta por cento galegos, solicitaron a nacionalidade española, acolléndose á coñecida como Lei da Memoria Histórica, explicou Antonio Izquierdo Escribano, catedrático de Socioloxía da Universidade da Coruña, director do proxecto de investigación e do “Grupo de Estudos de Migracións e Memoria Histórica” da Universidade da Coruña e co-coordinador do seminario xunto con Ramón Villares, presidente do CCG. Na organización do programa, ademais do grupo citado, participa o Arquivo da Emigración Galega do CCG.
16/05/2013

Máis de 200 persoas seguiron en Bonaval o Concerto “Día das Letras Galegas”, música e palabra arredor dos “Cantares Gallegos” rosalianos

Máis de duascentas persoas seguiron esta tarde na igrexa de San Domingos de Bonaval, en Compostela, o Concerto “Día das Letras Galegas”, que o Consello da Cultura Galega ven organizando desde 2011 para subliñar a dimensión conmemorativa, reivindicativa e festiva da xornada. O concerto “Aqueles doces Cantares” -no 150 aniversario dos “Cantares Gallegos” rosalianos- incluiu o recitado dos 36 “cantares” e as composicións musicais para unha posta en escena na que colaboraron a Asociación Galega de Compositores, a Asociación de Actores e Actrices de Galicia e a Escola Superior de Arte Dramática de Galicia. O presidente da Xunta, Alberto Nüñez Feijóo, a presidenta do Parlamento, Pilar Rojo, e o conselleiro de Cultura, Xesús Vázquez Abad, asistiron xunto co presidente do CCG, Ramón Villares e integrantes da Comisión Executiva da institución.
08/05/2013

O Consello da Cultura inaugurou en Ourense a exposición “Un canto e unha luz na noite. Asociacionismo cultural en Galicia (1961-1975)”

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega (CCG) en colaboración coa Fundación “10 de Marzo”, foi inaugurada esta tarde no Centro Cultural “Marcos Valcárcel” da Deputación de Ourense. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Francisco González, director do Centro Cultural da Deputación; Ricardo Gurriarán; Marcelino Fernández Santiago, xerente do CCG, e Roberto Castro, subdelegado do Goberno en Ourense. A exposición poderá visitarse ata o próximo 9 de xuño.
06/05/2013

Ramón Villares falou en Munich sobre “O exilio republicano español. Luces e sombras da España Peregrina”

Ramón Villares, catedrático de Historia Contemporánea da Universidade de Santiago de Compostela e presidente do Consello da Cultura Galega, falou hoxe na Universidade de Munich (Alemaña) sobre “Luces e sombras de La Espara Peregrina. Sobre o exilio republicano español (1939-19779”. A conferencia inscribiuse no Coloquio de investigación da Cátedra de Historia Contemporánea de Europa Meridional, detentada polo profesor Xosé Manoel Núñez Seixas.
02/05/2013

O Consello da Cultura Galega presentou o libro-homenaxe a Roberto Vidal Bolaño co facsímile da peza teatral inédita “Ruada das papas e o unto”

O Consello da Cultura Galega presentou hoxe o libro-homenaxe a Roberto Vidal Bolaño, a quen se lle dedica este ano o Día das Letras Galegas. A publicación contén o facsímile da peza teatral inédita “Ruada das papas e o unto” e estudos introdutorios de Ramón Villares, Camilo Franco e Inmaculada López Silva. No acto interviron o profesor Manuel Quintáns, a viúva do autor desaparecido, Belén Quntáns, o director do Centro Dramático Galego, Manuel Guede, e o presidente da institución, Ramón Villares, para significar a dimensión referencial de Vidal Bolaño como figura senlleira do teatro galego contemporáneo.

30/04/2013

Xornada de debate sobre “Artes Escénicas: situación e perspectivas” con intervencións de Eduardo Alonso e Manuel F. Vieites

Unha xornada de análise e debate sobre “Situación e perspectivas das Artes Escénicas en Galicia” ten lugar hoxe martes 30 de abril a partir das 10 h. no Consello da Cultura Galega. Analiza polo miúdo o documento elaborado por unha Comisión técnica temporal coa participación do sector e as propostas para un Plan Estratéxico. Eduardo Alonso e Manuel F. Vieites son os relatores. Na apertura interviron Ramón Villares, presidente do CCG, Maximino Zumalave, coordinador da Sección de Música e Artes Escénicas, e Manuel F. Vieites, director da Escola Superior de Arte Dramática de Vigo.
30/04/2013

A exposición “Nós mesmos. Asociacionismo galego na emigración”, inaugurouse o 1 de maio en Arbo

A exposición “NÓS MESMOS. ASOCIACIONISMO GALEGO NA EMIGRACIÓN”, realizada polo Consello da Cultura Galega (CCG) a través do seu Arquivo da Emigración Galega, pode verse desde o 1 de maio ata o 12 dese mes en Arbo a petición dese concello pontevedrés. No acto inaugural participaron o alcalde de Arbo, Xavier Simón Fernández, e o coordinador do Arquivo da Emigración Galega, do CCG, Marcelino Fernández Santiago.
25/04/2013

Parlamento, Xunta e Consello da Cultura presentaron no Pazo do Hórreo a edición fascsimilar de "Cantares Galegos" no seu 150 aniversario

O Parlamento de Galicia acolleu o xoves día 25 ás 19 horas a presentación da edición facsimilar de “Cantares Gallegos”, obra auroral da literatura galega que viu a luz en 1863 e da que este ano se cumpre o 150 aniversario. Máis de cento cincuenta persoas asitiron ao acto no que interviron: Pilar Rojo, presidenta do Parlamento; Ramón Villares, presidente do Consello da Cultura Galega, e Alberto Núñez Feijóo, presidente da Xunta de Galicia. Falou tamén a profesora, escritora e estudosa da obra rosaliana, Marina Mayoral e contouse coa actuación musical do dúo galaico-italiano “2nafronteira”.
Acudiron, entre outras autoridades, o conselleiro de Cultura, Educación e Ordenación Universitaria, Xesús Vázquez Abad, o Delegado do Goberno, Samuel Juárez, representantes dos Grupos Parlamentarios e representacións institucionais, culturais e académicas de Galciia.
O facsímile de “Cantares Gallegos” é unha coedición do Parlamento, a Xunta de Galicia e o Consello da Cultura Galega.
25/04/2013

Unha conferencia de Xesús Alonso Montero abriu a terceira xornada do congreso “Rosalía de Castro no século XXI”

A terceira xornada do congreso internacional “Rosalía de Castro no século XXI. Unha nova ollada” abriuse cunha conferencia do profesor Xesús Alonso Montero, presidente da Real academia Galega, sobre “o problema da lingua, das linguas” na autora iniciadora do “Xurdimento”. A xornada, coordinada polo profesor e escritor Anxo Angueira baixo o título “Cara a unha interpretación global de Rosalía: hermenéutica, fontes e edición”, ofreceu unha lectura sistémica do conxunto da obra rosaliana, en prosa e en verso, en galego e castelán e revisou a edición da obra completa e a súa lectura á luz das máis importantes fontes, como a das letras alemás do seu tempo. O congreso, organizado polo CCG, comezou en febreiro e rematará en xuño, cinco sesións ao longo de cinco meses, que poden seguirse en directo en www.consellodacultura.org e contan asemade cunha importante dimensión virtual.

19/04/2013

Os XV Encontros para a Normalización Lingüística acolleron duras críticas ao decreto de plurilingüismo “que converte ao galego en invisible e inútil”

Os XV Encontros para a Normalización Lingüística tomaron nota hoxe das duras críticas ao “decreto de plurilingüismo” a través das experiencias de diferentes docentes. A nova normativa converte ao galego “nunha lingua invisible e inútil” e favorece claramente a hexemónica posición do castelán. Así o expresaron todas as participantes nos dous paneis que analizaron a situación do galego no ensino. As sesións de traballo, iniciadas onte e organizadas polo Centro de Documentación Sociolingüística do Consello da Cultura Galega, concluíron hoxe con distintas propostas aplicables á tarea normalizadora e aos traballos colaborativos e de implicación social nesta tarefa. Os Encontros contaron coa participación de cen especialistas e eexpertas.
18/04/2013

Os XV Encontros para a Normalización Lingüística subliñan a necesidade de amplos compromisos sociais e políticos para unha acción eficaz e sostida en defensa da lingua



primeira xornada dos XV Encontros para Normalización Lingüística subliñou a necesidade dun activo compromiso dos poderes públicos e a adhesión e a vontade da cidadanía nun amplo compromiso social e politico para unha acción eficaz e sostida en materia lingüística. O programa analizou o proceso desenvolvido desde a aprobación da Lei de Normalización Lingüística de Galicia (1983) e prestou tamén atención á situación en Catalunya e Euskadi. O acto inaugural, presidido por Ramón Villares, presidente do Consello da Cultura Galega, contou coa asistencia de Valentín García Gómez, Secretario Xeral de Política Lingüística, Henirque Monteagudo, coordinador do Centro de Documentación Sociolingüística-CCG, E Nel Vidal en representación das Coordinadoras de Normalización da Lingua. Os Encontros, organizados ininterrumpidamente desde 1998 polo Consello da Cultura Galega, e aos que asisten cen estudiosos e especialistas, finalziarán hoxe con especial atención á comunidade educativa.