noticia

Rexistros 1831 a 1860 de 1862
05/06/2012

O CCG publica o seu primeiro libro electrónico

En 1955, Valentín Paz Andrade escribiu en Bogotá o poemario Canto do pobo disperso, que o Consello da Cultura Galega editou como facsímile para conmemorar o Día das Letras Galegas dedicado a este autor. Co Canto do pobo disperso, o Consello inicia tamén a súa colección de libros electrónicos. As novas publicacións que o CCG está a preparar incluirán tamén unha versión en ePUB, co obxectivo de facilitar a lectura en tablets, móbiles e outros dispositivos de lectura electrónica. A edición estivo ao coidado de María Xesús Lama, profesora da Universidade de Barcelona, e autora do estudo introdutorio. Pode descargalo na ficha da Mediateca.



O libro electrónico pode visualizarse en calquera software e dispositivo con capacidade para reproducir ficheiros ePuB.
01/06/2012

9-Xuño: Seminario “A reorganización da industria mediática e os incentivos europeos” con Robert Picard, director do Reuters Institut de Oxford

O Consello da Cultura Galega acollerá o sábado 9 de xuño un seminario de reflexión e debate sobre “A reorganización da industria mediática e as políticas de incentivos no escenario europeo”, no que intervirá Robert G. Picard, director do Reuters Institut da Universidade de Oxford (Inglaterra), un dos máis prestixiosos expertos en xestión de medios. Entregarase diploma acreditativo. O aforo está limitado a cen persoas e a inscrición debe cumprimentarse en: http://www.consellodacultura.org/evento.php?id=357

24/05/2012

Asinado un convenio de colaboración entre o Consello da Cultura Galega e a Fundación Curros Enriquez

O Consello da Cultura Galega e a Fundación Curros Enríquez asinaron hoxe un convenio de colaboración polo que a institución celanovense gravará en arquivos informáticos de formato dixital os seus actos relevantes e remitirá copia ao Arquivo Sonoro de Galicia do Consello da Cultura Galega. Para completar o “Fondo Fundación Curros Enrríquez” o Consello da Cultura Galega recibirá tamén en préstamo durante seis meses outras gravacións da Fundación para a súa copia e dixitalización, fondos que a primeira institución cultural de Galicia poñerá a disposición de investigadores externos e poderá difundir nas súas páxinas web. No acto da sinatura estiveron Ramón Villares, presidente do Consello da Cultura Galega; Antonio Piñeiro, secretario da Fundación Curros Enriquez; Maximino Rodríguez, concelleiro de Celanova, e Afonso Vázquez-Monxardín, secretario do Arquivo Sonoro de Galicia.
24/05/2012

Unha xornada sobre Celso Emilio e a emigración galega salienta a necesidade de revitalizar en pé de igualdade as relacións coa "terceira xeración".

A xornada “¿Xigantes ou ananos? Celso Emilio Ferreiro e o debate sobre a emigración Galega” puxo sobre a mesa a necesidade de dinamizar as relacións coa terceira xeración dos emigrantes, nomeadamente en América e darlle un novo impulso á proxección de Galicia. A sesión, organizada polo Arquivo da Emigración Galega, do Consello da Cultura Galega, e coordinada polo profesor Xosé Manoel Núñez Seixas, revisou tamén diferentes aspectos da biografía persoal e literaria de Celso Emilio Ferreiro (Celanova, 1912-Vigo, 1979) e a súa desemellante relación co mundo da emigración en Venezuela, onde en 1968 publicara “Viaxe ao país dos ananos”, logo de ser expulsado da Hermandad Gallega.
17/05/2012

Ramón Villares: "Valentín Paz Andrade foi exemplo de intelectual moderno e coherente visión de futuro e contribuiu a situar o feito diferencial galego na axenda politica da transición”

Ramón Villares, académico e presidente do Consello da Cultura Galega, definiu a Valentín Paz Andrade, xornalista, avogado, ensaísta, economista e poeta, como “persoa de reflexión pero tamén de acción, unha figura singular no panorama da cultura e da política galegas do século XX, autor dunha inxente e innovadora obra”. En definitiva, “un exemplo de intelectual moderno e coherente que sempre apostou por colocar Galicia no mundo, no sentido de ser galego alí onde se atopase e actuase”. Audaz mesmo na súa defensa da lingua galega como “idioma transcontinental”.
16/05/2012

Setecentas persoas en Pontevedra no II Concerto "Día das Letras Galegas" organizado polo Consello da Cultura coa Real Filharmonía de Galicia, a Polifónica e o Coro "M. Quiroga"

Setecentas persoas asistiron ao II Concerto "Día das Letras Galegas" organziado polo Consello da Cultura Galega no Pazo da Cultura de Pontevedra. Foi o mércores 16 de maio ás 21 horas, con entrada libre e gratuíta, e contou coa Real Filharmonía de Galicia dirixida por Maximino Zumalave e acompañada pola Sociedade Coral Polifónica e o Coro Académico do Conservatorio Profesional “Manuel Quiroga” de Pontevedra. Na sesión estreáronse as obras “Cantata das cantigas”, de Roxelio Groba, e “Caderno de bitácora de Valentín Paz Andrade”, de Juan Durán. Entre outras autoridades asistiron o Alcalde de Pontevedra, Miguel Anxo Fernández Lores; a Presidenta do Parlamento de Galicia, Pilar Rojo Noguera; o Secretario Xeral de Cultura, Anxo Lorenzo, e o Director Xeral de Política Lingüística, Valentín García Gómez.
15/05/2012

Concluíron as xornadas sobre as boas prácticas na conservación e protección do Patrimonio Cultural Material-Inmaterial Galego

A reflexión sobre o valor crítico dos Bens Culturais e a súa formulación, conservación e protección orientou as dúas xornadas de debate que sobre o patrimonio cultural galego convocou os días 11 e 15 de maio o Consello da Cultura Galega, en sesións de mañá e tarde. Organizadas pola Sección de Patrimonio e Bens Culturais, que coordina Iago Seara Morales, as xornadas reuniron expertos de Galicia, Andalucía, Aragón, Madrid e Valencia e continuaron outros encontros que sobre esta temática acolleu o Consello da Cultura en 2008 e 2011. As xornadas reclamaron un inventario oficial do patrimonio e subliñaron a necesidade de non separar o inmaterial do material, "caras dun mesmo poliedro", en expresió do profesor Marcial Gondar.
11/05/2012

Presentado en Pontevedra o Concerto “Día das Letras Galegas”, organizado polo Consello da Cultura Galega coa Real Filharmonía de Galicia

O Consello da Cultura Galega organizará o seu segundo concerto “Día das Letras Galegas” no Pazo da Cultura de Pontevedra. Será o mércores 16 de maio ás 21 horas, con entrada libre e gratuíta, e contará coa Real Filharmonía de Galicia dirixida por Maximino Zumalave e acompañada pola Sociedade Coral Polifónica e o Coro Académico do Conservatorio Profesional “Manuel Quiroga” de Pontevedra. Na sesión estrearanse as obras “Cantata das cantigas”, de Roxelio Groba, e “Caderno de bitácora de Valentín Paz Andrade”, de Juan Durán. A entrada será libre ata completar a capacidade do auditorio. O concerto foi presentado hoxe nunha conferencia de prensa polo Alcalde de Pontevedra, Miguel Anxo Fernández Lores, o presidente do Consello da Cultura Galega, Ramón Villares, e o director da orquestra Maximino Zumalave. O Alcalde Lores agradeceu a oportunidade de Pontevedra acoller a segunda edición deste concerto. Villares lembrou a feliz coincidencia de ser a cidade o lugar natal de Valentín Paz Andrade e contar cunha destacada traxectoria musical e coral. Maximino Zumalave aludiu á importante significación da música na vida social e cultural dos pobos.
09/05/2012

O Consello da Cultura Galega presentou “Canto do pobo disperso”, poemario inédito de Valentín Paz Andrade, "exemplo de intelectual moderno e coherente"

O Consello da Cultura Galega presentou hoxe o poemario CANTO DO POBO DISPERSO, transcrición e facsímile dun inédito de Valentín Paz Andrade, escrito en Bogotá (Colombia) en 1955. A institución contribúe así tradicionalmente á celebración do Día das Letras Galegas coa publicación dunha peza senlleira da figura homenaxeada. A edición estivo ao coidado de María Xesús Lama, profesora da Universidade de Barcelona, e autora do estudo introdutorio. Na presentación interviron: Ramón Villares, presidente do CCG; Rosario Álvarez, vicepresidenta e Alfonso Paz-Andrade, fillo do homenaxeado, que salientou a importancia e a vixencia da obra do seu pai, a quen definiu como "un home coherente entre o seu discurso e a súa acción".
07/05/2012

Inaugurouse en Fene a exposición OS ADEUSES, 73 fotografías da epopea migratoria captadas por Alberto Martí

O Consello da Cultura Galega (CCG) e o Centro Galego de Artes da Imaxe (CGAI) inauguraron o luns 7 de maio ás 20 horas na Casa da Cultura de Fene (Avda. de Conces 20-22) a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. A exposición permanecerá en Fene ata o día 30 de maio. Con anterioridade puido verse na Coruña, Vigo, Santiago de Compostela, A Pobra do Caramiñal, Ferrol e Ourense. Na inauguración estiveron presentes o Alcalde de Fene, Gumersindo Galego; o xerente do CCG, Marcelino Fernández Santiago, e o director do CGAI, Guillermo Escrigas.
27/04/2012

Xornada “As coleccións sonoras de Galicia ante o presente dixital en rede”, organizada polo Arquivo Sonoro de Galicia do Consello da Cultura

O Arquivo Sonoro de Galicia, do Consello da Cultura Galega, organizou o venres 27 de abril unha xornada de reflexión e debate “V Encontro o son da Memoria” sobre “As grandes coleccións sonoras de Galicia ante o presente dixital en rede”. A xornada celebrouse, en sesións de mañá e tarde, no auditorio da Biblioteca da Cidade da Cultura de Galicia e ocupouse da situación dos arquivos sonoros na radiodifusión, nas universidades, nas institucións galegas e nos grupos de recompilación etno-musical. Consideráronse novas formas de coordinación e cooperación entre posuidores e/ou xestores de coleccións de gravacións sonoras ao abeiro das posibilidades abertas polo traballo en rede.
25/04/2012

Ramón Villares participa en Cádiz no “II Foro Editorial de Estudios Hispánicos y Americanistas”

O presidente do Consello da Cultura Galega e catedrático de Historia Contemporánea da Universidade de Santiago de Compostela, Ramón Villares, participa no “II Foro Editorial de Estudios Hispánicos y Americanistas”, que se celebra do 25 ao 27 de abril na Universidade de Cádiz baixo o título “La edición en el mundo hispánico: historia y desafíos”.

25/04/2012

O Consello da Cultura Galega expresa o seu pesar polo falecemento do destacado galeguista Xaime Isla Couto

O Presidente e a Comisión Executiva do Consello da Cultura Galega (CCG) expresaron hoxe o seu pesar polo falecemento do avogado, economista, ensaísta e académico da Galega, Xaime Isla Couto (Santiago de Compostela, 1915) “figura sobranceira e dinamizadora do galeguismo político e cultural”.
O CCG subliñou “o inequívoco compromiso galeguista de Xaime Isla Couto, desde a súa actividade nas Mocidades Galeguistas, no Seminario de Estudos Galegos ou no Partido Galeguista, ata a súa decisiva participación na fundación da Editorial Galaxia, da que era Presidente de Honra, ou o seu labor como director da “Revista de Economía de Galicia”.
O CCG salientou asemade a contribución de Xaime Isla Couto, activo e brillante conferenciante, á normalización do idioma galego nos ámbitos económicos e tamén na igrexa, nomeadamente a través da Editorial SEPT e a súa tradución da Biblia ao galego.
19/04/2012

Nova convocatoria de bolsas do Consello da Cultura Galega

Hoxe, o Diario Oficial de Galicia publica a RESOLUCIÓN do 12 de abril de 2012 pola que se aproban as bases que rexerán a convocatoria pública de cinco bolsas de colaboración en proxectos de investigación que se están a desenvolver no Consello da Cultura Galega e se anuncia a súa convocatoria.

Pode descargar aquí a convocatoria
18/04/2012

Concluíron as Xornadas de análise e debate sobre o estado da cuestión da Arte Contemporánea en Galicia

O Consello da Cultura Galega acolleu os días 12-13 e 18-19 de abril unhas xornadas de análise e debate sobre o estado da cuestión da Arte Contemporánea en Galicia. Organizadas pola Sección de Creación e Artes Visuais Contemporáneas, que coordina María Luísa Sobrino, as xornadas reflexionaron sobre a creación artística, os labores de intermediación, o papel das institucións e o mercado. Os debates, aos que asistiron cada día unas corenta persoas, puideron tamén seguirse en directo, vía streaming, en: www.consellodacultura.org
18/04/2012

O Consello da Cultura inaugurou no Museo do Pobo Galego a exposición “Un canto e unha luz na noite. Asociacionismo cultural en Galicia (1961-1975)”

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación 10 de Marzo, foi inaugurada esta tarde no Museo do Pobo Galego, en Santiago de Compostela, onde permanecerá ata o vindeiro 13 de maio. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega “O Galo”. No acto inaugural, ao que asistiron máis de cen persoas, interviron Ricardo Gurriarán; Manuel Caamaño, un dos fundadores da Agrupación Cultural "O Facho" e o presidente do Consello da Cultura Galega, Ramón Villares, que subliñou a importancia de dar a coñecer o legado "daqueles pioneiros que fixeron un traballo esencial para o que hoxe temos".
03/04/2012

O Encontro Festlatino 2012 subliñou a decidida importancia estratéxica da proxección internacional das linguas e culturas pensinsulares

O Encontro Festlatino 2012 celebrado hoxe no Consello da Cultura Galega, que puido seguirse vía streaming, salientou a importancia estratéxica da proxección internacional das linguas e as culturas peninsulares e, no caso galego, a necesidade dunha maior cooperación interinstitucional e social para actuar nomeadamente no universo da lusofonía. Nas sesións participaron dirixentes de institucións das culturas da península ibérica vinculadas á súa proxección exterior e á promoción do diálogo intercultural (Institutos Camões, Cervantes e Ramón Llull, e o Movimento Festlatino) e persoas de recoñecido prestixio no ámbito cultural e universitario galego. O Festlatino é un movimento cultural que fomenta o diálogo entre as culturas neolatinas de Europa, América, África e Asía.
02/04/2012

3-Abril.- Seminario sobre “As linguas e culturas peninsulares e a súa proxección internacional” en colaboración co Movimento Festlatino

O Consello da Cultura Galega ven desenvolvendo nos últimos anos encontros e convenios con distintas institucións públicas e entida¬des culturais contribuíndo ao diálogo da cultura galega con outras culturas e á súa proxección no exterior. Nesta liña de traballo organiza en colaboración co Movimento Festlatino o seminario “As linguas e culturas peninsulares e a súa proxección internacional. Encontro Festalatino 2012”, que terá lugar o martes, 3 de abril. Participarán representantes de institucións das distintas culturas da península ibérica vinculadas á súa proxección exterior e á promoción do diálogo intercultural (Instituto Ramón Llull, Instituto Ca¬mões, Instituto Cervantes, o propio Festlatino), xunto a persoas de recoñecido prestixio no ámbito cultural e universitario galego. O encontro está coordinado por Henrique Monteagudo (Consello da Cultura Galega) e Humberto França (Movimento Festlatino).

30/03/2012

O Presidente do Consello da Cultura Galega participa na clausura dun congreso internacional sobre Inés de Castro no mosteiro de Alcobaça

O presidente do Consello da Cultura Galega, Ramón Villares, participará mañá 31 de marzo no mosteiro de Alcobaça (Portugal) na sesión de clausura do congreso internacional “Pedro e Inés: o futuro do pasado”, sobre a figura da noble galega Inés de Castro (1325-1355), quen fora reina consorte, de Pedro I de Portugal, a título póstumo. O congreso, iniciado o día 28 en Coimbra e continuado en Montemor o Velho e Alcobaça, acolleu cincuenta relatorios e conmemorou os 650 anos do traslado dos restos de Inés de Castro desde Coimbra ao mosteiro de Alcobaça en 1362. O Consello da Cultura Galega colaborou con diferentes institucións portuguesas na organización do congreso, que xa contara cunha primeira fase en 2005 ao cumprírense os 650 anos da morte da raíña.
27/03/2012

O "Álbum da Ciencia" pretende cubrir os déficits no coñecemento científico e incorporará 300 biografías elaboradas por 23 investigadores

O proxecto do “Álbum da Ciencia” encaixa no que o Consello da Cultura Galega entende que debe ser a cultura científica e “ven cubrir evidentes déficits no coñecemento dese ámbito fronte á cultura humanística”. Así o definiu Francisco Díaz-Fierros, vicepresidente da institución e coordinador da Sección “Ciencia, natureza e sociedade”. O proxecto, que xa pode verse e consultarse en www.culturagalega.org/albumdaciencia/, foi presentado hoxe polo seu director Xosé Antonio Fraga Vázquez, que deu conta das xa consultables primeiras vinte biografías, resultado do traballo dun equipo de 23 especialistas, que irán incorporando outras achegas ata acadar as trescentas biografías. Pola tarde o Álbum foi presentado ao público nun coloquio no que xunto cos relatores citados interviu Ángel Carracedo, catedrático e investigador de referencia da Universidade de Santiago. O Álbum da Ciencia supón un novo paso para un ambicioso proxecto do CCG: a futura elaboración do Álbum de Galicia.
27/03/2012

Ramón Villares impartiu un seminario sobre "expectativas e desafíos da cooperación cultural" no Instituto “Itaú Cultural” de Sao Paulo

O presidente do Consello da Cultura Galega, profesor Ramón Villares, concluiu en Sao Paulo (Brasil) un periplo que o levou tamén, desde o 19 de marzo, a Bos Aires e Montevideo. En Sao Paulo impartiu no Instituto “Itaú Cultural” un seminario para xerentes e coordinadores desa institución e dirixentes de instituciós culturais paulistas. Falou sobre “As institucións culturais de Galicia e as expectativas e os desafíos da cooperación cultural”.
27/03/2012

Unha nova etapa para o Álbum da Ciencia





Hoxe presentamos a nova etapa do Álbum da Ciencia. Nesta entrevista, o seu coordinador, Xosé A. Fraga, explícanos as claves do novo Álbum.
23/03/2012

Montevideo e o Patronato da Cultura Galega acollen a exposición OS ADEUSES, fotografías da epopea migratoria galega, de Alberto Martí

O presidente do Consello da Cutlura Galega, Ramón Villares, inaugurou hoxe no Patronato da Cultura Galega, en Montevideo (Uruguai) a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. A mostra, promovida e organizada polo Consello da Cultura Galega (CCG) e o Centro Galego de Artes da Imaxe (CGAI), percorreu toda Galicia en 2011. Ramón Villares continúa así o periplo que persoalmente iniciou en Bos Aires o 19 de marzo e que rematará en Sao Paulo o vindeiro día 27.
22/03/2012

Xa pode escoitar os XIV Encontros pola Normalización Lingüística

O Consello da Cultura Galega publicou en audio na Mediateca todas as intervencións realizadas nos XIV Encontros pola Normalización Lingüística, canda outros materiais que permiten seguir os relatorios e os debates. Pode consultalos aquí.
16/03/2012

Ramón Villares presentará o libro “Luís Seoane, entre Galicia y la Argentina” no Museo de Arte Latinoamericano de Buenos Aires

O presidente do Consello da Cultura Galega, Ramón Villares, ponunciará conferencias en Bos Aires e Sao Paulo e inaugurará unha exposición en Montevideo. Na capital arxentina presentará o libro “Luís Seoane, entre Galicia y la Argentina” nun coloquio previsto para o 21 de marzo no Museo de Arte Latinoamerixcano de Buenos Aires (MALBA). En Montevideo inagurará a exposición “Os Adeuses. 73 imaxes da emigración galega (1957-1963” o día 23 no Patronato da Cultura Galega e, finalmente, o día 26 de marzo en Sao Paulo, no Instituto Itaú Cultural, dirixirá un seminario sobre “Institucións e cooperación cultural”.
14/03/2012

Un avance da mostra Asociacionismo cultural en Galicia 1961-1975





Ricardo Gurriarán, comisario da mostra Asociacionismo cultural en Galicia 1961-1975 que o CCG inaugurará esta primavera no Museo do Pobo Galego explícanos as claves do proceso de produción e amósanos unha escolma dos materiais que se exhibirán.
13/03/2012

O Consello da Cultura Galega colaborará coa Asociación de Empresas e Profesionais da Conservación e Restauración de Bens Culturais

O Consello da Cultura Cultura Galega, a través da súa Sección de Patrimonio e Bens Culturais, colaborará coa Asociación de Empresas e Profesionais da Conservación e Restauración de Bens Culturais de Galicia (CRG) na valorización do patrimonio artístico e cultural galego. Con esa finalidade promoverá accións e foros para fomentar o coñecemento e a divulgación do legado atesourado por Galicia, a terceira comunidade autónoma de España en riqueza artística.
09/03/2012

A presenza do galego nas Redes Sociais é "escasa e insuficiente", segundo o avance do estudo presentado por Fernando Ramallo nos Encontros para a Normalización Lingüística

A mocidade e o seu uso das redes sociais suponen para o idioma galego unha oportunidade evidente con todo por facer, xa que a presenza do galego percíbese “escasa e insuficiente”. Así o reflicte o avance dun informe que está a elaborar Fernando Ramallo, profesor da Universidade de Vigo, que hoxe presentou un avance nos XIV Encontros para a Normalización Lingüística. O informe parte dunha enquisa entre 1.295 estudantes de bacharelato, ciclos e universidade e foi encargado pola Secretaría Xeral de Política Lingüística. A atención ao comportamento da mocidade galega nas redes sociais dominou a segunda e última xornada dos Encontros organizados polo Centro de Documentación Sociolingüística do Consello da Cultura Galega e celebrados na Cidade da Cultura de Galicia coa asistencia de máis de cen investigadores e xestores lingüísticos.
08/03/2012

“A normalización do galego debe ser un reto para a sociedade e non só para os poderes públicos”, di Henrique Monteagudo

A normalización do galego debe ser un reto para o conxunto da sociedade e non só para os poderes públicos. Así a ve o sociolingüista e académico Henrique Monteagudo, que hoxe abriu os XIV Encontros para Normalización Lingüística organizados polo Centro de Documentación Sociolingüística do Consello da Cutlura Galega. No acto inaugural o presidente da instituciòn, Ramón Villares, apostou “pola vía do consenso para revertir unha situación que é reversible”. Pola súa parte, o Secretario Xeral de Política Lingüística, Valentín García, afirmou que a mocidade “é un dos ámbitos prioritarios para a dinamización da nosa lingua”. Nos Encontros, que mañá rematarán no auditorio da Bilbioteca de Galicia da Cidade da Cultura, participan máis de cen investigadores e xestores lingüísticos que reflexionan e debaten sobre as distintas vías de relación entre lingua galega e mocidade.
07/03/2012

8 e 9-M na Cidade da Cultura: Os XIV Encontros para a Normalización Lingüística analizarán a problemática relación lingua galega-mocidade

Máis de cen investigadores e xestores lingüísticos, case o 75 por cento mulleres, participarán nos “XIV Encontros para a Normalización Lingüística” organizados polo Centro de Documentación Sociolingüística de Galicia do Consello da Cultura Galega. Coordinados por Henrique Monteagudo e Susana Mayo, os Encontros desenvolveranse os días 8 e 9 de marzo no auditorio da Biblioteca de Galicia da Cidade da Cultura en Santiago de Compostela e centraranse fundamentalmente na problemática relación entre a lingua galega e a mocidade. O acto inaguural terá lugar o xoves día 8 ás 10 horas presidido po Ramón Villares, presidente do CCG, ao que acompañarán Valentín García Gómez, Secretario Xeral de Política Lingüística, Henrique Monteagudo, coordinador, e David Barro e Valentina Formoso en representación das Coordinadoras de Normalización da lingua.