Promover os valores da tolerancia, da liberdade, da xustiza e dos dereitos humanos é o obxectivo do I Encontro Internacional Cultura de Paz que organiza o Consello da Cultura Galega (CCGA) e o Seminario Galego de Educación para a Paz (SGEP). O Salón de Actos do Consello da Cultura Galega acollerá a presentación do I Encontro Internacional Cultura de Paz o luns, 7 de xaneiro, ás 12:00 h. No acto estarán presentes Henrique Monteagudo, secretario do Consello da Cultura Galega e Manuel Dios, secretario do Encontro e Presidente do SGEP.
05/01/2002
20/12/2001
O Consello da Cultura Galega afronta o proxecto da edición da obra completa do Padre Sarmiento. O obxectivo é dixitalizar e recuperar as máis de 20.000 páxinas que se conservan do autor en arquivos de Andalucía e Madrid, transcribíndoas e realizando unha edición crítica. O Museo de Pontevedra tamén conta con tres tomos orixinais da súa obra. Ata o momento, só está publicada unha quinta parte de toda a obra do homenaxeado no Día das Letras Galegas do ano 2002. Nas previsións actuais, o proxecto terá unha duración de cinco anos, e os tomos iranse publicando a un ritmo de catro por ano.
17/12/2001
Abordar a cuestión da identidade galega é o obxectivo da última publicación dirixida polo profesor da Facultade de Ciencias da Información de Santiago de Compostela, Víctor Fernández Freixanes. Galicia, unha luz no atlántico, é o título desta obra, que terá a súa presentación oficial no Salón de Actos do Consello da Cultura Galega nun acto oficial previsto para mañá, martes, 18 de decembro, ás 20,00 h.
14/12/2001
A formación de intérpretes e o intercambio de experiencias entre os grupos de teatro afeccionado que existan a nivel nacional ou internacional, son as premisas fundamentais coas que nace a Federación Galega de Teatro Afeccionado (FEGATEA), unha asociación constituída desde o mes de setembro pasado e que agora fai a súa presentación oficial nun acto que terá lugar na sede do Consello da Cultura Galega mañá, sábado 15 de decembro, a partir das 10 h.
11/12/2001
Con motivo da presentación das actas do I Congreso Manuel Luís Acuña, a sede do Consello da Cultura Galega acolle un completo programa de actividades enmarcadas no desenvolvemento cultural da comarca de Terra de Trives e que terán lugar na tarde de mañá mércores, 12 de decembro. O acto central deste programa será a presentación do volume no que se recollen as actas do I Congreso Manuel Luís Acuña, celebrado o pasado ano na comarca de Terra de Trives. O secretario xeral de Planificación e Desenvolvemento Comarcal de Galicia, Andrés Precedo Ledo, e o secretario do Consello da Cultura Galega, Hernique Monteagudo, serán os encargados de levar adiante a presentación destas actas, previsto para as 19,00h. de mañá no Salón de Actos da institución.
30/11/2001
As distintas relacións que se poden establecer entre a acción cultural e a participación centran este ano a nova edición dos Encontros Cultura e Concellos que, por terceiro ano, organiza o Consello da Cultura Galega en colaboración coa Federación Galega de Municipios e Provincias (FEGAMP).
27/11/2001
Con motivo da presentación da obra De América para a Casa: correspondencia familiar de emigrantes galegos no Brasil, Venezuela e Uruguay (1916-1969), de Raúl Soutelo Vázquez, o Consello da Cultura Galega organiza un acto previsto para mañá, mércores 28 de novembro, ás 19,00 h.na bilblioteca da institución.
27/11/2001
O CCG REÚNE TODOS OS ACTOS ORGANIZADOS EN SANTIAGO EN HOMENAXE Ó POLÍTICO E ESCRITOR ALFREDO VICENTI
No marco do programa de actos que van ter lugar en Santiago dentro da Semana de Homenaxe a Alfredo Vicenti, organizada con motivo do 150 aniversario deste político, xornalista e escritor compostelán, hai que destacar que o acto que estaba previsto para mañá mércores, 28, na Facultade de Ciencias da Información trasládase de lugar e de hora.
23/11/2001
O secretario do Consello da Cultura Galega, Henrique Monteagudo, e o decano da Facultade de Ciencias da Información e responsable da Sección de Comunicación, Xosé López foron os encargados da presentación do actos que van ter lugar en Santiago dentro da Semana de Homenaxe a Alfredo Vicenti, organizada con motivo do 150 aniversario deste político, xornalista e escritor compostelán.
22/11/2001
Cando se cumpren os 150 anos do nacemento de Alfredo Vicenti, o Consello da Cultura Galega colabora co Taller de Edicións de J.A Durán (Ed.) na Semana de Homenaxe a Alfredo Vicenti, que terá lugar entre o luns, 26 de novembro e o sábado, 1 de decembro. A sede do CCG en Santiago, así como a Deputación Provincial de Pontevedra, a Asociación da Prensa de Madrid e o Congreso dos Deputados, acollerán diferentes roldas de prensa co obxecto de presentar esta homenaxe ó insigne político, escritor e xornalista compostelán, atendendo especificamente ós actos que terán lugar en Madrid e Galicia.
16/11/2001
No marco do Ano Europeo das Linguas, Andorra acolleu o 2º Congreso Europeo sobre Planificación Lingüística, unhas xornadas que se viñeron desenvolvendo durante os días 14, 15 e ata a xornada do 16, xornada que se pechou coa participación dos coordinadores do Informe de Política Lingüística e Normalización (IPLN) en Galicia, Henrique Monteagudo e Xan Bouzada, e da coordinadora do Arquivo de Planificación e Normalización Lingüística, Susana Mayo, entre outros asistentes.
09/11/2001
El libro Poetas e Narradores nas súas voces, editado por el Arquivo Sonoro de Galicia el pasado mes de junio ya es accesible a través de la Red gracias al especial que el portal cultural del Consello da Cultura Galega (CCG), www.culturagalega.org, acaba de publicar en Internet. Gracias a este trabajo, todas aquellas personas interesadas en la literatura gallega contemporánea podrán disponer de esta obra, en la que se incluyen los textos, en ocasiones inéditos, y las voces de estos poetas y narradores gallegos contemporáneos en la lectura de sus propias creaciones.
05/11/2001
A dependencia do sector audiovisual galego da CRTVG, que exerce unha forte influencia como factor dinamizador da producción audiovisual en Galicia, e o proceso de estructuración que este sector está vivindo centran o Informe do Audiovisual en Galicia 2001 que esta mañá foi presentado no Consello da Cultura Galega pola catedrática de Comunicación Audiovisual da Universidade de Santiago, Margarita Ledo Andión.
02/11/2001
Margarita Ledo, catedrática de Comunicación Audiovisual da Facultade de CC. da Comunicación da Universidade de Santiago de Compostela, presentará os resultados do Informe do Audiovisual en Galicia 2001 e o Catálogo de Produccións Audiovisuais 1999-2000.
26/10/2001
O concelleiro de Normalización Lingüística de Santiago sinalou no primeiro relatorio desta tarde a necesidade dun compromiso por parte de toda a cidadadanía compostelá para que o Consello Municipal de Normalización Lingüística acade unha efectiva difusión da lingua en tódolos niveis sociais e empresariais.
25/10/2001
O III Congreso Internacional de Historiadores Latinoamericanistas ADHILAC, que se ven celebrando en Pontevedra desde o pasado luns, trasladou hoxe as súas sesións científicas a Santiago. O Consello da Cultura Galega, xunto coa Universidade de Santiago, é unha das institucións que acolle hoxe estas xornadas, en concreto a mesa Galicia-América: balance de una relación histórica, baixo a coordinación da directora do Arquivo da Emigración Galega, Pilar Cagiao.
25/10/2001
Os V Encontros para a Normalización Lingüística inauguráronse hoxe co relatorio de Henrique Monteagudo, co-director, con Xan Bouzada, do Informe de Política Lingüística e Normalización. Este proxecto, que comezou a finais de 1998 subvencionado pola Comisión Europea, é un estudio analítico da situación da lingua no ámbito da política, a administracións públicas e o ensino. Ademais, tamén se analiza o campo da planificación e difusión da lingua e oa área empresarial e comercial.
24/10/2001
A quinta edición dos Encontros para a Normalización Lingüística inaugúrase mañá coa presencia do director xeral de Política Lingüística, Xesús P. González Moreiras, o director da Escola Galega de Administración Pública, Domingo Bello Janeiro, o presidente do Consello da Cultura Galega, Carlos Casares, e o director do Arquivo de Planificación e Normalización Lingüística, Henrique Monteagudo.
24/10/2001
"A inversión da Unión Europea no galego é cero". Así de conduntente se amosaba Miquel Strubell durante a conferencia que impartiu esta mañá na sede do Consello da Cultura Galega no marco dos V Encontros para a Normalización, organizados polo Arquivo de Planificación Normalización Lingüística, que hoxe se clausuran.
17/10/2001
A presentación do Informe de Política Lingüística e Normalización centra a quinta edición dos Encontros para a Normalización Lingüística, que terán lugar os vindeiros 25 e 26 de outubro na sede do Consello da Cultura Galega, organizados polo Arquivo de Planificación e Normalización Lingüística. Este Informe estrucúrase en torno a un minucioso estudio da política de difusión no ensino, na empresa ou no ámbito editorial, aínda inmersos nas campañas e actividades do Ano Europeo das Linguas.
09/10/2001
O Consello da Cultura Galega recibiu o premio ó mellor traballo de divulgación científica da Real Sociedad Española de Física pola mostra "A noite está varrida da terra". Esta mostra foi realizada pola Sección de Ciencia, Tecnoloxía e Sociedade, que coordina Francisco Díaz-Fierros e estivo exposta na Igrexa da Universidade de Santiago ata o 30 de xuño do 2000.
28/09/2001
Arxentina, Chile, México, Porto Rico, Estados Unidos e Europa foron os principais países de acollida para os exiliados galegos, na maioría das casos acabaron converténdose na segunda patria para os que fuxiron da guerra e da represión franquista. Exiliados e emigrantes chegaron a conformar amplas comunidades galegas que prolongaron, máis aló da terra natal, costumes e a fala. "Estas comunidades galegas, moitas das cales xa existían ante do 36, transformáronse en núcleos de loita contra o réxime franquista", asegurou a directora do Arquivo da Emigración Galega, Pilar Cagiao. A profesora Cagiao foi a encargada de presentar a xornada de hoxe do I Congreso "O Exilio Galego", dedicada ós destinos do exilio.
27/09/2001
As precarias condicións que miles de galegos que fuxían da Guerra Civil e da represión franquista pola fronteira pirenaica atoparon nos campos de concentración franceses, "onde só tiñan os areais, as aramados e o mar en fronte", impresionaron a todos aqueles que se achegaron esta mañá ó relatorio que ofreceu Rosa López no Congreso do "Exilio Galego".
26/09/2001
A reconstrucción desde o exilio dunha literatura nacional, o título do relatorio do profesor González Millán e que foi lido por Dolores Vilavedra, estableceu as características do discurso do exilio: "por unha clara conciencia nacional, a necesidade de volver á terra natal e a difícil experiencia de ter que abandonar á forza un lugar". Segundo González Millán, son estas as claves que os investigadores deben ter en conta á hora de realizar estudios sobre exilio.
26/09/2001
No marco da visión globalizada que os organizadores do I Congreso Internacional "O Exilio Galego" quixeron imprimir desde o comezo a este evento, encádrase esta terceira xornada, dedicada ó impacto que a Guerra Civil e o exilio causou noutras manifestacións artísticas como a arquitectura, as artes plásticas, o cine ou o teatro. Aínda que moitos menos coñecidos que escritores, políticos ou intelectuais fuxidos, arquitectos como Caridad Mateo, pintoras como Maruja Mallo ou fotógrafos coma Xosé Suárez tamén terían que marchar de Galicia.
26/09/2001
"Hai que superar o debate do bilingüismo no teatro galego", asegurou Lois Pérez Rodríguez, responsable da presentación da sesión que o I Congreso Internacional "O Exilio Galego" dedicou esta tarde ás artes escénicas. Segundo Pérez Rodríguez, "no exilio o teatro facíase en galego e en castelán porque o público ó que ía dirixido tamén era diglósico", incluso, asegurou o relator, "esta producción teatral no exterior fixo posible que moitos emigrantes chegaran a tomar conciencia do feito de seren galegos".
24/09/2001
Máis de 130 participantes e 77 relatores participan no I Congreso Internacional do "O exilio galego", que hoxe pola mañá celebrou a súa primeira xornada, baixo a organización do Consello da Cultura Galega. Un congreso que, segundo asegurou o presidente do Consello da Cultura Galega, Carlos Casares, no transcurso do acto de inauguración do congreso, "foi concibido en principio coma unha homenaxe a Castelao, o primeiro gran exiliado" pero que, pouco a pouco foi abríndose "a moitas outras exiliados menos coñecidos". Neste sentido, Casares quixo destacar que este evento, que se desenvolve en Santiago desde hoxe e ata o vindeiro sábado, ten coma obxectivos afondar no fenómeno do exilio pero tamén "facer unha sentida homenaxe a tódolos galegos que tiveron que sufrir esta desgracia histórica".
21/09/2001
Co galo do setenta e cinco aniversario do comezo do exilio galego do 36, o Consello da Cultura Galega reúne en Santiago de Compostela a estudiosos e especialistas de dous continentes para lembrar a aqueles que fuxiron tralo comezo da Guerra Civil en 1936. Segundo os organizadores: "ó se cumprir o sesenta e cinco aniversario do comezo do exilio galego de 1936, o Consello da Cultura Galega coida chegada a ocasión de lembrar axeitadamente os que se foron, de estudiar a súa historia e de recuperar a súa memoria". A inauguración realizarase o luns 24 ás 10:00 h. no Salón de Actos do Consello da Cultura Galega. O congreso está coordinado por Pilar Cagiao Vila (Coordinadora Xeral) e Henrique Monteagudo (Secretario) entre outros.
14/09/2001
A análise de Curros Enríquez como poeta total, moito máis aló do Curros social e civil do que habitualmente se fala, así como as relacións que o escritor celanovés mantivo cos seus contemporáneos, Emilia Pardo Bazán, Cástor Elices, Murguía ou Lugrís, son os aspectos que centran a xornada de hoxe no I Congreso Internacional "Curros Enríquez e o seu tempo", que se celebra ata o vindeiro sábado en Celanova.
13/09/2001
A recuperación da figura de Curros Enríquez, outorgándolle no 150 aniversario do seu nacemento un recoñecemento que ata o de agora se lle negou, centra a xornada inaugural do I Congreso Internacional "Curros Enríquez e o seu tempo", que se celebra na vila natal do escritor, Celanova, baixo a organización do Consello da Cultura Galega. O director do congreso, Xesús Alonso Montero, foi o encargado de ofrece-la primeira das conferencias, centrada nas ausencias que o nome e a figura de Curros sufriu durante a Guerra Civil e a posguerra.