NOTICIA

Rexistros 1 a 30 de 2265
24/06/2022

Nigrán acolle unha xornada dedicada ás xentes do mar

O 25 de xuño é o Día das Xentes do Mar, unha efeméride que o Consello da Cultura Galega (CCG), a Unidade de Cultura Científica do CSIC e o concello de Nigrán celebrarán de xeito conxunto cunha xornada. A lonxa de Panxón deste concello pontevedrés acollerá unha conversa entre dúas persoas moi vencellada so mar como son a pescantina Laura González, e o coñecido influencer defensor da sustentabilidade da pesca, Rogelio Santos Queiruga, xunto coa científica Luisa Iglesias García. A xornada é de balde e aberta ao público.
23/06/2022

Rosario Álvarez destaca o dereito á cultura na súa comparencia no Parlamento de Galicia

A presidenta electa do Consello da Cultura Galega (CCG), Rosario Álvarez, compareceu esta mañá na Comisión Cuarta de Educación e Cultura do Parlamento de Galicia. É o paso previo ao seu nomeamento, que será efectuado polo Consello da Xunta de Galicia e posteriormente publicado no Diario Oficial de Galicia. Na súa intervención salientou que a acción da institución manterase fiel ao principio da cultura como dereito e da obriga de promoción da cultura propia. Defendeu unha xestión participativa do CCG e a necesidade de traballar a prol da cohesión do sistema cultural dunha maneira plural.
23/06/2022

O legado educativo de Pedro Murias centra a nova entrega do especial Historias de ida e Volta

A vixésima entrega do especial Historias de ida e volta está dedicada á figura de Pedro Murias, emigrante destacado pola súa acción filantrópica no eido educativo. Este proxecto do Arquivo do Emigración (AEG) do Consello da Cultura Galega (CCG), co apoio da Secretaría Xeral da Emigración, fai un repaso en vinte imaxes e documentos que se gardan no AEG do legado desde home no qeu destaca a pioneira escola agrícola que leva o seu nome.
22/06/2022

A presidenta electa do Consello da Cultura Galega comparece mañá no Parlamento de Galicia

A presidenta electa do Consello da Cultura Galega, Rosario Álvarez, comparecerá mañá xoves na Comisión Cuarta de Educación e Cultura do Parlamento de Galicia (10:30 horas). É o paso previo ao seu nomeamento, que será efectuado polo Consello da Xunta de Galicia e posteriormente publicado no Diario Oficial de Galicia. O Plenario do Consello da Cultura Galega (CCG) reelixiu a Rosario Álvarez (Pontevedra, 1952) como presidenta o pasado 2 de xuño. A súa candidatura foi a única presentada e inicia o que será o seu segundo e último mandato.
20/06/2022

Unha xornada lembra o Galician Programme que emitiu a BBC

Neste 2022 cúmprense 75 anos do inicio das emisións do Galician Programme. Foi a primeira vez que o noso idioma contou cunha programa regular de radio e tivo lugar desde a prestixiosa emisora a BBC. Impulsado por un produtor da Sección Española, o exiliado ourensán Alexandre M. Raimúndez, mantívose activo entre 1947 e 1956. Polos seus micrófonos pasaron Plácido Castro, Leuter González Salgado, Felipe Fernández Armesto, Xosé Ramón Fernández-Oxea "Ben Cho Sey" e Francisco Fernández del Riego, entre moitos outros. O Consello da Cultura Galega (CCG) destina este martes unha xornada para contextualizar este fito e, de paso, homenaxear aos seus artífices. A cita é presencial pero pode seguirse en directo a través da web da institución.
19/06/2022

Unha xornada do Consello da Cultura Galega propón unha reflexión multidisciplinar sobre o corpo

Ao fío do 28 de xuño, Día Internacional do Orgullo. LGTBI, a Sección de Pensamento do Consello da Cultura Galega propón anualmente unha xornada debate. Nesta ocasión, a cita desenvolverase este luns 20 baixo o título “Pensar con Orgullo III. Corpos en rebeldía: aproximacións interdisciplinarias”. Unha sesión de reflexión que sirva para tender pontes na sempre complexa relación entre o corpo, a sexualidade, o desexo e o sexo/xénero, desde unha proposta interdisciplinaria. A presidenta do CCG, Rosario Álvarez e a coordinadora da Sección de Pensamento, Carme Adán, serán as encargadas de inaugurar esta cita presencial que tamén se poderá seguir en directo a través da web e das redes sociais da institución.
16/06/2022

O Repertorio de prensa da emigración inclúe novos números do xornal Orzán

O proxecto Repertorio de prensa da emigración actualízase este xoves con novos fondos procedentes do Arquivo da Emigración Galega (AEG), centro dependente do Consello da Cultura Galega (CCG). Nesta ocasión súbense 5 números da publicación Orzán, voceiro oficial do Centro Coruñés de Bos Aires. Catro deles proceden dunha doazón realizada por Chema Rei Lama.
16/06/2022

Expertos destacan en San Simón a importancia cultural e histórica do exilio

Os legados artísticos, musicais, literarios, políticos e históricos que deixaron as personalidades que se tiveron que exiliar analizáronse ao longo do día de hoxe no congreso “Legados dende a dislocación. Intervencións no presente e imaxinación do futuro nos exilios da Guerra Civil” que organiza o Consello da Cultura Galega (CCG) en San Simón. “A situación actual da guerra da Ucraína ponnos na sensibilidade de recoñecer a importancia dos exilios e a necesidade da súa análise” afirmou a presidenta do CCG, Rosario Álvarez, na inauguración. A cita remata este venres cunha conferencia de clausura a cargo do historiador Xosé Manuel Núñez Seixas, logo dun percorrido a través dos legados culturais.
15/06/2022

Un congreso analiza en San Simón o legado cultural producido polo exilio

A elección da figura de Florencio Delgado Gurriarán como homenaxeado no Día das Letras Galegas, fixo que ao longo deste ano se puxera o acento en estudar e analizar o legado de persoas que, coma el, se tiveron que exiliar. E esta é a idea que vertebra “Legados dende a dislocación. Intervencións no presente e imaxinación do futuro nos exilios da Guerra Civil”, o congreso que organiza o Consello da Cultura Galega (CCG) ata o vindeiro venres. A cita xuntará unha ducia de especialistas no estudo do exilio producido pola Guerra Civil nun espazo tan significativo como é a illa de San Simón (Redondela). A xornada é presencial e non se poderá retransmitir en directo pero será gravada para subirse posteriormente á web da institución.
15/06/2022

Presentada en Panxón a xornada As xentes do mar 2022

A presidenta electa do Consello da Cultura Galega, Rosario Álvarez, xunto coa responsable da Unidade de Cultura Científica do CSIC en Galicia, Luisa Martínez, e o alcalde do Concello de Nigrán; Juan A. González, presentaron esta mañá en Panxón a Xornada As Xentes do Mar 2022. Trátase dunha actividade que busca fomentar o debate sobre o estado da pesca, a sustentabilidade, a conservación da biodiversidade ou a aparición de especies invasoras, a través da traxectoria profesional das persoas convidadas que dedican ou dedicaron a súa vida ao traballo no mar.
13/06/2022

O Consello da Cultura e a Xunta visibilizan a diversidade sexual coa mostra Sen Cancelas

Sen cancelas. Memorias do arco da vella en Galicia é o título do proxecto expositivo que poñen en marcha o Consello da Cultura Galega (CCG) e a Consellería de Promoción do Emprego e Igualdade. A mostra ten un carácter didáctico e divulgativo e fai un percorrido histórico e conceptual sobre a diversidade sexual en Galicia. A presidenta do CCG, Rosario Álvarez, e a conselleira, María Jesús Lorenzana, inauguraron esta mañá no claustro do Instituto Rosalía de Castro en Santiago de Compostela este proxecto pensado principalmente para a mocidade que itinerará polos centros educativos do país. Carme Adán é a coordinadora do comité asesor que deseñou os contidos e que ten como comisarios a Daniela Ferrández e Enrique Latorre. A exposición tamén se pode consultar na rede desde o web do CCG.
13/06/2022

Os Encontros Monográficos co Patrimonio Cultural reflexionan sobre a conservación e a xestión dos documentos

O concepto de documento está a mudar con rapidez e non tanto as leis que regulan a súa conservación. A xornada número 37 dos Encontros Monográficos co Patrimonio Cultural, organizados pola Sección de Patrimonio e Bens Culturais do Consello da Cultura Galega, pon o foco e reflexionar sobre como han de ser os arquivos que custodian este patrimonio, como se debe abordar a xestión dos documentos dixitais e cal será o papel dos arquivistas. Rosario Álvarez, presidenta do CCG, máis Rebeca Blanco-Rotea e Olimpia Rodríguez, coordinadora e membro da Sección de Patrimonio respectivamente, inaugurán esta actividade presencial que tamén se pode seguir en directo a través da web e das redes da institución.
08/06/2022

A situación da industria discográfica galega ante a dixitalización, a debate nunha xornada

“A industria discográfica en Galicia” é o titulo da xornada que terá lugar no Consello da Cultura Galega (CCG) e na que destacados profesionais abordarán o impacto da dixitalización neste sector. A cita está coordinada por Xosé Ramón Pousa, é presencial pero poderá seguirse en directo a través da web e das redes sociais da institución.
07/06/2022

Unha xornada analiza o que nos custa o cambio climático e a transición enerxética

Canto nos está a custar e nos custará o cambio climático? Entre as medidas a emprender, ocupa un lugar destacado a transición enerxética dende o paradigma de combustibles fósiles. A canto ascende esta factura? Temos maneira de reducila a través de políticas axeitadas? Podemos facelo dunha forma xusta? E, sobre todo, compensaranos pagala? Expertos como Xavier Lavandeira ou Beatriz Hervella responderán a estas preguntas na xornada “A factura do cambio climático e transición enerxética” que organiza a Sección de Ciencia, Tecnoloxía, Natureza e Sociedade do Consello da Cultura Galega (CCG). A xornada é presencial pero poderá seguirse en directo a través da rede.
06/06/2022

O Consello da Cultura Galega e a Consellería de Promoción do Emprego e Igualdade constitúen o Foro Identidades e Disidencias Sexuais

Rosario Álvarez, presidenta do Consello da Cultura Galega (CCG), e María Jesús Lorenzana, conselleira de Promoción do Emprego e Igualdade, deron a coñecer este luns en rolda de prensa o Foro Identidades e Disidencias Sexuais. Trátase dun proxecto coordinado por Carme Adán, responsable tamén da Sección de Pensamento do CCG, que busca incrementar o coñecemento das necesidades da poboación LGBTQI, así como os recursos e servizos cos que contan as administracións públicas nesta materia. O Foro está conformado por cinco mesas de traballo que artellarán un proceso de reflexión que culminará en 2023 coa presentación dun informe pioneiro nesta materia.
02/06/2022

Un especial achega documentación inédita sobre Urbano Feijoo

Urbano Feijoo Sotomayor (1808-1898) foi un empresario e político galego que promoveu a creación dun plan de colonización que facilitase, en termos xurídicos, económicos, filantrópicos e prácticos a chegada a Cuba de galegos. O operativo foi moi coñecido polo trato denigrante dispensado aos traballadores. A documentación deste episodio, tan dramático como fundamental para a colectividade galega asentada en Cuba, pódese consultar no especial sobre Urbano Feijoo que acaba elaborar o Arquivo da Emigración Galega (AEG), centro dependente do Consello da Cultura Galega. Nel pódense consultar os documentos orixinais, a súa transcrición, así como outros recursos que permiten afondar na controvertida figura de Feijoo.
02/06/2022

Rosario Álvarez é reelixida presidenta do Consello da Cultura Galega

O Plenario do Consello da Cultura Galega (CCG) reelixiu no serán deste xoves a Rosario Álvarez (Pontevedra, 1952) como presidenta. A súa candidatura foi a única presentada e afronta agora o que será o seu segundo e último mandato. A presidenta electa afronta o novo período con renovado impulso que manterá os seus sinais de identidade: xestión participativa, busca de novos públicos, cohesión do tecido cultural galego e colaboración con todo tipo de entidades, así como a promoción exterior da cultura galega.
31/05/2022

Unha xornada analiza a liberdade creativa de Maruja Mallo

Maruja Mallo é a personificación do espírito da vangarda no seu intento de “cambiar o mundo” e “cambiar a vida”. Sobre a súa liberdade creativa e de pensamento afonda mañá unha xornada do ciclo “Revisando a nosa arte” co que a Sección de Creación e Artes Visuais Contemporáneas do Consello da Cultura Galega (CCG) revisa mensualmente a traxectoria de personalidades destacadas da nosa arte. A sesión é presencial pero pode seguirse en directo desde o web e as redes sociais da institución.
26/05/2022

A literatura galega da posguerra en América centra o novo especial Historias de ida e Volta

A nova entrega do especial Historias de ida e volta sitúanse no ronsel da figura do homenaxeado deste ano co Día das Letras Galegas, o galeguista e exiliado en México, Florencio Delgado Gurriarán. Por iso, a entrega número 19 do proxecto do Arquivo do Emigración (AEG) do Consello da Cultura Galega (CCG), co apoio da Secretaría Xeral da Emigración, fai un repaso por algunhas das obras e figuras máis destacadas da nosa literatura xurdidas no continente americano.
25/05/2022

O Consello da Cultura Galega e os institutos Ramon Llull, Extepare e Cervantes impulsarán un informe periódico sobre a situación das linguas oficiais

O Consello da Cultura Galega (CCG) acolleu este mércores unha xuntanza de traballo na que participaron Pere Almeda, director do Institut Ramon Llull; Irene Larraza, directora do Extepare Euskal Institutua; Martín López-Vega, director de Gabinete do Instituto Cervantes; e Rosario Álvarez, presidenta do CCG. Nela acordaron, entre outras accións, a realización dun Informe bianual sobre a situación das respectivas linguas e a celebración dunha mostra multidisciplinar, para visibilizar o máis actual da creación cultural galega, vasca e catalá e española. A reunión celebrouse cando se cumpren dous anos da sinatura do primeiro acordo conxunto para apoiar a diversidade lingüística e pluralidade cultural de España.
23/05/2022

A última conxuntura do Observatorio da Cultura Galega apunta a unha suba dos prezos

A recuperación do sector cultural tras a COVID-19 vese agora condicionada pola suba de prezos. A última conxuntura estatística de ámbito cultural que acaba de publicar o Observatorio da Cultura Galega, servizo dependente do Consello da Cultura Galega (CCG), apunta a que a cultura notou máis tarde e en menor medida a suba de prezos que o resto de sectores. Ademais, destaca que son os libros, a prensa e os artigos de papelaría os que máis o notan, cunha suba dun 2,5%, impulsados polo encarecemento de subministracións, nomeadamente o do papel.
23/05/2022

Comeza o ciclo Literarias todas, que analiza a posición das mulleres no sistema literario

Olga Novo, Chus Lama e Alba Cid comparten, entre outros aspectos, ser tres mulleres gañadoras de tres premios nacionais de literatura. As tres participan este martes (Chus Lama por videoconferencia) na sesión titulada “Novas voces, éxitos eternos. Os premios nacionais levan nome de muller (parte I)”. Con ela ábrese o ciclo Literarias todas, organizado polo Centro de Documentación en Igualdade e Feminismos (CDIF) do Consello da Cultura Galega (CCG). Unha proposta coordinada por Inma López Silva que busca reflexionar sobre a posición das mulleres dentro do sistema literario galego. A xornada é presencial pero pode seguirse en directo a través do web e das redes da institución.
19/05/2022

Un simposio analiza a relevancia de rutas de peregrinación europeas e xaponesas

O Consello da Cultura Galega colabora co Instituto Cervantes de Tokio, as embaixadas de Irlanda e Portugal en Xapón e o Instituto Camões no Simposio "Fóra do común. Espiritualidade, Resiliencia e Rexeneración nas rutas de peregrinaxe de Europa e Xapón". A cita arrinca hoxe en Tokio e conta cunha parte presencial e outra telemática. Con este simposio búscase analizar o papel que as rutas de peregrinación en Xapón e Europa tiveron ao longo da historia e a súa actual relevancia.
19/05/2022

O Repertorio de prensa da emigración Galega incorpora o Boletín Oficial do Centro Galego

O Arquivo da Emigración Galega, centro do Consello da Cultura Galega (CCG), acaba incorporar ao seu proxecto Repertorio de Prensa da Emigración Galega 200 novos números. Son os que se corresponden co Boletín Oficial do Centro Galego de Avellaneda (Arxentina).
18/05/2022

Javier Vilanova fala de filosofía de sentido común no ciclo Pensarmos

O ciclo de reflexión Pensarmos, que organiza mensualmente a Sección de Pensamento do Consello da Cultura Galega (CCG) que coordina Carme Adán, ten este xoves 19 de maio (18:00horas) unha nova cita. Desta volta co filósofo e profesor Javier Vilanova, que falará da filosofía de sentido común. Estará con el na mesa a tamén profesora, Nieves Herrero. A sesión é presencial, pode seguirse en directo a través do web e das redes sociais da institución.
18/05/2022

Unha xornada analiza o exilio galego da posguerra en Norteamérica

José Rubia Barcia, Ernesto Guerra da Cal, Emilio González López, Ramón Martínez López ou Eugenio Fernández Granell comparten o feito de ser intelectuais galegos que se tiveron que exiliar entre 1936 e 1939. As rutas que seguiron, así como a evolución do seu pensamento e a relación entre vida e obra, forman parte da sesión “Fragmentos da comunidade: o exilio galego de posguerra en Norteamérica” que organiza o Consello da Cultura Galega (CCG) e o Observatorio de la Lengua Española y las Culturas Hispánicas en los Estados Unidos do Instituto Cervantes. A cita desenvólvese a través da plataforma Zoom (en liña o xoves, 19 de maio ás 19:00, hora española) e ten aberta a súa participación.
16/05/2022

O Concerto das Letras Galegas homenaxea a Florencio Delgado Gurriarán e o exilio mexicano

O Teatro Lauro Olmo do Barco de Valdeorras encheuse no serán deste luns para homenaxear con música a un dos seus fillos pródigos: Florencio Delgado Gurriarán (Vilamartín de Valdeorras, Ourense, 1903 - Fair Oaks, USA, 1987). A duodécima edición do Concerto das Letras Galegas, antesala festiva do Día das Letras que organiza o Consello da Cultura Galega (CCG), repasou musicalmente o legado do homenaxeado e tamén lembrou a memoria das exiliadas e exiliados republicanos que, coma Florencio, pasaron de Galicia a México. O concerto supuxo a estrea da peza Diásporas, composta para a ocasión por Carme Rodríguez a partir dos textos de Galicia infinda, poemario referencial do autor. A presidenta do CCG, Rosario Álvarez; unha ampla representación dos concellos da comarca, entre eles, o alcalde do Barco de Valdeorras, Alfredo García, e o de Vilamartín, Enrique Álvarez; mais o secretario xeral de Política Lingüística, Valentín García; a directora xeral de Patrimonio, María del Carmen Martínez; o presidente da Real Academia Galega, Víctor Freixanes, e a familia do homenaxeado asistiron a este concerto que tamén se emitirá na TVG este martes, 17 de maio, dentro da programación especial das letras galegas.
15/05/2022

O Concerto das Letras Galegas abre este luns os actos de homenaxe a Florencio Delgado Gurriarán

O Consello da Cultura Galega (CCG), coa colaboración do concello do Barco de Valdeorras, abre este luns 16 de maio os actos de celebración do Día das Letras Galegas que homenaxea ao poeta e activista político e cultural Florencio Delgado Gurriarán (Vilamartín de Valdeorras, Ourense, 1903 - Fair Oaks, USA, 1987). Faino co tradicional Concerto das Letras Galegas que corre a cargo do grupo Zoar Ensemble cun programa musical que repasa o legado do homenaxeado e tamén lembra a memoria dos exiliados e exiliadas republicanos que, coma Florencio, pasaron de Galicia a México. As entradas son gratuítas, pódense retirar no propio día do concerto que terá lugar no Teatro Lauro Olmo (Barco de Valdeorras, 20:00 horas) e será retransmitido en directo pola web do CCG e a da CRTVG. Nel estrearase a peza Diásporas, composta para a ocasión por Carme Rodríguez.
12/05/2022

Galicia no tempo de Afonso X centra unha mesa redonda do 57º congreso de Estudos Medievais

A cidade estadounidense de Kalamazoo acolle ata o sábado o 57th International Congress on Medieval Studies organizado polo Instituto Medieval da Western Michigan University. Trátase dun congreso de referencia sobre estudos medievais a nivel internacional. O congreso ten no seu extenso programa varias sesións dedicadas a analizar a Galicia Medieval que están coordinadas polo especialista Simon Doubleday. Unha desas sesións consiste nunha mesa redonda que parte da publicación do Consello da Cultura Galega (CCG) Galicia no tempo de Afonso X, do que Doubleday é tamén editor.
12/05/2022

O Consello da Cultura Galega participa en varias actividades en Bos Aires

Bos Aires celebra estes días a 46ª edición da súa Feria Internacional do Libro. Unha cita destacada no panorama mundial na que participa o Consello da Cultura Galega (CCG), en virtude do convenio de colaboración asinado co Instituto Cervantes, co Institut Ramón Llul e o Etxepare Euskal Institutua. No marco do programa da feira, este venres 13 de maio terá lugar un encontro con autores que escriben nas linguas cooficiais do Estado. A cita estará moderada polo poeta e director do Instituto Cervantes, Luis García Montero, e nela participan, a escritora galega, Berta Dávila, premio Xerais 2021 e premio da Crítica de narrativa galega 2019; o antropólogo e narrador Adriá Pujol; xunto coa escritora Marta Sanz, premio Herralde de novela 2015 e finalista do Premio Nadal 2006. O encontro conta coa colaboración da Consejería Cultural da Embaixada de España na Arxentina.