Sextina

----

Sextina

A través deste espazo, cada seis meses e en razón de un a un, dáse visibilidade a aqueles libros, folletos e documentos dos fondos do CDIF considerados rarezas ou pouco coñecidos debido á súa antigüidade, tipoloxía, forma de produción, procedencia ou xeito de difusión.

Segunda entrega:
Título: Materiais das II Xornadas Feministas Galegas, 1-4 de novembro de 1984





Autoría: Centro de Documentación en Igualdade e Feminismos (CDIF)

Publicación: 2021

Descrición física: 1 PDF ( 229 p.)

Contido: Compilación dos materiais elaborados por diferentes mulleres e organizacións integradas en 1984 na Coordinadora Nacional do Movemento Feminista en Galicia para as xornadas feministas que tiveron lugar en Vigo no mes de novembro de 1984. Ademais de materiais publicitarios, comprende un total de dezanove documentos manuscritos e mecanoscritos. Neles abórdanse as seguintes temáticas: lesbianismo, pacifismo, violencia, educación, traballo e historia, autonomía e formas de organización e loita do movemento feminista organizado en Galicia.

Trátase de documentación relevante para a memoria do movemento feminista en Galicia e para o coñecemento dos debates, reflexións, revisións e críticas máis destacados a mediados da década de oitenta do século XX en Galicia.

Os documentos foron depositados no CDIF a través de doazóns e preparados para a súa publicación en formato PDF en marzo de 2021.

Materias: feminismo, mulleres, violencia , LGTBIQ+, coeducación, historia




Primeira entrega:
Título: A Mulher hoje: unidade didáctica





Autoría: Asembleia de Mulheres de A Corunha; AS-PG da Corunha

Publicación: A Coruña: Asociaçom Sócio-Pedagógica Galega (AS-PG), 1983

Descrición física: 1 tríptico; 21cm.

Contido: Material elaborado polo Grupo de trabalho sobre “O ensino e a muller”. Tríptico nº5 da serie editada pola AS-PG. Son: 1) «Orientaçons para a escrita do noso idioma»; 2) «Observaçons sobre as normas ortográficas do ILRRAG»; 3) «Para ler textos escritos em galego»; 4) «O entroido: unidade didáctica »; 5) « A mulher hoje: unidade didáctica»; 6) « A contaminaçom: unidade didáctica».

Este documento en formato tríptico, é considerado un dos primeiros sobre educación non sexista publicados en Galicia. Trátase dunha guía de apoio ao proceso de ensino-aprendizaxe dirixido ao profesorado. Ten o obxectivo de fomentar unha conciencia crítica perante as desigualdades e desequilibrios entre os sexos a través da análise das discriminacións das mulleres en todos os ámbitos de relacións sociais. Inclúe recomendacións de actividades e medios para desenvolvelas.

Materias: coeducación, feminismo, mulleres, fontes de información

Recomendamos: