Inmaculada López Silva

Biografía de Inmaculada López Silva

1978- Santiago de Compostela

Escritora e crítica teatral, é doutora en Filoloxía pola Universidade de Santiago e diplomada polo Institut d’Études Théâtrales da Université Paris III-Sorbonne Nouvelle. Desde 2007 é columnista no xornal La Voz de Galicia. Deuse a coñecer en 1996 coa novela Neve en abril (1996 e 2005). Despois publicou os libros de relatos Rosas, corvos e cancións (2000) e Tinta (2012), mais acadou o recoñecemento do público e a crítica coas súas novelas, entre as que destacan Concubinas (Premio Xerais de Novela 2002), Non quero ser Doris Day (2006) e Memoria de cidades sen luz (Premio Blanco Amor 2008, Premio Arcebispo San Clemente e Premio da Asociación de Escritores en Lingua Galega); ademais escribiu o libro de viaxes New York, New York (2007) e os ensaios feministas Maternosofía (2014) e Chámame señora, pero trátame coma a un señor (2018). En 2016 publicou a que até agora é a súa última novela, Aqueles días en que eramos malas.

Actualmente é tamén profesora na Escola Superior de Arte Dramática de Galicia e membro do Centro de Documentación en Igualdade e Feminismos do Consello da Cultura Galega. Figura no consello de redacción da revista Grial, onde desenvolve un intenso labor crítico ao que se acrecentan as súas investigacións publicadas noutros espazos relacionados cos estudos teatrais no ámbito internacional. Centrada esencialmente na análise da política e institucións teatrais e na configuración de sistemas teatrais emerxentes, publicou os libros Un abrente teatral (2002), Teatro e canonización (2004) e Resistir no escenario. Unha historia institucional do teatro galego (2015). Tamén é tradutora ao galego da obra dramática de Albert Camus e de Jean Genet e directora para o Consello da Cultura Galega do proxecto en liña Dicionario Enciclopédico de Termos Escénicos.

Hístórico no Consello da Cultura Galega

Dende 2019
Centro de Documentación en Igualdade e Feminismos (CCG)
Cargo: Membro
Órgano:-
Dende 2018 ata 2019
Comisión de Igualdade (CCG)
Cargo: Membro
Órgano:-
Dende 2015 ata 2018
Comisión Técnica temporal para a organización da exposición “Centenario das Sociedades Corais en Galicia” (CCG)
Cargo: Membro
Órgano:-
Dende ata 2018
Sección de Música e Artes Escénicas (CCG)
Cargo: Membro
Órgano:-