Galicia e, nomeadamente, a cidade de Ourense distinguíronse dun xeito moi singular por espallar por todo o país o pensamento do bieito ilustrado, ata o punto de que na segunda metade do xix as publicacións galegas superaron en importancia as do resto de España. A figura de Feijoo foi aclamada e a súa galeguidade converteuse en motivo de orgullo e satisfacción para unha Galicia que comezaba a desangrarse nunha riada humana sen fin cara ao alén mar. Esta corrente de afecto mantívose, cando menos, ata a segunda metade do século xx, na que outras efemérides vitais do beneditino serviron como xustificación para realizar novos estudos sobre o seu pensamento e a súa importancia no contexto cultural español. De todas as maneiras, no último cuarto do século xx e na primeira década do xxi comezou a caer nun lento e progresivo esquecemento, e foron moi escasos os traballos ou mencións que lle foron dedicados pola intelectualidade galega. Feijoo, a pesar de todo, segue a ser unha figura esencial e indiscutible da nosa historia cultural que está por riba das modas e dos oportunismos intelectuais do momento. Por iso, o Consello da Cultura Galega non quixo deixar pasar os douscentos cincuenta anos do seu pasamento, en 1764, sen lle lembrar á cidadanía galega que o erudito ourensán segue a ser un dos máximos referentes da nosa cultura, como recoñeceu Castelao na «Alba de Groria» incluíndoo no cortexo dos galegos egrexios e inmorredoiros. Deste xeito, quérese contribuír ao avivamento entre nós da memoria dun galego, referente fundamental da Ilustración española e loitador incansable contra o pensamento débil, preguizoso e lixeiro. Algo que nunca deixará de estar de actualidade.

Titulo	B. J. Feijoo, renovador do pensamento da Ilustración
Coordinación	Francisco Díaz-Fierros Viqueira
Autoría	Xosé Ramón Barreiro Fernández Francisco Díaz-Fierros Viqueira Luís Rodríguez Ennes Inmaculada Urzainqui
Limiar	Francisco Díaz-Fierros Viqueira
Obxecto de estudo	Benito Jerónimo Feijoo
Publicación	Santiago de Compostela: Consello da Cultura Galega, 2016
Edición	1ª edición
Entidade	Consello da Cultura Galega
Descrición física	118 p. ; 24 cm.
ISBN. Ed. papel	978-84-92923-73-1
Depósito Legal. Ed. papel	C 988-2016
ISBN. Ed. pdf	978-84-92923-73-1
Depósito Legal. Ed. pdf	C 988-2016
Materias	lingua historia filosofía biografías
Áreas	Centro de Documentación Sociolingüística de Galicia (CCG)
Código QR