O Vicepresidente do Consello da Cultura Galega Francisco Díaz-Fierros Viqueira, a Coordinadora da Comisión de Igualdade desta institución María Xosé Agra Romero e o Director Xeral de Medios da Xunta de Galicia Alfonso Cabaleiro, presentan a xornada

Xosé López García, Secretario do CCG, presenta a Manuel Lombao Lombao, ex – director da TVE en Galicia e dos Centros Territoriais de TVE. Este, no relatorio inaugural achéganos referencias de mulleres nos medios de comunicación desde a década de cincuenta de século XX, e, a través figura da xornalista Tereixa Navaza, céntrase máis concretamente nas orixes da televisión feita en Galicia desde a década de setenta do citado século.

Mariam Mariño Costales, técnica da Comisión de Igualdade do CCG, presenta a cartografía Tereixa Navaza González no Álbum de mulleres. Trátase dun espazo arquivístico e de documentación que aporta materiais para coñecer máis de perto a vida e obra da xornalista así como as producións doutras autoras e autores sobre ela.

Marta Pérez Pereiro, vicedecana de Ciencias da Comunicación da USC, presenta ás participantes desta sesión científica: Belén Puñal Rama, xornalista e investigadora en comunicación e xénero da USC no relatorio titulado “Donas da información? Mulleres xornalistas en Galicia” reflexiona sobre o lugar ocupado polas mulleres nos medios de comunicación no pasado e no presente. Pola súa banda, Ana Arellano Salafranca, membro do consello de redacción da revista Andaina no relatorio titulado “Forza e valentía feminista tras un sorriso” acheganos á faciana máis activista de Tereixa Navaza na súa implicación no movemento feminista galego destacando máis concretamente, os traballos da xornalista para a revista Andaina. “O xornalismo de Tereixa Navaza, un oficio de vivir” é o título da intervención da xornalista e membro da Comisión de Igualdade do CCG Carme Vidal Lage, que fai unha achega á produción escrita de Tereixa Navaza publicada en prensa e revistas. Finalmente Marga Tojo González, xornalista e Presidenta de Dioivo, reflexiona sobre as dificultades de traballar nos medios de comunicación a día de hoxe e sobre a complicada situación na que se atopan as e os xornalistas na actualidade no relatorio titulado “Traballar nos medios hoxe?”

Raquel Rei Branco presenta o audiovisual elaborado por Candongas do Quirombo para esta xornada sobre Tereixa Navaza. O audiovisual atende aspectos biográficos, laborais e de compromiso social da xornalista.

Tereixa Navaza. A voz da Liberdade de As Candongas do Quirombo en Vimeo.

Manuel Rivas conversa con Tereixa Navaza sobre diferentes aspectos da súa vida profesional e persoal

Xosé María Palmeiro, Director de comunicación do CCG, presenta e modera unha mesa redonda que, na procura de abrir novas canles de aproximación ao traballo das xornalistas pioneiras en Galicia, conta coa presenza de Tonina Gay Parga, Tereixa Navaza, Concha Pino e María Xosé Porteiro

Ana Romaní Blanco e Carme Vidal Lage Coordinadoras da xornada e membros da Comisión de Igualdade do CCG