               <div class="single-product shop-quick-view-ajax clearfix">

                    <div class="product modal-padding clearfix">

                        <div class="col_half nobottommargin">
                            <div class="product-image">
                                
                            </div>
                        </div>
                        <div class="col_half nobottommargin col_last product-desc">
<b>RESUMO</b><h4 style="margin:0;"> A Nosa Terra<!--1977-2011--><br />                                                                                                                                n. 25                                                                                                (
                                                                29/
                                                                                                6/
                                                                1978)
                                </h4>
                            <div class="clear"></div>
                            <div class="line"></div>
                            <p>O número 25 destaca especialmente en portada a morte de dous traballadores de Elnosa-Celulosa en Pontevedra. Ademais, tamén con avances na primeira páxina, dúas reportaxes tratan unha protesta polo desemprego en Ferrolterra convocada por forzas políticas vencelladas ao goberno do Estado e da Xunta e as malas condicións laborais na mina da Penouta, aberta nun monte comunal preto de Viana do Bolo. Así mesmo, nas demais páxinas dedicadas a Galicia hai pezas sobre as propiedades curativas das augas dos balnearios, a petición de liberdade de cinco veciños da Balea presos por “defender” un monte comunal, despedimentos na fábrica de embutidos Vazey de Chantada e o traballo do acibeche en Santiago. No espazo dedicado ao Estado español recóllese a morte e feridos provocados polas forzas policiais nos San Fermíns e as discrepancias no seo do nacionalismo catalán. Da actualidade internacional trátase o resultado das últimas eleccións na República Dominicana e o interese de EE. UU. por solucionar os conflitos entre Exipto e Israel. A entrevista ten por convidado ao activista antinuclear Pedro Costa Morata. Os contidos de opinión versan sobre as barreiras arquitectónicas coas que se atopan moitas persoas con mobilidade reducida, sobre a polémica entre Lenin e Rosa Luxemburg polo dereito á autodeterminación dos pobos e sobre a lexislación contra o maltrato no ámbito familiar. A isto engádense os habituais textos breves e ilustracións satíricas, que neste caso se centran no control sanitario e sexual de animais en Galicia e no estranxeiro, nun incidente no parlamento británico, na actuación dunha cómica explotando estereotipos galegos na televisión, na manipulación da opinión pública por parte do nacionalismo español e na contaminación e accidentes laborais na empresa Celulosa-Elnosa de Pontevedra. As pezas de temática deportiva  abordan o torneo coruñés de fútbol “Teresa Herrera” e os problemas da pesca recreativa. As páxinas de cultura inclúen artigos sobre o progresivo desuso das fontes públicas e sobre as terras de Viana do Bolo, recomendacións lingüísticas e a correspondente axenda. Ademais fanse eco da aparición dun libro de banda deseñada de Xaquín Marín e do esmorecemento da tempada de ópera na Coruña. Por último, a contraportada repasa a traxectoria de Cruz Gallástegui Unamuno.</p>

                            
                        </div>

                    </div>

                </div>