Novas da lingua. AXUDAS E PREMIOS

Rexistros1 a 30 de 922
11/04/2024. AXUDAS E PREMIOS

Exército Mekemeke convértese no primeiro podcast en galego en chegar aos Premios Ondas

Exército Mekemeke quedou entre os cinco finalistas dos "Premios Ondas Globales del Podcast", na categoría de mellor podcast en lingua cooficial do Estado, xunto a producións de Catalunya Radio, Eitb e IB3. Esta é a primeira ocasión en que un programa en galego resulta nominado.

Trátase dun videopodcast en ton humorístico dirixido á "xabaxeración", producido e presentado por Carlos Vieito, que se grava en Ames Radio e se publica semanalmente a través das principais plataformas de podcast e vídeo, así como na grella da emisora. O programa conta coa colaboración do músico Xabier Dios, a actriz Lidia Veiga e o cineasta Miguel Gómez Abad. Ademais de ter como voz en off a unha das figuras máis recoñecidas da dobraxe galega, Antón Rubal.

08/04/2024. AXUDAS E PREMIOS

Os V Premios Mil Primaveras xa teñen gañadores

O xurado dos V Premios Mil Primaveras fixo públicos os catro proxectos gañadores desta edición, por seren modelos de boas prácticas no ámbito da normalización lingüística e porque “favorecen a reflexión e a acción, potencian a oralidade, reforzan a formación e introducen a nosa lingua en ámbitos de interese para a mocidade”. As iniciativas galardoadas son Aquí tamén se fala, CeibaRimas, Elos. Engánchate ao galego! e Recuncho Gamer.

Os Premios Mil Primaveras están organizados pola Coordinadora de Traballadores/as de Normalización da Lingua, coa colaboración económica da Deputación Provincial de Pontevedra.

Podes ampliar esta nova premendo aquí.
05/04/2024. AXUDAS E PREMIOS

Premios de poesía, relato curto e tradución na UVigo

A Área de Normalización Lingüística da Universidade de Vigo convoca os Premios de poesía, relato curto e tradución 2024, dirixidos a todos os membros da comunidade da Universidade de Vigo en activo. Os orixinais deberán estar escritos en lingua galega de acordo coas Normas ortográficas e morfolóxicas do idioma galego da Real Academia Galega e do Instituto da Lingua Galega (NOMIG, 2003). O certame está dotado con 700 € para o primeiro premio e dous accésits de 250 € en cada unha das tres categorías. O prazo de admisións de orixinais remata o día 12 de abril de 2024.

Podes consultar as bases completas premendo aquí.
05/04/2024. AXUDAS E PREMIOS

Axudas para os SNL da Administración local de Pontevedra

A Deputación de Pontevedra convoca unha liña de axudas, dirixida a concellos e outras entidades locais da provincia, para a creación, mantemento ou reforzo dos servizos de normalización lingüística (SNL) municipais durante o ano 2024. No caso das axudas á creación de SNL, poden optar os concellos de ata un máximo de 50.000 habitantes, ou ben as agrupacións de concellos, mancomunidades ou entidades locais menores da provincia que non conten con este servizo. Para o mantemento ou reforzo do SNL, poden optar os concellos que conten con este servizo e queiran mantelo ou reforzalo (contratando persoal a maiores ou incrementando a xornada existente).

O prazo de presentación de solicitudes será dun mes, contado a partir do día seguinte ao da publicación da convocatoria e do extracto no BOP de Pontevedra e na Base de Datos Nacional de Subvencións.
03/04/2024. AXUDAS E PREMIOS

Resolución provisional das axudas da Deputación da Coruña aos SNL municipais

A Deputación da Coruña publica a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2024.
Os solicitantes teñen un un prazo de 10 días hábiles, contados a partir do día seguinte ao da publicación da resolución provisional no Boletín Oficial da Provincia, para comunicar, se é o caso, a desistencia da solicitude, presentar solicitude de reformulación, alegacións ou emenda de erros. Transcorrido o prazo de 10 días sen que por parte dos solicitantes se desista expresamente, a subvención considerarase aceptada tacitamente.

Podes consultar a resolución premendo aquí.
26/03/2024. AXUDAS E PREMIOS

Axudas para a promoción do galego na Administración local

A Consellería de Cultura, Educación, Formación Profesional e Universidades da Xunta de Galicia publica as bases das subvencións ás entidades locais para a promoción do galego durante o ano 2024. As axudas están destinadas á creación, mantemento ou reforzamento de servizos de normalización lingüística; así como ao desenvolvemento de programas de dinamización da lingua galega. Poderán optar a estas axudas os concellos ou os agrupamentos de concellos con poboación igual ou superior aos 3.000 habitantes.

O prazo de presentación de solicitudes é dun mes, contado a partir do día seguinte ao da publicación desta convocatoria.
15/03/2024. AXUDAS E PREMIOS

III Premio de Investigación xurídica en lingua galega Xosé Luis Franco

A Facultade de Ciencias Xurídicas e do Traballo da Universidade de Vigo convoca o III Premio de Investigación xurídica en lingua galega Xosé Luis Franco. O certame comprende dúas modalidades: unha para o estudantado de calquera grao ou mestrado matriculado no sistema universitario de Galicia e do Estado e outra para o estudantado da Facultade de Ciencias Xurídicas e do Traballo, nos graos en Dereito, PCEO Ade-Dereito e Relacións Laborais e Recursos Humanos, e nos mestrados en Avogacía, Menores en situación de desprotección e conflito e Dirección e Xestión Laboral. Ademais, as persoas participantes deben acreditar a matrícula nos cursos 2021/2022, 2022/2023 ou 2023/2024. Outorgarase un premio de 500 euros en cada unha das modalidades e un diploma acreditativo. O prazo de presentación dos traballos remata o 12 de abril de 2024.

Para consultar as bases completas da convocatoria preme aquí.
06/03/2024. AXUDAS E PREMIOS

Agadic convoca axudas para a creación audiovisual en lingua galega

A Axencia Galega das Industrias Culturais (Agadic) convoca subvencións para o ano 2024 destinadas a impulsar a creación de obras audiovisuais en galego a través do apoio á realización e posprodución de curtametraxes e a produción de longametraxes. O prazo para a presentación de solicitudes é dun mes, contado a partir do día seguinte ao da publicación desta convocatoria.

Para consultar o texto completo coas bases, preme aquí.
01/03/2024. AXUDAS E PREMIOS

Axudas da Deputación de Pontevedra para a edición de obras en galego de difusión cultural

A Deputación de Pontevedra publica as bases reguladoras para optar ás axudas para a edición de obras en galego de difusión cultural, dotadas neste 2024 cun orzamento de 90 000 euros. A convocatoria está dirixida a entidades sen ánimo de lucro, que poderán recibir ata 12 000 euros.

Con estas axudas, preténdese fomentar a publicación de obras con interese social e cultural para a provincia de Pontevedra. Deste xeito, os traballos deberán tratar aspectos relacionados coa provincia, co seu patrimonio material, inmaterial ou artístico, ou con persoas e colectivos relevantes desta. Ademais, deberán estar editados en galego e non poderán ser distribuídos como suplemento doutra publicación.

O prazo de presentación de solicitudes remata o 26 de marzo de 2024.
01/03/2024. AXUDAS E PREMIOS

Convocado o VII Premio Luís Porteiro Garea, distinción a persoas ou colectivos promotores do uso do galego na USC

Luís Porteiro Garea, insigne membro das Irmandades da Fala, foi o primeiro profesor da Universidade de Santiago de Compostela en impartir unha clase en galego. Na súa honra, a Universidade recoñece anualmente traxectorias ou iniciativas, tanto de persoas vinculadas hoxe á institución como que pasaron anteriormente por ela, que contribuíron á normalización da lingua galega na propia USC.

A entrega do premio correspondente á sétima edición, de carácter simbólico, realizarase en setembro, no mesmo mes en que Porteiro Garea, en 1915, impartiu a súa lección. O prazo para presentar candidaturas remata o 30 de abril de 2024. Podes consultar as bases e a documentación requirida na páxina web do premio.

21/02/2024. AXUDAS E PREMIOS

XV Premio Rosalía de Castro de Lingua

A Sección de Normalización Lingüística da Deputación da Coruña convoca unha nova edición do Premio Rosalía de Castro de Lingua, que ten como obxectivo recoñecer iniciativas de normalización lingüística ou traxectorias de persoas, colectivos e entidades que destaquen polo seu compromiso coa promoción e dignificación do idioma galego. Establécense tres categorías: unha para recoñecer o labor daquelas persoas que máis destaquen na promoción da lingua galega de calidade e cunha identidade propia e unhas características xenuínas para empregala en todos os estratos sociais; outra para a entidade que máis destaque na promoción do galego; e unha terceira para o proxecto de dinamización lingüística que estea dirixido especificamente aos sectores de menor idade (infancia e mocidade) e que atenda espazos emerxentes do uso da lingua. A dotación económica do premio é de 5.000 euros para cada unha das categorías. O prazo de presentación de candidaturas publicarase no anuncio de publicación da convocatoria elaborado a través do Sistema Nacional de Publicación de Subvencións, e rematará ás 14:00 h do 30 de abril de 2024.

Para consultar o texto coas bases completas deste premio, preme aquí.
19/02/2024. AXUDAS E PREMIOS

Canles gañadoras dos Premios Youtubeiras 2023

O pasado sábado, 17 de febreiro de 2024, tivo lugar no Teatro Principal de Santiago de Compostela a gala dos sétimos Premios Yoububeiras e estas foron as canles gañadoras da edición de 2023: “OU ké! ” (Premio Canle), “Recuncho Gamer” (Premio Youtubeira), “O Faiado Podcast” (Premio Youtubeira Revelación), “Unha fin de semana en Londres” da canle “todomalva Gz” (Premio Vídeo), “olaxonmario (Premio Calidade Lingüística), “Fica coa Bola” (Premio Pioneiro), “Youtube en galego” (Premio Rede), e “Savia Nova” (Premio do Público).

Os Premios Youtubeiras están organizados polos servizos de normalización lingüística de nove concellos galegos, a Deputación da Coruña e as universidades da Coruña, Santiago de Compostela e Vigo, para fomentar a produción de contidos en galego en Internet e darlle visibilidade á comunidade youtubeira.
19/01/2024. AXUDAS E PREMIOS

Axudas ás entidades locais para a compra de novidades editoriais en galego

A Consellería de Cultura, Educación, Formación Profesional e Universidades publica unha convocatoria de subvencións dirixidas ás entidades locais de Galicia para a compra de novidades editoriais en galego en formato físico e para mellorar as coleccións bibliográficas das bibliotecas e/ou axencias de lectura públicas de titularidade municipal, integradas na Rede de Bibliotecas Públicas de Galicia.

O prazo para a presentación de solicitudes é dun mes, contado a partir do día seguinte ao da publicación da convocatoria.
16/01/2024. AXUDAS E PREMIOS

Axudas para a tradución do libro galego

A Consellería de Cultura, Educación, Formación Profesional e Universidades da Xunta de Galicia publica a convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas.
O prazo de presentación de solicitudes é dun mes, contado a partir do día seguinte ao da publicación da convocatoria.

16/01/2024. AXUDAS E PREMIOS

Subvencións para a edición de publicacións periódicas en galego

A Secretaría Xeral de Medios da Xunta de Galicia publica a convocatoria de subvencións para o ano 2024 destinadas a empresas que realicen publicacións periódicas escritas integramente en galego.
O prazo para presentar as solicitudes é dun mes, contado a partir do día seguinte ao da publicación da convocatoria.
15/01/2024. AXUDAS E PREMIOS

Axudas para a distribución de audiovisual en galego na provincia da Coruña

A Deputación da Coruña publica as bases reguladoras do programa de subvencións a empresas audiovisuais para o apoio á distribución, comercialización e exhibición audiovisual en lingua galega na provincia da Coruña durante o ano 2024. Esta convocatoria contempla dúas modalidades, unha de apoio aos contidos audiovisuais galegos (longametraxes, curtametraxes, documentais, etc. feitas en Galicia) para a súa distribución e exhibición en lingua galega (VO, VOSG ou dobraxe); e outra para a distribución en lingua galega (VO, VOSG ou dobraxe) de contidos audiovisuais non galegos (feitos fóra de Galicia).

O prazo de presentación de solicitudes estará aberto desde o 22 de xaneiro ata o 22 de febreiro de 2024, ás 14:00 horas, tal e como se indica no extracto da convocatoria.
15/01/2024. AXUDAS E PREMIOS

Axudas para o fomento do galego no ensino

A Consellería de Cultura, Educación, Formación Profesioonal e Universidades da Xunta de Galicia publica dúas convocatorias de axudas para a presentación de proxectos de fomento do uso do galego no ámbito do ensino non universitario durante o curso 2023/2024, unha dirixida a centros de titularidade pública e outra a centros de titularidade privada.
En ambos os casos, o prazo de presentación de solicitudes é dun mes, que se contará a partir do día seguinte ao da publicación das respectivas convocatorias.
12/01/2024. AXUDAS E PREMIOS

Nova edición do Premio Literario Descubrindo Oleiros

O Concello de Oleiros convoca a décima edición do Premio Literario Descubrindo Oleiros, un concurso que procura dar a coñecer espazos do municipio e contribuír á normalización do uso oral e escrito do galego, capacidade que lle confire, como entidade local, o Estatuto de autonomía de Galicia.

Poderán concorrer ao premio todos os rapaces e rapazas de 3º a 6º de primaria; mozas e mozos de 16 e 17 anos que cursen ESO e persoas maiores de 18 anos empadroadas ou escolarizadas no Concello de Oleiros.

O prazo para presentarse é de un mes a contar desde o día seguinte á publicación das bases no Boletín Oficial da Provincia.
10/01/2024. AXUDAS E PREMIOS

O 13 de xaneiro celébranse os III Premios Galegos da Regueifa

Os Premios Galegos da Regueifa Espalla Rimas 2024, convocados por iniciativa do grupo La Voz de Galicia en colaboración con varias entidades, cítannos o vindeiro 13 de xaneiro, ás 18 h, no Pazo da Cultura de Carballo.

Novamente, mestres e mestras da regueifa xuntaranse coas voces máis novas en desafíos, que son tamén unha festa de celebración da vitalidade da improvisación oral en galego.
27/12/2023. AXUDAS E PREMIOS

I Premio Internacional de Estudos Galegos

A Asociación Internacional de Estudos Galegos (AIEG) convoca, co apoio da Secretaría Xeral de Política Lingüística da Xunta de Galicia e da UMinho Editora, a primeira edición do Premio Internacional de Estudos Galegos, que terá carácter trianual para facelo coincidir co Congreso da AIEG. Poden optar a este premio os/as investigadores/as que desenvolven a súa pescuda no ámbito xeral dos Estudos Galegos en universidades de fóra da Galicia e que presentaron o seu traballo académico nos últimos tres anos anteriores ao 31 de decembro do ano previo á celebración do Congreso da AIEG.

Os traballos deben estar redactados en lingua galega e o/a gañador/a recibirá unha dotación económica de 2.000 euros, así como a posibilidade de publicar a obra en formato de libro electrónico na UMinho Editora.

O prazo de presentación de candidaturas estará aberto entre o 1 de xaneiro e o 1 de marzo de 2024.

Podes consultar as bases completas do premio premendo aquí.

26/12/2023. AXUDAS E PREMIOS

Héctor Carré gaña o V Premio Daniel Domínguez de guión en galego

A Asociación Sindical de Guionistas Galegos (AGAG) fixo público o traballo gañador da quinta edición do Premio Daniel Domínguez de guión en galego, un certame deseñado para potenciar a lingua galega no audiovisual e promover os autores e autoras que escriben no noso idioma. Nesta edición o guión premiado foi “Sinais”, de Héctor Carré, que recibirá 2.000 euros en metálico e unha subscrición gratuíta e ilimitada ao mercado online da plataforma Filmarket Hub.

Así mesmo, os/as autores/as dos traballos finalistas (Uxía Diéguez Santiago por “Furtivo” e Gumersindo Novoa Rodríguez por “As cores da alma”) tamén serán galardoados/as cunha subscrición a Filmarket Hub.

Na páxina web da AGAG tes toda a información sobre esta iniciativa.
20/12/2023. AXUDAS E PREMIOS

II Premio de oratoria en formato podcast “Ramón Otero Pedrayo”

A Asociación Amigos de Otero Pedrayo, en colaboración coa Secretaría Xeral de Política Lingüística, convoca o II Premio de oratoria en formato podcast “Ramón Otero Pedrayo”, dirixido a alumnado de educación secundaria e universitaria de entre 15 e 23 anos. O obxectivo do certame é incentivar as habilidades comunicativas orais e a expresión correcta mediante o cultivo da oratoria. Os temas das pezas, que deberán estar en lingua galega, serán preferentemente os do “universo oteriano”: o medio ambiente, a paisaxe, a sostibilidade, o territorio, o patrimonio, a historia, a xeografía, a etnografía, a comunicación oral e a tradición oral.

O xurado outorgará diferentes premios (produtos Coren e mais un portátil), valorados todos eles en 3.000 euros.

O prazo para enviar as pezas estará aberto entre o 10 de febreiro e o 25 de xullo de 2024.
20/12/2023. AXUDAS E PREMIOS

Axudas concedidas pola Deputación de Pontevedra a entidades culturais para a promoción do galego

A Deputación de Pontevedra publica a listaxe de axudas concedidas durante o segundo semestre de 2023 a entidades culturais sen fin de lucro da provincia de Pontevedra, para desenvolver actividades de promoción do idioma galego durante o ano 2023.

Podes consultar a listaxe de entidades beneficiarias premendo aquí.
19/12/2023. AXUDAS E PREMIOS

Premio para os mellores proxectos de innovación educativa en dinamización lingüística

A Secretaría Xeral de Política Lingüística e a Dirección Xeral de Ordenación e Innovación Educativa da Xunta de Galicia convocan o programa de proxectos de innovación educativa en dinamización lingüística, dirixido a centros docentes de titularidade pública da Consellería de Cultura, Educación, Formación Profesional e Universidades durante o curso 2023/2024. Entre os proxectos presentados seleccionaranse cinco, considerados como excelentes, que recibirán cada unha deles unha dotación económica de 2.000 euros. O prazo de presentación de solicitudes remata o 12 de marzo de 2024.

Podes consultar as bases completas da convocatoria premendo aquí.

18/12/2023. AXUDAS E PREMIOS

Outórganse os premios Novos Poliedros á innovación científica en galego entre a mocidade

Igaciencia e a Secretaría Xeral de Política Lingüística da Xunta de Galicia entregaron os premios correspondentes á III edición de Novos Poliedros.

Nesta ocasión, obtiveron o recoñecemento á innovación científica en galego os seguintes sete institutos: o IES Monelos, o IES Menéndez Pidal-Zalaeta e o IES Rafael Puga Ramón, da Coruña; o IES As Lagoas, de Ourense; o IES Santiago Basanta Silva, de Lugo, e o IES de Meaño e mais o IES do Barral, de Pontevedra.

Este concurso homenaxea a Evarist Galois, creador do concepto de grupo e da simetría científica, buscando incentivar entre a rapazada o interese pola ciencia, en particular pola xeometría e pola simetría, amosándolle a súa importancia no estudo do universo, da estrutura química ou dos seres vivos.

04/12/2023. AXUDAS E PREMIOS

O Festival Carballo Interplay premia a creación e produción de contidos dixitais en galego

Entre os días 4 e 7 de abril de 2024 terá lugar o XI Carballo Interplay, o festival de contidos dixitais que organiza anualmente o Concello de Carballo. No marco deste festival, convócanse dous premios que teñen como obxectivo principal o fomento da creación e a difusión de contidos audiovisuais orixinais en lingua galega en Internet.

No BOP da Coruña do 30 de novembro de 2023 podes consultar as bases completas:

-Bases dos premios a mellor contido dixital en galego do Festival Carballo Interplay 2024. Prazo de inscrición ata o 22 de febreiro de 2024.
-Bases do premio a produción de contido dixital en galego Festival Carballo Interplay 2024. Prazo de inscrición ata o 8 de marzo de 2024.

Na páxina web do Carballo Interplay tes toda a información sobre este festival.
29/11/2023. AXUDAS E PREMIOS

XXIV Premios Manuel Beiras

O Concello de Santiago e a Cámara de Comercio de Santiago de Compostela convocan a vixésimo cuarta edición dos Premios Manuel Beiras, que este ano levan por lema “En galego, naturalmente”. Estes galardóns teñen como finalidade recoñecer o compromiso coa normalización lingüística no sector empresarial compostelán, premiando o uso do galego na comunicación comercial nas seguintes categorías: "empresa cun uso continuado da lingua galega", "empresa de nova incorporación ao uso da lingua galega" e "empresa innovadora no uso do galego". Poden concorrer a este premio as empresas radicadas do concello de Santiago de Compostela, entendendo aquelas que teñen a súa sede social no municipio ou que realizan unha importante actividade nel. As empresas poderán presentar directamente a súa candidatura ou seren propostas por calquera outra persoa ou entidade. O prazo para presentar as candidaturas remata o 11 de decembro de 2023. O acto oficial de entrega de premios terá lugar o 18 de decembro de 2022 no Teatro Principal, ás 20 h.

No sitio web da iniciativa atoparás as bases completas da convocatoria, así como información sobre edicións anteriores.
27/11/2023. AXUDAS E PREMIOS

Convocadas as axudas a teses de doutoramento en galego na USC

Co obxectivo de que a lingua galega sexa de uso normal na redacción e defensa das teses de doutoramento, a Universidade de Santiago de Compostela convoca axudas para a súa realización, co apoio do Servizo de Normalización Lingüística.

O importe das axudas será de 3000 € para o curso académico 2023/2024, que se repartirán cun importe máximo de 400 € por solicitude aceptada. O prazo de presentación remata o 30 de setembro de 2024 e require que se efectúe con posterioridade á lectura e defensa da tese. Consulta a convocatoria para acceder á información completa.
20/11/2023. AXUDAS E PREMIOS

"Habelas hainas" 2023. Xornada divulgativa de investigación matemática

A Comisión de Normalización Lingüística da Facultade de Matemáticas e o Seminario de Iniciación á Investigación da USC cítannos, un ano máis, na xornada "Habelas hainas". No programa, investigadores e investigadoras da facultade achéganse a temas de interese para o alumnado de grao e mestrado, dun xeito ameno e divulgativo.

"Habelas hainas" 2023 terá lugar o vindeiro 23 de novembro, ás 16:00 h, na Aula Magna da Facultade de Matemáticas da USC, e rematará cun magosto ás 20 h. Podes inscribirte a través desta ligazón.
15/11/2023. AXUDAS E PREMIOS

Entregado o I Premio de Podcast Ramón Otero Pedrayo

O I Premio de oratoria en formato podcast Ramón Otero Pedrayo, convocado pola Asociación de Amigos Otero Pedrayo, xa ten gañadores. Trátase de Raquel González Calvo, primeiro premio polo podcast ‘O mundo en feminino de Otero Pedrayo’; Miguel Blanco, segundo por ‘As sete vacas da Tebra’ e Naihara Darriba, terceiro por ‘Aturuxo’.

O obxectivo deste certame, dirixido a alumnado galego de entre 15 e 25 anos, é incentivar o cultivo da expresión oral e da oratoria entre a mocidade ao tempo que se homenaxea a Otero Pedrayo, mestre nesta disciplina.

Fóra de concurso, o xurado fixo unha valoración moi positiva de ‘Aprendendo sobre Otero Pedrayo’, podcast colectivo elaborado polo alumnado do IES Milladoiro.