Novas da lingua. CURSOS E CONGRESOS

Rexistros721 a 744 de 744
13/02/2006. CURSOS E CONGRESOS

Cursos de formación en lingua galega para o persoal das administracións públicas, os adultos e os colectivos de Galicia

A Consellería de Presidencia, Administracións Públicas e Xustiza publica, no DOG do 13 de febreiro de 2006, as seguintes convocatorias de formación lingüística:

-cursos de linguaxe administrativa galega, nivel medio, para o persoal das administracións públicas de Galicia.

-cursos de galego oral, de iniciación e de perfeccionamento da lingua galega para adultos e colectivos galegos.

Nos textos das convocatorias atopará toda a información sobre as datas de realización, os contidos e os prazos de presentación de solicitudes.
03/02/2006. CURSOS E CONGRESOS

Cursos de lingua e cultura galegas para residentes no exterior

A Consellería de Presidencia, Administracións Públicas e Xustiza publica, no DOG do 3 de febreiro de 2006, unha convocatoria de cursos de iniciación e perfeccionamento da lingua galega, de extensión cultural galega e de animación ao coñecemento do galego para galegos residentes no exterior.

A inscrición xestionarase desde os centros galegos ou asociacións de galegos residentes no exterior que soliciten estes cursos. Se desexa máis información, prema aquí.

26/01/2006. CURSOS E CONGRESOS

O Institut Linguapax promove un debate sobre a revitalización lingüística nos diferentes continentes

Co ánimo de conmemorar o Día Internacional da Lingua Materna, declarado pola Unesco no ano 2001, o vindeiro 21 de febreiro celebrarase en Barcelona unha mesa redonda sobre a revitalización lingüística nos diferentes continentes.
A iniciativa, organizada polo Institut Linguapax, quere dar a coñecer estudos sobre boas prácticas levadas a cabo en diferentes puntos do planeta.

Ao final da xornada darase a coñecer o galardoado do Premio Linguapax, co que se homenaxea anualmente a lingüistas, investigadores ou membros da sociedade civil que teñan desenvolvido un grande labor a prol da diversidade lingüística.

Prema aquí para consultar o programa provisional.
18/01/2006. CURSOS E CONGRESOS

Obradoiro Atender a clientela = atender á clientela?

O Departamento de Lingua Galega do Concello de Pontevedra organiza un obradoiro de formación lingüística destinado aos traballadores do comercio con atención ao público. Os obxectivos principais desta iniciativa son mellorar a atención ao público e estender o uso do galego nos establecementos comerciais da cidade.

A data límite de inscrición é o vindeiro venres 20 de xaneiro. Se desexa máis información sobre os contidos do obradoiro ou os trámites de inscrición, prema aquí.
11/01/2006. CURSOS E CONGRESOS

Normalizando a fé

A Comisión de Normalización Lingüística da Federación Española de Relixiosos do Ensino (FERE-CECA Galicia) organiza as I Xornadas de Normalización Lingüística.
As xornadas, que inaugurará a secretaria xeral de Política Lingüística, terán lugar o venres 13 de xaneiro de 2006 no Gran Hotel Santiago. O eixo central das xornadas será a revisión do Plan Xeral de Normalización Lingüística da Federación de Centros Educación e Xestión, así como a presentación de diverso material didáctico que contribuirá á galeguización da materia de Relixión. Para obter máis información, pode premer no díptico e no programa.
13/12/2005. CURSOS E CONGRESOS

Os novos retos socio-económicos e situacionais da lingua galega a debate en Vigo

O Servizo de Normalización Lingüística do Concello de Vigo organiza a xornada A lingua galega ante os novos retos socio-económicos e situacionais, que se centrará en analizar a situación do galego en dous sectores claves: o socio-económico e o da comunicación.

As sesións terán lugar o vindeiro xoves 22 de decembro no Auditorio do Vérbum (Avda. de Samil, Vigo).

A entrada é libre aínda que o aforo é limitado, polo que pode reservar a súa praza chamando ao seguinte número de teléfono: 986 810281 (SNL do Concello de Vigo).
05/12/2005. CURSOS E CONGRESOS

A obra filolóxico-lingüística de Ángel Amor Ruibal a debate no CCG

A sección de Filosofía e Pensamento do Consello da Cultura Galega organiza un simposio internacional sobre a obra filolóxico-lingüística do coñecido filólogo, filósofo e teólogo Ángel Amor Ruibal.

As sesións terán lugar os vindeiros días 15, 16 e 17 de decembro na sede do CCG. Se desexa máis información sobre o programa ou os trámites de inscrición, prema aquí.
23/11/2005. CURSOS E CONGRESOS

VI Xornadas de Expresión Oral Tíralle da Lingua

A Asociación Socio-Pedagóxica Galega organiza a sexta edición destas xornadas, dirixidas ao profesorado, que teñen como obxectivo proporcionar técnicas para traballar a oralidade na aula.

As sesións desenvolveranse ao longo do vindeiro día 26 de novembro, no Museo do Pobo Galego (Santiago) e a matrícula é gratuíta, aínda que cómpre realizar a reserva de praza.

Coa mesma finalidade de fomentar o uso oral do galego entre a comunidade educativa, esta asociación convoca tamén o VI Concurso de Relato Oral Tíralle da Lingua, que se celebrará o vindeiro mes de abril en Santiago de Compostela.
Pode obter máis información sobre estas actividades no web da AS-PG.
27/10/2005. CURSOS E CONGRESOS

Diálogos sobre linguas e sociedades 2005

Baixo o lema Diversidade lingüística e intervención: as políticas da diversidade e a diversidade de políticas, xorde da man da Fundación Carlos Casares esta iniciativa que quere converterse en foro estable de reflexión e debate sobre as cuestións derivadas da complexa relación entre as linguas e os grupos humanos nas sociedades actuais.

As sesións desenvolveranse na Universidade de Vigo (Edificio Miralles, sala 1) durante os días 16 e 17 de decembro de 2005.

Se desexa consultar o programa, prema aquí.
26/10/2005. CURSOS E CONGRESOS

II Xornadas sobre Lingua e Usos

O Servizo de Normalización Lingüística da Universidade da Coruña, en colaboración coa Real Academia Galega, organizan a segunda edición destas xornadas que xirarán nesta ocasión arredor do uso da lingua galega no ámbito da investigación.
As sesións desenvolveranse desde o 30 de novembro ata o 2 de decembro na Sala de Xuntas do Consello de Goberno da UDC.

O prazo de inscrición remata o 28 de novembro. Se desexa consultar o programa ou obter máis información sobre os trámites de inscrición, prema aquí.
25/10/2005. CURSOS E CONGRESOS

I Seminario de Dinamización Lingüística para as Escolas Infantís: recursos e metodoloxía

O Servizo de Normalización Lingüística do Concello de Ames está a desenvolver o I Seminario de Dinamización Lingüística para as Escolas Infantís, que ten como principal obxectivo divulgar entre os formadores que traballan neste nivel educativo os recursos pedagóxicos existentes en galego para nenos/as de 0 a 3 anos.

O seminario impartiuse o pasado sábado, día 22 de outubro, na Casa da Cultura de Bertamiráns e volverá a realizarse novamente o vindeiro sábado, 5 de novembro, na Casa da Cultura do Milladoiro.
25/10/2005. CURSOS E CONGRESOS

Iª Escola Permanente Fermín Penzol

A Vicerreitoría de Relacións Institucionais da Universidade de Vigo e a Concellaría de Cultura do Concello de Ribadeo organizan unhas xornadas sobre a política lingüística e a normalización do galego estremeiro.

O curso, de entrada libre, desenvolverase os vindeiros días 28 e 29 de outubro no Concello de Ribadeo e os matriculados que asistan a todas as sesións recibirán un certificado de asistencia expedido pola Universidade de Vigo. Para realizar a matrícula deberá enviar un boletín de inscrición (onde conste o seu nome e datos de contacto) aos seguintes enderezos electrónicos: xcostas@uvigo.es ou alorenzo@uvigo.es

Se desexa máis información pode poñerse en contacto co Departamento de Filoloxía Galega e Latina da Universidade de Vigo.
25/10/2005. CURSOS E CONGRESOS

Simposio “Na nosa lyngoage galega”

O simposio, organizado polo Instituto da Lingua Galega e o Consello da Cultura Galega, xirará arredor da emerxencia do galego como lingua escrita na Idade Media e desenvolverase entre os días 2 de novembro e 2 de decembro no Salón de graos da Facultade de Filoloxía da USC.

Todas as persoas interesadas teñen de prazo para inscribirse ata o vindeiro 31 de outubro. Se desexa máis información sobre o programa e os trámites de inscrición, prema aquí.
17/10/2005. CURSOS E CONGRESOS

Curso de dinámicas e técnicas grupais aplicadas á normalización lingüística

A Coordinadora de Traballadores/as de Normalización da Lingua (CTNL) organiza unha nova edición deste curso de formación que ten como principal obxectivo dar a coñecer ferramentas e dinámicas de traballo para desenvolver o labor de normalización lingüística no ámbito dos grupos.
(Máis información)
05/10/2005. CURSOS E CONGRESOS

I Encontro de Sociolingüística Galega

A Fundación Carlos Casares, en colaboración co Consello da Cultura Galega (CCG), organizan o I Encontro de Sociolingüística Galega, que terá lugar o vindeiro 25 de novembro no salón de actos do CCG.

A finalidade do encontro é establecer un foro de debate e intercambio de opinión entre os diferentes investigadores, docentes e especialistas que están a traballar no ámbito da linguaxe e as linguas en contexto.

Neste acto intervirán, entre outros, Mauro Fernández, Henrique Monteagudo, Gabriel Rei-Doval, Modesto Rodríguez Neira e Fernando Ramallo.
27/09/2005. CURSOS E CONGRESOS

Cursos de lingua e cultura galegas na Universitat de Barcelona

A Sección de Filoloxía Galega e Portuguesa da Universitat de Barcelona fai pública a convocatoria de cursos de lingua e cultura galegas para o ano académico 2005-2006. A oferta formativa está destinada a maiores de 17 anos, sexan ou non alumnos/as desta universidade, e contempla diferentes niveis e tipos de cursos (galego oral, iniciación á lingua galega, perfeccionamento da lingua galega e extensión cultural).

O prazo de inscrición é do 26 de setembro ao 11 de outubro de 2005.

Se desexa máis información, prema aquí.
05/10/2005. CURSOS E CONGRESOS

Encontro de asesores lingüísticos na Universidade Complutense

A Universidade Complutense de Madrid (UCM), o grupo de investigación LEETHI e a asociación profesional Unión de Correctores (UniCo) organizan o I Encontro “Asesores lingüísticos na sociedade de hoxe”, onde se debaterá, entre outras cousas, sobre a situación do asesor lingüístico ou sobre as propostas para a viabilidade profesional do corrector. Como representante galego intervirá Antón Lado, fundador de Reverso Servizos Lingüísticos.

As sesións, de acceso libre, terán lugar os vindeiros días 14 e 15 de outubro, no Paraninfo da Facultade de Filoloxía da UCM.
20/09/2005. CURSOS E CONGRESOS

Oferta formativa de lingua galega para a Universidade de Vigo

A Área de Normalización Lingüística da Universidade de Vigo presenta a oferta formativa de lingua galega para o primeiro cuadrimestre do curso 2005-2006, que inclúe diferentes cursos (tanto na modalidade virtual como presencial) destinados a mellorar a competencia lingüística da comunidade universitaria.

O prazo para realizar a preinscrición remata o vindeiro 3 de outubro. Se desexa máis información, prema aquí.

08/09/2005. CURSOS E CONGRESOS

Curso de perfeccionamento en lingua oral para os medios de comunicación

O Departamento de Filoloxía Galega e o Instituto de Lingua Galega da USC organizan este curso de lingua oral que ten como obxectivos ampliar a capacidade do alumnado para empregar os recursos fonéticos, prosódicos e pragmáticos máis axeitados para as diferentes funcións e formatos da comunicación audiovisual.
(Máis información)
29/07/2005. CURSOS E CONGRESOS

IX Encontros para a Normalización Lingüística

Xa está accesible no noso web toda a información referente á novena edición dos Encontros para a Normalización Lingüística, que se celebrarán os días 20 e 21 de outubro de 2005. Consulte o programa provisional e, se o desexa, acceda ao formulario de inscrición en liña.

En breve poderá acceder tamén desde o programa aos resumos das diferentes intervencións, que iremos subindo á rede tan pronto como os relatores nolos vaian facilitando.
20/07/2005. CURSOS E CONGRESOS

Cursos de linguaxe administrativa galega para o persoal da Administración local

A Consellería de Xustiza, Interior e Administración local convoca cursos de linguaxe administrativa galega (niveis básico, medio e superior) para o persoal da Administración local.

O prazo de presentación de solicitudes é de corenta días naturais, contados a partir do seguinte ao da publicación desta convocatoria.
24/06/2005. CURSOS E CONGRESOS

Formación lingüística para o profesorado

O Centro de Formación e Recursos de Santiago está a organizar o curso A nova normativa da lingua galega, que ten como obxectivo difundir os cambios ortográficos e morfolóxicos da última reforma de 2003 entre a comunidade docente.

Esta actividade terá unha duración de 18 horas e desenvolverase ao longo do vindeiro curso 2005-2006. A data límite de inscrición é o 15 de setembro.
13/06/2005. CURSOS E CONGRESOS

Curso de deseño e aplicación de ferramentas de análise sociolingüística

A Coordinadora de Traballadores/as de Normalización da Lingua organiza este curso de formación destinado especialmente a técnicos/as de normalización lingüística e en xeral a todas as persoas interesadas no estudo da sociolingüística galega.

O curso, de 16 horas de duración, desenvolverase os vindeiros días 8 e 15 de xullo na Facultade de Filoloxía da USC. O prazo de preinscrición é do 13 ao 22 de xuño e só unha vez recibida a confirmación de admisión se deberán efectuar os trámites de matrícula.

Se desexa coñecer o programa do curso ou acceder ao formulario de preinscrición en liña, prema aquí.
07/06/2005. CURSOS E CONGRESOS

Curso de verán “Lingua e dereito: logros, fracasos e retos”

A Facultade de Dereito de Ourense organiza un curso de verán que ten como obxectivos estudar e fomentar os usos lingüísticos no ámbito da xurisprudencia.

O curso, de 20 horas de duración, desenvolverase durante os días 13 e 14 de xullo de 2005 en Castro Caldelas - Salón Nobre do Castelo. Todos as persoas interesadas teñen de prazo para formalizar a súa inscrición ata o vindeiro 30 de xuño de 2005.

Se desexa máis información sobre o programa ou os trámites de inscrición, prema aquí.
24/05/2005. CURSOS E CONGRESOS

I Curso de Verán sobre Dinamización Lingüística

O Servizo de Normalización Lingüística da Universidade da Coruña, a Deputación da Coruña e a Cooperativa Tagen Ata organizan un curso de verán no que se traballarán os aspectos teóricos e metodolóxicos máis salientables da dinamización lingüística.
O curso desenvolverase na Facultade de Filoloxía da Universidade da Coruña entre os días 19 e 22 de xullo de 2005.

Se desexa máis información sobre o programa ou os trámites de inscrición, prema aquí.

26/04/2005. CURSOS E CONGRESOS

Culturas en diálogo entre a mocidade europea

A asociación Culturas en Diálogo convida a todos os mozos e mozas europeos de idades comprendidas entre os 18 e os 25 anos a participar nos encontros Culturas en Diálogo 2005, que terán lugar entre o 17 e 30 de xullo a ambos os lados da fronteira de Dinamarca e Alemaña.

A iniciativa, que nace da cooperación entre as minorías xermana, danesa e frisoa, pretende fomentar entre a mocidade o estudo e a reflexión sobre a realidade plural de Europa e as súas minorías nacionais, lingüísticas e culturais. A data límite para formalizar a matrícula é o 17 de maio.
23/03/2005. CURSOS E CONGRESOS

Xornada técnica sobre a toponimia en Galicia

O Proxecto Toponimia de Galicia organiza, o vindeiro 20 de abril, unha xornada técnica que ten como finalidade deseñar estratexias para desenvolver con éxito o traballo de recuperación, catalogación e depuración da toponimia galega. Todas as persoas interesadas en asistir teñen como data límite para formalizar a súa inscrición ata o 15 de abril.

Se desexa máis información sobre o programa da xornada ou sobre os trámites de matrícula, prema aquí.

15/03/2005. CURSOS E CONGRESOS

As reivindicacións nacionais e lingüísticas durante o S. XIX, a debate na Universidade Paul-Valéry

A Universidade Paul-Valéry organiza o coloquio internacional O espertar das nacionalidades e as reivindicacións lingüísticas en Europa (1830-1930). O evento conta coa colaboración, entre outras entidades, do Departamento de Filoloxía Galega da Universidade de Santiago de Compostela e as sesións terán lugar os vindeiros días 2 e 3 de xuño en Montpellier (Francia).

Se desexa coñecer o programa provisional ou acceder ao boletín de inscrición, prema aquí.
11/03/2005. CURSOS E CONGRESOS

XV Xornadas de Lingua e Literatura

A Asociación Socio-Pedagóxica Galega (AS-PG) organiza unha nova edición das Xornadas de Lingua e Literatura, que se celebrarán os vindeiros días 8 e 9 de abril.
Entre os contidos de sociolingüística, destaca o seminario de normalización e dinamización nas aulas (Colectivo Tagen Ata), as diferentes presentacións de experiencias educativas de inmersión lingüística e a conferencia “Sociolingüística ou ‛suciolingüística’?” (P. García Negro).

Se desexa coñecer o programa completo das xornadas ou acceder ao formulario de matrícula en liña, prema aquí.
25/02/2005. CURSOS E CONGRESOS

Obradoiro de integración lingüística e cultural para inmigrantes e emigrantes retornados/as

O Servizo de Normalización Lingüística do Concello de Carballo organiza este obradoiro de integración lingüística e cultural que ten como obxectivo facilitarlles a integración no contexto sociolingüístico galego aos inmigrantes e emigrantes retornados.

As sesións desenvolveranse entre o 14 de marzo e o 7 de abril, en horario de 19.00 a 21.00 h., e todas as persoas interesadas teñen de prazo para formalizar a súa inscrición ata o vindeiro 9 de marzo. Se desexa máis información sobre os contidos deste obradoiro ou sobre os trámites de inscrición, prema aquí.