Noticias

Arquivo Sonoro de Galicia (CCG). Rexistros1 a 30 de 98
05/06/2024

Unha xornada homenaxea o legado de Dorothé Schubarth, figura fundamental para a música tradicional galega

Con música, baile e palabra o Consello da Cultura Galega (CCG), o Museo do Pobo Galego e o Instituto da Lingua Galega da USC (ILG-USC) celebrarán o vindeiro 12 de xuño un acto de homenaxe para lembrar a figura de Dorothé Schubarth (Basilea, Suíza, 1944-2023). A presidenta do CCG, Rosario Álvarez; a presidenta do Padroado do Museo do Pobo Galego, Concha Losada, e a directora do ILG-USC, Elisa Fernández Rei, destacaron na súa presentación do programa o papel central que esta musicóloga e compositora suíza representou para o folclore galego. “É unha homenaxe que o pobo galego lle brinda a Dorothé polo seu traballo titánico e xeneroso”, apuntou Rosario Álvarez. Concha Losada destacou a importancia deste legado, que inspirou e contribuíu á música actual e que “todas as que colaboran neste inmenso agradecemento de todo o país o fan voluntariamente”. Pola súa parte, Elisa Fernández Rei engadiu que “o programa é unha festa na que lembraremos a muller, pero tamén escoitaremos a súa música”. Ademais, hoxe incorporouse a súa entrada biográfica ao Álbum de Galicia, a colección de biografías do CCG, escrita polo musicólogo Sergio de la Ossa.
31/05/2024

O Arquivo Sonoro de Galicia participa na xornada “Transformando a música en patrimonio”

O patrimonio sonoro centra este venres, 31 de maio, a xornada titulada “Transformando a música en patrimonio” da Biblioteca de Galicia, institución cabeceira do sistema de bibliotecas da nosa comunidade. Na cita, dirixida a profesionais e persoas interesadas en saber como funcionan as institucións da memoria, analizarase a situación actual deste tipo de patrimonio. O Arquivo Sonoro de Galicia participa cun relatorio titulado “Arquivo Sonoro de Galicia: fonte para o estudo da nosa identidade”.
20/05/2024

Caligrafías musicais incorpora unha detallada intervención de Rogelio Groba sobre Béla Bartók

A complexa e fecunda personalidade de Béla Bartók (1881-1945) centra a conferencia que Rogelio Groba pronunciou a principios dos anos oitenta na Coruña, con ocasión do centenario do nacemento do compositor húngaro. Esta intervención, que forma parte do Fondo Ramiro Cartelle, é a nova entrega do proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimestralmente conferencias destacadas de prestixiosos estudosos do eido musical galego. A conferencia estivo acompañada de intervencións musicais e nela Groba destaca os trazos máis destacados da personalidade, biografía e carreira musical de Bartók.
16/05/2024

Música e palabra conflúen no Concerto das Letras Galegas que homenaxeou a Luísa Villalta

A celebración do Día das Letras Galegas arrincou coa décimo cuarta edición do Concerto das Letras Galegas, proposta musical e sonora do Consello da Cultura Galega (CCG) que este ano contou co apoio do Concello da Coruña. Un concerto que conciliou a faceta musical e literaria de Luísa Villalta e no que se estreou a ópera de cámara Concerto para un home só a partir da obra teatral homónima da homenaxeada e composta por Federico Mosquera. A presidenta do CCG, Rosario Álvarez; o presidente da Real Academia Galega, Víctor Freixanes; o secretario xeral da Lingua, Valentín García; a familia Villalta Gómez e unha ampla representación da sociedade e da cultura galegas encheron o Teatro Colón. O concerto poderá verse este venres na segunda canle da TVG (23:13 horas), no marco da programación especial para o Día das Letras.
15/05/2024

O Concerto das Letras Galegas estrea mañá a ópera Concerto para un home só sobre texto Luísa Villalta

Literatura e música son dúas facetas vencelladas á escritora e violinista Luísa Villalta (A Coruña, 1957-2004), homenaxeada este ano no Día das Letras Galegas. As dúas conflúen no programa da décimo cuarta edición do Concerto das Letras Galegas, iniciativa organizada polo Consello da Cultura Galega (CCG) que este ano conta co apoio do Concello da Coruña. O Teatro Colón acolle mañá (xoves 16, 20:30 horas) esta cita, que corre a cargo do Grupo Instrumental Siglo XX, dirixido por Florian Vlashi. No programa, alén dos compositores preferidos da homenaxeada, estrearase a peza Concerto para un home só, baseada na obra homónima de Luísa Villalta, que o CCG lle encargou a Federico Mosquera (A Coruña, 1986) para a ocasión. O concerto, de entrada libre ata completar a capacidade, tamén se poderá seguir en directo no web do CCG e nas plataformas da CRTVG.
15/05/2024

Alejo Amoedo é nomeado membro do Instituto de Estudios Vigueses

O pianista e doutor Alejo Amoedo acaba de ser nomeado membro de número do Instituto de Estudios Vigueses (IEV), institución dedicada á recuperación, divulgación e estudo de diversos temas relacionados coa cidade olívica e a súa contorna. O ingreso tivo lugar no serán deste 14 de maio nun acto desenvolto no Museo MARCO de Vigo. Amoedo é membro do Plenario do Consello da Cultura Galega (CCG), vogal da súa Comisión Executiva e director do Arquivo Sonoro de Galicia (ASG).
14/05/2024

A publicación das Letras homenaxea a diversidade creativa de Luísa Villalta

Luísa Villalta: entender para vivir é a obra coa que o Consello da Cultura Galega (CCG) contribúe á celebración da figura homenaxeada nesta edición do Día das Letras Galegas. A presidenta do CCG, Rosario Álvarez, presentou esta publicación, que “naceu como un espazo para o diálogo entre a obra de Luísa e un monllo selecto de persoas que, sendo referentes no sistema cultural galego, mantiveron en vida vínculos coa autora e a súa obra”. Pola súa parte, Dolores Vilavedra, coordinadora do volume, destacou que son unha colección de textos que “amosan ben a natureza intrinsecamente dinámica e expansiva dun corpus precursor e versátil como poucos na nosa historia”. A publicación foi presentada nun acto ao que asistiu a familia de Luísa Villalta, representada na mesa pola súa irmá Susana, quen agradeceu a homenaxe, e Margarita Ledo, secretaria da Real Academia Galega (RAG), quen destacou que “este volume coincide coa achega diversa e comprometida da autora”. A obra xa está dispoñible para descarga no web do CCG.
25/04/2024

O Concerto das Letras Galegas evoca a faceta musical de Luísa Villalta

Luísa Villalta (A Coruña, 1957-2004) foi, ademais dunha grande escritora, unha recoñecida violinista. Por iso, no programa desta edición do Concerto das Letras Galegas teñen unha presenza moi destacada os violíns e os compositores favoritos da homenaxeada este 17 de maio. A presidenta do Consello da Cultura Galega (CCG), Rosario Álvarez; o concelleiro de Fomento e Promoción da Cidade, Gonzalo Castro Pardo; a irmá de Luísa, Susana Villalta, e o director do Grupo Instrumental Siglo XX, Florian Vlashi, presentaron esta mañá o programa da décimo cuarta edición que busca, en palabras da presidenta, “unir literatura e música, dous fíos que están na propia biografía e actividade cultural de Luísa”. O concerto celebrarase na Coruña, cidade natal da homenaxeada (Teatro Colón, 20:30 horas), o 16 de maio, véspera do Día das Letras Galegas. A entrada é libre ata completar a capacidade.
12/04/2024

Especialistas destacan o labor do Arquivo Sonoro de Galicia na conservación do patrimonio musical e oral do país

“Desenvolver iniciativas como as do Consello da Cultura Galega e o seu arquivo sonoro son moi importantes para que a sociedade tome conciencia da importancia deste tipo de patrimonio e da súa necesidade de preservación”. Así o subliñou María Jesús López no marco da xornada O Arquivo Sonoro de Galicia: fondos inesgotables para aprehender a nosa cultura, que se desenvolveu esta tarde na sede institucional do Consello da Cultura Galega (CCG) e na que participaron tamén Xaime Estévez Vila e Beatriz Cancela. O director do Arquivo Sonoro de Galicia (ASG), Alejo Amoedo, inaugurou xunto cos coordinadora-técnica do arquivo, Cristina Pujales, destacou na inauguración o valor que ten o documento sonoro como “fonte de información primaria”, en tanto permite acadar “unha comprensión mais completa do noso pasado e presente”.
10/04/2024

Unha xornada aborda os fondos do Arquivo Sonoro de Galicia

O Arquivo Sonoro de Galicia (ASG), centro dependente do Consello da Cultura Galega (CCG), organiza este xoves, 11 de abril (16:30 horas) a xornada O Arquivo Sonoro de Galicia: fondos inesgotables para aprehender a nosa cultura. Nela daranse a coñecer unha parte dos documentos sonoros que se atopan depositados no ASG, ao tempo que se analizará a importancia que estes teñen para enriquecer o coñecemento sobre a cultura e identidade galegas. Alejo Amoedo e Cristina Pujales, director e coordinadora-técnica do ASG, inaugurarán esta cita presencial, que se poderá seguir en directo desde o web e as redes sociais da institución.
06/04/2024

Unha xornada divulga os fondos do Arquivo Sonoro de Galicia

O Arquivo Sonoro de Galicia (ASG), centro dependente do Consello da Cultura Galega (CCG), organiza o próximo 11 de abril (16:30 horas) a xornada O Arquivo Sonoro de Galicia: fondos inesgotables para aprehender a nosa cultura. Nela daranse a coñecer unha parte dos documentos sonoros que se atopan depositados no ASG, ao tempo que se analizará a importancia que estes teñen para enriquecer o coñecemento sobre a cultura e identidade galegas. A cita, que terá lugar de xeito presencial na sede do CCG, ten aberto o seu prazo de inscrición.
18/03/2024

O CCG publica unha conferencia de Pedro Echevarría sobre o Negra sombra de Juan Montes

O Consello da Cultura Galega publicou hoxe no seu web unha nova entrega das Caligrafías Musicais, a serie de conferencias de expertos sobre o patrimonio musical galego que recupera fondos pouco coñecidos do Arquivo Sonoro de Galicia. Desta volta, incorpórase unha intervención do folclorista Pedro Echevarría Bravo, realizada en Ferrol en 1984, onde dá conta dos paralelismos entre Negra sombra, a composición musical de Juan Montes inspirada no poema de Rosalía de Castro, e a danza prima asturiana. A conferencia xa está accesible no web do Consello da Cultura Galega.
28/02/2024

O Álbum de Galicia suma a biografía do poeta e musicólogo Emilio Pita

A poesía e a música foron as dúas grandes paixóns de Emilio Pita (A Coruña, 1907 – Bos Aires, 1981). Autor de numerosos poemas, a súa obra Jacobusland (1942) marcou un fito inaugural na literatura galega de posguerra. Tamén escribiu artigos para diferentes cabeceiras editadas tanto en Galicia como en Bos Aires, nos que manifestou o seu compromiso coa política galeguista e coa defensa e uso do idioma propio. No eido musical, transcribiu e arranxou diferentes composicións patrimoniais galegas e interpretou ao piano a “Muiñeira de Chantada”, sintonía do programa radiofónico Sempre en Galiza. Asina a súa entrada no Álbum de Galicia, a colección dixital de biografías que mantén o Consello da Cultura Galega (CCG), Xavier Groba González.
15/01/2024

A nova entrega de Caligrafías musicais recupera unha conferencia de Fernando López-Acuña sobre a zanfona

A sexta entrega de Caligrafías musicais, proxecto do Arquivo Sonoro de Galicia (ASG) do Consello da Cultura Galega (CCG) que recupera bimestralmente conferencias destacadas de prestixiosos estudosos do eido musical galego, difunde neste mes de xaneiro un relatorio de Fernando López-Acuña sobre a zanfona. Na intervención, de case unha hora de duración, o musicólogo detense nas súas orixes e evolución histórica, ao tempo que explica as principais características que a diferencian doutro instrumento da mesma familia: o organistro.
27/12/2023

O Álbum de Galicia incorpora a entrada do crego e músico Ángel Rodulfo

Ángel Rodulfo (Baiona, 1880 – Vigo, 1956) compaxinou o seu ministerio sacerdotal cunha ampla actividade no eido da música. Foi compositor, instrumentista, docente e pedagogo musical e, aínda que “adquiriu xusta fama no seu tempo”, na actualidade “forma parte daqueles músicos galegos ‘esquecidos’ que, no entanto, merecen un estudo rigoroso”. Así o subliña Javier Jurado na entrada que asina para o Álbum de Galicia, a colección dixital de biografías que mantén o Consello da Cultura Galega (CCG).
14/12/2023

Nas ás do canto reivindica a unión de música e literatura no Rexurdimento polo centenario de Murguía

Nas ás do canto é o título do proxecto co que o Consello da Cultura Galega (CCG) contribúe a festexar o centenario de Manuel Murguía (Arteixo, 1833- A Coruña, 1923), figura sobranceira do Rexurdimento. Unha iniciativa que ofrece documentos e recursos musicais para amosar a importancia da unión entre música e literatura neste período destacado para a cultura galega. A presidenta da institución, Rosario Álvarez, xunto con ensaísta Xurxo Martínez e a musicóloga Margarita Viso presentaron na tarde deste xoves un especial web que deita na rede, entre outros contidos, un repertorio de voz e piano en galego. Rosario Álvarez sinalou que este material permite “afondar no contexto decimonónico en que nace a canción lírica galega contemporánea” ao tempo que amosa que “o Rexurdimento foi moito máis que literatura” segundo apuntou Xurxo Martínez. A presentación do proxecto, cuxos contidos se editarán en forma de libro, estivo acompañada dun concerto no que se interpretaron cinco das pezas musicais incluídas no proxecto.
20/11/2023

Manuel Balboa protagoniza a nova entrega de Caligrafías musicais

“Teatro lírico gallego” é o título da conferencia que Manuel Balboa (1958-2004) pronunciou no Ateneo Republicano na Coruña en 1979. A intervención é a nova entrega do proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimensualmente conferencias destacadas de prestixiosos estudosos do eido musical galego.
08/11/2023

A entrada do arquitecto e compositor Eduardo Rodríguez-Losada incorpórase ao Álbum de Galicia

A vida de Eduardo Ramón Rodríguez-Losada (A Coruña, 1886–1973) centrouse en dous ámbitos: a arquitectura e a composición musical. No eido arquitectónico, foi considerado como un dos máis importantes arquitectos rexionalistas galegos. No campo musical, compuxo máis de setenta obras de diferentes xéneros, aínda que foi recoñecido principalmente polas súas óperas. Nelly Iglesias é a autora da entrada que sumamos hoxe ao Álbum de Galicia, a colección dixital de biografías que mantén o Consello da Cultura Galega (CCG).
04/10/2023

Dúas actividades profundan na música medieval a partir da figura de Martín Codax

Unha xornada científica e un concerto son as dúas actividades coas que o Consello da Cultura Galega (CCG) e o concello de Redondela celebran este xoves, 5 de outubro, unha nova edición do ciclo “Seíam'eu... en San Simón”. O programa busca profundar na figura de Martín Codax, figura homenaxeada este ano co Día das Artes Galegas. A xornada terá lugar de mañá (a partir das 10:30 horas) na illa de San Simón, e contará con destacados especialistas para falar das voces e da arpa na música medieval. Titúlase “Ecos medievais: A voz e a arpa, testemuñas e transmisores da alma musical do pasado”, non se retransmite en directo, pero será gravada para logo subirase á rede no web do CCG. Pola tarde (19:30 horas), no auditorio a Xunqueira de Redondela, haberá un concerto no que terá lugar a estrea absoluta da reinterpretación das cantigas de Martín Codax feita por catro compositores galegos actuais.
18/09/2023

Ramiro Cartelle profunda na figura de Mauricio Farto na nova entrega de Caligrafías musicais

O proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG), recupera cada dous meses conferencias destacadas de prestixiosos estudosos do eido musical galego. Hoxe publícase a cuarta entrega, que consiste nunha conferencia do intelectual coruñés Ramiro Cartelle sobre o compositor, director e recompilador do folclore galego Maurico Farto Parra (1867-1947).
08/09/2023

O Consello da Cultura Galega expresa o seu fondo pesar polo pasamento de Dorothé Schubarth, figura fundamental para o coñecemento do folclore musical galego

Esta musicóloga e compositora suíza desenvolveu un amplo labor investigador centrado na procura das formas e orixes da música popular europea. Dorothé Schubarth introduciu parámetros de clasificación descoñecidos en Galicia e novidosas metodoloxías de traballo e de compilación que, aínda hoxe, están a influír nos nosos estudosos. É a responsable da máxima achega xamais realizada para a conservación e coñecemento do folclore musical do país.
25/06/2023

Unha xornada analiza as bandas sonoras dos videoxogos

“Música e videoxogos dende Galicia” é o título da xornada que terá lugar este luns, 26 de xuño, ás 16:30 horas, na sede institucional do Consello da Cultura Galega (CCG). Nela, diversos expertos analizarán as composicións musicais que acompañan os videoxogos e como estas condicionan a experiencia das persoas durante o xogo. Ademais, profundarase nas bandas sonoras que se compoñen en Galicia co fin de identificar os seus referentes, a existencia de influencias foráneas ou o emprego da lingua galega. A actividade está organizada polo Arquivo Sonoro de Galicia do CCG e coordinada por Alejo Amoedo e Cristina Pujales. A sesión é presencial, pero poderase seguir en directo a través do web e as redes sociais corporativas.
19/06/2023

A nova entrega de Caligrafías musicais difunde unha conferencia de Xosé V. Ferreirós sobre a gaita

O proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimensualmente conferencias destacadas de prestixiosos estudosos do eido musical galego, difunde na súa terceira entrega unha conferencia de Xosé V. Ferreirós. Nela, o gaiteiro fai un percorrido polos instrumentos tradicionais galegos para, posteriormente, centrarse na gaita, nas súas orixes e nas súas diferentes tipoloxías e xeitos de tocala.
01/06/2023

O proxecto Voces centenarias recupera tres audios de Ernesto Guerra da Cal

Ernesto Guerra da Cal (Ferrol, 1911 – Lisboa, 1994) foi escritor, poeta e un destacado estudoso das literaturas portuguesa e galega. Exiliado en Nova York dende 1939, traballou a prol da internacionalización da cultura galega e, sobre todo, da figura de Rosalía de Castro. A nova entrega de Voces centenarias, proxecto que mantén o Arquivo Sonoro de Galicia (ASG) do Consello da Cultura Galega (CCG), difunde tres audios que permiten escoitar algúns dos seus poemas recitados na voz do propio autor.
05/05/2023

A nova entrega de Voces centenarias recupera tres audios de Lois Tobío

Lois Tobío Fernández (Viveiro, 1906 – Madrid, 2003) foi diplomático, escritor, tradutor e xornalista. Destacado militante galeguista, foi tamén un firme defensor da personalidade cultural de Galicia no mundo. A nova entrega de Voces centenarias, proxecto que mantén o Arquivo Sonoro de Galicia (ASG) do Consello da Cultura Galega (CCG), difunde tres gravacións que permiten profundar na súa figura e coñecer, a través das súas propias palabras, como foi o proceso de creación do Seminario de Estudos Galegos.
03/05/2023

O Álbum de Galicia incorpora a entrada do recoñecido especialista en música catedralicia José López-Calo

José López-Calo (Nebra, Porto do Son, 1922 – Salamanca, 2020) foi “o grande especialista na música das catedrais españolas”, cun labor que chegou a ser recoñecido internacionalmente. Así o afirma Francisco Javier Garbayo Montabes na biografía que asina para o Álbum de Galicia, a colección dixital de biografías que mantén o Consello da Cultura Galega (CCG).
17/04/2023

A conferencia do Padre Calo sobre Jesús Bal y Gay centra a nova entrega de Caligrafías musicais

A segunda entrega de Caligrafías musicais, proxecto do Arquivo Sonoro de Galicia (ASG) do Consello da Cultura Galega (CCG) que rescata bimensualmente conferencias destacadas de prestixiosos estudosos do eido musical galego, difunde neste mes de abril unha conferencia de Xosé López-Calo (1922-2020), máis coñecido como Padre Calo, un referente internacional da musicoloxía. Son corenta minutos en que o xesuíta sonense explica as investigacións do músico lugués Jesús Bal y Gay (Lugo, 1905 - Torrelaguna, Madrid, 1993) sobre a música culta antiga e o folclore.
14/04/2023

O proxecto Voces centenarias difunde tres audios de Celso Emilio Ferreiro

Celso Emilio Ferreiro (Celanova, 1912 – Vigo, 1979) foi unha das figuras máis sobresaíntes do nacionalismo galego, tanto en termos políticos como culturais. A nova entrega de Voces centenarias, o proxecto que mantén o Arquivo Sonoro de Galicia (ASG) do Consello da Cultura Galega (CCG), incorpora tres audios que permiten repasar, da man do propio autor, a súa traxectoria poética e vital ou escoitar as súas reivindicacións a prol da lingua galega.
29/03/2023

Unha xornada analiza os aspectos materiais do patrimonio sonoro galego

Historia, dixitalización e preservación de documentos sonoros é o título da xornada que terá lugar o 30 de marzo, ás 16:30 horas, na sede institucional do Consello da Cultura Galega (CCG). Nela, Susana Belchior e Jose M. Navia farán un percorrido pola historia das gravacións sonoras e afondarán no tratamento técnico do son. A sesión está organizada polo Arquivo Sonoro de Galicia (ASG) do CCG e coordinada polo seu director, Alejo Amoedo. A actividade é presencial, pero poderá seguirse en directo a través do sitio web e as redes sociais corporativas.q
01/03/2023

O Álbum de Galicia incorpora a entrada do cantautor Suso Vaamonde

Suso Vaamonde (Ponte Caldelas, Pontevedra, 1950 – Vigo, 2000) destacou, no panorama musical galego, por ser un dos cantautores máis comprometidos na loita pola defensa do seu pobo e da súa lingua. De feito, foi un dos primeiros en musicar as obras dos poetas da terra e en reivindicar a poesía galega e o vencello da literatura co pobo. Ademais, fixo importantes achegas á música infantil e mesmo contribuíu á súa renovación. Fernando Fernández Rego é o autor da súa entrada no Álbum de Galicia, a colección dixital de biografías que mantén o Consello da Cultura Galega (CCG).