Noticias

Gabinete de Comunicación (CCG). Rexistros91 a 105 de 105
08/11/2023

Acordo para a dixitalización de materiais de Paz-Andrade do arquivo de Paulo Rónai

A presidenta do Consello da Cultura Galega, Rosario Álvarez, visitou o arquivo do escritor e tradutor brasileiro Paulo Rónai (1907-1992), no inicio da súa viaxe institucional a Río de Xaneiro (Brasil). Alí foi recibida pola súa viúva, Nora Tausz, e a súa filla, Laura Rónai, que acordaron conceder permiso para dixitalizar as cartas do epistolario do pai que recibiu de Valentín Paz Andrade. Esta visita abre a axenda institucional na que destaca a inauguración, hoxe mércores, da mostra Afonso X e Galicia na Universidade Federal do Río de Xaneiro (UFRJ).
08/11/2023

A entrada do arquitecto e compositor Eduardo Rodríguez-Losada incorpórase ao Álbum de Galicia

A vida de Eduardo Ramón Rodríguez-Losada (A Coruña, 1886–1973) centrouse en dous ámbitos: a arquitectura e a composición musical. No eido arquitectónico, foi considerado como un dos máis importantes arquitectos rexionalistas galegos. No campo musical, compuxo máis de setenta obras de diferentes xéneros, aínda que foi recoñecido principalmente polas súas óperas. Nelly Iglesias é a autora da entrada que sumamos hoxe ao Álbum de Galicia, a colección dixital de biografías que mantén o Consello da Cultura Galega (CCG).
26/10/2023

O galeguismo en América centra a nova entrega de Historias de ida e volta

A colectividade galega emigrada alén mar desenvolveu un importante labor a prol da preservación da identidade cultural galega e da defensa dunha nacionalidade propia. En Cuba e Bos Aires constituíronse durante as primeiras décadas do século XX diferentes asociacións cun marcado carácter galeguista. Ademais de organizar actos para recadar fondos que enviar a Galicia, estas institucións puxeron en marcha diferentes xornais étnicos nos que divulgaban a súa ideoloxía. O especial Historias de ida e volta, proxecto do Arquivo da Emigración Galega (AEG) do Consello da Cultura Galega (CCG) que conta co apoio da Secretaría Xeral da Emigración, amosa en vinte imaxes e documentos algunhas destas publicacións, así como os mitins e outras actividades organizados para defender a causa galeguista.
24/10/2023

A biografía de Isabel Martínez-Barbeito entra no Álbum de Galicia

Con motivo da conmemoración do Día das Bibliotecas, o Álbum de Galicia, a colección dixital de biografías que mantén o Consello da Cultura Galega (CCG), incorpora a entrada da bibliotecaria e arquiveira Isabel Martínez-Barbeito (A Coruña, 1918-2007). Intelectual comprometida coa preservación e difusión do patrimonio cultural, amosou ao longo de toda a súa vida unha preocupación constante por “contribuír ao acceso á cultura”, sobre todo “á relacionada coa promoción e a historia da Coruña”. Así o subliña a autora da súa biografía, Susana Guitar Novo.
24/10/2023

O proxecto audiovisual Crossing borders profunda no momento actual da música de raíz

A música de raíz galega está a traspasar fronteiras e a vivir un momento dourado sobre o que o Consello da Cultura Galega (CCG) profunda nun novo proxecto audiovisual. A presidenta do Consello da Cultura Galega, Rosario Álvarez, e o coordinador do proxecto, Manuel Gago, presentaron en rolda de prensa Crossing borders. A música TRAD galega atravesando fronteiras, tres pezas audiovisuais subtituladas en inglés que, da man de creadores como Mercedes Peón, Baiuca (Alejandro Guillán) e Uxía Senlle, entre outros, mais os expertos Óscar Losada e Marina Fernández, percorren a evolución, as especificidades e as claves do éxito da música de raíz.
23/10/2023

Unha xornada analiza o Seminario de Estudos Galegos en comparación con outros centros de alta cultura

O Seminario de Estudos Galegos e as institucións de alta cultura do seu tempo é o título da xornada que terá lugar mañá, 24 de outubro, ás 10:00 horas, na sede institucional do Consello da Cultura Galega (CCG). Coordinada por Ramón Villares, a cita ten como obxectivo analizar a relevancia que tivo o Seminario de Estudos Galegos (SEG) en comparación con outras institucións de alta cultura da Península Ibérica, como o Institut d’Estudis Catalans (Barcelona, 1907), a Eusko Ikaskuntza-Sociedad de Estudios Vascos (San Sebastián, 1918), o Centro de Estudios Históricos (Madrid, 1910) ou a Sociedade Martins Sarmento (Guimarães, 1881). A sesión é presencial, pero poderá seguirse en directo a través do sitio web e das redes sociais corporativas.
19/10/2023

Especialistas instan a repensar o modelo de xestión do territorio no foro Pensar o mundo dende Galicia

“Cómpre abrir o debate da ordenación do territorio, e facelo desde unha perspectiva social, cultural e tamén ambiental” apuntou a arquitecta Teresa Táboas no marco da xornada “Territorio, patrimonio e identidade”, a sétima sesión do foro Pensar o mundo dende Galicia organizado polo Consello da Cultura Galega (CCG). Unha idea na que afondou o arqueólogo Agustín Azkárate, que engadiu que “non se pode recuperar un espazo sen documentalo e comprendelo”. A cita foi gravada e os vídeos pódense consultar no sitio web da institución. Ademais, abriuse a inscrición para a ultima sesión deste foro co que o CCG celebra o seu 40º aniversario. Titúlase “Modelos para unha economía da cultura” está coordinada por Xosé Carlos Arias e terá lugar o vindeiro 9 de novembro.
18/10/2023

O Álbum de Galicia incorpora a entrada de Manuel Soto Freire

Manuel Soto Freire (Lugo, 1826 – Goián, Ferreira de Pantón, Lugo, 1897) foi un impresor de gran sona da cidade lucense. No seu negocio tipográfico publicáronse algunhas obras de Manuel Murguía, Rosalía de Castro ou Juan Antonio Saco Arce, así como o calendario agrícola Gaiteiro de Lugo e os populares Almanaques. Con Soto Freire, Lugo inaugurou “o seu máis estreito vencello co Rexurdimento das letras galegas”, afirma Xurxo Martínez González. El é o autor da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).
18/10/2023

O foro Pensar o mundo dende Galicia propón este xoves unha reflexión sobre o patrimonio

O arqueólogo Agustín Azkarate e a arquitecta Teresa Táboas participan este xoves na xornada “Territorio, patrimonio e identidade”, a sétima sesión do foro Pensar o mundo dende Galicia, co que o Consello da Cultura Galega (CCG) celebra o seu 40º aniversario. Rebeca Blanco-Rotea é a coordinadora desta cita, que pretende afondar dende unha perspectiva teórica e práctica en como se establece a relación entre unha sociedade o espazo que habita, unha reflexión pertinente no contexto actual no que se están a producir conflitos entre a protección das paisaxes culturais e a forma de implantar enerxías renovables. Xosé Manoel Núñez Seixas, coordinador do foro, e Rebeca Blanco-Rotea inauguran esta xornada, que se pode seguir en directo dende o web e as redes sociais do CCG.
17/10/2023

O sector empresarial amosa unha maior sensibilidade cara ao galego aínda que mingua o seu uso

"O máis coherente para unha empresa que nace en Galicia, formada por galegos, con capital galego e cun Consello de Administración que fala galego é que a súa comunicación, as súas relacións internas e externas sexan nesta lingua", afirmou Pedro González, avogado e directivo de Leite Noso. Pero non todas as empresas teñen a mesma posición coa lingua, tal e como foron debullando responsables de diferentes empresas e entidades que participaron nos XXV Encontros para a Normalización Lingüística que organiza o Centro de Documentación Sociolingüística de Galicia (CDSG) do Consello da Cultura Galega (CCG). A presidenta da institución, Rosario Álvarez, e o secretario xeral de Política Lingüística, Valentín García, destacaron na inauguración a importancia deste foro, que este ano pon o foco no ámbito socioeconómico, un eido no que, pese as medidas adoptadas, se reduce o uso da lingua. Segundo as cifras achegadas polo investigador da Universidade de Santiago (USC) Miguel Guisantes entre 2003 e 2018 descendeu un 17% o número de persoas que falaban sempre en galego cos compañeiros e un 12,3% coa clientela.
16/10/2023

Os Encontros para a Normalización Lingüística cumpren 25 anos cunha reflexión sobre vender en galego

“Economía, lingua e sustentabilidade” é o título da vixésimo quinta edición dos Encontros para a normalización lingüística que organiza este martes, 17 de outubro (9:45 horas), o Centro de Documentación Sociolingüística de Galicia (CDSG) do Consello da Cultura Galega (CCG). A presidenta do CCG, Rosario Álvarez, e o secretario xeral de Política Lingüística, Valentín García, inauguran esta cita que pretende reflexionar sobre o papel do idioma no ámbito socioeconómico. Responsables de empresas e entidades como Daveiga, Espiga, Fegatur Vegalsa-Eroski, Deleite Cooperativa 57 ou Caixa Rural Galega, entre outros, achegarán as súas experiencias neste encontro presencial que tamén se pode seguir en directo a través do web e as redes sociais da institución.
13/10/2023

Preséntase en Braga Como levar unha vida honesta , o manual para príncipes de Martiño de Dumio

“Que as túas opinións sexan xuízos” ou “Non finxas ser o que non es, nin queiras semellas máis do que es” son algúns dos consellos que figuran en Formula vitae honestae. Un compendio de ética natural que o monxe Martiño, bispo de Dumio, escribiu a petición do rei Miro cara o ano 570 e que o Consello da Cultura Galega (CCG) traduciu ao galego o pasado mes de marzo. Este éxito da Europa medieval do momento preséntase este venres en Braga nun acto en colaboración coa Universidade do Minho que inclúe dúas visitas comentadas polos escenarios biográficos e históricos ligados a el e o seu contexto cultural: Núcleo Museológico de São Martinho de Dume e São Frutuoso de Montélios.
11/10/2023

O Álbum de Galicia incorpora a entrada de Marcial Valladares

A Marcial Valladares Núñez (Vilancosta, Berres, A Estrada, 1821-1903) “o nome viñéralle dado en lembranza da batalla de San Marcial contra os franceses en que saíra vitorioso o pai, o avogado don José Dionisio Valladares, que desenvolveu unha intensa vida militar e política”. Así o Xosé A. Fernández Salgado, autor da entrada que hoxe se incorpora no Álbum de Galicia, colección de biografías que mantén o Consello da Cultura Galega (CCG).
10/10/2023

Especialistas destacan a contribución metodolóxica e o coñecemento que achegou o Seminario de Estudos Galegos

“O Seminario de Estudos Galegos (SEG) inaugurou unha nova forma de saber, ao introducir unha metodoloxía e un maior coñecemento global atendendo ao rigor científico” apuntou Francisco Díaz Fierros, coordinador do congreso Saber de Nós, na inauguración desta cita que convoca a destacados especialistas para ofrecer un balance do que significou este movemento no centenario da súa creación. A presidenta do Consello da Cultura Galega (CCG), Rosario Álvarez, destacou tamén a relevancia histórica desde grupo que mudou o coñecemento do país. A cita remata mércores cunha revisión as áreas de actividade nas que o Seminario conseguiu resultados máis tanxibles: a etnografía, a prehistoria e a arqueoloxía, as ciencias, as belas artes e os estudos literarios e a lingua. Sobre o SEG afonda tamén a nova entrega de Proxector, iniciativa que o CCG coa Universidade de Santiago de Compostela que nesta ocasión escolma doce vídeos vencellados ao movemento e os seus membros. A revisión do Seminario compleméntase o vindeiro 24 de outubro con outra xornada que ofrece unha análise en comparación con outros centros análogos no contexto hispánico.
06/10/2023

O impacto directo do galego no conxunto da economía supón 1.440 millóns de euros

O valor económico do galego é un documento pioneiro que achega, por primeira vez, o coñecemento da contribución da lingua galega ao conxunto da economía de Galicia. A presidenta do Consello da Cultura Galega (CCG), Rosario Álvarez; o secretario xeral de Política Lingüística, Valentín García; o responsable do Observatorio da Cultura Galega, Håkan Casares; Melchor Fernández e Diana Fernández, profesores da USC e investigadores do Instituto de Estudos e Desenvolvemento de Galicia (IDEGA) presentaron esta mañá os resultados deste informe que cuantifica en 1.440 millóns de euros de valor engadido bruto (VEB) e 27.702 postos de traballo o impacto directo que o galego supón ao conxunto da economía de Galicia. O documento xa está dispoñible para descarga.
04/10/2023

Perugia acolle a mostra Afonso X e Galicia, que afonda na conexión galega do monarca

A presidenta do Consello da Cultura Galega (CCG), Rosario Álvarez, acompañada de Carlo Pulsoni e Marco Paone, codirectores do centro de estudos galegos da Universidade de Perugia;. Roberto Rettori, delegado de orientación, titoría e divulgación científica da mesma universidade; Ignacio Peyró, director do Instituto Cervantes de Roma e Leonardo Varasano, asesor de cultura da Comuna de Perugia, inauguraron esta mañá no reitorado da universidade a mostra Afonso X e Galicia. O proxecto expositivo poderá verse na cidade italiana ata o 13 decembro.
04/10/2023

Dúas actividades profundan na música medieval a partir da figura de Martín Codax

Unha xornada científica e un concerto son as dúas actividades coas que o Consello da Cultura Galega (CCG) e o concello de Redondela celebran este xoves, 5 de outubro, unha nova edición do ciclo “Seíam'eu... en San Simón”. O programa busca profundar na figura de Martín Codax, figura homenaxeada este ano co Día das Artes Galegas. A xornada terá lugar de mañá (a partir das 10:30 horas) na illa de San Simón, e contará con destacados especialistas para falar das voces e da arpa na música medieval. Titúlase “Ecos medievais: A voz e a arpa, testemuñas e transmisores da alma musical do pasado”, non se retransmite en directo, pero será gravada para logo subirase á rede no web do CCG. Pola tarde (19:30 horas), no auditorio a Xunqueira de Redondela, haberá un concerto no que terá lugar a estrea absoluta da reinterpretación das cantigas de Martín Codax feita por catro compositores galegos actuais.
04/10/2023

O rexionalista Andrés Martínez Salazar entra no Álbum de Galicia

Editor, arquiveiro e historiador, Andrés Martínez Salazar (Astorga,1846 - A Coruña, 1923) foi unha das principais figuras do rexionalismo galego, sobre todo no campo da cultura e como impulsor do rexurdimento literario do país. A súa entrada, que hoxe se inclúe no Álbum de Galicia, colección de biografías que elabora o Consello da Cultura Galega (CCG), foi elaborada por Alfonso Mato.
03/10/2023

A exposición Afonso X e Galicia chega a Bratislava

A presidenta do Consello da Cultura Galega, Rosario Álvarez; a directora da biblioteca central de Brastislava, Silvia Stasselova; e a embaixadora de España en Eslovaquia, Lorea Arribalzaga, inauguraron este luns a mostra Afonso X e Galicia. Un proxecto expositivo que afonda na conexión do rei Sabio con Galicia.
02/10/2023

O CCG desenvolverá proxectos conxuntos coa embaixada de España en Eslovaquia

A presidenta do Consello da Cultura Galega (CCG), Rosario Álvarez, reuniuse esta mañá coa embaixadora de España en Eslovaquia, Lorea Arribalzaga Ceballos. Na xuntanza estableceron contacto para futuras vías de colaboración en iniciativas de ámbito cultural que se concretará en proxectos expositivos e outras actividades.
29/09/2023

Nace Seara, un espazo para a tradución literaria galega ao inglés

De Rosalía de Castro ata Emma Pedreira, pasando por Luis Pimentel, Claudio Rodríguez Fer ou Luisa Villalta. Todos eles están en Seara. Discover Galician literature through its texts/Descubre a cultura galega a través dos seus textos, un espazo web que nace para ofrecer unha selección decantada que percorre a historia da literatura galega. Nesta seara, presentada na véspera do Día Internacional da Tradución que se celebra cada 30 de setembro, os textos dos creadores galegos estarán na versión orixinal, pero tamén na súa tradución ao inglés. A presidenta do Consello da Cultura Galega (CCG), Rosario Álvarez, e a coordinadora técnica do proxecto, a profesora e tradutora estadounidense Kathleen Nora March, presentaron en rolda de prensa este espazo que amosa textos inéditos canda outros máis coñecidos, algúns deles tamén recitados para, en palabras da presidenta, “amadores e amadoras das linguas e da literatura, desde calquera lugar e cultura”.
27/09/2023

A pioneira actriz e locutora Pilar Pereira entra no Álbum de Galicia

María del Pilar Pereira Carballo (Santiago, 1937-2020) foi unha actriz de teatro e locutora radiofónica pioneira, aínda que tamén foi autora e directora escénica e traballou como actriz de cinema e televisión. Foi “un referente e posúe unha dilatada, destacada e versátil carreira” asegura Ana Abad de Larriba, que asina a entrada que hoxe se inclúe no Álbum de Galicia, colección de biografías que elabora o Consello da Cultura Galega (CCG).
27/09/2023

Os editores reflexionan sobre o presente e futuro do sector no Consello da Cultura Galega

A presidenta do Consello da Cultura Galega, Rosario Álvarez, inaugurou esta mañá o XX Simposio “O Libro e a lectura” que organiza anualmente a Asociación Galega de Editoras. Na súa intervención destacou o salto “cuantitativo e cualitativo que o sector de unos últimos corenta anos” e lembrou o reto da internacionalización e a dixitalización. Ademais, destacou que ambas institución cumpren neste 2023 corenta anos e que “estamos xuntas no mesmo barco”.
27/09/2023

Xosé Ramón Veiga reflexiona sobre a aceptación da derrota democrática no ciclo Pensarmos

O ciclo Pensarmos, organizado pola Sección de Pensamento do Consello da Cultura Galega (CCG) que coordina Celia Pereira Porto, regresa este xoves (18:00 horas) cunha nova cita sobre a calidade da democracia. Nesta ocasión, Xosé Ramón Veiga reflexiona sobre o tema a partir da análise dun período concreto da historia. A xornada leva por título “O máis difícil é aceptar a derrota: Pluralismo político, participación e democracia no século XIX”. A sesión é presencial e pode seguirse en directo desde o sitio web e as redes sociais da institución.
25/09/2023

Rosario Álvarez deposita na Caixa das Letras o legado material e simbólico de Rosalía de Castro

A sede do instituto Cervantes acolleu na mañá deste luns un acto para conmemorar o Día Europeo das Linguas que se celebra cada 26 de setembro. Nel presentouse a versión multilingüe do poema “Grito hacia Roma” de Federico García Lorca e tamén tivo lugar a apertura da Caixa das Letras de Rosalía de Castro. Aproveitando a conexión recoñecida entre Lorca e a poeta galega, Rosario Álvarez, presidenta do Consello da Cultura Galega (CCG), depositou o legado material e simbólico “dunha muller poeta dun categoría literaria e dun pensamento revolucionario”. O acto, contou coa presenza do presidente en funcións, Pedro Sánchez, quen lembrou a primeira tentativa de creación dunha cartografía lingüística, a do Atlas Lingüístico iniciado polo grupo do filólogo Tomás Navarro quen “descubriu unha xeografía lingüística plural, unha España de multitude de acentos e unha riqueza que debemos preservar”. Asistiron a esta homenaxe representantes do sector da cultura e da política como a presidenta do Congreso, Francina Armengol, ou a ministra de Educación en funciones, Pilar Alegría, entre outros.
22/09/2023

O CCG participa no XII Pleno do Consello de Comunidades Galegas

Hoxe comeza en Ourense o XIII Pleno do Consello de Comunidades Galegas, órgano representativo dos galegos do exterior a través das entidades asentadas fóra de Galicia que teñen a condición de “comunidade galega” no Rexistro da Galeguidade. A esta xuntanza asiste o xerente do Consello da Cultura Galega (CCG), Marcelino Fernández. Alí falará do proxecto de creación dun Museo de Emigración e doutras iniciativas desenvolvidas pola institución coma o proxecto de xeolocalización das Escolas da Emigración. Ademais, esta semana tamén se incorpora ao Repertorio da prensa da emigración galega, proxecto que mantén o Arquivo da Emigración Galega (AEG) do CCG, a colección completa de El Eco de Teo, publicado en Bos Aires polas sociedades de emigrantes do distrito de Teo e Vedra en Arxentina.
22/09/2023

A presidenta deposita o legado de Rosalía de Castro na Caixa das Letras

O 26 de setembro é o Día Europeo das Linguas. Unha celebración que o Consello da Cultura Galega (CCG), o Instituto Cervantes, o Euskal Etxepare Institutua e o Institut Ramon Llull adoitan celebrar de maneira conxunta e que nesta edición cobra especial protagonismo a cultura galega. A presidenta do CCG, Rosario Álvarez, depositará na Caixa das Letras que mantén o Instituto Cervantes un legado “in memoriam” de Rosalía de Castro. Será no marco do acto no que se presenta a edición especial multilingüe do poema "Grito hacia Roma", obra de Federico García Lorca. O acto, que se desenvolverá na sede do Cervantes o vindeiro luns 25 de setembro (11 horas), conta coa presenza do presidente do goberno en funcións, Pedro Sánchez.
21/09/2023

Unha xornada analiza a gordofobia

A discriminación provocada pola obesidade, a gordofobia, e a violencia estética son os temas que aborda a xornada Gordofobia que o Consello da Cultura Galega (CCG) e a Valedora do Pobo celebran este venres, 22 de setembro na sede do CCG. A presidenta da institución, Rosario Álvarez, e a Valedora do Pobo, Dolores Fernández Galiño, inaugurarán esta cita coordinada por María Xosé Porteiro e Carme Adán. A xornada pode seguirse en directo desde o sitio web e as redes sociais da institución.
20/09/2023

As crises alimentarias e o cambio climático centran a nova sesión do foro Pensar o mundo dende Galicia

O Consello da Cultura Galega (CCG) regresa co ciclo Pensar o mundo dende Galicia, co que celebra o seu 40º aniversario, para afondar na situación climática actual. María Loureiro coordina esta sesión do foro que se titula “Límites planetarios. Unha ollada socioeconómica dende Galicia” e na que se analizará o impacto do cambio global na agricultura e nas posibles crises de alimentos. Nela participan, entre outros expertos, José María Sumpsi, exdirector de Política Alimentaria da FAO, e Adrián Escudero, catedrático e divulgador da Universidad Rey Juan Carlos. Xosé Manoel Núñez Seixas, coordinador do Foro, e María Loureiro inauguran esta cita que se pode seguir en directo desde o web e as redes sociais do CCG.
20/09/2023

Un acto festivo e un congreso reivindican o legado do Seminario de Estudos Galegos

O 12 de outubro de 1923 un grupo de ilustres estudantes da Universidade de Santiago camiñaron xuntos ata a casa de Rosalía de Castro en Ortoño. Esa andaina derivou na creación do Seminario de Estudos Galegos (SEG), unha institución científica determinante no futuro do país. Cen anos despois, diferentes entidades repiten aquel percorrido cun acto festivo aberto á cidadanía. É un dos actos centrais que conmemora o centenario do SEG e que debullaron esta mañá a presidenta do Consello da Cultura Galega, Rosario Álvarez; a presidenta do Museo do Pobo Galego, Concha Losada; o secretario xeral de Política Lingüística, Valentín García; o presidente da Real Academia Galega, Víctor Freixanes; a alcaldesa de Santiago, Goretti Sanmartín; o alcalde de Ames, Blas García; máis a vicerreitora de Estudantes e Cultura da Universidade de Santiago (USC), Pilar Murias. Alén da festa popular do día 12 de outubro, na véspera (días 10 e 11) terá lugar o congreso «Saber de nós: Cen anos do Seminario de Estudos Galegos», que fará balance da significación na historia científica, intelectual e cultural de Galicia do SEG.