Arquivo de noticias do CCG

Os "IV Encontros Cultura e Concellos" reunirán o vindeiro venres e sábado, días 18 e 19 de xuño, a preto dun centenar de axentes culturais de concellos e de expertos en diferentes ámbitos para afondar na relación entre a cultura e as novas tecnoloxías. O coordinador do encontro e director do Observatorio da Cultura Galega, Xan Bouzada, salientou a importancia destas xornadas debido "ao papel das novas tecnoloxías como ferramentas para conseguir a participación e o desenvolvemento cultural nos concellos".

O Consello da Cultura Galega (CCG) presentará mañá mércores, día 16, ás 12´30 horas, os IV Encontros "Cultura e Concellos" que, nesta edición analizarán a relación entre Cultura e Novas Tecnoloxías.

O Consello da Cultura Galega (CCG) acolleu esta mañá a presentación da obra "A Crónica de Idacio de Limia, bispo de Chaves", de José Antonio López Silva. Con esta publicación, segundo sinala o autor, "preténdese facilitar un achegamento ás orixes do pobo galego e a un texto considerado fundamental para a configuración dos alicerces históricos da identidade política e histórica de Galicia".

O Consello da Cultura Galega (CCG) acollerá mañá martes, día 1 de xuño, ás 12´30 horas, a presentación en rolda de prensa das "V Xornadas Internacionais de Cultura Tradicional Carnota 2004".

O Consello da Cultura Galega (CCG) acolle hoxe a segunda e última xornada do encontro O CAMIÑO DE SANTIAGO, DIVERSIDADE CULTURAL E COMUNICACIÓN, que se celebra na sede da institución desde onte. Nela, responsábeis dalgúns dos principais medios de comunicación privados da Comunidade apostaron por unha renovación e reprantexamento do Xacobeo, que agora consideran esgotado.

O Consello da Cultura Galega (CCG) reúne este xoves e venres, días 27 e 28 de maio, a expertos de universidades, medios de comunicación e institucións nun amplo debate en torno ao Xacobeo nas xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O encontro, dirixido polo coordinador da Sección de Comunicación do CCG, Xosé López, e a secretaria xeral do Grupo Español de Comunicación da UNESCO, Ángeles Pérez, comezou esta mañá salientando o papel do Camiño de Santiago como vehículo de comunicación entre pobos e como fenómeno comunicativo exitoso.

O Consello da Cultura Galega (CCG) acollerá este xoves e venres, días 27 e 28 de maio, as xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O encontro, dirixido polo coordinador da Sección de Comunicación do CCG, Xosé López, e a secretaria xeral do Grupo Español de Comunicación da UNESCO, Ángeles Pérez, analizará a difusión do Ano Xacobeo desde diversas instancias: as universidades, as institucións públicas e eclesiásticas e os medios de comunicación públicos e privados.

O Consello da Cultura Galega (CCG) acollerá mañá martes, día 25, ás 19´00 horas, unha conferencia da escritora portuguesa Inês Pedrosa, quen reflexionará sobre ESCRIBIR FICCIÓN. A conferenciante será presentada polo escritor e profesor Carlos Quiroga.

O Consello da Cultura Galega acollerá este martes, día 18, a presentación das xornadas "O CAMIÑO DE SANTIAGO, DIVERSIDADE CULTURAL E COMUNICACIÓN", que se desenvolverán o 28 e 29 de maio na sede da institución en Santiago de Compostela.

O Consello da Cultura Galega (CCG) acollerá os días 27 e 28 de maio as xornadas O CAMIÑO DE SANTIAGO, DIVERSIDADE CULTURAL E COMUNICACIÓN. O obxectivo, según explicou o coordinador da Sección de Comunicación do CCG, Xosé López, é "abrir unha liña de traballo e reflexión sobre a difusión de todo o relacionado coa Ruta Xacobea e avanzar na creación dun espazo galego de comunicación. Para elo, compaxinaremos as exposicións teóricas coas experiencias e os puntos de vista dos profesionais dos medios de comunicación".

As rutas literarias en Galicia e Portugal centran hoxe a segunda sesión das "III Xornadas sobre Casas-Museo. O Patrimonio Inmaterial" que celebra estes días o Consello da Cultura Galega (CCG) en Santiago de Compostela. O coordinador do encontro e secretario da Fundación Rosalía de Castro, Gonzalo Rey Lama, destacou o "valor inigualable" que supoñen as rutas literarias, os percorridos creados para os visitantes en base ao camiño que un escritor ou os seus personaxes realizaron., para coñecer a historia, as obras e o contorno.

As "III Xornadas sobre as Casas-Museo. O Patrimonio Inmaterial" comezaron esta mañá no Consello da Cultura Galega (CCG) abordando a creación da Casa-Museo de Curros Enríquez en Celanova de man dun dos seus principais promotores, o académico Xosé Luis Méndez Ferrín. O escritor galego, ademais de explicar con entusiasmo este proxecto, destacou a necesidade de que a poboación sexa consciente "do tesouro" que supoñen as casas-museo de escritores como elemento de identificación e coñecemento das comunidades.

O Consello da Cultura Galega (CCG) presentará mañá venres, día 14, ás 11´00 horas no Instituto Rosalía de Castro de Santiago de Compostela, tres publicacións dedicadas á figura de Xaquín Lorenzo Fernández "Xocas", mestre da etnografía galega e a quen este ano se lle dedica o Día das Letras Galegas.

O Consello da Cultura Galega (CCG) acollerá este xoves e venres, no salón de actos da institución, as III XORNADAS SOBRE AS CASAS-MUSEO. O PATRIMONIO INMATERIAL. O obxectivo destas xornadas é, segundo o seu coordinador, Gonzalo Rey Lama, "evidenciar e analizar o carácter de foco cultural que teñen as casas-museo", institucións emprazadas en casas onde viviron personaxes destacados e que xestionan o seu legado.

O Consello da Cultura Galega (CCG) acollerá mañá martes, día 11 de maio, ás 12:30 horas, a rolda de prensa de presentación das III XORNADAS SOBRE AS CASAS-MUSEO. O PATRIMONIO INMATERIAL. No acto intervirá Gonzalo Rey Lama, coordinador das xornadas e membro da Sección de Arquitectura do CCG.

"Dar a coñecer a realidade galega e promover o diálogo con outras culturas, facendo da diferenza un valor e non unha limitación". Así explica Ramón Villares, coordinador da Sección de Cultura Galega no Exterior do CCG, o obxectivo da exposición "O sorriso de Daniel". Esta mostra representará a cultura galega no Fórum Universal das Culturas de Barcelona, un encontro patrocinado pola Unesco que pretende avanzar no respecto á diversidade cultural, ao desenvolvemento sostíbel e á paz.

Este xoves, día 6 de maio, a Sección de Literatura e Industrias da Edición do Consello da Cultura Galega (CCG) celebrará a súa tertulia mensual. O tema escollido nesta ocasión é "O significado do Día das Letras Galegas", que se celebrará o próximo 17 de maio. Os convidados serán Carlos Negro, escritor e secretario da Asociación de Escritores en Lingua Galega, Xosé Antón Pedreira, libreiro e presidente da Agrupación de Libreiros de Santiago, e Pilar Sampedro, presidenta da Asociación Galega do Libro Infantil e Xuvenil (GALIX), mestra e asesora de formación. O escritor, editor e membro da Sección de Literatura do CCG Miguel Anxo Fernán-Vello será o encargado de moderar o debate.

Galicia e Irlanda como países de emigración e de industrialización tardía e as súas relacións culturais centraron a segunda xornada do Congreso internacional "Galicia-Irlanda: dúas Fisterras Europeas", que se celebra desde o mércores, día 21, no Consello da Cultura Galega (CCG). Entre a análise de similitudes e diverxencias, o profesor Fernando González Laxe foi o encargado de tocar un tema no que as relacións entre Irlanda e Galicia están na actualidade enfrontadas: a pesca. Laxe reclamou a igualdade de acceso aos caladoiros e control das cotas fronte aos irlandeses e a non imposicións de restriccións, sinalando que se a Unión Europea non resposta á necesidade de acordos, haberá que apostar por acordos privados ou das institucións galegas para conseguir que a flota desenvolva a súa capacidade. "Galicia non pode estar maniatada por postulados arcaicos", sinala, dada a importancia económica e social da pesca en Galicia.

Tras a sesión inaugural de onte pola tarde, o "Congreso Galicia-Irlanda: dúas Fisterras Europeas" iniciou esta mañá a súa andadura no Consello da Cultura Galega (CCG) cunha análise das relacións históricas desde a antigüidade entre os dous territorios, que acabou cun animado debate sobre o celtismo e o "anticeltismo" actual. Deste xeito, abriuse un congreso internacional, organizado pola Sección de Cultura Galega no Exterior do CCG, as universidades de Santiago de Compostela e Cork (Irlanda) e o Comité de Relacións Culturais do Departamento de Artes, Deporte e Turismo de Irlanda, que até o día 24 analizará desde as relacións históricas enraizadas na lenda até a economía e a emigración dos dous países.

Esta tarde, ás 18:00, terá lugar o acto de inauguración do "Congreso Galicia-Irlanda: dúas Fisterras Europeas" no Consello da Cultura Galega (CCG). Este evento internacional reunirá até o día 24 a expertos galegos e irlandeses para abordar nun amplo debate as similitudes e diverxencias dos dous territorios, desde as relacións históricas enraizadas na lenda sobre o tronco común céltico até a economía e a emigración. O congreso está organizado pola Sección de Cultura Galega no Exterior do CCG, as universidades de Santiago de Compostela e Cork (Irlanda) e o Comité de Relacións Culturais do Departamento de Artes, Deporte e Turismo de Irlanda.