noticia

Rexistros 1 a 30 de 2396
25/06/2024

Un encontro debate sobre a cronoloxía e funcionalidade das 'rodas' da Idade do Bronce

En 2006 foi escavada a 'Roda de Barreiros', o primeiro dun conxunto de xacementos que abrían unha nova tipoloxía patrimonial e numerosos interrogantes sobre un período pouco coñecido da historia galega: a Idade do Bronce. Desde entón, a combinación de investigación científica e participación cidadá levou a descubrir cincuenta xacementos similares ao longo do país e á escavación de oito deles. O novo Encontro Monográfico co Patrimonio Cultural reúne por primeira vez o 4 de xullo a arqueólogos, responsables da Administración e comunicadores para debater ao redor da cronoloxía, funcionalidade e difusión destes xacementos.
24/06/2024

Publicado o encontro entre os arqueólogos Rebeca Blanco-Rotea e André Teixeira

En maio deste ano os arqueólogos Rebeca Blanco-Rotea, investigadora auxiliar de carreira no Laboratorio de Paisaxes, Patrimonio e Territorio (Lab2PT) da Universidade de Minho (Portugal), e André Teixeira, profesor no Departamento de Historia da Faculdade de Ciencias Sociais e Humanas da Universidade Nova de Lisboa, protagonizaron no Museo Arqueológico do Carmo (Lisboa) un encontro ao redor da investigación e as ciencias do pasado en Galicia e Portugal.
20/06/2024

A biografía do sacerdote Xosé Manuel Rodríguez Pampín incorpórase ao Álbum de Galicia

O Álbum de Galicia, a colección dixital de biografías que mantén o Consello da Cultura Galega (CCG), suma a entrada do sacerdote católico, ensaísta e tradutor Xosé Manuel Rodríguez Pampín (Melide, 1940 – Melide, 1997). Foi un dos promotores da tradución da Biblia ao galego, recibindo en 1970 xunto con José Fernández Lago e Andrés Torres Queiruga o Premio Nacional da Tradución de Tradución por este proxecto. A súa biografía está asinada por Ana Abad de Larriva.
20/06/2024

Arquitectos e restauradores do emblemático colexio monfortino da Nosa Señora da Antiga explican a rehabilitación nun encontro

O Colexio de Nosa Señora da Antiga (Monforte de Lemos) é unha das obras arquitectónicas máis destacadas do Renacemento galego e toda unha icona do patrimonio cultural de Monforte de Lemos. O Consello da Cultura Galega organiza o 25 de xuño un novo Encontro Monográfico co Patrimonio Cultural no que se analiza os procesos de restauración e recuperación patrimonial do inmoble que incluíu un innovador proxecto de Educación Patrimonial asociado á proposta de declaración do Colexio como Ben de Interese Cultural (BIC). O encontro Intervencións patrimoniais no Colexio de Nosa Señora da Antiga (Monforte de Lemos): Pasado, presente e futuro está coordinado pola arqueóloga Rebeca Blanco-Rotea e a especialista en Educación Patrimonial María del Mar Bóveda López.
19/06/2024

As entidades da cultura galega realizan máis do 50 por cento da súa produción en galego

No sector da cultura hai ámbitos máis galeguizados que outros. Os que máis son os departamentos de cultura das administracións públicas, que desenvolven un 87,5 % das súas actividades en lingua galega e os que menos, as actividades de comercio de libros e publicación periódicas cun 25,2 %. Son cifras do informe A produción en lingua galega no ámbito cultural que acaba de facer público o Observatorio da Cultura Galega (OCG), unidade dependente do Consello da Cultura Galega (CCG), a partir de dous contidos específicos do Barómetro da cultura galega relacionados coa produción en galego das entidades da cultura en Galicia. Ademais, no informe os directivos das identidades enquisadas sinalan que debería aumentar a presenza do idioma e cultura galegos nos medios de comunicación e redes sociais, así como a promoción do consumo en galego de produtos e servizos destinados á infancia e mocidade.
19/06/2024

A nova xornada 'Pensar con orgullo' presta atención á perspectiva da diversidade sexual e de xénero na programación cultural

Reflexionar sobre a "inclusión da perspectiva da diversidade sexual e de xénero nas programacións culturais de Galicia e a situación dos profesionais LGBT+" é o obxectivo da quinta xornada "Pensar con orgullo. Culturas e perspectivas queer" que se celebrará este xoves 20 de xullo de 2024 no Consello da Cultura Galega. A xornada está organizada polo Centro de Documentación en Igualdade e Feminismos (CCG) do Consello da Cultura Galega baixo a coordinación de María Fernández Sanjurjo.
13/06/2024

O Consello da Cultura Galega amplía o coñecemento sobre a Galicia medieval con dúas novas publicacións

A presidenta do Consello da Cultura Galega (CCG), Rosario Álvarez, presenta este venres (20:00 horas) no Instituto de Estudos Miñoráns, en Gondomar, dúas novas publicacións que permiten afondar no coñecemento da lingua galega medieval. Documentos medievais de Santa María de Baiona (1274-1531) , autoría de Xulián Maure (Vigo, 1941), e Os mosteiros de Santa María de Tomiño e Santa Baia de Donas na Idade Media. Estudo histórico e colección documental, de Víctor Rodríguez Muñiz (Ramirás, 1982), son os novos títulos que se integran na colección Gallaeciae Monumenta Historica.
13/06/2024

A biografía do escritor Xosé Manuel López Gómez, “Ardeiro”, incorpórase ao Álbum de Galicia

O Álbum de Galicia, a colección dixital de biografías que mantén o Consello da Cultura Galega (CCG), suma a entrada do escritor galeguista e activista cultural Xosé Manuel López Gómez (Logrosa, Negreira, 1944 – Ferrol, 2007). Máis coñecido como “Pepe Ardeiro” ou “O Ardeiro”, tivo na literatura unha das súas grandes afeccións. Malia publicar traballos en prosa, destacou como poeta cunha obra marcada polo “intimismo, o compromiso social e patriótico, as viaxes, as lembranzas familiares e da terra matricial, as evocacións aos grandes poetas, a recreación da paisaxe, a soidade, o amor e desamor...”. Así o subliña o autor da entrada, Xosé Amancio Liñares Giraut.
12/06/2024

Ferrol acolle a mostra As xeracións do Montserrat

A presidenta do Consello da Cultura Galega, Rosario Álvarez; o secretario xeral da Emigración, Antonio Rodríguez Miranda; o presidente por delegación de Exponav, Ignacio Frutos inauguran este xoves en Ferrol (19:00 horas) unha nova itinerancia de As xeracións do Montserrat. Memoria emocional da emigración galega ao Reino Unido. A mostra, que conta coa colaboración da Secretaría Xeral da Emigración da Xunta de Galicia, pretende recuperar a memoria daquelas persoas que tiveron que emigrar a Reino Unido na segunda metade do século XX e, a través dela, documentar non só ese tránsito entre países e culturas, senón o contexto social, económico e afectivo que rodeaba aos que buscaban unha vida mellor. O comisario é Xesús Fraga e conta co deseño Pepe Barro, que será o encargado de facer unha visita guiada trala inauguración.
12/06/2024

A cultura galega homenaxeou a figura e legado de Dorothé Schubarth

“Foi unha muller que se entregou á cultura galega, á que se dedicou en profundidade e que nos deixou un legado impagable” apuntou a presidenta do Consello da Cultura Galega (CCG), Rosario Álvarez, na inauguración. A xornada está coorganizada polo CCG, o Instituto da Lingua Galega (ILG) e o Museo do Pobo, “tres entidades que representan moi ben o vínculo de Dorothé con Galicia e coa cultura galega” engadiu a directora do ILG da Universidade de Santiago de Compostela, Elisa Fernández Rei. Concha Losada, presidenta do Padroado do Museo do Pobo Galego, institución que acolle presencialmente a sesión apuntou que “fan falta moitas mans para debuxar o perfil poliédrico de Dorothé Schubarth”.
11/06/2024

Francisco Llanos e a liñaxe viguesa de fotógrafos do estudio Llanos entran no Álbum de Galicia

Francisco Llanos Mas (Valencia, 1865 – Vigo, 1928) foi o fundador do estudio fotográfico Llanos, un negocio familiar que se estableceu na cidade olívica a finais do século XIX e que continuou da man do seu fillo Francisco Llanos Trápaga e do seu neto Ángel Llanos González durante máis dunha centuria. As tres xeracións cultivaron a fotografía de exteriores e de gabinete, aínda que destacaron no ámbito da foto-reportaxe e do documento. “Chegaron a construír unha das coleccións máis amplas das que hoxe dispón o patrimonio fotográfico histórico galego”, subliña Vítor Vaqueiro. El é o autor da entrada que se acaba de incorporar ao Álbum de Galicia, a colección dixital de biografías que mantén o Consello da Cultura Galega (CCG).
10/06/2024

Os problemas de preservación dos xardíns históricos centran a nova sesión dos Encontros Monográficos co Patrimonio Cultural

“Xardíns históricos: a protección dun patrimonio cultural” é o título da nova sesión dos Encontros Monográficos co Patrimonio Cultural (EMPC). A cita, organizada pola Sección de Patrimonio e Bens Culturais do Consello da Cultura Galega (CCG), reunirá este martes, 11 de xuño (16:00 horas), diferentes especialistas para abordar os problemas de conservación e valoración dos xardíns históricos como bens culturais. Ricardo Varela é o coordinador desta actividade, que se desenvolverá presencialmente na sede institucional do CCG e que tamén se poderá seguir en directo a través do sitio web e as redes sociais corporativas.
06/06/2024

Expertos e cidadanía urxen a definición dun modelo enerxético propio

“Estamos en crise enerxética, que se debe á non-adaptación do sistema enerxético aos límites da biosfera. E esta crise provoca pobreza nas economías domésticas e no ámbito empresarial”, apuntaba a profesora e investigadora Rosa Regueiro no relatorio que abriu a xornada “A cuestión enerxética en Galicia: entre economía, territorio e sociedade”, organizada polo Consello da Cultura Galega (CCG). Durante dous días especialistas e investigadores, xunto con representantes de colectivos cidadáns implicados en procesos de implantación de enerxías renovables, defenderon a necesidade de definir un modelo de transición enerxética que respecte as comunidades locais, o territorio, a paisaxe, a biodiversidade e o patrimonio. A creación dunha zona franca para atraer a cadea de valor da enerxía, un sistema de tributación especial, a constitución dunha empresa pública de enerxía ou unha mellor planificación da ordenación do territorio son algunhas das medidas que se puxeron sobre a mesa. A presidenta do CCG, Rosario Álvarez, incidiu na inauguración en que esta xornada se insire nunha liña de traballo continuada da institución, “preocupada pola perda da diversidade, a situación real do clima e as consecuencias que pode ter o modelo enerxético sobre o patrimonio e os valores culturais do pobo galego”.
05/06/2024

Unha xornada homenaxea o legado de Dorothé Schubarth, figura fundamental para a música tradicional galega

Con música, baile e palabra o Consello da Cultura Galega (CCG), o Museo do Pobo Galego e o Instituto da Lingua Galega da USC (ILG-USC) celebrarán o vindeiro 12 de xuño un acto de homenaxe para lembrar a figura de Dorothé Schubarth (Basilea, Suíza, 1944-2023). A presidenta do CCG, Rosario Álvarez; a presidenta do Padroado do Museo do Pobo Galego, Concha Losada, e a directora do ILG-USC, Elisa Fernández Rei, destacaron na súa presentación do programa o papel central que esta musicóloga e compositora suíza representou para o folclore galego. “É unha homenaxe que o pobo galego lle brinda a Dorothé polo seu traballo titánico e xeneroso”, apuntou Rosario Álvarez. Concha Losada destacou a importancia deste legado, que inspirou e contribuíu á música actual e que “todas as que colaboran neste inmenso agradecemento de todo o país o fan voluntariamente”. Pola súa parte, Elisa Fernández Rei engadiu que “o programa é unha festa na que lembraremos a muller, pero tamén escoitaremos a súa música”. Ademais, hoxe incorporouse a súa entrada biográfica ao Álbum de Galicia, a colección de biografías do CCG, escrita polo musicólogo Sergio de la Ossa.
04/06/2024

O novo especial de Proxector recompila unha ducia de vídeos didácticos sobre os arquivos

“Arquivos: conservar a memoria para mellor difundila” é o título da nova entrega de Proxector, iniciativa que desenvolve o Centro de Documentación Sociolingüística de Galicia (CDSG) do Consello da Cultura Galega (CCG) en colaboración coa Universidade de Santiago de Compostela (USC). Os doce recursos audiovisuais que se escolman nesta ocasión buscan dar a coñecer algúns dos arquivos de referencia en Galicia, profundar nas súas funcións e nos servizos que prestan, así como pór en valor os documentos que neles se custodian. Con este especial o CCG súmase ao Día Internacional dos Arquivos, que se conmemora anualmente o 9 de xuño para promover a importancia deste tipo de institucións.
04/06/2024

Especialistas de diferentes ámbitos analizan o proceso de implantación das enerxías renovables

A enerxía solar, a eólica…, en resumidas contas, as enerxías renovables son o futuro ante a crise do actual sistema enerxético. Sobre o seu modo de implantación e as diferenzas entre o que acontece en España e no resto de Europa, así como sobre a necesidade de conciliar o impacto a nivel económico, social, patrimonial e ambiental, falarán desde mañá no Consello da Cultura Galega (CCG) unha ducia de expertos e expertas. A xornada titulada “A cuestión enerxética en Galicia: entre economía, territorio e sociedade” está organizada polas seccións de Pensamento, de Patrimonio e Bens Culturais e de Ciencia, Tecnoloxía, Natureza e Sociedade do CCG. A presidenta do CCG, Rosario Álvarez, inaugurará esta cita presencial, que poderá seguirse en directo desde o web e as redes sociais da institución.
03/06/2024

A oitava entrega do proxecto Sextina pon o foco na actividade feminista a prol da legalización do aborto

Aborto. Corenta anos de mobilizacións é o título do recurso que se acaba de incorporar á Sextina, proxecto do Centro de Documentación en Igualdade e Feminismos (CDIF) do Consello da Cultura Galega (CCG) que divulga semestralmente documentos pouco coñecidos pola súa antigüidade, tipoloxía ou procedencia. A publicación presenta unha achega cronolóxica e documental sobre as actividades que levaron a cabo diferentes agrupacións feministas para reclamar a legalización e gratuidade do aborto desde a década dos setenta ata o ano 2014. Carteis, pancartas, adhesivos, fotografías e referencias documentais son algúns dos materiais recompilados nesta monografía, que xa está dispoñible para a súa descarga no sitio web corporativo.
31/05/2024

O Arquivo Sonoro de Galicia participa na xornada “Transformando a música en patrimonio”

O patrimonio sonoro centra este venres, 31 de maio, a xornada titulada “Transformando a música en patrimonio” da Biblioteca de Galicia, institución cabeceira do sistema de bibliotecas da nosa comunidade. Na cita, dirixida a profesionais e persoas interesadas en saber como funcionan as institucións da memoria, analizarase a situación actual deste tipo de patrimonio. O Arquivo Sonoro de Galicia participa cun relatorio titulado “Arquivo Sonoro de Galicia: fonte para o estudo da nosa identidade”.
31/05/2024

Un gran coro infantil cantoulle á Xeración Nós en Ribadavia na oitava edición de No bico un cantar

As palabras de Otero Pedrayo, Risco e Álvaro de las Casas resoaron nas voces dos trescentos cincuenta nenos e nenas que encheron o Castelo de Ribadavia na oitava edición de No bico un cantar. “Esta é unha actividade moi querida por nós. Programámola pensando nas nenas e nenos que son os protagonistas do día, para que sexa unha experiencia rica e inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade que a institución organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia e mais coa colaboración do Concello de Ribadavia. O conselleiro de Cultura, José López Campos, destacou que este concerto, que pecha unha xornada de convivencia e o traballo de todo un ano, “adobía con acerto música, lecer e patrimonio”. Maximino Zumalave dirixiu este gran coro acompañado da formación de metais Hércules Brass. Ademais, anunciouse que a vindeira edición terá lugar en Rianxo con Castelao como protagonista, cando se fan 75 anos do seu pasamento.
30/05/2024

Mellora a percepción social da ciencia en Galicia segundo o Observatorio da Cultura Galega

A ciencia e a tecnoloxía ocupan o noveno lugar entre os asuntos de interese para a cidadanía galega. A evolución deste indicador nas dúas últimas décadas é positiva, aínda que decae con respecto a 2018 e Galicia está 2,3 puntos por debaixo da media española na evolución histórica. Son algúns dos achados do documento de traballo Percepción social da ciencia e da tecnoloxía en Galicia, que acaba de facer público o Observatorio da Cultura Galega, servizo dependente do Consello da Cultura Galega (CCG). O documento xa está dispoñible para a súa descarga.
30/05/2024

O castelo de Ribadavia acolle este venres o encontro musical No bico un cantar

Máis de trescentos cincuenta nenos e nenas participan este venres na oitava edición de No bico un cantar. Unha cita que xunta música, literatura e mocidade nun encontro que arrinca pola mañá, coa chegada do alumando procedente dos conservatorios de música profesional de Galicia xunto coas escolas de música da zona, e remata co concerto (18:00 horas) no Auditorio Rubén García do Castelo de Ribadavia. Maximino Zumalave dirixe esta actuación organizada polo Consello da Cultura Galega (CCG), as consellerías de Educación, Ciencia, Universidades e Formación Profesional e a de Cultura, Lingua e Xuventude da Xunta de Galicia, coa colaboración do Concello de Ribadavia. A escritora Rosa Aneiros é a mantedora deste acto ao que asiste a presidenta do CCG, Rosario Álvarez; o Conselleiro de Cultura, José López Campos; e o alcalde de Ribadavia, César Fernández. No programa destaca a estrea absoluta de Vos nova, peza composta para a ocasión por Aaron Siebert sobre texto de Otero Pedrayo.
29/05/2024

O pensamento de Luísa Villalta centra a sesión de maio do ciclo Pensarmos

A Sección de Pensamento do Consello da Cultura Galega (CCG) organiza mañá, 30 de maio (18:00 horas), unha nova sesión do ciclo Pensarmos. Nesta ocasión, a sección coordinada por Celia Pereira Porto aproveitou que estamos no mes das Letras Galegas para programar unha actividade que permita afondar na figura da persoa homenaxeada: Luísa Villalta (A Coruña, 1957-2004). A poeta Eva Veiga será a encargada de achegarse ao pensamento da escritora coruñesa. A sesión desenvolverase de xeito presencial na sede da institución, pero tamén se poderá seguir en directo a través do sitio web e as redes sociais corporativas.
29/05/2024

O Álbum de Galicia suma a entrada de Ramón Piñeiro, primeiro presidente do Consello da Cultura Galega

O Álbum de Galicia, a colección biobibliográfica do Consello da Cultura Galega (CCG), incorpora a entrada de Ramón Piñeiro (Armea de Abaixo, Láncara, 1915 – Santiago de Compostela, 1990) no ronsel do aniversario do seu nacemento, que se conmemora este venres 31. Filósofo, ensaísta, publicista e académico, o seu compromiso co dereito ao autogoberno do pobo galego e coa defensa da lingua e cultura propias erixírono como un dos principais referentes do galeguismo do século XX. Xosé Luís Pastoriza Rozas asina a entrada, na que destaca o seu papel na Lei de normalización lingüística, aprobada por unanimidade en 1983, ano en que foi elixido primeiro presidente do CCG.
28/05/2024

Unha xornada revisa os vinte e cinco anos da Illa das Esculturas

En xullo de 1999 inaugurábase en Pontevedra a Illa das Esculturas, un espazo natural próximo ao centro da cidade no que realizaron as súas obras algúns dos creadores máis importantes do mundo: Richard Long, Dan Graham, Francisco Leiro…., entre moitos outros. A Illa das Esculturas vinte e cinco anos despois é o título do encontro no que a Sección de Creación e Artes Visuais Contemporáneas do Consello da Cultura Galega (CCG) xunta as persoas que botaron a andar este proxecto, como Antón Castro, con outros creadores e xestores para facer unha revisión do que foi este cuarto de século e das posibilidades de futuro. Ramón Rozas coordina esta cita, que se desenvolverá na tarde deste mércores (a partir das 17:00 horas) na Casa das Campás. A xornada non se retransmitirá en directo, pero será gravada e posteriormente subiranse os vídeos ao web e ás redes sociais do CCG.
27/05/2024

Trescentos cincuenta nenos e nenas cantan á Xeración Nós na oitava edición de No bico un cantar

O centenario da publicación do primeiro número de Nós, voceiro da histórica entidade, centra o programa da oitava edición de No bico un cantar, unha actividade organizada polo Consello da Cultura Galega (CCG) que pon música á tradición literaria galega para divulgala entre o alumnado dos conservatorios e centros de ensino musical de toda Galicia. Máis de trescentos cincuenta nenos e nenas participarán neste encontro, que terá lugar no Auditorio Rubén García do Castelo de Ribadavia o vindeiro 31 de maio (18:00 horas). A presidenta do CCG, Rosario Álvarez, destacou na presentación “a recuperación deste proxecto que se tivo que suspender por mor da pandemia, que xunta música, literatura e mocidade e co que contribuímos a crear un corpus musical coa encarga dunha composición, que nesta ocasión recae en Aaron Siebert e leva por título Vos nova sobre texto de Otero Pedrayo”. O director xeral de Cultura, Anxo Lorenzo e o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez destacaron na rolda os traballos de preparación previos levados a cabo desde os conservatorios, mentes que o alcalde de Ribadavia, César Fernández, agradeceu a escolla desta localidade para lembrar a Xeración Nós. Maximino Zumalave, director do concerto destacou que “a música sempre se asocia aos días de festa, e precisamente isto é o que imos desenvolver este venres, unha gran festa que xunta a mocidade cantando na nosa lingua coa nosa música”.
25/05/2024

Especialistas analizan o papel social das igrexas nos fluxos migratorios na Europa da posguerra

Asistencia humanitaria, actividades de lecer, tramitación de documentación... a asistencia social prestada polas diferentes confesións relixiosas durante os movementos migratorios producidos en Europa após a II Guerra Mundial tivo múltiples formas. Sobre elas afondaron especialistas de Italia, Francia, Portugal, Suíza e España na xornada Migracións, asistencia social e igrexas na Europa da posguerra organizada polo Arquivo da Emigración Galega (AEG) do Consello da Cultura Galega (CCG) que se celebrou durante os días 23 e 24 deste mes de maio. Xosé Manoel Núñez Seixas, vicepresidente do CCG e director do Arquivo da Emigración Galega (AEG), subliñou na inauguración a atención que “dentro do CCG sempre se prestou á diáspora galega”. As intervencións pódense consultar desde o web da institución.
23/05/2024

Publicados fondos documentais da Unión Progresista del Distrito de Salvatierra de Miño en Buenos Aires

A nova entrega de Memoria documental das sociedades da emigración galega , iniciativa que mantén o Arquivo da Emigración Galega (AEG) do Consello da Cultura Galega (CCG), divulga a documentación pertencente á Unión Progresista del Distrito de Salvatierra de Miño en Buenos Aires. A sociedade foi creada pola colectividade de salvaterrenses na Arxentina co fin de axudar as e os compatriotas emigrados, así como de promover o desenvolvemento do seu concello natal. Entre os fondos documentais que se difunden neste mes de maio inclúense a acta de fundación da entidade, os libros de actas das reunións societarias, algúns dos seus balances e memorias, así como a correspondencia enviada e recibida.
22/05/2024

A entrada da parteira Genoveva Vázquez Calviño incorpórase ao Álbum de Galicia

Genoveva Vázquez Calviño (Ponte Barxes, Bande, 1896 – Xinzo de Limia, 1971) exerceu como parteira nas zonas rurais de Ourense durante medio século, un labor polo que chegou a ser coñecida e respectada en toda a provincia. O Álbum de Galicia, a colección dixital de biografías que mantén o Consello da Cultura Galega (CCG), acaba de incorporar a súa entrada cun texto asinado pola Asociación Escola Rural de Saúde da Limia.
22/05/2024

Unha xornada analiza o labor asistencial das igrexas na Europa da posguerra

Migracións, asistencia social e igrexas na Europa da posguerra é o título da xornada que o Arquivo da Emigración Galega (AEG) do Consello da Cultura Galega (CCG) organiza os días 23 e 24 de maio na sede institucional. A cita, que ten como obxectivo analizar a axuda que prestaron as diferentes confesións para velar polo coidado das persoas emigradas e refuxiadas, reunirá diferentes especialistas de Italia, Francia, Portugal, Suíza e España. A presidenta do CCG, Rosario Álvarez, inaugurará a xornada xunto cos seus coordinadores, Luís Domínguez Castro e José Ramón Rodríguez Lago. A actividade é presencial, pero poderá seguirse en directo a través do sitio web e as redes sociais corporativas.
20/05/2024

Caligrafías musicais incorpora unha detallada intervención de Rogelio Groba sobre Béla Bartók

A complexa e fecunda personalidade de Béla Bartók (1881-1945) centra a conferencia que Rogelio Groba pronunciou a principios dos anos oitenta na Coruña, con ocasión do centenario do nacemento do compositor húngaro. Esta intervención, que forma parte do Fondo Ramiro Cartelle, é a nova entrega do proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimestralmente conferencias destacadas de prestixiosos estudosos do eido musical galego. A conferencia estivo acompañada de intervencións musicais e nela Groba destaca os trazos máis destacados da personalidade, biografía e carreira musical de Bartók.