Presentación da campaña
Por que deseñamos esta campaña?
Para transmitirlle á comunidade educativa, que é coa que traballamos, pero tamén ao conxunto da sociedade galega, un sentimento que debería ser común a todos nós, independentemente da ideoloxía de cadaquén, da súa condición social ou do lugar onde se viva, independentemente da idade, raza, orixe ou cor de pel que teñamos.
O que queremos transmitir?
Que ter unha lingua propia é unha SORTE, non unha desgraza, é un ORGULLO, non un problema...
Porque hai quen se empeña en ver, ou en facer ver, o galego coma un problema, e non o é, é un motivo de ORGULLO.
Por iso lanzamos esta campaña, para PRESUMIR do que somos, do que temos, do noso, para FACHENDEAR da nosa lingua.
E ese orgullo a nós xa nos vén de vello, e herdámolo de moitos que se esforzaron antes ca nós pola lingua, pero queremos que se estenda e que dure, por iso deseñamos esta campaña non como algo puntual, senón coma unha campaña que nos gustaría que fose duradeira no tempo, igual ca
o ORGULLO de ter unha lingua propia, un patrimonio que debemos conservar.
o ORGULLO por ter unha lingua de futuro que –se queremos- podemos utilizar en todos os ámbitos.
o ORGULLO por ter unha lingua que nos abre camiños á comunicación con millóns de persoas no mundo.
o ORGULLO de ter unha lingua de noso.
Como se materializa esta campaña?
Nesta primeira fase, consta de dúas partes:
A campaña gráfica componse de materiais nos que vai estampado o lema da campaña, que elaborou de maneira totalmente desinteresada un deseñador profesional, ao que lle estamos inmensamente agradecidos, xa que sen el, en realidade, non teriamos campaña. Os distintos modelos de materiais están dispoñibles nesta páxina web a disposición dos diferentes ENDL, e mais de todos os que mostren interese neles, para que poidan escoller, imprimir e difundir os que queiran. Trátase de modelos de camisolas, chapas, adhesivos, cartaces, marcapáxinas, colantes para coches e banners para páxinas web. Estes son os materiais que xa están á disposición de quen teña interese neles, pero imos ir engrosando esta lista con máis mostras que xa se están deseñando.
Os vídeos. Presentamos tamén dous vídeos que se elaboraron, produciron e editaron grazas á colaboración igualmente desinteresada de Antón Reixa e da produtora Filmanova e dalgunhas das figuras máis destacadas que ten Galicia, dos que todos os galegos nos sentimos tamén moi orgullosos. Actores, actrices, músicos e xornalistas colaboraron connosco desinteresadamente.
Luís Tosar, Antón Reixa, Belén Regueira, Martín Rivas, Susana Seivane, e María Castro, protagonistas do vídeo “Orgullosos do galego”, así coma Isabel Risco e Carlos Ares, protagonistas do vídeo “En galego, proba e verás”, fixeron un oco nas súas axendas sempre apretadas e aceptaron realizar un traballo de balde, altruísta igual ca o noso, porque comparten as mesmas inquietudes que temos nós pola lingua galega e porque os move o mesmo orgullo.
A todos eles, así coma aos extras, guionistas, cámaras e toda a xente que participou na elaboración dos vídeos, tamén de forma desinteresada, así coma á persoa que se encargou de que todo estivese a punto hoxe para visualizalo na nosa web, queremos reiterarlle o noso enorme agradecemento.
Como se difunde?
A Coordinadora galega de ENDL formada por docentes que se esforzan porque a lingua galega ocupe o lugar que merece na nosa sociedade, ademais doutras tarefas, ocúpase da elaboración de materiais, ou organiza a elaboración de materiais coma estes, e ponos á disposición da sociedade. Aí están para que se empreguen nas comunidades educativas, pero tamén para que quen queira bote man deles e os difunda, porque xa non son nosos, son da sociedade galega.
