A celebración o día 9 de xuño do Día Internacional dos Arquivos – día escollido coincidindo coa fundación do Consello Internacional de Arquivos da Unesco, o 9 de xuño de 1948- sérvenos de excusa para botar a vista atrás e recuperar os diferentes proxectos, documentos e reflexións que fomos xuntando ao longo dos anos, ademais da propia existencia no seo do Consello da Cultura Galega do Arquivo da Emigración Galega, o Arquivo Sonoro de Galicia, o Centro de Documentación en Igualdade e Feminismos e Centro de Documentación Sociolingüística de Galicia. Tanto nos diversos informes como nos eventos realizados salientouse o papel dos arquivos como garantes da seguridade e a transparencia das actuacións da Administración, como promotores da preservación da memoria histórica e como protectores do dereito da cidadanía a acceder á información e ao coñecemento, tal como puxo de relevo a Declaración Universal sobre os Arquivos, aprobada pola Unesco na súa 36.ª Conferencia Xeral en París, o 10 de novembro de 2011.