Mañá, 30 de outubro, a partir das 20:30 horas, o Auditorio de Galicia de Santiago de Compostela acollerá a gala ari[t]mar 2025, na que se fará entrega dos premios da música e da poesía galego-portuguesas. Os/as galardoados/as desta edición son Mondra, Diogo Piçarra e Pedro Abrunhosa (na categoría de música); Elba Pedrosa e Cátia Cardoso (na categoría de poesía); e o Município de Braga (Premio especial do xurado á embaixada da amizade galego-lusófona).

A cerimonia, de entrada libre ata completar o aforo, será presentada por Tati Moyano e Xurxo Souto.

Ari[t]mar é un proxecto didáctico e cultural organizado polo Equipo de Dinamización da Lingua Galega da EOI de Santiago, en colaboración cos Departamentos de Galego e de Portugués da escola. O seu obxectivo é divulgar a música e a poesía galego-portuguesas actuais, e achegar a cultura e a lingua dos dous países, no marco do desenvolvemento da Lei Valentín Paz-Andrade.