Novas da lingua

Rexistros1 a 30 de 5493
  1. Inicio
  2. CDSG-CCG
  3. Novas da lingua
26/10/2026. INVESTIGACIóN

Dicionário de Zoologia e Zoonímia dos Invertebrados. Português-Espanhol-Inglês-Alemão: 180 000 termos en catro linguas

O profesor Carlos Garrido, da Facultade de Filoloxía e Tradución da Universidade de Vigo, publica o que se estima como o maior traballo lexicográfico, 1356 páxinas, en galego-portugués sobre os invertebrados.

A obra conta con 180 000 termos, c. 31 200 definicións e c. 28 000 entradas zoonímicas, das cales c. 26 200 ofrecen a designación vernácula ou paracientífica nas catro linguas do dicionario: galego-portugués, castelán, inglés e alemán.

Podes atopalo á venda no Servizo de Publicacións da Universidade de Vigo. Para máis información, preme aquí.
26/10/2026. AXUDAS E PREMIOS

“Vitamina G” para a promoción da lingua gana o 1º premio da XVII edición de EducaCompostela

O Departamento de Educación do Concello de Santiago e Nova Escola Galega fan pública a decisión do xurado da XVII edición dos premios EducaCompostela de materiais didácticos en prol da innovación, da calidade educativa e da renovación pedagóxica.

O primeiro premio levouno o proxecto titulado Vitamina G, de Mariña Lema Blanco. Trátase dunha actividade de dinamización da lingua para estender o seu uso entre alumnado, familias e comunidade escolar a través de recursos audiovisuais nos que os estudantes son os propios protagonistas.

Máis información na web de Nova Escola Galega.
23/10/2026. DINAMIZACIóN

Xeopasatempos para o xeoparque Montañas do Courel

O xeoparque Montañas do Courel, integrado polos concellos de Quiroga, Ribas de Sil e Folgoso do Courel, publica unha revista destinada ao ensino para que dar a coñecer mellor o seu territorio e profundar na lingua galega a través do xogo.

O traballo previo foi elaborado por alumnado de infantil e primaria coordinado por Celia Díaz Núñez, en obradoiros de palabras relacionadas coa flora, a fauna ou a toponimia do xeoparque.
23/10/2026. LEXISLACIóN

O CIEMEN impulsa a actualización da Declaración Universal de Dereitos Lingüísticos

O Centro Internacional Escarré para as Minorías Étnicas e as Nacións (CIEMEN) e o PEN Català reúnen o 23 e 24 de outubro de 2026 corenta especialistas de diversas procedencias e disciplinas co obxecto de actualizar a Declaración Universal de Dereitos Lingüísticos fronte a factores como a tendencia homoxeneizadora e a necesidade de reforzar a protección da diversidade lingüística. Tamén se pretende que o texto dea resposta a ámbitos como as redes sociais, as plataformas dixitais e a investigación, e que garanta o papel das linguas propias de cada comunidade na educación.

Desde Galicia, participa neste Comité de actualización Pilar García Negro, quen xa estivo no de elaboración da Declaración inicial. Tes máis detalles na web da Mesa pola Normalización Linguística.
22/10/2026. AXUDAS E PREMIOS

As escolas Semente son premiadas no Carballiño pola Asociación Avantar

A innovación pedagóxica e o labor de inmersión lingüística en galego valéronlle ás Escolas de Ensino Galego Semente o galardón correspondente ao III Premio Ernesto Atanasio "O Corcheiro".

O acto de entrega do premio será o sábado 24 de outubro de 2026, ás 19.30 horas, no salón de actos do Casino do Carballiño. A Asociación Cultural Avantar, fundada en 1974, recoñece deste xeito o labor de persoas ou colectivos destacados pola súa contribución á cultura e á lingua galegas.
22/10/2026. DINAMIZACIóN

Preséntase "Letras Galegas para a Eternidade: Epitafios da Costa Ártabra"

Mañá, 23 de outubro de 2026, ás 19.00 horas, no centro cívico de Canido, inaugúrase a exposición Letras Galegas para a Eternidade: Epitafios da Costa Ártabra.

No acto intervirán a antropóloga Emma Pedreira e Bernardo Penabade, coordinador do proxecto Palabra e memoria. Na creación desta exposición, participaron tamén o Grupo de Investigación en Experiencia Turística da Universidade da Coruña, a Deputación Provincial, a Asociación Veciñal Muíño do Vento e o Concello de Ferrol.

21/10/2026. CURSOS E CONGRESOS

Faladoiros Vigo 2026-2027: sesións de conversas en galego

A Asociación Faladoiros Vigo pon en marcha o curso 2026-2027, creando, un ano máis, espazos de conversa en galego que xuntan a persoas voluntarias que falan habitualmente en galego con outras que desexan practicar e mellorar a súa fluidez e competencia comunicativa no noso idioma.

Nesta edición hai tres sesións semanais; dúas delas presenciais (unha no café De Catro a Catro e outra na cafetería da EOI) e unha terceira que se organiza en liña, entre os meses de outubro de 2026 e xuño de 2027.

A asistencia aos faladoiros é de balde. Se o desexas, podes inscribirte no formulario que atoparás na páxina web da asociación.
21/10/2026. CURSOS E CONGRESOS

A Universidade de Vigo organiza a II Conferencia Internacional de Investigación en Linguas

Os días 19 e 20 de novembro de 2026, no edificio Redeiras, vai ter lugar a segunda edición da Conferencia Internacional de Investigación en Linguas.

O congreso abordará contidos que se axustan ás liñas de investigación do instituto iLingua: lingüística interna e variación lingüística; relación entre sociedade, ideoloxía e política lingüística; linguas, cognición e educación; tradución e interpretación; lingua e literatura; lingua e accesibilidade; e humanidades dixitais.

Ademais das conferencias plenarias, esta edición ofrece máis de 60 comunicacións de autores e autoras procedentes de universidades e centros de investigación de ata once países diferentes.
21/10/2026. CURSOS E CONGRESOS

IX Xornadas “Educación e linguas en Galicia”

O Servizo de Normalización Lingüística da USC e a Comisión de Normalización Lingüística da Facultade de Ciencias da Educación organizan a novena edición de Educación e linguas en Galicia, xornadas que van ter lugar na Facultade de Ciencias da Educación (edificio do Campus Vida) o 5 e 12 de novembro de 2026.

A inscrición é de balde, ata completar aforo, e a asistencia dá dereito a un diploma co recoñecemento de 9 horas presenciais.
21/10/2026. AXUDAS E PREMIOS

IX Premios Lingua e Empresa do Concello de Ames

A Concellaría de Normalización Lingüística e a de Promoción Económica do Concello de Ames convocan a novena edición dos Premios Lingua e Empresa, orientados a recoñecer o uso e fomento da lingua galega na actividade empresarial.

Poderán presentar a súa candidatura as empresas con sede social ou centro de actividade no concello de Ames. As empresas interesadas deben descargar este formulario e entregalo a través das canles indicadas antes do 20 de novembro de 2026.

Toda a información sobre a convocatoria podes consultala aquí.
19/10/2026. INVESTIGACIóN

Convocatoria para a vinculación de persoal investigador ao Instituto da Lingua Galega

O Instituto da Lingua Galega da USC abre unha convocatoria de expresións de interese para a vinculación de persoal investigador á súa actividade científica.

O prazo está aberto ata o 28 de outubro de 2026. As solicitudes teñen carácter estritamente individual e deberán remitirse por correo electrónico ao enderezo ilgsec@usc.gal. Deben conter un currículo breve e este fomulario cuberto.

Podes consultar a información ampliada aquí.
16/10/2026. AXUDAS E PREMIOS

Subvencións da Deputación da Coruña para gastos de persoal dos SNL das entidades locais

A Deputación da Coruña publica as bases reguladoras da convocatoria de subvencións dirixidas aos concellos, agrupacións de concellos, mancomunidades e outras entidades locais da provincia da Coruña, para contribuír ao financiamento do persoal técnico de normalización lingüística durante o ano 2027.

Poderán participar todos os concellos da provincia da Coruña de 5000 ou máis habitantes, ou agrupacións de concellos e mancomunidades que, entre eles, cheguen a esa cifra mínima. No caso dos concellos sometidos ao réxime de organización de municipios de gran poboación, só poderán ser beneficiarios os que teñan máis dunha persoa técnica de normalización lingüística cun posto de traballo recollido na relación de postos de traballo ou instrumento de ordenación de persoal que corresponda.

A forma e prazo da solicitude regúlanse na Ordenanza xeral de subvencións e transferencias da Deputación da Coruña.
16/10/2026. CURSOS E CONGRESOS

Simposio ILG 2026. Lingua(s) e identidade(s) nas redes sociais: análise discursiva, oportunidade didáctica e revitalización lingüística

O Instituto da Lingua Galega convoca o seu simposio anual centrado, nesta ocasión, na capacidade das redes sociais para construír e negociar as identidades contemporáneas.

Con respecto aos destinatarios, oriéntase ás persoas investigadoras da análise do discurso, da sociolingüística e da didáctica da lingua, xunto con persoas dedicadas á creación de contidos.

As xornadas vanse desenvolver o 24 e 26 de novembro de 2026 na Facultade de Filoloxía da USC. A inscrición debe realizarse a través deste formulario ata o 20 de novembro de 2026.

Toda a información na páxina do Simposio.
16/10/2026. DINAMIZACIóN

Obradoiro de regueifa para docentes en Pontevedra

O Servizo de Normalización Lingüística de Pontevedra dá inicio ás actividades de Enreguéifate o próximo día 23 de outubro, cun obradoiro destinado a profesorado interesado en explorar estratexias para fomentar a expresión, a empatía e o traballo en equipo nas aulas, ao tempo que promoven valores como a diversidade, a cooperación, a integración e o feminismo.

O prazo de inscrición remata o 20 de outubro de 2026 e hai 45 prazas dispoñibles. Tes máis información aquí.
16/10/2026. DINAMIZACIóN

O Foro Enrique Peinador presenta a Guía básica de galeguización empresarial

O Foro Enrique Peinador, coa colaboración da Deputación de Pontevedra, edita un manual con recomendacións e suxestións orientadas a que as empresas incorporen e promovan o uso do galego como un elemento máis da súa cutura corporativa.

A Guía básica de galeguización empresarial reúne referencias legais e propostas para paliar a marxinación da lingua galega no ámbito económico: "nas páxinas web, na sinalética, na telefonía, nas nóminas e contratación laboral, incluídas as cláusulas dos dereitos lingüísticos de traballadores e consumidores".
16/10/2026. CURSOS E CONGRESOS

O Concello de Quiroga convoca un curso de iniciación ao galego entre o 26 e o 30 de outubro

O Concello de Quiroga, coa colaboración de Cruz Vermella, organiza un curso presencial de lingua e cultura galegas. O propósito é dobre: fomentar a integración e a inclusión sociocultural efectivas das persoas participantes, así como aproveitar o potencial que supón a chegada de persoas de fóra de Galicia como un xeito de incrementar o número de neofalantes.

Esta formación é de balde, ten unha duración de 20 horas e un límite de 20 prazas, que se cubrirán por orde de solicitude.

A inscrición presencial farase na Biblioteca Municipal da Casa da Cultura (Rúa Real s/n 1º andar).
15/10/2026. CURSOS E CONGRESOS

IV Xornada sobre variación e cambio lingüístico

O Instituto da Lingua Galega da Universidade de Santiago de Compostela e o Centro de Línguas, Literaturas e Culturas da Universidade de Aveiro organizan a IV Xornada sobre variación e cambio lingüístico, un encontro que reunirá o vindeiro 5 de novembro de 2026 a investigadores e investigadoras para difundir os seus estudos sobre a variación e o cambio lingüístico.

Nesta convocatoria, que terá lugar na Facultade de Filoloxía da Universidade de Santiago de Compostela, presentaranse traballos vinculados co tratamento e análise de documentación oral, tanto para a investigación como para a súa aplicación ás tecnoloxías da fala.

Podes informarte sobre o programa e a inscrición nesta ligazón.
15/10/2026. CURSOS E CONGRESOS

Convocada a proba en liña para a obtención do Celga 4 no ano 2026

A Secretaría Xeral da Lingua convoca unha proba en liña para a obtención do Certificado de lingua galega 4 (Celga 4) en 2026. Poderán participar todas as persoas maiores de dezaoito anos ou que os fagan no ano natural da convocatoria.

A proba, para a que se dispoñen 200 prazas, terá lugar o 27 de novembro de 2026, sempre que ningunha circunstancia excepcional o impida.

As persoas que desexen inscribirse nesta convocatoria deberán presentar dúas solicitudes: unha a través da sede electrónica da Xunta de Galicia, para os efectos do rexistro oficial de entrada e a correspondente tramitación administrativa; e outra a través da plataforma de teleformación da Secretaría Xeral da Lingua, pois esta constitúe o soporte técnico indispensable para a realización da proba en liña.

O prazo de inscrición será de dez días hábiles, que se contarán a partir do día seguinte ao da publicación da resolución no Diario Oficial de Galicia.
15/10/2026. DINAMIZACIóN

Andaina "Reivindica o galego: camiña e fala na túa lingua" en Valga

O Concello de Valga, coa colaboración dacSecretaría Xeral da Lingua, organiza unha andaina co obxectivo de promover o uso da lingua galega na vida e nas actividades cotiás.

A andaina sairá do parque Irmáns Dios Mosquera o 17 de outubro de 2026, a partir das 9.30 h. As persoas interesadas teñen que remitir a folla de inscrición ao correo xestion@valga.gal.

Máis información aquí.
13/10/2026. OUTRAS

DuckDik Sense, primeira pulseira de saúde que funciona integramente en galego

A empresa DuckDik lanza unha pulseira ou banda de saúde na que se pode escoller a lingua de uso entre as oficiais no Estado: galego, éuscaro, catalán, castelán e valenciano.

Este aparato non ten pantalla, toda a "comunicación" realízase a través dunha aplicación na que a persoa usuaria interactúa cos distintos servizos na lingua que desexe. A explicación dos creadores resulta evidente: “unha persoa non entende igual unha recomendación sobre a súa saúde nunha segunda lingua que na súa. Se o que vendemos é comprensión, traducir só os botóns non serve de nada”.
13/10/2026. INVESTIGACIóN

En rede "O libro en Galicia: produción editorial, lingua e mercado"

O Consello da Cultura Galega acaba de poñer en rede o último informe do Observatorio da Cultura Galega, co título O libro en Galicia: produción editorial, lingua e mercado. O informe, que colle os seus datos da estatística de ISBN e do Comercio Interior del Libro, sitúa a edición galega como un sistema de “alta densidade cultural e modesta escala económica”. Así mesmo, os datos falan de estabilidade na produción e fortaleza do sector editorial e da súa capacidade asociativa.

Con respecto á lingua, o galego é o principal idioma das publicacións realizadas en Galicia, por diante do castelán; máis a súa representación económica é considerablemente menor.

Accede á nota de prensa para coñecer un resumo dos datos.

09/10/2026. DINAMIZACIóN

Aberta a inscrición no certame de contos orais non profesionais Bótalle un conto

O Concello de Pontevedra pon en marcha unha nova edición de Bótalle un conto, certame de contos orais non profesionais que pretende prestixiar e visibilizar as persoas galegofalantes e os seus trazos dialectais e promover a participación interxeracional. Valorarase nos participantes a habilidade para emocionar e engaiolar coa palabra en catro minutos.

Accede á información completa e o formulario de inscrición na web do Servizo de Normalización Lingüística do Concello.
08/10/2026. LEXISLACIóN

O Parlamento de Galicia aproba un novo Plan xeral de normalización da lingua galega

Na sesión plenaria do 7 de outubro de 2026, o Parlamento de Galicia someteu a votación a Proposta de actualización do Plan xeral de normalización da lingua galega, presentada polo Partido Popular e o Partido Socialista de Galicia. O resultado foi de 50 votos a favor, os dos propoñentes e Democracia Ourensana, e 24 en contra, do Bloque Nacionalista Galego.

Coa aprobación deste documento, decae o PXNL vixente, que acadara o consenso da Cámara. Outro motivo importante de crítica é a modificación do polémico "Decreto do plurilingüismo" de 2010. De excluír a docencia de materias de ciencias en galego, pásase a deixar esta decisión en mans dos centros, sempre e cando dar en galego estas materias supoña impartir en castelán as materias da área de Sociais, para manter as cotas establecidas no Decreto en 2010.

Os propoñentes advirten da necesidade dunha intervención urxente e destacan do plan as case 700 medidas resultado das achegas de profesionais, entidades, institucións e particulares. O conselleiro de Cultura explicou que as principais liñas de actuación deste documento céntranse na acollida e no arraigamento da poboación chegada de fóra de Galicia, na problemática da transmisión xeracional ou no reforzo da presenza do galego nas plataformas e aplicacións dixitais.


08/10/2026. AXUDAS E PREMIOS

IV Premios Folgueira para Francisco Fernández Rei e Pablo Quintana por dignificar o galego-asturiano

Axuntar, Asociación prá normalización del galego de Asturias, fixo públicos os nomes das persoas galardonadas cos IV Premios Folgueira, que distinguen a persoas e institucións destacadas no seu labor pola dignificación do galego-asturiano.

Trátase de Pablo Quintana López, investigador e divulgador do patrimonio cultural das terras do Eo-Navia e responsable da Editorial Canela; e Francisco Fernández Rei, catedrático de Filoloxía Románica da USC e coordinador das primeiras Normas ortográficas del galego de Asturias.


A entrega dos galardóns terá lugar o 10 de outubro de 2026 ás 16:30 horas na Biblioteca de Vilanova de Ozcos.
08/10/2026. EMPREGO

O Concello de Ames convoca unha bolsa de prácticas no Servizo de Normalización Lingüística

A través do programa de formación da Fundación Empresa-Universidade Galega (FEUGA), o Concello de Ames oferta unha bolsa de prácticas para persoas graduadas en Lingua e Literatura Galegas sen experiencia laboral.

Esta bolsa, vinculada ao Servizo de Normalización Lingüística, terá unha duración de 12 meses, do 11 de novembro de 2026 ao 10 de novembro de 2027. O prazo para presentarse remata o 26 de outubro ás 14.00 horas.

Máis información

Inscrición
07/10/2026. DINAMIZACIóN

Achégase o festival dos Premios Fouciño de curtametraxes

Os VI Premios Fouciño outorgarán os galardóns aos proxectos gañadores desta edición dentro dun festival que se vai celebrar do xoves 22 ao sábado 24 de outubro en Baio.

Na programación altérnanse o cinema e a música; competicións en directo, como a de dobraxe; escolares e dirixidas á mocidade. Nesta edición, o foco ponse especialmente na animación galega.
07/10/2026. OUTRAS

Ferramenta pioneira do Proxecto Nós para avaliar o galego nos grandes modelos de IA

Arena Nós é o nome polo que se coñece a ferramenta que o Proxecto Nós presentou no Parlamento Europeo, nunha xornada organizada por Google para tratar o papel da intelixencia artificial no futuro da diversidade lingüística e cultural.

A importancia de recursos como este reside na garantía dos dereitos lingüísticos, máis tamén en conseguir unha representación profunda das diferentes linguas e culturas nos sistemas de IA.

A iniciativa concluirá o seu desenvolvemento nos vindeiros meses, co fin de facer accesibles datos públicos baseados en metodoloxías científicas de referencia. Tes máis información nesta crónica da xornada.
07/10/2026. CURSOS E CONGRESOS

Curso na Escola de Segunda Oportunidade de Santiago de Compostela para acadar o título de Competencias Básicas

As persoas interesadas en presentarse aos exames de Competencias Básicas teñen a posibilidade de recibir formación na Escola de Segunda Oportunidade que xestiona a Concellaría de Dereitos e Asuntos Sociais do Concello de Santiago de Compostela.

As clases, que comezan o 19 de outubro, impartiranse por ámbitos: o científico-técnico (matemáticas, física e química); o lingüístico (galego, castelán e lingua estranxeira) e o humanístico (historia e xeografía). Os exames oficiais convocaranse en abril e xuño.

O prazo de inscrición péchase o 15 de outubro de 2026. Para solicitar praza pódese enviar un correo electrónico a plandeinclusion@santiagodecompostela.gal ou chamar ao teléfono 618212859.

Máis información aquí.
06/10/2026. DINAMIZACIóN

1ª edición do Premio de Pódcast Transmitindo na Lingua Galega

A área de Lingua da Deputación da Coruña convoca a I edición do Premio de Transmitindo na Lingua Galega, que se concederá aos pódcast candidatados que destaquen polo uso da lingua galega nas seguintes catro categorías: O teatro do aire; A palabra fiada; A pescuda sonora e A voz da nosa lingua.

O prazo para presentar as candidaturas iníciase o día seguinte ao da publicación do extracto das bases no Boletín Oficial da Provincia e finalizará o 18 de decembro ás 14.00 h.

Podes ampliar esta información na web da Área de Lingua da Deputación.
06/10/2026. EMPREGO

Praza de técnica/o de normalización lingüística na Deputación da Coruña

O Diario Oficial de Galicia do 2 de outubro publica a oferta de emprego público de 2026 da Deputación da Coruña.

No anuncio recóllese unha praza de técnica/o de normalización lingüística.