O Servizo de Normalización Lingüística e mais o Departamento de Promoción Económica do Concello de Ames están a organizar, coa colaboración das asociacións de comerciantes e de empresarios, a campaña Calidade en Galego, co ánimo de dinamizar os usos lingüísticos no ámbito do pequeno comercio amiense.

O desenvolvemento da campaña inclúe diferentes accións, como o reparto de materiais (adhesivos para os agasallos, distintivos cos horarios de apertura e peche, paraugas de cortesía, etc.), a prestación de asesoramento lingüístico por parte do Concello ou a organización de actividades formativas para mellorar as estratexias de comunicación publicitaria e a atención ao público.