O Goberno galego aprobou, no Consello da Xunta do pasado 30 de decembro de 2009, as Bases para a elaboración do decreto do plurilingüismo no sistema educativo non universitario.

Segundo o secretario xeral de Política Lingüística, Anxo Lorenzo, o documento aséntase en tres piares: o reparto equilibrado das horas de docencia en galego e castelán, a reserva dun terzo da docencia para impartir en linguas estranxeiras (nomeadamente en inglés) e a incorporación da opinión das familias no referente ao reparto das materias que deben impartirse en cada lingua.

Antes da elaboración do documento final, que derrogará o Decreto 124/2007, estas bases serán presentadas ás forzas políticas e aos axentes sociais implicados.