A Asociación de Escritores en Lingua Galega está a organizar o programa de actos graffitiRosalía co que, en colaboración con diferentes concellos e asociacións culturais, celebrará o Día de Rosalía de Castro o vindeiro 24 de febreiro. Nesta edición o obxectivo é visibilizar os versos da escritora en espazos públicos e comunitarios, polo que convida aos centros educativos de Galicia a que graffiteen versos de Rosalía en muros ou paredes habilitadas para a actividade. Así mesmo, a AELG anima á cidadanía en xeral a festexar este día agasallando un libro en galego e unha flor.