O IES Marco do Camballón (Vila de Cruces), o IES Maximino Romero (Baio) e o IES Arratia (Biscaia) impulsan o proxecto Regueibertso Galiza-Euskal Herría, un encontro entre alumnado galego e vasco deseñado para desenvolver habilidades lingüísticas, promover a creación musical e impulsar a improvisación oral como forma de socialización entre a xente nova. Hoxe, 4 de maio, a partir das 11:30 h, terá lugar a Regueifesta (festa de improvisación oral en galego e éuscaro) no edificio Cersia de San Lázaro (Santiago de Compostela). A xornada continuará, a partir das 16:30 h, cunha mesa redonda sobre a regueifa no Museo do Pobo Galego. O intercambio escolar continuará entre os días 13 e 16 de maio, cando o alumnado galego visite o País Vasco.