Co gallo do Día Internacional da Tradución, que se celebra cada 30 de setembro, a Asociación Galega de Profesionais da Tradución e a Interpretación (AGPTI) convoca o Premio Xela Arias, para homenaxear a figura de Xela Arias e reivindicar o idioma galego como lingua de traballo no ámbito da tradución. O premio está dirixido a unha empresa, entidade ou persoa que destaque pola promoción da tradución ou interpretación cara ou desde o galego. As candidaturas poden enviarse ao correo electrónico info@agpti.org ata o día 18 de outubro.