A Área de Normalización Lingüística da Universidade de Vigo e a Deputación de Pontevedra presentan os resultados do traballo sociolingüístico que leva por título Lingua e sociedade. Guía didáctica sobre os procesos sociolingüísticos en Moaña, elaborado por Martín Vázquez e Rubén Moralejo, da Universidade de Vigo. Trátase dunha ferramenta en formato web deseñada para achegarlle á comunidade educativa contidos didácticos, de carácter teórico e práctico, relacionados co ámbito da sociolingüística, exemplificándoos con discursos e experiencias persoais dalgúns moañeses e moañesas. O obxectivo principal é fomentar no alumnado unha visión informada, realista e crítica sobre a situación social da lingua en Galicia, e máis en concreto, no concello de Moaña.