Novas da lingua

Rexistros1 a 30 de 5493
  1. Inicio
  2. CDSG-CCG
  3. Novas da lingua
13/11/2026. CURSOS E CONGRESOS

XXII Xornadas de Normalización Lingúística de Escolas Católicas de Galicia

O venres 20 de novembro de 2026, no salón de actos do Consello da Cultura galega, terá lugar a vixésimo segunda edición da Xornada de Normalización Lingüística, organizada por Escolas Católicas de Galicia.

Nesta ocasión, renderáselle homenaxe a Xosé Neira Vilas, protagonista do vindeiro Día das Letras Galegas, e tamén á dobraxe en galego. Presentaranse recursos novos e entregaranse os Premios Irmán Reboiras ás mellores iniciativas de fomento da lingua galega. A xornada está dirixida a profesorado de galego dos colexios da federación, así como de centros públicos e privados.

Consulta o programa e inscrición aquí.

12/11/2026. CURSOS E CONGRESOS

O 13º Congreso Internacional de Lingüística Misioneira atende a salvagarda do patrimonio lingüístico

Xa está aberto o rexistro para o 13º Congreso Internacional de Lingüística Misioneira: Chamada de contribucións para a Salvagarda do Patrimonio Lingüístico e Cultural Mundial, organizado conxuntamente polo Instituto de investigación Lingua da UVigo e o Centro de Estudos en Letras da Universidade de Trás-os-Montes e Alto Douro.

A primeira parte vaise desenvolver en Vigo entre o 31 de marzo e o 1 de abril de 2027. A seguir, o congreso trasladarase a Vila Real, onde terá lugar a segunda e última parte entre o 2 e o 3 de abril.

Toda a información sobre a organización e os prazos na web da organización.
09/11/2026. CURSOS E CONGRESOS

Simposio das Letras Galegas de Begoña Caamaño

A Real Academia Galega celebrará o 21 de novembro de 2026, no Museo de Arte Contemporánea de Vigo (MARCO), o Simposio das Letras Galegas 2026. Baixo o título Begoña Caamaño: literatura, xornalismo e vida, unha ducia de voces afondarán na literatura, no xornalismo e na vida da autora homenaxeada. Uxía pechará o simposio interpretando os seus temas dedicados á protagonista das Letras Galegas 2026. Ademais, proxectarase unha peza audiovisual na que o alumnado dos Cursos de lingua e cultura galegas lle dá lectura a fragmentos da obra de Caamaño en distintos idiomas.

A entrada é de balde. Coñece o programa na web da RAG.
09/11/2026. OUTRAS

Consulta e comparte o cancioneiro tradicional dixital "Foliada"

Vítor Cancela, administrador de sistemas cunha longa bagaxe no mundo da música tradicional, presenta a aplicación Foliada. Este recurso permite consultar letras, escoitar as pezas que contan con gravación, buscar por palabras ou procedencia e gardar as favoritas. As persoas usuarias tamén poden ter un papel activo incorporando letras e gravacións para seren revisadas antes da súa publicación.

Actualmente pódese descargar en Google Play, mais non se creou por agora unha páxina propia para os iPhone. A alternativa consiste en compartir o url de Android abríndoo en Safari.
06/11/2026. DINAMIZACIóN

Nace Ludogal, a plataforma de creación de xogos en liña en galego

Ludogal preséntase como a "maior plataforma de xogos en liña en galego", co propósito de converterse nunha nova ventá en lingua galega en internet. Para a súa estrea, lanza Xeogal e Xeobusca, ligados á xeografía, e Verbogal, á gramática. A estas novas ferramentas úneselles Pensatermos 2.0, un xogo que vén do que creara a Mesa pola Normalización Lingüística, colaboradora desta iniciativa.

O rexistro é de balde e pode orientarse ao lecer mais tamén ao uso educativo.
06/11/2026. LEXISLACIóN

O Concello de Mazaricos publica a ordenanza reguladora do uso do galego

O Concello de Mazaricos publica, no BOP do 6 de novembro de 2026, a Ordenanza reguladora do uso do galego, que regula os usos lingüísticos polos que debe rexerse o Concello, así como todas as unidades administrativas e servizos que del dependan.

A ordenanza aplicaráselles tamén aos organismos públicos e ás entidades de dereito público vinculadas ao Concello de Mazaricos ou dependentes del (organismos autónomos, entidades públicas empresariais, consorcios, fundacións, etc.). No caso das sociedades mercantís e outras entidades de dereito privado vinculadas ou dependentes do Concello de Mazaricos, deberán rexerse por esta ordenanza cando exerzan potestades administrativas e naqueles contidos que especificamente se refiran a elas. Así mesmo, aplicaránselles os criterios lingüísticos establecidos nesta ordenanza ás empresas adxudicatarias, concesionarias ou contratistas do Concello, así como ás entidades de explotación mixta, no desenvolvemento das prestacións obxecto da adxudicación, concesión ou contrato.

No último capítulo do texto quedan recollidas as funcións do Servizo de Normalización Lingüística compartido que manteñen os concellos de Carnota e Mazaricos.

No Kit para a normalización en rede podes consultar a listaxe completa de ordenanzas e regulamentos lingüísticos en vigor na Administración local galega.
05/11/2026. OUTRAS

Xa podes facer as túas propostas para elixir a Palabra do Ano

A Real Academia Galega e a Fundación Barrié abren a campaña para a elección popular da Palabra do Ano 2026.

As propotas do público recolleranse ata o venres 20 de novembro de 2026 ás 23:59 horas no Portal das Palabras . Tras o anuncio das voces finalistas, a votación telemática permanecerá aberta ata o 16 de decembro. Saberemos cal foi a ganadora nas vésperas do Nadal.
05/11/2026. DINAMIZACIóN

Novembro para descubrir, rir e namorar da ciencia en galego na UVigo

A Universidade de Vigo celebra o Día da Ciencia en Galego dándolle continuidade a dúas iniciativas exitosas e unha novidade. Por unha parte, publica a Escolma de Termos Científicos III, dedicada este ano ás matemáticas, á astronomía e á botánica.

Por outra, convoca a segunda edición do Concurso de monólogos científicos Gargallada Científica. O prazo de presentación abriuse o 4 de novembro de 2026 e rematará o 3 de decembro ás 12 h.

A novidade na programación deste ano consiste nun programa de citas rápidas divulgativas co persoal investigador da UVigo. Seducindo con ciencias, que require inscrición gratuíta, terá lugar o 26 de novembro en Vigo: pola mañá no campus, para a comunidade universitaria, e pola tarde, no edifico Redeiras, aberto á cidadanía.
05/11/2026. OUTRAS

Os primeiros videoxogos en galego expóñense na Biblioteca de Galicia

A Fundación Museo do Videoxogo de Galicia expón na Biblioteca de Galicia os resultados do proxecto Pioneiros II, que nos permite coñecer os primeiros xogos comerciais creados en galego e percorrer a historia dos comezos dos productos interactivos e a súa achega á presenza da lingua e a identidade galegas nos novos espazos de lecer dos anos noventa.

Entre 1989 e 1998 viron a luz O Día Despois, Cuban Mission e Terra Terremota, un traballo ligado á Revista Bravú.

Para unha información detallada, consulta a reportaxe de Código Cero.
05/11/2026. AXUDAS E PREMIOS

Resólvense as axudas para a produción editorial galega

A Consellería de Cultura , Lingua e Xuventude da Xunta de Galicia publica a resolución das axudas para a produción editorial da literatura galega para nos anos 2026 e 2027. Esta liña de axudas estrutúrase en tres programas diferentes: "Produción editorial en calquera idioma de Galicia"; "Produción editorial de libros de lectura fácil en formato físico ou dixital en galego"; e "Produción editorial de audiolibros en galego".

Podes consultar a listaxe de proxectos e entidades beneficiarias premendo aquí.
03/11/2026. AXUDAS E PREMIOS

Aprobadas as bases das competicións do Festival de contidos dixitais Carballo Interplay

A Xunta de Goberno do Concello de Carballo aproba as bases que rexerán nos premios ligados ao XIV Festival Carballo Interplay, programado entre o 8 e o 11 de abril de 2027.

Como xa é habitual, ábrense dúas convocatorias destinadas ás persoas e proxectos que crean e difunden contidos en galego en internet: á mellor canle e ao mellor creador ou creadora, dotados con 600 euros cada un. O prazo para a presentación de proxectos remata o 15 de marzo de 2027.

03/11/2026. CURSOS E CONGRESOS

Comeza a Master Class "Audiovisual Galego" na Universidade de Vigo

A Facultade de Comunicación da UVigo deu comezo onte a Augal, Master Class Audiovisual Galego. Entre o 2 de novembro de 2026 e o 25 de marzo de 2027, o estudantado e os profesionais deste ámbito van gozar da proxección de películas, curtas, un documental e encontros con profesionais e empresas do sector.

A inscrición é de balde e obrigada, xa que hai límite de prazas. No caso do público xeral, non é precisa. Para máis información, consulta a convocatoria e o programa.

03/11/2026. OUTRAS

A biblioteca de Vilalba xa leva o nome de Agustín Fernández Paz

O Concello de Vilalba acordou darlle o nome de Agustín Fernández Paz á biblioteca municipal, así como descubrir unha placa na súa honra.

Esta é unha das iniciativas que suma no propósito do Instituto de Estudos Chairegos de solicitar o Día das Letras Galegas 2028 para un dos autores en lingua galega máis aprezados, especialmente entre a mocidade. As distintas actividades que programen irán publicándose na páxina Miradas sobre Agustín.
02/11/2026. AXUDAS E PREMIOS

Convocados os Premios Mil Primaveras a proxectos que valorizan a lingua galega

A Coordinadora de Traballadores/as de Normalización da Lingua, coa colaboración da Deputación Provincial de Pontevedra, convoca a oitava edición dos Premios Mil Primaveras a proxectos que contribúen a valorizar o galego, co obxectivo de recoñecer e divulgar o traballo ben feito no ámbito da normalización lingüística.

Poden optar a eles todas as accións, campañas, programas e proxectos que teñan como obxectivo principal fomentar a lingua e incrementar o seu uso e/ou prestixio e que fosen desenvolvidos, total ou parcialmente en 2023, 2024, 2025 ou 2026. O prazo de candidaturas remata o 31 de xaneiro de 2027.

Consulta as bases desta edición.
30/10/2026. DINAMIZACIóN

O Espazo Apego de Santiago de Compostela adéntrase no Samaín

A programación do Departamento de Lingua do Concello de Santiago de Compostela para o Espazo Apego énchese en novembro de meigas e feitizos.

Os xoves de Tachán! traerán dúas propostas cheas de contos e música coa Compañía de Teatro Ghazafelhos o 12 de novembro e Brais das Hortas o 26 de novembro. Estas actividades forman parte da programación mensual, na que vas atopar actividades como Enredando e lingoretando, Tardes de contos e A lingua medra.
30/10/2026. EMPREGO

Resolución definitiva da convocatoria de bolsas no CCG

O Consello da Cultura Galega (CCG) publica a resolución definitiva da convocatoria de catro bolsas de colaboración en diferentes proxectos que se desenvolverán nesta entidade durante os anos 2026-2027. Unha destas bolsas, de perfil lingüístico, estará adscrita á Unidade de Publicacións do CCG.

Podes consultar a listaxe de persoas titulares e suplentes premendo aquí.
29/10/2026. DINAMIZACIóN

O proxecto "Modo galego, actívao!" continuará aplicándose en Ames e estenderase a Rois

A Real Academia Galega anuncia unha nova edición de Modo galego, actívao!, programa de dinamización e investigación do galego na infancia.

A colaboración entre a Academia e o Concello de Ames, iniciada en 2023, consiste nunha experiencia de inmersión en galego de tres semanas en todos os centros públicos de infantil e primaria do municipio, así como nos espazos de educación non formal (actividades extraescolares ou comedores). A seguir, o Seminario de Sociolingüística da Academia procede á avaliación científica de cada edición.

En Ames implica máis de 2 000 nenos e nenas e uns 200 docentes; en Rois participarán preto de 300 estudantes e uns 40 profesores e profesoras que permitirán analizar a efectividade do proxecto nun concello de menos de 5 000 habitantes e características diferentes en canto ao uso da lingua galega.

Podes coñecer máis detalles na páxina web da RAG.
29/10/2026. AXUDAS E PREMIOS

Resólvense os XXXVI Premios San Martiño de Normalización Lingüística

O Padroado dos Premios San Martiño de Normalización Lingüística outorga os galardóns da edición de 2026 á Asociación Cultural Coto Manguelo (categoría "Tabeirós-Terra de Montes"), ao grupo de música tradicional Leilía (categoría "Galicia enteira") e á empresa Eferro (categoría "Toda unha vida").

O acto de entrega realizarase o vindeiro 12 de novembro, ás 20.30 horas, no Teatro Principal da Estrada, concello promotor deste premio.

Amplía a información aquí.
26/10/2026. INVESTIGACIóN

Dicionário de Zoologia e Zoonímia dos Invertebrados. Português-Espanhol-Inglês-Alemão: 180 000 termos en catro linguas

O profesor Carlos Garrido, da Facultade de Filoloxía e Tradución da Universidade de Vigo, publica o que se estima como o maior traballo lexicográfico, 1356 páxinas, en galego-portugués sobre os invertebrados.

A obra conta con 180 000 termos, c. 31 200 definicións e c. 28 000 entradas zoonímicas, das cales c. 26 200 ofrecen a designación vernácula ou paracientífica nas catro linguas do dicionario: galego-portugués, castelán, inglés e alemán.

Podes atopalo á venda no Servizo de Publicacións da Universidade de Vigo. Para máis información, preme aquí.
26/10/2026. AXUDAS E PREMIOS

“Vitamina G” para a promoción da lingua gana o 1º premio da XVII edición de EducaCompostela

O Departamento de Educación do Concello de Santiago e Nova Escola Galega fan pública a decisión do xurado da XVII edición dos premios EducaCompostela de materiais didácticos en prol da innovación, da calidade educativa e da renovación pedagóxica.

O primeiro premio levouno o proxecto titulado Vitamina G, de Mariña Lema Blanco. Trátase dunha actividade de dinamización da lingua para estender o seu uso entre alumnado, familias e comunidade escolar a través de recursos audiovisuais nos que os estudantes son os propios protagonistas.

Máis información na web de Nova Escola Galega.
23/10/2026. DINAMIZACIóN

Xeopasatempos para o xeoparque Montañas do Courel

O xeoparque Montañas do Courel, integrado polos concellos de Quiroga, Ribas de Sil e Folgoso do Courel, publica unha revista destinada ao ensino para que dar a coñecer mellor o seu territorio e profundar na lingua galega a través do xogo.

O traballo previo foi elaborado por alumnado de infantil e primaria coordinado por Celia Díaz Núñez, en obradoiros de palabras relacionadas coa flora, a fauna ou a toponimia do xeoparque.
23/10/2026. LEXISLACIóN

O CIEMEN impulsa a actualización da Declaración Universal de Dereitos Lingüísticos

O Centro Internacional Escarré para as Minorías Étnicas e as Nacións (CIEMEN) e o PEN Català reúnen o 23 e 24 de outubro de 2026 corenta especialistas de diversas procedencias e disciplinas co obxecto de actualizar a Declaración Universal de Dereitos Lingüísticos fronte a factores como a tendencia homoxeneizadora e a necesidade de reforzar a protección da diversidade lingüística. Tamén se pretende que o texto dea resposta a ámbitos como as redes sociais, as plataformas dixitais e a investigación, e que garanta o papel das linguas propias de cada comunidade na educación.

Desde Galicia, participa neste Comité de actualización Pilar García Negro, quen xa estivo no de elaboración da Declaración inicial. Tes máis detalles na web da Mesa pola Normalización Linguística.
22/10/2026. AXUDAS E PREMIOS

As escolas Semente son premiadas no Carballiño pola Asociación Avantar

A innovación pedagóxica e o labor de inmersión lingüística en galego valéronlle ás Escolas de Ensino Galego Semente o galardón correspondente ao III Premio Ernesto Atanasio "O Corcheiro".

O acto de entrega do premio será o sábado 24 de outubro de 2026, ás 19.30 horas, no salón de actos do Casino do Carballiño. A Asociación Cultural Avantar, fundada en 1974, recoñece deste xeito o labor de persoas ou colectivos destacados pola súa contribución á cultura e á lingua galegas.
22/10/2026. DINAMIZACIóN

Preséntase "Letras Galegas para a Eternidade: Epitafios da Costa Ártabra"

Mañá, 23 de outubro de 2026, ás 19.00 horas, no centro cívico de Canido, inaugúrase a exposición Letras Galegas para a Eternidade: Epitafios da Costa Ártabra.

No acto intervirán a antropóloga Emma Pedreira e Bernardo Penabade, coordinador do proxecto Palabra e memoria. Na creación desta exposición, participaron tamén o Grupo de Investigación en Experiencia Turística da Universidade da Coruña, a Deputación Provincial, a Asociación Veciñal Muíño do Vento e o Concello de Ferrol.

21/10/2026. CURSOS E CONGRESOS

Faladoiros Vigo 2026-2027: sesións de conversas en galego

A Asociación Faladoiros Vigo pon en marcha o curso 2026-2027, creando, un ano máis, espazos de conversa en galego que xuntan a persoas voluntarias que falan habitualmente en galego con outras que desexan practicar e mellorar a súa fluidez e competencia comunicativa no noso idioma.

Nesta edición hai tres sesións semanais; dúas delas presenciais (unha no café De Catro a Catro e outra na cafetería da EOI) e unha terceira que se organiza en liña, entre os meses de outubro de 2026 e xuño de 2027.

A asistencia aos faladoiros é de balde. Se o desexas, podes inscribirte no formulario que atoparás na páxina web da asociación.
21/10/2026. CURSOS E CONGRESOS

A Universidade de Vigo organiza a II Conferencia Internacional de Investigación en Linguas

Os días 19 e 20 de novembro de 2026, no edificio Redeiras, vai ter lugar a segunda edición da Conferencia Internacional de Investigación en Linguas.

O congreso abordará contidos que se axustan ás liñas de investigación do instituto iLingua: lingüística interna e variación lingüística; relación entre sociedade, ideoloxía e política lingüística; linguas, cognición e educación; tradución e interpretación; lingua e literatura; lingua e accesibilidade; e humanidades dixitais.

Ademais das conferencias plenarias, esta edición ofrece máis de 60 comunicacións de autores e autoras procedentes de universidades e centros de investigación de ata once países diferentes.
21/10/2026. CURSOS E CONGRESOS

IX Xornadas “Educación e linguas en Galicia”

O Servizo de Normalización Lingüística da USC e a Comisión de Normalización Lingüística da Facultade de Ciencias da Educación organizan a novena edición de Educación e linguas en Galicia, xornadas que van ter lugar na Facultade de Ciencias da Educación (edificio do Campus Vida) o 5 e 12 de novembro de 2026.

A inscrición é de balde, ata completar aforo, e a asistencia dá dereito a un diploma co recoñecemento de 9 horas presenciais.
21/10/2026. AXUDAS E PREMIOS

IX Premios Lingua e Empresa do Concello de Ames

A Concellaría de Normalización Lingüística e a de Promoción Económica do Concello de Ames convocan a novena edición dos Premios Lingua e Empresa, orientados a recoñecer o uso e fomento da lingua galega na actividade empresarial.

Poderán presentar a súa candidatura as empresas con sede social ou centro de actividade no concello de Ames. As empresas interesadas deben descargar este formulario e entregalo a través das canles indicadas antes do 20 de novembro de 2026.

Toda a información sobre a convocatoria podes consultala aquí.
19/10/2026. INVESTIGACIóN

Convocatoria para a vinculación de persoal investigador ao Instituto da Lingua Galega

O Instituto da Lingua Galega da USC abre unha convocatoria de expresións de interese para a vinculación de persoal investigador á súa actividade científica.

O prazo está aberto ata o 28 de outubro de 2026. As solicitudes teñen carácter estritamente individual e deberán remitirse por correo electrónico ao enderezo ilgsec@usc.gal. Deben conter un currículo breve e este fomulario cuberto.

Podes consultar a información ampliada aquí.
16/10/2026. AXUDAS E PREMIOS

Subvencións da Deputación da Coruña para gastos de persoal dos SNL das entidades locais

A Deputación da Coruña publica as bases reguladoras da convocatoria de subvencións dirixidas aos concellos, agrupacións de concellos, mancomunidades e outras entidades locais da provincia da Coruña, para contribuír ao financiamento do persoal técnico de normalización lingüística durante o ano 2027.

Poderán participar todos os concellos da provincia da Coruña de 5000 ou máis habitantes, ou agrupacións de concellos e mancomunidades que, entre eles, cheguen a esa cifra mínima. No caso dos concellos sometidos ao réxime de organización de municipios de gran poboación, só poderán ser beneficiarios os que teñan máis dunha persoa técnica de normalización lingüística cun posto de traballo recollido na relación de postos de traballo ou instrumento de ordenación de persoal que corresponda.

A forma e prazo da solicitude regúlanse na Ordenanza xeral de subvencións e transferencias da Deputación da Coruña.