Novas da lingua. OUTRAS

Rexistros1 a 30 de 551
  1. Inicio
  2. CDSG-CCG
  3. Novas da lingua
  4. OUTRAS
16/07/2025. OUTRAS

Nós Diario publicará un caderno especial con 100 ideas para expandir o galego

O vindeiro 25 de xullo o xornal Nós Diario publicará o caderno especial 100 ideas para expandir a lingua galega, co que obsequiará as lectoras e lectores do diario. O documento recolle as propostas de 10 especialistas en diferentes ámbitos profesionais ou do coñecemento, que presentan 10 medidas concretas para a normalización do galego nas súas respectivas áreas, sumando entre todos/as un total de 100 ideas.

Os/as autores/as deste cento de propostas son Ana Pérez Rico, profesora e presidenta da AS-PG; Luís Villares, maxistrado do Tribunal Superior de Xustiza de Galicia; Flora Miranda, coordinadora da Irmandade da Sanidade Galega; Pablo García, xornalista e presidente da Asociación de Medios en Galego; Paula Chaves 'Pauliña', filóloga e música; Diniz Cabreira, membro da Cooperativa Gráfica Sacauntos; Telmo Celeiro, coordinador e adestrador do ximnasio Artabros Crossfit; Aitana Cuétara, produtora e xestora cultural; e Xosé Manuel Vilas, profesional do comercio enerxético e doutros bens.
15/07/2025. OUTRAS

A Xunta de Galicia publica unha guía para simplificar a linguaxe administrativa

A Consellería de Facenda e Administración Pública da Xunta de Galicia elaborou a Guía para simplificar as mensaxes dirixidas á cidadanía, un documento dirixido ao persoal empregado público que contén unha serie de recomendacións para simplificar a linguaxe administrativa e adaptala á persoa usuaria, co obxectivo de acadar unha comunicación entre administración e cidadanía máis clara e eficiente.

Este documento foi galardoado co segundo premio no concurso de persoal funcionario público innovador, convocado pola Axencia Galega de Innovación, na modalidade de simplificación administrativa.
30/06/2025. OUTRAS

Un país coa súa lingua: inscrición na mesa "Sociedade, crenzas e participación comunitaria"

Xa está accesible en liña o formulario de inscrición para asistir presencialmente ao sexto debate do foro Un país coa súa lingua, que nesta ocasión se centrará na formulación de propostas para garantir a presenza do galego na sociedade civil, no asociacionismo e nos espazos comunitarios. O debate, coordinado por Montse Pena Presas e Dolores Vilavedra, terá lugar o vindeiro 8 de xullo de 2025, a partir das 16:30 h, na sede do Consello da Cultura Galega (Pazo de Raxoi, Santiago de Compostela).

Na páxina web do CCG podes ampliar información sobre esta sexta mesa de debate e acceder ao formulario de inscrición.

A maiores da participación presencial, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.
23/06/2025. OUTRAS

Begoña Caamaño será a autora homenaxeada no Día das Letras Galegas 2026

O Plenario da Real Academia Galega acordou, na sesión ordinaria do 20 de xuño de 2025, que o Día das Letras Galegas do vindeiro ano 2026 estará dedicado á escritora e xornalista Begoña Caamaño (Vigo, 14 de outubro de 1964 – Santiago de Compostela, 27 de outubro de 2014).

Begoña Caamaño foi unha narradora serodia, comezou a escribir aos 45 anos de idade, e deixounos dúas novelas: Circe ou o pracer do azul (2009) e a premiada Morgana en Esmelle (2012), nas que reelabora os mitos da Odisea e o artúrico desde a perspectiva feminista. Como xornalista, a súa obra representa o exercicio da profesión de maneira crítica, rigorosa, independente e comprometida co uso do galego, uns valores que a RAG tamén quere reivindicar con esta homenaxe.

Na páxina web da RAG atoparás máis información.
11/06/2025. OUTRAS

Un país coa súa lingua: inscrición na mesa "Economía, turismo e deporte"

Xa está accesible en liña o formulario de inscrición para asistir presencialmente ao quinto debate do foro Un país coa súa lingua, que nesta ocasión se centrará na formulación de propostas para garantir a presenza do galego na economía, o turismo e o deporte. O debate, coordinado por Jakson R. Rodrigues Soares e Dolores Vilavedra, terá lugar o vindeiro 25 de xuño de 2025, a partir das 16:30 h, na sede do Consello da Cultura Galega (Pazo de Raxoi, Santiago de Compostela).

Na páxina web do CCG podes ampliar información sobre esta quinta mesa de debate e acceder ao formulario de inscrición.

A maiores da participación presencial, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.
04/06/2025. OUTRAS

A Biblia en galego xa ten versión en liña

A editorial SEPT e o Arcebispado de Santiago de Compostela presentaron a edición en liña da Biblia en lingua galega. O texto correspóndese coa cuarta edición da Biblia, publicada por SEPT no 2021.

A tradución ao galego desta obra foi realizada dende as linguas orixinais por un equipo coordinado por Xosé Fernández Lago e Andrés Torres Queiruga. A primeira edición, que contou coa aprobación da Conferencia Episcopal Española, data de 1989. Da supervisión desta 4ª edición ocupouse Xosé Fernández Lago.

A presentación pública da versión en liña tivo lugar onte, 3 de xuño de 2025, no Instituto Teolóxico Compostelán.
21/05/2025. OUTRAS

O discurso “Alba de Gloria” incorpórase aos fondos da UNESCO para reivindicar a diversidade lingüística e cultural

Hoxe, 21 de maio, a ONU conmemora o Día Mundial da Diversidade Cultural para o Diálogo e o Desenvolvemento, e con este motivo o Legado Activo Beiras Cal, coa colaboración da Real Academia Galega, organizou o envío á biblioteca da UNESCO dun exemplar numerado da primeira edición do discurso “Alba de Gloria” de Castelao, pertencente á biblioteca da pedagoga Antía Cal e do oftalmólogo galeguista Antón Beiras.

Ademais dos representantes das entidades promotoras, Beatriz Beiras Cal (Legado Activo Beiras Cal) e Henrique Monteagudo (RAG), no acto de preparación deste envío participou tamén o alumnado do CEIP Antía Cal Vázquez (Muras), que redactou unha carta dirixida á directora xeral da UNESCO, Audrey Azoulay, demandando o apoio da organización internacional ao uso do galego na escola.

Na páxina da RAG podes ampliar información.
19/05/2025. OUTRAS

Un país coa súa lingua: inscrición na mesa “Comunicación, cultura e acción exterior”

Xa está accesible en liña o formulario de inscrición para asistir presencialmente ao cuarto debate do foro Un país coa súa lingua, que nesta ocasión se centrará na formulación de propostas para garantir a presenza do galego nos medios de comunicación, no eido audiovisual e na produción cultural, en xeral. O debate, coordinado por Marta Veiga e Dolores Vilavedra, terá lugar o vindeiro 27 de maio de 2025, a partir das 16:30 h, na sede do Consello da Cultura Galega (Pazo de Raxoi, Santiago de Compostela).

Na páxina web do CCG podes ampliar información sobre esta cuarta mesa de debate e acceder ao formulario de inscrición.

A maiores da participación presencial, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.
23/04/2025. OUTRAS

Datas e lugares das probas para a obtención do Celga

A Secretaría Xeral da Lingua anuncia as datas e lugares de realización das probas para a obtención dos certificados de lingua galega (niveis Celga 1, 2, 3 e 4), que foron convocadas ao abeiro da resolución publicada no DOG do pasado 7 de marzo de 2025.

As probas realizaranse en Santiago de Compostela: IES Antonio Fraguas (Celga 2, 3 e 4) e Escola Galega de Administración Pública (Celga 1); en Ponferrada: Escola Oficial de Idiomas desta localidade (Celga 2, 3 e 4) e en Madrid: Casa de Galicia en Madrid (Celga 2, 3 e 4).

As datas serán as seguintes:
-Celga 1: 31 de maio de 2025
-Celga 2: 25 de maio de 2025
-Celga 3: 24 de maio de 2025
-Celga 4: 10 e 11 de maio de 2025 (organízanse dúas quendas segundo a letra pola que empece o primeiro apelido das persoas admitidas a participar nas probas).
07/04/2025. OUTRAS

Henrique Monteagudo, novo presidente da Real Academia Galega

O Pleno da Real Academia Galega reuniuse o pasado venres, 4 de abril de 2025, en sesión extraordinaria e apoiou a candidatura de Henrique Monteagudo á Presidencia da institución. Henrique Monteagudo é catedrático de Filoloxía Galega e Portuguesa da Universidade de Santiago de Compostela (USC) e investigador especializado na sociolingüística, a historia da lingua e os procesos de normalización lingüística, así como no estudo e a edición da obra de autores como Martín Sarmiento e Castelao.

Da comisión executiva tamén formarán parte os/as académicos/as Ana Boullón Agrelo (secretaria), Lourenzo Fernández Prieto (vicesecretario), María López-Sández (tesoureira) e María Dolores Sánchez Palomino (arquiveira-bibliotecaria).

Na páxina web da RAG podes ampliar información.
02/04/2025. OUTRAS

Un país coa súa lingua: inscrición na mesa “Sanidade, ciencia e servizos sociais”

Xa está accesible en liña o formulario de inscrición para asistir presencialmente ao terceiro debate do foro Un país coa súa lingua, que nesta ocasión se centrará na formulación de propostas para garantir a presenza do galego na sanidade, nos servizos sociais e na investigación científica. O debate, coordinado por Iolanda Casal e Dolores Vilavedra, terá lugar o vindeiro 23 de abril de 2025, a partir das 16:30 h, na sede do Consello da Cultura Galega (Pazo de Raxoi, Santiago de Compostela).

A maiores da participación presencial, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.

Na páxina web do CCG podes ampliar información sobre esta terceira mesa de debate e acceder ao formulario de inscrición.
07/03/2025. OUTRAS

Volve a revista LongaLingua en formato dixital

A Mesa pola Normalización Lingüística e a Fundación Vía Galego retoman a edición de LongaLingua, unha publicación que estivo aberta en formato papel entre os anos 2006 e 2010 e que agora volve en formato dixital e podcast, dirixida pola xornalista Eva Fernández Prieto.

A revista contará con análises sobre a situación da lingua galega en diferentes ámbitos realizadas por persoas expertas, e os artigos completaranse cunha serie de videopodcast que estarán dispoñíbeis en diferentes plataformas como Spotify e Youtube. A profesora da Universidade da Coruña María Pilar García Negro será a encargada de inaugurar a serie de análises, cunha achega que se publicará este mesmo venres, 7 de marzo de 2025.
07/03/2025. OUTRAS

Convocatoria de probas para a obtención dos certificados Celga

A Secretaría Xeral da Lingua da Xunta de Galicia convoca probas para a obtención dos certificados de lingua galega dos niveis Celga 1, 2, 3 e 4. Poderán presentarse todas as persoas maiores de dezaseis anos ou que os fagan no ano natural da convocatoria, nacionais ou estranxeiras. As probas realizaranse en Santiago de Compostela, Ponferrada e Madrid en maio de 2025. As datas concretas publicaranse no Diario Oficial de Galicia, así como na páxina web da Secretaría Xeral da Lingua.

O prazo de presentación de solicitudes é de quince días hábiles, contados a partir do seguinte ao da publicación da convocatoria.
04/03/2025. OUTRAS

Un país coa súa lingua: inscrición na mesa “Administración, xustiza e servizos públicos”

Xa está accesible en liña o formulario de inscrición para asistir presencialmente ao segundo debate do foro Un país coa súa lingua, que nesta ocasión se centrará na formulación de propostas para mellorar o uso efectivo da lingua galega en ámbitos como a xustiza, a atención administrativa e os servizos básicos de carácter público. O debate, coordinado por Alba Nogueira e Dolores Vilavedra, terá lugar o vindeiro 20 de marzo, a partir das 16:00 h, na sede do Consello da Cultura Galega (Pazo de Raxoi, Santiago de Compostela).

A maiores da participación presencial, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.

Na páxina web do CCG podes ampliar información e acceder ao formulario de inscrición.
28/02/2025. OUTRAS

O galego poderá usarse nas sesións plenarias do Comité Económico e Social Europeo

O Comité Económico e Social Europeo (CESE), un órgano consultivo da Unión Europea, aprobou o uso do galego, o catalán e o éuscaro nas intervencións dos seus membros nas sesións plenarias. Este acordo enmárcase no plan de negociacións que o Goberno de España está a manter para promover o uso das linguas cooficiais do Estado español na Unión Europea, tal e como anunciou o Ministerio de Asuntos Exteriores, Unión Europea e Cooperación nun comunicado.

O CESE súmase deste xeito ao Consello da UE e ao Comité das Rexións, que tamén permiten intervir en galego, catalán e éuscaro nas súas sesións e plenos.
28/02/2025. OUTRAS

Guía didáctica “O Seminario de Estudos Galegos”

O Instituto de Estudos Galegos Padre Sarmiento publica, co apoio da Secretaría Xeral da Lingua da Xunta de Galicia, a guía didáctica O Seminario de Estudos Galegos, dirixida ao alumnado dos cursos finais de Educación Primaria e de Educación Secundaria Obrigatoria. A guía inclúe contidos relacionados cos obxectivos do SEG, o seu funcionamento interno e os homes e mulleres que formaron parte del. Como material complementario, inclúese o xogo “E ti… de quen vés sendo?”, unha versión do clásico “quen é quen?”, onde os xogadores deben adiviñar a identidade dunha selección dos membros do SEG a partir dunha serie de pistas sobre o seu aspecto.

Ademais da versión impresa, que conta cunha tiraxe de 500 exemplares, a guía conta cunha versión dixital accesible de balde na Rede.

Se o precisas, podes ampliar información premendo aquí.
21/02/2025. OUTRAS

21 de febreiro: Día Internacional da Lingua Materna

Hoxe, 21 de febreiro, conmemórase o Día Internacional da Lingua Materna, unha celebración que este ano leva por lema As linguas importan e que a UNESCO conmemora desde hai 25 anos para pór de relevo a riqueza que supón a diversidade lingüística do planeta. Coincidindo con esta conmemoración, a UNESCO presenta a publicación As linguas importan: orientación mundial sobre a educación multilingüe, unha guía que convida aos responsables políticos a integrar a educación multilingüe nos sistemas educativos e recolle exemplos de boas prácticas neste eido en varios países.

Entre os múltiples recursos que o Consello da Cultura Galega elabora desde a perspectiva lingüística, neste 21 de febreiro desde o CDSG seleccionamos como recomendación a última publicación do Álbum de Galicia, que recolle a biografía de Adolfina e Rosa Casás Rama, dúas mulleres que cantaron e crearon sempre na súa lingua materna e, xustamente por ese valioso legado que nos deixaron, forman parte do grupo de cantareiras homenaxeadas nas Letras Galegas 2025.
20/02/2025. OUTRAS

Conversa sobre a lingua na Facultade de Filoloxía da USC

O colectivo de estudantes Erguer organiza un diálogo aberto sobre normalización lingüística, que terá lugar na Facultade de Filoloxía da Universidade de Santiago hoxe, xoves 20 de febreiro de 2025, ás 19:00 h, na aula C01. Na conversa participarán Alba Nogueira, xurista e membro correspondente da Real Academia Galega (RAG); Elías Feijóo, catedrático de Filoloxía Galega e Portuguesa da USC; e Marcos Maceira, presidente da Mesa pola Normalización Lingüística. O evento é de acceso libre, tanto para a comunidade universitaria como para o público xeral.

Na páxina web Neofantes podes obter máis información sobre esta iniciativa.
18/02/2025. OUTRAS

Comeza o foro “Un país coa súa lingua” cun debate sobre a educación e a socialización

O vindeiro 27 de febreiro de 2025, a partir das 16:00 h, terá lugar na sede do Consello do Cultura Galega, en Santiago de Compostela, a mesa de debate “Educación e socialización”, coa que o CCG inaugura o foro participativo Un país coa súa lingua. Este primeiro encontro, coordinado por Nel Vidal e Dolores Vilavedra, ten como obxectivo reflexionar sobre “o papel do ensino para adquirir a competencia e favorecer o uso da lingua galega na infancia e na adolescencia, en relación con outras dinámicas e espazos para a socialización na lingua propia de Galicia”.

Xa está accesible en liña o formulario de inscrición para asistir presencialmente a este primeiro debate. A maiores, o CCG habilitou un formulario en liña que estará aberto durante todo o proceso para a recepción de propostas relacionadas con calquera das áreas de análise, e no outono organizarase un foro final aberto a toda a cidadanía, no que se presentarán as conclusións iniciais e se debaterán co público asistente.

O foro Un país coa súa lingua é unha iniciativa do Consello da Cultura Galega que ten como obxectivo fomentar un diálogo aberto e plural sobre o futuro do galego. O proxecto, de carácter propositivo, estrutúrase arredor de sete mesas de traballo nas que se debaterá sobre o futuro da lingua e se proporán accións normalizadoras en ámbitos como a educación, a administración, a economía, os medios, a cultura e a sociedade.

Na páxina web do CCG podes ampliar información e acceder ao formulario de inscrición.

18/02/2025. OUTRAS

Henrique Monteagudo imparte unha conferencia en Vigo sobre a figura de Castelao

No marco das actividades de conmemoración do Ano Castelao, a Fundación Penzol, en colaboración coa Cátedra Castelao da Universidade de Santiago (USC), organiza a conferencia “Castelao. A forxa dun mito”, impartida por Henrique Monteagudo. O acto terá lugar o vindeiro 20 de febreiro de 2025, ás 19 horas, na Casa Galega da Cultura de Vigo.

No seu relatorio, o profesor Monteagudo fará un percorrido pola traxectoria vital de Castelao e presentará unha síntese das principais liñas do seu pensamento, co obxectivo de divulgar o coñecemento dunha figura transcendental para a política, as artes plásticas, a literatura e a defensa e ilustración do idioma galego.

A maiores, tamén podes consultar a biografía de Castelao no Álbum de Galicia, autoría do propio Henrique Monteagudo.
18/02/2025. OUTRAS

Coloquio en Marín sobre o futuro do idioma

O Museo Municipal Manuel Torres, en Marín, acollerá o vindeiro venres, 21 de febreiro, ás 20:00 h, o coloquio O galego: unha lingua que vale para todo, organizado pola A. C. Almuinha. Na conversa participará Elsa Quintas, vicepresidenta da Mesa pola Normalización Lingüística, e Xosé Antonio Pazos, profesor do CEIP Sequelo. O obxectivo do acto é promover a reflexión sobre o estado actual do idioma galego, así como sobre as súas perspectivas de futuro. A entrada é libre ata completar o aforo do sala.

No Facebook da A. C. Almuinha podes ampliar información.

11/02/2025. OUTRAS

A Xunta de Galicia presenta un avance dos resultados da Enquisa sobre a percepción social do galego

A Consellería de Cultura, Lingua e Xuventude da Xunta de Galicia presentou publicamente un avance dos datos obtidos na Enquisa sobre a percepción social do galego, encargada ao Instituto Sondaxe e realizada entre o 22 de outubro e o 27 de novembro de 2024. Os resultados foron obtidos a partir dunha mostra de 1.200 enquisas realizadas a familias con fillos/as en idade escolar nas etapas de primaria e secundaria. O principal obxectivo do estudo é avaliar a opinión das familias en relación á crenza de se existe en Galicia algún idioma discriminado, e sondar as súas preferencias sobre o uso do galego no sistema educativo.

O documento foille entregado ao coordinador das comisións da renovación do Plan xeral de normalización da lingua galega para que poida empregarse como ferramenta de traballo.

Para ampliar información, preme aquí.
03/02/2025. OUTRAS

O galego impartirase como lingua de especialización na Université Sorbonne Nouvelle - París 3

A partir do vindeiro ano académico, a Université Sorbonne Nouvelle - París 3 ofertará a nova titulación “Linguas e culturas rexionais da Península Ibérica: éuscaro, catalán e galego”, financiada pola Xunta de Galicia, o Instituto Ramón Llull e o Instituto Etxepare. Con este novo plan de estudos (o único destas características que existe actualmente en Francia) o galego impartirase como unha lingua de especialización, xunto co catalán e o éuscaro, e implantaranse novas materias sobre historia e sociolingüística de Galicia.

O Centro de Estudos Galegos da Université Sorbonne Nouvelle - París 3 convida a todas as persoas interesadas á xornada de portas abertas que terá lugar o vindeiro 8 de febreiro de 2025, na que se presentará oficialmente esta nova titulación.
03/02/2025. OUTRAS

Queremos Galego convida a cidadanía galega a manifestarse no Día de Rosalía

O vindeiro 23 de febreiro, coincidindo coa conmemoración do Día de Rosalía, a plataforma Queremos Galego convoca a cidadanía galega a participar na manifestación que terá lugar en Santiago de Compostela, a partir das 12 h, baixo o lema “Lingua vital xa!”. Como xa acontecera na última convocatoria do pasado 17 de novembro de 2024, o obxectivo é que a cidadanía reaccione ante a actual situación de emerxencia lingüística e demande a plena reivindicación do idioma en todos os ámbitos sociais.

Na páxina web da plataforma tes toda a información sobre esta iniciativa.
03/02/2025. OUTRAS

Declaración de NEG sobre a actual situación de emerxencia lingüística

Nova Escola Galega acaba de facer pública a declaración “A emerxencia lingüística: do estado da cuestión á acción", coa que quere contribuír ao debate público sobre o presente o futuro do idioma galego, unha vez coñecidos os datos demolingüísticos presentados recentemente polo IGE.

Podes ler o texto completo da declaración premendo aquí.
23/01/2025. OUTRAS

Actualizamos información sobre as publicacións periódicas recibidas no CDSG en 2024

O Centro de Documentación Sociolingüística de Galicia publica en liña o Boletín de Sumarios 2024, un produto documental que inclúe os sumarios dos números das revistas que se incorporaron á hemeroteca do centro ao longo do ano pasado.

Tamén podes consultar a nosa colección completa actualizada a través do Catálogo de publicacións periódicas do CDSG.

Estas revistas pódense consultar en sala ou levar en préstamo naqueles casos en que dispoñamos de máis dun exemplar. No caso das dixitais, desde o boletín e o catálogo pode accederse directamente a elas.
15/01/2025. OUTRAS

O Consello da Cultura Galega pon en marcha o “Foro participativo: un país coa súa lingua”

Hoxe, 15 de xaneiro de 2025, tivo lugar na sede do Consello da Cultura Galega, en Santiago de Compostela, a presentación pública do “Foro participativo: un país coa súa lingua”, unha iniciativa de carácter propositivo na que se lle dará voz a persoas expertas no ámbito da planificación lingüística, a profesionais de diferentes ámbitos e a axentes sociais de referencia para o futuro do idioma, que reflexionarán sobre a situación sociolingüística actual e proporán as accións que se consideren prioritarias para a normalización e revitalización do galego.

O foro desenvolverase entre os meses de febreiro e xullo de 2025 e estruturarase en seis mesas temáticas: Educación e socialización; Administración, xustiza e servizos públicos; Sanidade, ciencia e servizos sociais; Comunicación, cultura e acción exterior; Economía, turismo e deporte; Sociedade, crenzas e participación comunitaria. Os resultados recolleranse nun documento que se fará público en novembro de 2025.

Na páxina web do CCG tes máis información sobre esta iniciativa.
14/01/2025. OUTRAS

Convócanse as probas de avaliación en competencia clave

A Consellería de Emprego, Comercio e Emigración convoca probas de avaliación en competencias clave, que dan acceso ás accións formativas dos certificados profesionais dos niveis 2 e 3 de cualificación. Entre as competencias clave requiridas para acceder a estes certificados está a “comunicación en lingua galega”.

O prazo de presentación de solicitudes para participar nas probas é dun mes, contado a partir do día seguinte ao da publicación da convocatoria no DOG.
14/01/2025. OUTRAS

O Misal Romano xa conta cunha versión actualizada en lingua galega

A finais de decembro do pasado 2024 tivo lugar no Museo das Peregrinacións, en Santiago de Compostela, a presentación pública da nova edición revisada e actualizada do Misal Romano en lingua galega. Esta nova edición está coordinada polo monseñor Leonardo Lemos Montanet, bispo de Ourense, e foi elaborada a través dun convenio de colaboración entre o Arcebispado de Santiago de Compostela e a Xunta de Galicia. No marco deste acordo, a Conferencia Episcopal Española editou 1.500 exemplares deste misal, que serán distribuídos a través das dioceses galegas. No Portal da Lingua Galega tamén está accesible en formato dixital.

Para ampliar información sobre esta iniciativa, preme aquí.
14/01/2025. OUTRAS

A Xunta de Galicia presenta o equipo encargado da renovación do Plan xeral de normalización da lingua galega

A Xunta de Galicia presentou o equipo de expertos que dirixirán as diferentes comisións encargadas de actualizar o Plan xeral de normalización da lingua galega (documento aprobado por unanimidade no Parlamento de Galicia o 21 de setembro de 2004), co obxectivo de adaptalo á realidade social, demográfica e lingüística actual. As persoas responsables das diferentes comisións de traballo son Diana Santiago, doutora de Dereito Administrativo na Universidade de Santiago de Compostela; Edita de Lorenzo, profesora do Departamento de Teoría do Sinal e Comunicacións da Universidade de Vigo; Manuel Núñez Singala, director do SNL da USC e experto en formación de adultos; Xoaquín Monteagudo, avogado e presidente da Asociación de Funcionarios pola Normalización Lingüística; Armando Requeixo, catedrático de Lingua e Literatura Galega e profesor da USC; Concha Losada, profesora da Facultade de Medicina da USC e presidenta do Museo do Pobo Galego; Patricia Hermida, produtora musical e avogada experta en dereitos de autor; Xosé González, dinamizador lingüístico e presidente do Foro Enrique Peinador; Rosalía Morlán, escritora e enfermeira; Celia Pereira, avogada e presidenta da Fundación Vicente Risco; e Xosé Lago, subdirector da AECT da Eurorrexión Galicia-Norte de Portugal. Todas as comisións traballarán baixo a coordinación do membro da RAG e catedrático de Filoloxía Románica Manuel González Gonzaléz.

A renovación do PXNLG é unha das medidas recollidas no documento Pacto pola lingua, presentado polo goberno autonómico galego ás forzas políticas con representación parlamentaria e mais ás principais institucións galegas a finais do 2024.

Na páxina web da Xunta de Galicia podes obter máis información sobre o proxecto de actualización do PXNLG.

O documento Pacto pola lingua podes consultalo no xornal Praza Pública.