Novas da lingua

Rexistros1321 a 1350 de 5436
  1. Inicio
  2. CDSG-CCG
  3. Novas da lingua
04/11/2022. CURSOS E CONGRESOS

XV Xornada Xustiza e Lingua

O Colexio de Avogados de Santiago de Compostela celebra unha nova edición da Xornada Xustiza e Lingua, dirixida a profesionais dos servizos lingüísticos e da xustiza, a alumnado das escolas de práctica xurídica e de Dereito e a persoas interesadas en xeral.

A cita, centrada na reflexión e as propostas arredor da normalización lingüística no ámbito xurídico, terá lugar o 7 de novembro de 2022, ás 20 h, no salón de actos do Colexio de Avogados. A inscrición é de balde e limitada a 80 persoas.
03/11/2022. OUTRAS

Omeupc.gal, novo espazo web con información tecnolóxica en galego

Se non es un experto en informática pero es desas persoas ás que lles gusta estar sempre ao día das novidades tecnolóxicas, en omeupc.gal poderás consultar todo tipo de información sobre os programas e aplicacións que acostumamos instalar nos nosos equipos informáticos e, ademais, poderás facelo en galego. Os contidos deste novo espazo web, distribuídos baixo licenza Creative Commons, teñen carácter divulgativo e están dirixidos ao público xeral.
03/11/2022. AXUDAS E PREMIOS

A Mesa pola Normalización Lingüística recibirá o V Premio Xela Arias

A Asociación Galega de Profesionais da Tradución e da Interpretación fixo pública a resolución do V Premio Xela Arias, convocado para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación. Nesta quinta edición a entidade galardoada é A Mesa pola Normalización Lingüística, polo seu traballo a prol do galego no ámbito da tradución audiovisual, no marco da modificación da Lei do Audiovisual.
O acto de entrega do premio terá lugar na Coruña o 16 de decembro de 2022.
Se o precisas, podes ampliar información na páxina web da AGPTI.
03/11/2022. DINAMIZACIóN

Chega Superheroínas, a nova serie de vídeos da RAG

A poeta Alba Cid, a cantante Andrea Pousa, a creadora de videoxogos Laksmy Irigoyen, a xornalista Esther Estévez, a instagramer Paula Jorge Horta, a fotógrafa Antía Castro e a cociñeira Lucía Freitas son as sete mulleres referentes que protagonizan Superheroínas, a segunda entrega do proxecto Novas voces para a lingua da Real Academia Galega e a Universidade de Santiago de Compostela.

O propósito, nesta ocasión, é amosar unha realidade esperanzadora: as mulleres novas si falan galego no seu día a día. A primeira que nolo conta é Lucía Freitas, na peza audiovisual presentada esta semana pola Academia. A seguir, irán publicándose novas entregas, tanto na web desta institución coma na da USC e nas redes sociais de ambas.
02/11/2022. CURSOS E CONGRESOS

Comeza na Coruña o Simposio Florencio Delgado Gurriarán

Mañá, 3 de novembro de 2022, comeza na sede da Real Academia Galega (A Coruña) o Simposio Florencio Delgado Gurriarán, que terá continuidade cunha segunda xornada o vindeiro 10 de novembro. O eixo temático das diferentes intervencións será a vida e a obra do autor protagonista do Día das Letras Galegas 2022.
As sesións poderán seguirse de xeito presencial na sede da RAG (a entrada é libre ata completar a capacidade da sala) ou a través da súa canle de Youtube. Para consultar o programa completo do simposio, preme aquí.

02/11/2022. AXUDAS E PREMIOS

Resólvense os Premios San Martiño de Normalización Lingüística 2022

O Padroado dos Premios San Martiño de Normalización Lingüística fixo públicos os/as galardoados/as da súa trixésimo primeira edición. Na categoría “A Estrada e Comarca de Terra de Montes”, o premio foi para as empresas Ausama e Ausavil, dirixidas polos irmáns Antonio e Miguel Villar Costoyas. Sabela Maneiro, Aida Tarrío e Olaia Maneiro, integrantes do grupo Tanxugueiras, son as galardoadas na categoría "Galicia Enteira", e a catedrática de Filoloxía Románica Mercedes Brea López é a gañadora na categoría "Toda unha vida". O acto de entrega destes premios, aberto ao público, terá lugar na segunda semana de novembro no Teatro Principal da Estrada.
Podes ampliar información premendo aquí.
31/10/2022. AXUDAS E PREMIOS

V Premios Internacionais de Podcasts Xosé Mosquera Pérez “O vello dos contos”

O IES Rosalía de Castro de Santiago de Compostela e Arraianos Producións, en colaboración con Ponte... nas ondas!, organizan a quinta edición dos Premios de podcast en galego e portugués Xosé Mosquera Pérez "O vello dos contos", dirixidos a alumnado de primaria (quinto e sexto curso) e educación secundaria de centros galegos, así como de centros que impartan ensinanzas de galego de réxime xeral fóra de Galicia. Tamén poderá participar o alumnado de 10 a 18 anos dos centros educativos públicos do norte de Portugal. Os participantes deberán elaborar un podcast inédito e orixinal, cunha duración non superior aos 3 minutos, relacionado coa vida e obra de Francisco Fernández del Riego, e outros aspectos do patrimonio cultural de Galicia e norte de Portugal. O prazo de inscrición remata o 21 de decembro de 2022. Os traballos poden entregarse ata o 1 de maio de 2023.

31/10/2022. CURSOS E CONGRESOS

Escolas Católicas Galicia organiza as XVIII Xornadas de Normalización Lingüística e os Premios Irmán Reboiras

Escolas Católicas Galicia organiza a décimo oitava edición da súa Xornada de Normalización Lingüística, co obxectivo de intercambiar experiencias e recursos didácticos en galego entre o profesorado e os membros dos equipos de dinamización da lingua galega dos centros educativos de Galicia. As sesións terán lugar o 18 de novembro de 2022, en horario de 9:30 h a 14:30 h, na sede do Consello da Cultura Galega. O prazo de inscrición remata o 16 de novembro.
Igual ca en edicións anteriores, no marco destas xornadas entregaranse os Premios Irmán Reboiras ás mellores iniciativas de fomento do galego, organizados tamén por Escolas Católicas Galicia, en colaboración coa Secretaría Xeral de Política Lingüística e co patrocinio da editorial Rodeira-Edebé. A convocatoria está dirixida a todos os centros da rede de Escolas Católicas Galicia, que teñen de prazo para presentar as súas candidaturas ata o vindeiro 10 de novembro.
27/10/2022. AXUDAS E PREMIOS

En marcha o V Premio Lingua e Empresa do Concello de Ames

O Servizo de Normalización Lingüística do Concello de Ames promove a quinta edición do Premio Lingua e Empresa, que ten como obxectivo fomentar o uso do galego na actividade económica local, de maneira que se contribúa ao aumento e á mellora do uso social da lingua galega dende ese sector.

O certame inclúe dúas categorías: unha para aquelas entidades que veñen realizando un uso continuado da lingua galega desde hai máis de dous anos, e outra para as que incorporaron o galego nos últimos dous anos. Na valoración das candidaturas terase en conta a utilización do galego na comunicación interna e externa, tanto oralmente como por escrito, medindo o impacto que a actividade da empresa poida ter en sectores especialmente relevantes para o proceso de normalización lingüística.

O prazo para participar remata o 8 de novembro de 2022 ás 14:00 h. Podes ampliar a información premendo aquí.
26/10/2022. AXUDAS E PREMIOS

Convocatoria de axudas para a realización de teses de doutoramento en galego

A Vicerreitoría de Transformación Dixital e Innovación da Universidade de Santiago de Compostela, a través do Servizo de Normalización Lingüística, publica unha Convocatoria de axudas para a realización de teses de doutoramento en galego.

Poden acceder a estas axudas os/as estudantes de programas de doutoramento da USC que realicen en lingua galega a redacción e defensa da tese de doutoramento no curso académico 2022/2023. O prazo de solicitude remata o 30 de setembro de 2023.
26/10/2022. CURSOS E CONGRESOS

V Xornadas de Lingua e Literatura Galegas no Ensino

O Instituto da Lingua Galega, o Departamento de Didácticas Aplicadas e o Departamento de Filoloxía Galega da USC convocan as V Xornadas de Lingua e Literatura Galegas no Ensino.

Nesta edición, que vai ter lugar o 18 e 19 de novembro de 2022 na Facultade de Filoloxía, reflexionarase sobre a competencia discursiva plurilingüe, presentaranse propostas didácticas e debaterase sobre retos e estratexias de adaptación aos novos escenarios educativos. Ademais, darase a coñecer o Corpus de textos galegos escritos por estudantes no ámbito académico, CORTEGAL, que inclúe mil textos anotados extraídos da pregunta de comentario das probas de lingua e literatura galegas dos exames ABAU.

O prazo de inscrición para profesorado de centros públicos e concertados remata o 30 de outubro. O público xeral ten ata o 12 de novembro para realizala. Máis información aquí.
25/10/2022. OUTRAS

Datas de realización das probas de acreditación do Celga

A Secretaría Xeral de Política Lingüística publicou o pasado de mes de setembro de 2022 a convocatoria de probas para a obtención dos certificados de lingua galega (niveis Celga 2, 3 e 4), e no DOG do 25 de outubro publica as datas concretas de realización destas probas, que se realizarán en Santiago de Compostela e Ponferrada.
Son as seguintes:
-Celga 2: 27 de novembro de 2022.
-Celga 3: 26 de novembro de 2022.
-Celga 4: 19 de novembro de 2022, para as persoas admitidas cuxo primeiro apelido empece polas letras letras T, U, V, W, X, Y, Z, A, B, C, D, E, F ou G; e 20 de novembro de 2022 para as persoas admitidas cuxo primeiro apelido empece polas letras H, I, J, K, L, M, N, Ñ, O, P, Q, R ou S.
24/10/2022. DINAMIZACIóN

Día da Restauración da Memoria Lingüística de Galicia

Co gallo da vindeira celebración do Día de Defuntos, a Asociación de Funcionarios para a Normalización Lingüística (AFNLG) promove, un ano máis, o Día da Restauración da Memoria Lingüística de Galicia, co obxectivo de fomentar o uso do galego no ámbito dos ritos funerarios e das últimas vontades, e facer pedagoxía sobre a incoherencia de enterrar os falecidos con lápidas escritas nun idioma diferente ao que falaban en vida. Con esta finalidade, a AFNLG, a través da Federación Galega de Municipios e Provincias, convida a todas as entidades locais a adherirse á iniciativa coa celebración dun acto no que se coloque nun sitio ben visible dos camposantos unha placa ou monumento co seguinte texto: “Na memoria de todas as persoas que xacen aquí, porque grazas a elas Galicia segue a ter cultura e lingua de seu”.
No marco deste iniciativa, que se celebra anualmente, a AFNLG publicou tamén varios volumes de mandas testamentarias (En galego, agora e sempre 2008; En galego, agora e sempre 2010) nos que diferentes persoas, coñecidas e anónimas, deixan por escrito os seus afectos polo idioma galego e o seu desexo de que se respecten os seus dereitos lingüísticos despois da súa morte.
24/10/2022. AXUDAS E PREMIOS

V Premio Xela Arias

A Asociación Galega de Profesionais da Tradución e da Interpretación (AGPTI) convoca a quinta edición do Premio Xela Arias, creado para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación. O prazo para a presentación de candidaturas remata o 25 de outubro. Para facelo cómpre enviar un correo electrónico a info@agpti.org co nome da empresa, entidade ou persoa candidata e os motivos polos que se considera que merece o premio.
Podes consultar as bases completas premendo aquí.
21/10/2022. DINAMIZACIóN

Évariste Galois e Ángeles Alvariño, homenaxeados no XIII Día da Ciencia en Galego

Coincidindo coa conmemoración do ano 2022 como “Ano internacional das ciencias básicas para o desenvolvemento sostible”, a Institución Galega da Ciencia (Igaciencia) promove a celebración do XIII Día da Ciencia en Galego, no que se renderá homenaxe ao matemático francés Évariste Galois e á oceanógrafa galega Ángeles Alvariño. Igual ca en edicións anteriores, ao longo de todo o mes de novembro Igaciencia organizará, coa colaboración da Xunta de Galicia, unha serie de videoconferencias didácticas dirixidas a centros de ensino galegos, especialmente aos de secundaria. O prazo de inscrición para asistir en liña remata unha semana antes da emisión de cada conferencia.

21/10/2022. CURSOS E CONGRESOS

Curso de improvisación oral en verso en Vigo

O Centro de Interpretación da Oralidade de Vigo organiza un Curso de improvisación oral en verso, que terá lugar no Verbum, todos os mércores en horario de 17:00 h a 20:00 h, a partir do vindeiro 26 de outubro de 2022. As sesións serán impartidas por Kike Estévez, de ORAL de Galicia, e os/as asistentes terán ocasión de aprender diferentes tipos de melodías de improvisación oral (repente galego, melodías lusófonas, catalás e americanas), así como as características e recursos literarios propios da regueifa. Para obter máis información sobre os trámites de inscrición, preme aquí.
18/10/2022. DINAMIZACIóN

"Ciencia Calidade", divulgación científica de calidade e en galego

O vindeiro 5 de novembro de 2022 terá lugar no Auditorio do Vello Cárcere (Lugo) o concurso de monólogos científicos en galego "Ciencia Calidade", onde oito persoas divulgarán contidos científicos de forma amena en menos de 3 minutos. Os/as divulgadores/as desta primeira edición son: Antonio Cagide Varela, Uxía Yáñez Ramil, Miriam Cebey López, Ángela Arnosa Prieto, Marta Trillo Domínguez, David García Dios, José Iglesias Moure e Alejandro Gómez Pazo.
A iniciativa está organizada polas divulgadoras Andrea Muras e Eva Cabanelas, en colaboración con Divulgaccion. Podes manterte ao día das novidades nas seguintes contas de Twitter e Instagram.
18/10/2022. DINAMIZACIóN

Música electrónica en galego para celebrar o Día das Bibliotecas na Coruña

Co gallo da celebración, o vindeiro 26 de outubro, do Día da Biblioteca, o Servizo de Normalización Lingüística e as Bibliotecas Municipais do Concello da Coruña organizan o AgoraSón 2022, unha iniciativa de carácter musical que nesta edición terá como protagonista a Nuno Pico, coñecido como Grande Amore, que acaba de recibir o Premio Martín Códax da Música ao mellor proxecto de música electrónica.
O evento terá lugar no auditorio do Centro Sociocultural Ágora o 22 de outubro de 2022 ás 21:00 horas. A entrada é de balde, mais cómpre ter invitación. Entregaranse un máximo de dúas invitacións por carné de socia/o das Bibliotecas Municipais da Coruña ao coller libros ou outro material en galego para os levar en préstamo. As invitacións sobrantes (de ser o caso) estarán ao dispor do público xeral o mesmo día do concerto, a partir das 20:00 h, na conserxería do Centro Ágora. Podes ampliar información sobre esta iniciativa premendo aquí.
18/10/2022. OUTRAS

Novo espazo para a proxección internacional da cultura galega

O Consello da Cultura Galega presenta Galicia, unha cultura por descubrir, proxecto deseñado para amosar no exterior o potencial creativo da cultura galega contemporánea. A primeira entrega, Unha literatura por descubrir, ofrece pezas audiovisuais protagonizadas por escritores e escritoras de referencia nas nosas letras, así como diversos recursos complementarios.

Estes contidos, que se dirixen a un público internacional especializado, poden consultarse en galego e en inglés no espazo web do Consello da Cultura Galega culture.gal, xunto con informacións básicas da propia institución e novos contidos que se irán incorporando sobre outras áreas da cultura galega.
17/10/2022. OUTRAS

Vocabulario panlatino do dixital: ataques e devasas

A Delegación xeral para a lingua francesa e as linguas de Francia, en colaboración coa Rede panlatina de terminoloxía (Realiter), presenta o Vocabulario panlatino do dixital: ataques e devasas, unha obra terminográfica na que se ofrecen solucións para 100 conceptos claves relacionados cos erros e problemas detectados no eido da informática, a telefonía e Internet. Xunto co termo e a definición en francés, preséntanse as correspondencias nas seguintes linguas: catalán, español, galego, italiano, portugués, romanés e inglés. De elaborar as correspondencias para o galego ocupáronse Manuel Núñez Singala e Xusto Rodríguez Río, do Servizo de Normalización Lingüística da Universidade de Santiago de Compostela.
17/10/2022.

A mocidade de Ferrolterra participa nun laboratorio de apoderamento lingüístico

O alumnado de bacharelato de catro centros de ensino medio da comarca de Ferrolterra (IES Carvalho Calero, IES Concepción Arenal, IES Sofia Casanova e IES Punta Candieira) está a participar estes días no proxecto "Laboratorio de Apoderamento Lingüístico", un proxecto piloto de dinamización do uso do galego e de xestión do conflito lingüístico na mocidade, desenvolvido pola cooperativa Rexenerando ao abeiro do Fondo de Proxectos Culturais Xacobeo 21-22. Os principais obxectivos do programa son a creación de espazos seguros para o uso do galego, a análise dos prexuízos existentes arredor do idioma propio e o deseño de prototipos de intervencións dinamizadoras para a creación dunha comunidade de activistas a prol do galego formada polos propios mozos e mozas participantes. Entre os días 13 e 27 de outubro o alumnado terá ocasión de traballar en grupo cos compañeiros/as de aula e posteriormente, o 11 de novembro, terá lugar un encontro intercentros para expor as propostas e recursos compilados. O programa rematará cun acto de peche, o 29 de novembro, onde se proxectará un vídeo resumo e se presentarán os resultados á comunidade educativa e ao conxunto da sociedade. Podes manterte ao tanto do desenvolvemento desta iniciativa a través da conta de instagram @laboratorio_lingua.
14/10/2022. DINAMIZACIóN

Concurso para atopar as palabras perdidas do galego

Docentes de Português na Galiza e AGAL organizan Perdidos e achados'22. Trátase dun concurso dirixido a alumnado de 3º da ESO a 2º de bacharelato, que consiste en localizar palabras galegas en desuso coincidentes co código internacional da lingua portuguesa. O obxectivo, recuperarmos e reaprendermos palabras perdidas a través da mocidade, dun xeito divertido e atractivo, así como aumentar a presenza da nosa lingua nas redes sociais.

O prazo para participar remata o 30 de novembro. Consulta as bases completas.
13/10/2022. CURSOS E CONGRESOS

I Xornada sobre Variación e Cambio Lingüístico

O Instituto da Lingua Galega da Universidade de Santiago de Compostela e o Centro de Línguas, Literaturas e Culturas da Universidade de Aveiro organizan, o 14 de novembro de 2022, a I Xornada sobre Variación e Cambio Lingüístico, un encontro que reunirá investigadores e investigadoras para promover e difundir os estudos sobre a variación e o cambio lingüístico nas linguas románicas.

A data límite de inscrición é o 10 de novembro. Podes consultar o programa e información adicional na páxina do ILG.
13/10/2022. DINAMIZACIóN

Campaña "Un outono cheo de letras" nas redes sociais

A Área de Normalización Lingüística da Deputación da Coruña botou a andar Un outono cheo de letras, campaña destinada á promoción do libro e a lectura en galego.

Esta iniciativa vai lanzando diariamente nas redes microentrevistas con diferentes actores sociais, vídeos divulgativos e entradas que mostran a importancia de termos unha lingua que nos permite construír unha visión propia do mundo. Ademais, ten en marcha un concurso: aquelas persoas que compartan post da campaña entrarán no sorteo de 10 bonos-libros a canxear en calquera libraría da provincia da Coruña.

A actividade remata o 24 de outubro de 2022, Día das Bibliotecas. Para obter máis información, preme aquí.
11/10/2022. OUTRAS

Axuntar presenta un informe sobre a situación lingüística do Eo-Navia

A asociación Axuntar presentou o pasado sábado, 8 de outubro de 2022, no concello de Boal (Asturias) o Informe lingüístico del Eo-Navia. Sen fronteiras: galego de Asturias. Trátase dun documento divulgativo que achega datos históricos sobre a realidade lingüística do Eo-Navia e sobre a situación sociolingüística actual desta comarca. O informe tamén trata o tema dos prexuízos lingüísticos e a percepción que os propios falantes de galego teñen da súa lingua, e valora as políticas deseñadas polas autoridades gobernamentais e lingüísticas asturianas en relación ao "galego de Asturias". Na canle de Youtube de Axuntar tes ao teu dispor catro vídeos coas intervencións dos participantes no acto de presentación deste informe.

11/10/2022. CURSOS E CONGRESOS

Xornada formativa sobre os recursos didácticos relacionados co Camiño de Santiago

A Comisión de Normalización Lingüística da Facultade de Ciencias da Educación da Universidade de Santiago organiza a XV Xornada "Os recursos educativos en galego”, que terá lugar o 3 de novembro de 2022 na Facultade de Ciencias da Educación da USC. Nesta edición o fío condutor das diferentes intervencións serán os recursos didácticos vinculados tematicamente co Camiño de Santiago. A xornada está dirixida a alumnado, PDI e PAS das universidades galegas, que ten de prazo para inscribirse ata o 31 de outubro de 2022.
10/10/2022. DINAMIZACIóN

Volve o LGx15 con ideas inspiradoras para o futuro do galego

A Coordinadora de Traballadores/as de Normalización da Lingua organiza unha nova edición do LGx15, un proxecto pensado para difundir, a través de charlas breves e amenas, argumentos e experiencias inspiradoras para o futuro do galego. Nesta ocasión os participantes serán Olaia Maneiro (Tanxugueiras), Pedro González Boquete, Fátima Barros, Beatriz Busto Miramontes, Padrorua e Fabiana Ambroa Ibarruri, Isaac González, Elsa Quintas Alborés e Guido Álvarez Parga. Da presentación e da música encargarase Lois Pérez. O acto terá lugar o 27 de outubro de 2022, ás 18 h, na Sala Capitol (Santiago de Compostela). Podes conseguir xa a túa entrada, a través da venda anticipada, premendo aquí.
10/10/2022. DINAMIZACIóN

Xa podes comezar a regueifar

Os servizos de normalización lingüística dos concellos de Ames, Carballo, Pontevedra, Santiago de Compostela e Teo presentaron a sexta edición do certame Enreguéifate, unha iniciativa deseñada para difundir a regueifa como forma de improvisación oral e para promover o uso do idioma galego. O certame inclúe dúas categorías, unha xeral (na que pode participar calquera persoa) e outra escolar (dirixida ao alumnado do ensino non universitario). Para participar cómpre enviar un vídeo, dunha duración máxima de 3 minutos, no que aparezan, cando menos, dúas persoas regueifando en galego. O xurado outorgará diferentes premios, de carácter simbólico, que incluirán o recoñecemento e difusión do traballo. O prazo para enviar os vídeos comeza o 10 de novembro de 2022 e remata o 10 de marzo de 2023.
10/10/2022. DINAMIZACIóN

XXI Concurso de Relato Oral "Tíralle da lingua"

A Asociación Socio-Pedagóxica Galega organiza unha nova edición deste certame, dirixido á comunidade educativa, co obxectivo de normalizar o uso oral do galego e contribuír a que este idioma se converta en instrumento normal de comunicación e creación de historias no ámbito educativo. Os participantes poderán contar historias en galego, de base popular, de base literaria ou de creación propia, durante un tempo máximo de cinco minutos. Na fase final o xurado outorgará un primeiro premio de 250 euros e, se o considerase oportuno, un segundo de 150 euros. Os centros de ensino dos participantes premiados tamén recibirán un premio do mesmo importe. O prazo para realizar a inscrición remata o vindeiro 14 de novembro de 2022.
Para acceder ás bases completas do concurso e mais á ficha de inscrición, preme aquí.
10/10/2022. DINAMIZACIóN

Fraseoloxía en galego nos servizos de pediatría lugueses

A Mesa pola Normalización Lingüística, a través da súa delegación de Monforte de Lemos, está a desenvolver unha campaña de promoción do uso do galego no ámbito da pediatría. A principal acción desta iniciativa consiste na difusión de adhesivos con fraseoloxía galega adaptada á poboación infantil que acode á consulta de pediatría. As láminas cos deseños, elaborados por doce ilustradores/as lugueses, repartiranse nos servizos de pediatría dos ambulatorios do sur de Lugo, para que os máis pequenos/as poidan gozar destas mensaxes de apoio en lingua galega. No Xornal de Lemos podes ampliar información sobre esta campaña.