O Campus Terra e o Servizo de Normalización Lingüística da Universidade de Santiago de Compostela presentan unha nova edición de DivulgaTerra, unha iniciativa de divulgación científica deseñada para darlle visibilidade ao traballo desenvolvido polos novos/as investigadores/as e promover a utilización do galego como ferramenta para a comunicación científica. Este ano o evento estrutúrase en tres xornadas temáticas (días 15, 22 e 29 de novembro), que terán lugar no Auditorio da Casa do Saber (Vicerreitoría do Campus de Lugo), combinando presentacións breves de 10 minutos con charlas divulgativas de arredor de 30 minutos. O prazo de inscrición remata o vindeiro 19 de outubro de 2018.
07/11/2018. DINAMIZACIóN
07/11/2018. CURSOS E CONGRESOS
O Servizo de Normalización Lingüística do Concello de Vigo organiza o obradoiro Moito por dicir, dirixido a persoas adultas (nomeadamente, membros de asociacións veciñais, entidades deportivas e culturais ou ANPAS) interesadas en mellorar a súa competencia lingüística no que respecta á elaboración de textos de carácter informativo (notas de prensa, artigos, reportaxes e artigos de opinión). As sesións desenvolveranse entre o 13 de novembro de 2018 e o 4 de decembro de 2019 na Aula de Informática do Edificio Carreras (antiga reitoría), en Vigo. Todas as persoa interesadas deben poñerse en contacto co SNL do Concello de Vigo.
05/11/2018. AXUDAS E PREMIOS
O Concello de Carballo convoca o Premio a proxectos de webseries en galego, no marco do Festival Carballo Interplay 2019, que se celebrará entre os días 4 e 6 de abril de 2019. O obxectivo do certame é a creación e a difusión de contidos audiovisuais orixinais en lingua galega en Internet. O premio, dotado de 1.500 euros, debe destinarse á produción de, como mínimo, tres vídeos do proxecto de webserie premiado. O prazo para enviar os proxectos remata o 17 de marzo de 2019.
02/11/2018. CURSOS E CONGRESOS
A Sección de Lingua, Literatura e Comunicación do Consello da Cultura Galega e a Rede de Investigación Galega TecAnDaLi organizan a xornada “Para que serven os datos lingüísticos?”, que terá lugar o 29 de novembro, a partir das 16:30 horas, na sede do Consello da Cultura Galega (Pazo de Raxoi, Santiago de Compostela). Na xornada presentaranse algúns dos logros acadados ata o momento na investigación sobre datos lingüísticos e analizaranse as necesidades e os retos futuros que cómpre afrontar neste campo interdisciplinar de investigación. A matrícula é gratuíta e as prazas cubriranse por rigorosa orde de inscrición.
02/11/2018. DINAMIZACIóN
A Institución Galega de Ciencia (Igaciencia) convida un ano máis a toda a comunidade educativa a conmemorar en clave científica e galega a declaración feita pola Unión Europea do ano 2018 como Ano Europeo do Patrimonio Cultural. Deste xeito, o IX Día da Ciencia en Galego xirará este ano arredor do tema “A cultura científica e a cultura galega como patrimonio cultural europeo”. Os científicos homenaxeados nesta edición son o matemático grego Arquímedes e mais o Mestre Mateo, artífice do Pórtico da Gloria da Catedral de Santiago, obra escultórica universal representativa da arte románica. No web cienciaengalego.org podes descargar o cartel conmemorativo da iniciativa así como un cartel didáctico sobre a xeometría no Pórtico da Gloria.
02/11/2018. AXUDAS E PREMIOS
A Asociación Cultural O Brado, da Estrada, fixo públicos os galardoados da vixésimo oitava edición dos Premios San Martiño de Normalización Lingüística, convocados anualmente para premiar a persoas e colectivos que destacan polo seu labor de promoción do idioma galego. Os premiados nesta edición son o mestre e poeta Manuel Pereira Valcárcel, na modalidade “A Estrada e comarca de Terra de Montes”; a cantante Uxía Senlle, na categoría de “Galicia enteira”; e o catedrático de Xeografía e Historia Xosé María Lema, na categoría “Toda unha vida”. A entrega dos galardóns terá lugar no Teatro Principal de A Estrada na segunda semana de novembro. Podes obter máis información premendo aquí.
02/11/2018. DINAMIZACIóN
As consellerías de Cultura e Educación organizan unha nova edición do programa Novembro, mes da ciencia en galego nas bibliotecas, co obxectivo de difundir a divulgación científica en galego en todas as bibliotecas públicas e escolares. Igual ca en edicións anteriores, o programa de actividades está acompañado polo manifesto dun científico/a galego/a e nesta edición asínao Luís Navarro, profesor de Bioloxía na Universidade de Vigo e membro do grupo Divulgare. A maiores, tamén se elaborou un sitio web cunha compilación de materiais didácticos en galego de temática científica e mais unha colección de imaxes en Pinterest coas portadas de libros informativos de interese para as bibliotecas escolares.
31/10/2018. LEXISLACIóN
A Mesa pola Normalización Lingüística presenta publicamente o Relatorio sobre a aplicación en Galiza da Carta europea das linguas rexionais ou minoritarias (2014-2016), un documento que será tido en conta, xunto coas achegas que formulen outras entidades, para a elaboración do Quinto informe sobre o cumprimento en España da Carta europea das linguas rexionais ou minoritarias, que o Consello de Europa emitirá en 2019. Neste relatorio, tras sinalar os diferentes incumprimentos do articulado da Carta, a Mesa conclúe que “tanto o Estado como a Xunta incumpren as súas obrigas en todas as áreas nas que deben garantir a presenza normal do galego”. Para ampliar esta nova preme aquí. Se o desexas, tamén podes consultar os informes anteriores do Consello de Europa en relación ao cumprimento deste tratado internacional.
31/10/2018. CURSOS E CONGRESOS
No marco dos actos de conmemoración do seu 25 aniversario, o Centro Ramón Piñeiro para a Investigación en Humanidades organiza a xornada “O Centro Ramón Piñeiro e a investigación lingüística”, que terá lugar o vindeiro 14 de novembro de 2018 no pazo de San Roque, en Santiago de Compostela. O obxectivo da xornada é poñer en valor os diferentes proxectos lingüísticos desenvolvidos polo Centro nos seus 25 anos de traxectoria. Podes obter máis información sobre o programa da xornada e os trámites de inscrición premendo aquí.
31/10/2018. DINAMIZACIóN
A Secretaría Xeral de Política Lingüística convoca unha nova edición do Concurso-Exposición Letras Galegas, dirixido aos centros de ensino público non universitario para a elaboración dunha exposición relacionada coa obra, época e lingua do autor homenaxeado no Día das Letras Galegas 2019, Antón Fraguas Fraguas. O concurso consta de dúas categorías, unha para os centros de educación infantil e primaria e outra para os restantes. Outorgarase un premio en metálico de 2.000 euros para cada categoría. O prazo de presentación dos traballos remata o 22 de xaneiro de 2019. Para obter máis información, preme aquí.
26/10/2018. DINAMIZACIóN
Vinte concellos galegos anuncian a futura creación da Asemblea de Entidades Locais pola Lingua. Trátase de entidades locais que xa viñan traballando xuntas en diferentes proxectos de normalización lingüística (como Apego, Youtubeir@s ou Club de debate) e que agora deciden dar un paso máis na formalización deste traballo colaborativo. A asemblea, aínda en proceso de creación, está aberta a novas incorporacións, de feito, os promotores enviarán convite formal a todos os concellos galegos e deputacións para que se sumen ao proxecto. O requisito é desenvolver políticas de normalización lingüística e contar no organigrama cunha unidade técnica para executalas. Podes ampliar información premendo aquí.
26/10/2018. DINAMIZACIóN
O Servizo de Normalización Lingüística do Concello de Vigo presenta unha nova edición do programa "Vigo Arrólate", deseñado para fomentar a transmisión do galego no ámbito da familia. O programa, dirixido a bebés e ás súas familias, inclúe contos, música e actividades formativas, que se desenvolverán neste último trimestre do ano 2018. No web do SNL de Vigo podes consultar un adianto da programación de outono, así como unha sinopse das diferentes actividades.
25/10/2018. CURSOS E CONGRESOS
O Instituto Nacional de Administración Pública (INAP) convoca actividades formativas para a aprendizaxe e perfeccionamento do catalán, éuscaro, galego e valenciano, dirixidas aos empregados da Administración Xeral do Estado (funcionarios/as, persoal laboral e estatutario), co ánimo de mellorar a súa competencia lingüística e garantir deste xeito os dereitos lingüísticos da cidadanía. Os cursos realizaranse na modalidade en liña, entre o 14 de xaneiro e o 13 de setembro de 2019. Para participar nos cursos de galego ofértanse 625 prazas. O prazo de inscrición é de 10 días hábiles, contados a partir do día seguinte ao da publicación da convocatoria no Boletín Oficial do Estado. Para obter máis información sobre os trámites de inscrición, preme aquí.
24/10/2018. AXUDAS E PREMIOS
A Secretaría Xeral de Medios da Xunta de Galicia publica a resolución das axudas concedidas a empresas que realicen publicacións periódicas escritas integramente en galego. Para consultar a listaxe de beneficiarios/as, preme aquí.
22/10/2018. DINAMIZACIóN
Co gallo da celebración o vindeiro 2 de novembro do Día de Defuntos, a Asociación de Funcionarios para a Normalización Lingüística (AFNL) convida, un ano máis, a todos os concellos galegos a festexar o Día da Restauración da Memoria Lingüística de Galicia, galeguizando as rotulacións dos cemiterios e colocando placas conmemorativas. Os promotores da iniciativa tamén están a difundir nas redes o vídeo “Deixa en herdanza a túa lingua”, para animar a recuperar a antiga tradición das mandas testamentarias. Podes ver algúns exemplos destas mandas no libro “En galego, agora e sempre”, editado pola AFNL en 2008, no que diferentes persoas manifestan as súas últimas vontades con respecto á lingua.
19/10/2018. CURSOS E CONGRESOS
A Comisión de Normalización Lingüística da Facultade de Ciencias da Educación da Universidade de Santiago organiza a XI Xornada "Os recursos educativos en galego”, que nesta edición estará centrada na educación musical. O obxectivo é dar a coñecer os recursos educativos existentes en lingua galega no ámbito da educación musical e promover a creación doutros novos adaptados ás necesidades contextuais e lingüísticas de Galicia. As sesións desenvolveranse o mércores 21 de novembro de 2018 no Salón de Actos da Facultade de Ciencias da Educación. Para ampliar información sobre o programa e os trámites de inscrición, preme aquí.
19/10/2018. DINAMIZACIóN
A Real Academia Galega e a Secretaría Xeral de Política Lingüística presentan a segunda edición do programa Toponimízate. Falámosche dos nomes da túa terra, que ten como obxectivo preservar e divulgar o patrimonio toponímico galego. No marco desta iniciativa, entre outubro e decembro de 2018 desenvolveranse unha serie de charlas divulgativas en 15 concellos adscritos á Rede de Dinamización Lingüística da Xunta de Galicia. Nestas charlas, o técnico do Seminario de Onomástica da RAG, Vicente Feijoo, ofrecerá información sobre a orixe e o significado dos topónimos de cada concello. Os asistentes tamén poderán familiarizarse con ferramentas coma o Buscador de topónimos, que permite localizar a microtoponimia recollida ata o momento, ou coa futura aplicación colaborativa “Galicia nomeada”, coa que calquera cidadán poderá xeolocalizar aqueles microtopónimos que aínda non están recollidos. Para obter máis información, preme aquí.
19/10/2018. CURSOS E CONGRESOS
Onte, 18 de outubro de 2018, inaugurouse en Denver (Colorado) o III Simposio Norteamericano de Estudos Galegos, coorganizado pola Regis University, a Metropolitan State University of Denver e o Colorado College. Este simposio, que leva por título “Os estudos galegos rumbo ao oeste. A lingua e a cultura galegas na encrucillada”, reunirá ata o vindeiro día 20 de outubro estudosos norteamericanos, galegos e internacionais para establecer un diálogo interdisciplinar arredor da lingua, literatura, cultura e identidade galegas.
18/10/2018. INVESTIGACIóN
A Comisión de Normalización Lingüística (CNL) da Facultade de Dereito e o Servizo de Normalización Lingüística (SNL) da USC presentan a obra Termos esenciais de dereito laboral e da seguridade social, un glosario trilingüe (galego-español-inglés) no que se compilan máis de 1.000 conceptos do ámbito do dereito do traballo e da seguridade social. Con esta obra péchase a colección de vocabularios básicos do dereito da que tamén forman parte outros títulos relacionados co
dereito constitucional, penal, internacional, civil, administrativo e mercantil.
dereito constitucional, penal, internacional, civil, administrativo e mercantil.
17/10/2018. OUTRAS
A Secretaría Xeral de Política Lingüística anuncia as datas de realización das probas para a obtención dos certificados de lingua galega, niveis Celga 2 e 4, que foron convocadas ao abeiro da resolución publicada no DOG do pasado 14 de setembro. Estas probas realizaranse o 17 de novembro de 2018 (Celga 4) e o 24 de novembro de 2018 (Celga 2).
15/10/2018. DINAMIZACIóN
O vindeiro 15 de novembro, ás 18:00 h, terá lugar na Sala Capitol de Santiago de Compostela unha nova edición do LGx15, un evento organizado pola Coordinadora de Traballadores/as de Normalización da Lingua, no que a través de charlas breves, diferentes participantes transmiten argumentos e experiencias para influír na conciencia e nas actitudes lingüísticas dos falantes. Nesta edición, as intervencións correrán a cargo de Ruth Caramés, Xema Varela, Mercé Barrientos, Manolo Maseda, Javier Balea, Inma Gil Rosendo, Eira Losada e Aquel-e. Das presentacións ocuparanse as regueifeiras Alba María e Lupe Blanco. O acto contará tamén coa actuación musical de Brais Morán. As entradas poden adquirirse no web da Sala Capitol ou na Tenda A Reixa.
11/10/2018. CURSOS E CONGRESOS
Dirixidas principalmente ás persoas que traballan no ámbito da normalización lingüística e das políticas públicas, as xornadas Malas Linguas centraranse en deseñar estratexias para activar os/as falantes do século XXI. O programa estrutúrase en catro sesións, que se celebrarán entre outubro de 2018 e abril de 2019. A primeira sesión terá lugar o vindeiro 23 de outubro no Pazo de Mariñán (Bergondo) e xirará arredor da lingua, o discurso e as políticas públicas. Nas seguintes, os fíos condutores serán a transmisión familiar do idioma (29 de novembro de 2018), a transmisión en contextos externos ao ámbito familiar (1 de marzo de 2019), e a lingua e os xéneros (19 de abril de 2019).
03/10/2018. CURSOS E CONGRESOS
A Real Academia Galega organiza, coa colaboración da Deputación Provincial de Pontevedra e o Museo de Pontevedra, a terceira edición da Xornada de Onomástica Galega, que nesta ocasión se centrará nos alcumes. A xornada terá lugar o 20 de outubro de 2018 no Museo de Pontevedra. A entrada é libre ata completar aforo. Para ampliar información, preme aquí.
03/10/2018. AXUDAS E PREMIOS
A Universidade de Santiago de Compostela convoca o II Premio Luís Porteiro Garea, co obxectivo de recoñecer publicamente o traballo de persoas, entidades ou colectivos que traballan a prol do uso do galego na universidade, e ao mesmo tempo, homenaxear a figura deste profesor de Dereito Civil que pronunciou en 1915 a primeira lección en galego no ámbito universitario. O premio ten carácter de distinción pública e consistirá nun elemento simbólico de tipo artístico. O prazo para presentar as candidaturas remata o 15 de novembro de 2018.
03/10/2018. CURSOS E CONGRESOS
O Instituto da Lingua Galega da Universidade de Santiago de Compostela organiza, coa colaboración do Consello da Cultura Galega, o simposio “Variedades lingüísticas en contacto na Península Ibérica”, onde se abordarán desde diferentes perspectivas (social, lingüística, etnográfica, histórica, etc.) as situacións de contacto entre as diferentes linguas que conviven na península. As sesións desenvolveranse os días 12, 13 e 14 de novembro de 2018 no Salón de Graos da Facultade de Filoloxía da USC. O prazo de inscrición remata o 10 de novembro ás 12:00 horas.
O Instituto da Lingua Galega da Universidade de Santiago de Compostela organiza, coa colaboración do Consello da Cultura Galega, o simposio “Variedades lingüísticas en contacto na Península Ibérica”, onde se abordarán desde diferentes perspectivas (social, lingüística, etnográfica, histórica, etc.) as situacións de contacto entre as diferentes linguas que conviven na península. As sesións desenvolveranse os días 12, 13 e 14 de novembro de 2018 no Salón de Graos da Facultade de Filoloxía da USC. O prazo de inscrición remata o 10 de novembro ás 12:00 horas.
02/10/2018. OUTRAS
O Ministerio de Cultura e Deporte presenta os datos da Panorámica da edición española de libros do ano 2017. No que respecta aos libros publicados en galego, os datos constatan un aumento do 6,4% (1.288 títulos en 2017 fronte aos 1.211 títulos en 2016), reverténdose así o descenso continuado que se viña producindo desde 2014. No que respecta aos títulos traducidos ao galego, os números non son tan favorables (42 títulos en 2017 fronte aos 54 títulos en 2016), constatándose un descenso dun 22,2%, máis acentuado incluso ca en anos anteriores. No referido á edición no conxunto do Estado, os libros editados en galego supoñen un 1,5% do total. Se o desexas, no web do Ministerio podes acceder aos cadros evolutivos do período 2013-2017. Tamén podes consultar o resumo dos datos facilitado polo Ministerio.
02/10/2018. AXUDAS E PREMIOS
Co gallo do Día Internacional da Tradución, que se celebra cada 30 de setembro, a Asociación Galega de Profesionais da Tradución e a Interpretación (AGPTI) convoca o Premio Xela Arias, para homenaxear a figura de Xela Arias e reivindicar o idioma galego como lingua de traballo no ámbito da tradución. O premio está dirixido a unha empresa, entidade ou persoa que destaque pola promoción da tradución ou interpretación cara ou desde o galego. As candidaturas poden enviarse ao correo electrónico info@agpti.org ata o día 18 de outubro.
01/10/2018. AXUDAS E PREMIOS
A Deputación de Pontevedra publica a listaxe de entidades beneficiarias da liña de axudas a entidades culturais sen fin de lucro da provincia de Pontevedra, para desenvolver actividades de promoción do galego durante o ano 2018. Segundo as bases da convocatoria, as accións subvencionables eran: certames literarios e xornalísticos; creación audiovisual e literaria; feiras/eventos de promoción da creación en galego; estudos de sociolingüística; xornadas e publicacións sobre recuperación da toponimia; iniciativas de dinamización comercial en galego; iniciativas de conmemoración do Día das Letras Galegas, ou recoñecementos a persoas e colectivos que aposten polo galego. Para ampliar información, preme aquí.
01/10/2018. INVESTIGACIóN
O Servizo de Normalización Lingüística do Concello de Vigo e a Área de Normalización Lingüística da Universidade de Vigo presentan un novo volume da colección Toponimia do Val do Fragoso, nesta ocasión dedicado á parroquia de Comesaña. A presentación terá lugar o vindeiro venres día 5 de outubro, ás 20:00 h, no local da SVCD Nautilius. No acto intervirá o autor do libro, Anxo Rodríguez Lemos, xunto con representantes da Comunidade de Montes de Comesaña, da SVCD Nautilius, da Universidade de Vigo e do Concello de Vigo. Podes consultar en liña os outros estudos desta colección (sobre a toponimia de Lavadores, Beade, Coia, Freixeiro e Sárdoma), no web do SNL do Concello de Vigo.
27/09/2018. CURSOS E CONGRESOS
A Sección de Lingua, Literatura e Comunicación do Consello da Cultura Galega organiza a xornada As tecnoloxías da lingua, unha oportunidade para a sociedade galega, que terá lugar o vindeiro 16 de outubro de 2018 en Santiago de Compostela. As xornadas centraranse no papel que poden xogar as tecnoloxías lingüísticas como ferramentas facilitadoras para a comunicación entre persoas, con especial interese en dous campos concretos: o da transcrición automática de voz a texto e o da tecnoloxía do procesado de linguaxe natural. A inscrición é gratuíta e as prazas cubriranse por rigorosa orde de inscrición.