A Deputación da Coruña publica a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2018. A partir do día seguinte á publicación desta resolución, os solicitantes teñen un prazo de 10 días hábiles para comunicar a súa renuncia, se fose o caso, a estas axudas. De non tramitar esta renuncia no citado prazo, enténdese que aceptan a axuda. Para consultar o texto completo da resolución, preme aquí.
20/03/2018. AXUDAS E PREMIOS
19/03/2018. CURSOS E CONGRESOS
Este ano os Encontros para a Normalización Lingüística chegan á súa vixésima edición e convidámoste a que o celebres con nós participando neste foro de debate e reflexión que terá lugar os días 12 e 13 de abril de 2018 na sede do Consello da Cultura Galega. O eixo temático desta edición está centrado na relación entre lingua e deporte, aínda que tamén haberá un oco no programa para botar a ollada atrás e analizar todos estes anos (1993-2018) de singradura compartida a prol do idioma. A maiores, volveremos destinar un espazo propio á presentación de iniciativas normalizadoras na Artesa 2018, a nosa mostra de recursos. Tamén manteremos un grupo de Facebook, que nos permitirá compartir información e iniciar o debate antes das sesións presenciais. A inscrición realizarase exclusivamente a través do formulario habilitado para este efecto e as prazas cubriranse por estrita orde de inscrición.
19/03/2018. OUTRAS
A Televisión de Galicia estrea hoxe, 19 de marzo, “Morangos com açúcar”, unha serie xuvenil da produtora Casa da Criaçao que se emitiu durante dez anos en Portugal con gran éxito de audiencia. A serie consta de 120 capítulos, que se poderán ver na segunda canle da TVG (tvG2) de luns a venres, ás 19:15 horas. “Morangos com açúcar” emitirase en versión orixinal con subtítulos en galego, converténdose na primeira serie que a Televisión de Galicia emite en portugués.
19/03/2018. INVESTIGACIóN
O Centro Ramón Piñeiro para a Investigación en Humanidades celebra este ano o seu 25 aniversario e farao cun programa de actos que se van desenvolver entre os meses de marzo e decembro no Pazo de San Roque, en Santiago de Compostela. Hoxe, 19 de marzo, terá lugar ás 12:30 horas a conferencia inaugural, que correrá a cargo de Darío Villanueva, presidente da RAE. O programa de actos completarase cunha exposición e con 4 xornadas académicas, que xirarán arredor da creación do centro, os programas de investigación que desenvolve e o fondo documental que custodia, grazas á doazón de persoeiros como o profesor alemán Jürgen Untermann, e os galegos Aníbal Otero e Elixio Rivas. Para consultar o programa completo, preme aquí.
16/03/2018. DINAMIZACIóN
Co gallo da conmemoración do 35 aniversario da aprobación da Lei de normalización lingüística, a Irmandade Xurídica Galega (IXUGA), entidade formada por máis de 220 xuristas, está a organizar diferentes actos conmemorativos das primeiras sentenzas ditadas en lingua galega. En concreto hoxe, 16 de marzo, terá lugar en Cambados un acto de descuberta dunha placa conmemorativa das primeiras sentenzas ditadas en galego polos maxistrados D. Edgar Fernández Closs, Dª Carme Pose Amado e D. Xoán Manuel Hermo Costoya nos xulgados do Partido Xudicial de Cambados. O acto celebrarase ás 12:30 horas no Edificio dos Xulgados de Cambados, na rúa Emilia Pardo Bazán.
16/03/2018. EMPREGO
O Concello da Estrada publica, no BOP de Pontevedra do 15 de marzo de 2018, unha modificación das bases para a contratación dun técnico/a de normalización lingüística. Tras advertir un erro nas anteriores bases (BOP do 26 de febreiro), modifícase agora a cláusula segunda, referida á modalidade do contrato, que pasa a ser de interinidade. Debido a esta modificación, ábrese un novo prazo para a presentación de instancias, que será de 10 días naturais desde a publicación do anuncio no BOP.
15/03/2018. DINAMIZACIóN
A Xunta de Galicia, a Real Academia Galega, o Consello da Cultura Galega e a CRTVG presentaron a programación conxunta de actividades coa que homenaxearán a María Victoria Moreno, escritora á que se lle dedica este ano o Día das Letras Galegas. O programa inclúe exposicións, actividades musicais e audiovisuais, iniciativas de participación social (certames, contacontos, obradoiros...) e propostas variadas para o ámbito educativo. No que respecta ao Consello da Cultura Galega, organizará o seu tradicional Concerto das Letras e editará unha edición facsimilar de Mar adiante, considerada unha das obras pioneiras da literatura infantil galega.
15/03/2018. DINAMIZACIóN
A Asociación Olloboi convoca unha nova edición do Festival Audiovisual Escolar Olloboi, dirixido a alumnado e profesorado de centros escolares de todos os niveis educativos (primaria, secundaria, bacharelato, formación profesional, universidade, escolas audiovisuais). Poderán presentarse ao certame videocreacións (documental ou ficción) realizadas nos últimos tres anos, dunha duración non superior aos 20 minutos e que estean accesibles en Internet. O prazo para inscribir as propostas remata o 30 de abril. No Encontro Olloboi 2018, que terá lugar o 11 de maio, entregaranse os nove premios do certame, organizados en categorías segundo a idade do alumnado. Neste encontro tamén se desenvolverá un CineForum e mais un roteiro socioaudiovisual por Boiro. Podes consultar as bases completas do certame premendo aquí.
14/03/2018. DINAMIZACIóN
A Comisión de Normalización Lingüística da Facultade de Matemáticas da USC convoca a sétima edición do concurso Explícoche matemáticas 2.0, co obxectivo de promover o uso do galego como medio de transmisión do coñecemento matemático. O certame está dirixido ao alumnado das universidades públicas do Estado español, así como a estudantes de 3º e 4º da ESO e Bacharelato dos centros de educación secundaria de Galicia e comunidades limítrofes. Para participar cómpre realizar un vídeo de entre 1:30 e 2:30 minutos de duración sobre un tema relacionado coas matemáticas. O xurado outorgará tres premios de 200 euros entre os gañadores das diferentes categorías. Haberá tamén un cuarto premio de 100 euros para o vídeo mellor valorado polos internautas. O prazo para enviar os proxectos remata o 6 de abril de 2018. Podes ampliar información premendo aquí.
13/03/2018. OUTRAS
A Secretaría Xeral de Política Lingüística da Xunta de Galicia convoca as probas para a obtención dos certificados de lingua galega (niveis Celga 1, 2, 3 e 4) no ano 2018. As probas realizaranse o 26 de maio (Celga 4), o 27 de maio (Celga 2), o 2 de xuño (Celga 3) e o 3 de xuño (Celga 1) en Santiago de Compostela e Ponferrada. O prazo de presentación de solicitudes é dun mes, contado a partir do día seguinte ao da publicación desta convocatoria.
[Modificación da convocatoria]
[Modificación da convocatoria]
13/03/2018.
A Real Academia Galega (RAG) presentou, no CEP Marcos da Portela, o proxecto web Primavera das Letras 2018, dedicado a María Victoria Moreno, que este ano será a autora homenaxeada no Día das Letras Galegas. O web compila materiais lúdicos e didácticos deseñados para o profesorado e o alumnado de infantil e primaria, ademais de información biográfica e bibliográfica sobre a autora. Podes obter máis información premendo aquí.
12/03/2018. EMPREGO
A Universidade de Santiago de Compostela anuncia a convocatoria pública de contratación de persoal para colaborar en actividades de investigación mediante contrato de obra ou servizo determinado. Entre as prazas ofertadas anúnciase unha para o proxecto “Contacto e cambio lingüístico en galego”, que se está a desenvolver no Instituto da Lingua Galega. A forma de provisión é o concurso de méritos. A duración do contrato será de catro meses, cunha xornada laboral a tempo parcial (30 horas semanais). O prazo de presentación de solicitudes remata o 18 de marzo de 2018. Para consultar as bases completas da convocatoria, preme aquí.
12/03/2018. CURSOS E CONGRESOS
A Real Academia Galega, coa colaboración da Secretaría Xeral de Política Lingüística, o Instituto da Lingua Galega da Universidade de Santiago e a Deputación da Coruña, organiza a XXXI edición dos Cursos de verán de lingua e cultura galegas, dirixidos preferentemente a alumnado e profesorado universitario vinculado aos centros de estudos galegos do exterior, aínda que tamén están abertos a calquera persoa maior de idade de fóra de Galicia interesada no noso idioma. Os cursos, que se desenvolverán entre os días 2 e 24 de xullo de 2018, contan con diferentes niveis (elemental, medio e superior). O prazo de inscrición remata o 6 de abril de 2018. Para ampliar información sobre o programa e os trámites de matrícula, preme aquí.
12/03/2018. AXUDAS E PREMIOS
No marco das X Xornadas Martín Sarmiento, que tiveron lugar o pasado 9 de marzo en Vilafranca do Bierzo, presentouse o I Premio Morales para a Promoción da Lingua Galega no Bierzo, promovido por Edicións Positivas, o Grupo As Médulas para a Lingua e Cultura Galegas do Bierzo, A Xunta de Galicia, a Junta de Castilla y León, o Consejo Comarcal de El Bierzo, O Instituto de Estudios Bercianos e a Real Academia Galega. O premio, dirixido ao alumnado do “Programa de Promoción da Lingua Galega no Bierzo” e ao público adulto en xeral, conta con diferentes categorías segundo a idade dos participantes, que deben elaborar unha ilustración ou creación literaria a partir do poema Os Magostos, de Antonio Fernández Morales. O prazo para a presentación de traballos remata o 21 de xuño de 2018. As obras premiadas serán recollidas nunha publicación especial e o acto de entrega dos premios terá lugar o 20 de outubro nas Médulas.
09/03/2018. AXUDAS E PREMIOS
A Unidade Técnica de Normalización Lingüística da Deputación da Coruña convoca o IX Premio “Rosalía de Castro” de Lingua 2018, que ten como obxectivo recoñecer o traballo de persoas, colectivos, asociacións ou entidades que destaquen polo seu compromiso coa promoción e dignificación do noso patrimonio lingüístico. Establécense dúas categorías, unha para recoñecer o labor de promoción da lingua galega de persoas, colectivos ou asociacións, e outra para premiar o traballo específico cos sectores da infancia e a mocidade. A dotación económica do premio é de 3.000 euros para cada unha das categorías. O prazo de presentación das candidaturas remata o 30 de xuño.
07/03/2018. INVESTIGACIóN
A Fundación Antonio Fraguas Fraguas, coa colaboración da Secretaría Xeral de Política Lingüística, convoca o XI Proxecto Didáctico Antonio Fraguas Fraguas, un programa de investigación sobre o patrimonio lingüístico e cultural galego dirixido á comunidade educativa. Establécense dúas modalidades, ensino primario e secundario, e outorgaranse dous premios de 7000 euros para cada proxecto gañador, que deberán materializarse durante o vindeiro curso escolar 2018-2019. O prazo para participar estará aberto ata o 31 de maio de 2018.
06/03/2018. OUTRAS
O Servizo de Normalización Lingüística da Universidade de Santiago publica no último número d´O Cartafol dixital os datos sobre usos lingüísticos na actividade docente no curso 2017-2018. En termos xerais, impártese en castelán o 74,93% das horas docentes, en galego o 23,09%, e noutras linguas (inglés, portugués…) o 1,98%. No mesmo número ofrécese información detallada sobre usos lingüísticos segundo o tipo de titulación (grao, mestrado, licenciatura), ou o departamento e a categoría do persoal docente e investigador. Así mesmo, tamén podes consultar a evolución dos usos lingüísticos nos últimos anos.
05/03/2018. EMPREGO
O Concello de Santa Comba anuncia a contratación temporal de persoal docente para impartir diferentes cursos formativos, entre os que se atopa o de “Especialidade competencia comunicación en lingua galega nivel 2”. As bases que rexerán o proceso selectivo están dispoñibles na Secretaría do Concello de Santa Comba. Os/as aspirantes teñen de prazo para presentar as súas solicitudes 5 días naturais, contados a partir do seguinte ao da publicación do anuncio.
05/03/2018. EMPREGO
O Concello de Outes publica as bases para a contratación temporal dun técnico/a de normalización lingüística. O sistema de selección será o de concurso. Os/as aspirantes deben estar en posesión do título de licenciatura en Filoloxía Galega-Portuguesa, Filoloxía Galega ou Filoloxía Hispánica (subsección Galego-Portugués), grao en Lingua Galega, ou calquera outra licenciatura/grao sempre que dispoña do Celga 5. A duración do contrato será ata o 31 de decembro de 2018. O prazo para a presentación de solicitudes remata o vindeiro 14 de marzo. Podes consultar o texto completo da convocatoria premendo aquí.
02/03/2018. OUTRAS
A Galipedia celebra este mes de marzo de 2018 os seus quince anos de difusión en Internet do coñecemento en galego. Desde aquela primeira entrada coa definición lexicográfica do termo “grupo”, editada o 8 de marzo de 2003, centos de persoas contribuíron de xeito desinteresado a que hoxe teñamos ao noso dispor máis de 145.000 entradas sobre todo tipo de temas. Para conmemorar este aniversario, o vindeiro 10 de marzo, a comunidade de administradores e editores realizará en Ourense o “Primeiro wikimaratón do Día Internacional da Muller”, co ánimo de ampliar e mellorar os artigos biográficos de mulleres destacadas. Podes ler unha reportaxe sobre o proxecto no portal Gciencia.
02/03/2018. AXUDAS E PREMIOS
O Concello de Pontevedra deu a coñecer os/as gañadores/as destes galardóns, deseñados para facer un recoñecemento
público ao labor de impulso do uso da lingua galega e, ao mesmo tempo, manter viva a memoria do
xurista e escritor Xoán Manuel Pintos. Nesta edición os/as premiados/as son o Programa Apego, na categoría de “labor desenvolto desde a última edición”; e os profesores de lingua e literatura galegas Vitoria Ogando e Anxo González Guerra, na categoría de “traballo continuado ao longo de toda a traxectoria vital e profesional”. De entre as propostas presentadas pola cidadanía, o xurado acordou premiar a Galipedia, polos seus 15 anos de difusión do coñecemento en galego. O acto de entrega dos galardóns terá lugar o 15 de marzo de 2018, no Pazo de Mugartegui (praza da Pedreira) ás 20:30 horas. Podes ampliar a nova premendo aquí.
público ao labor de impulso do uso da lingua galega e, ao mesmo tempo, manter viva a memoria do
xurista e escritor Xoán Manuel Pintos. Nesta edición os/as premiados/as son o Programa Apego, na categoría de “labor desenvolto desde a última edición”; e os profesores de lingua e literatura galegas Vitoria Ogando e Anxo González Guerra, na categoría de “traballo continuado ao longo de toda a traxectoria vital e profesional”. De entre as propostas presentadas pola cidadanía, o xurado acordou premiar a Galipedia, polos seus 15 anos de difusión do coñecemento en galego. O acto de entrega dos galardóns terá lugar o 15 de marzo de 2018, no Pazo de Mugartegui (praza da Pedreira) ás 20:30 horas. Podes ampliar a nova premendo aquí.
01/03/2018. EMPREGO
O Parlamento de Galicia anuncia a convocatoria de dúas bolsas de formación práctica, de doce meses de duración, vinculadas ao seu Servizo de Publicacións. Poden optar a estas bolsas as persoas que posúan o grao/licenciatura en Tradución e Interpretación, sempre que a lingua de orixe principal da súa combinación lingüística (1ª lingua ou lingua A1) sexa a lingua galega, ou o grao/licenciatura en Filoloxía Galega. O prazo de presentación de solicitudes é de quince días naturais a partir do día seguinte ao da publicación desta convocatoria no DOG. As bases completas da convocatoria podes consultalas premendo aquí.
26/02/2018. EMPREGO
A Universidade de Vigo convoca tres bolsas de formación na súa Área de Normalización Lingüística (ANL) destinadas á formación complementaria do estudantado, que participará nas actividades de dinamización, formación e planificación lingüística que se desenvolven na ANL. Os solicitantes deben ser estudantes do Grao en Estudos de Galego e Español, do Grao en Tradución e Interpretación ou do Grao en Ciencias da Linguaxe e Estudos Literarios no curso 2017/2018, e ter cursado polo menos a metade dos créditos da titulación. O prazo de presentación de solicitudes remata o 7 de marzo de 2018. Para obter máis información sobre esta convocatoria, preme aquí.
26/02/2018. EMPREGO
O Concello da Estrada publica as bases para a contratación temporal dun/dunha técnico/a de normalización lingüística. O sistema de selección será o de oposición libre. Os/as aspirantes deben estar en posesión da licenciatura/grao en Filoloxía Galega-Portuguesa, Filoloxía Galega ou Filoloxía Hispánica (subsección Galego-Portugués), ou outras titulacións superiores pertencentes á área de humanidades ou de ciencias xurídicas sociais, sempre que teñan o Celga 5. O prazo para a presentación de solicitudes será de 10 días naturais, contados a partir do día seguinte ao da publicación da convocatoria. (modificación das bases)
23/02/2018. INVESTIGACIóN
Co gallo da celebración do Día Internacional da Lingua Materna, a Real Academia Galega (RAG) difundiu a publicación Lingua e sociedade en Galicia. Resumo de resultados 1992-2016, que á súa vez é un resumo e actualización dos datos presentados nun traballo anterior elaborado polo Seminario de Sociolingüística da RAG, Lingua e Sociedade. A evolución sociolingüística 1992-2013. O obxectivo do traballo é presentar unha visión panorámica da situación social da lingua galega no período 1992-2016 desde unha perspectiva demolingüística, para identificar as tendencias que marcan a súa evolución. Á vista dos resultados, a RAG lanza unha voz de alarma ante a creba da transmisión interxeracional e as tendencias negativas cara o uso do galego entre as xeracións máis novas. Ao tempo lémbralles, nomeadamente aos responsables políticos en materia de promoción do idioma pero tamén á sociedade no seu conxunto, a necesidade dun compromiso sincero e unha acción eficaz a prol da normalización do galego. Para ampliar a nova, preme aquí.
21/02/2018. EMPREGO
O Concello de Abegondo publica as bases xerais da convocatoria dun proceso selectivo para a cobertura en propiedade dunha praza de técnico/a de normalización lingüística. O sistema de selección será o de concurso-oposición. O procedemento de selección, os exercicios e a titulación requirida para participar no proceso concretaranse nas bases específicas da convocatoria. O prazo de presentación de solicitudes será de 20 días naturais, contados a partir do seguinte ao da publicación da convocatoria no Boletín Oficial do Estado (BOE).
21/02/2018. OUTRAS
Un ano máis, como ben sendo costume desde 1999, A UNESCO conmemora cada 21 de febreiro o Día Internacional da Lingua Materna. Neste día celebramos a riqueza que supón a diversidade lingüística do planeta, con programas e actividades destinadas a preservar este patrimonio e a promover o plurilingüismo. A directora xeral da UNESCO, Audrey Azoulay, fai especial énfase este ano na súa mensaxe institucional na necesidade de políticas lingüísticas que fomenten as linguas maternas e autóctonas, especialmente en países plurilingües. A Unesco tamén pon de relevo a importancia de usar as linguas maternas en Internet, espazo multilingüe por excelencia.
20/02/2018. EMPREGO
A Fundación Universidade de Vigo convoca, polo sistema de acceso libre, un proceso selectivo para constituír unha listaxe de agardas para contratacións temporais de profesorado de galego, co obxectivo de garantir a cobertura de potenciais necesidades do Centro de Linguas desta universidade. Os/as aspirantes deben estar en posesión do título de grao, licenciatura ou equivalente e ter unha experiencia mínima de tres anos na docencia de galego. O proceso selectivo constará de dúas fases: valoración do currículo e entrevista persoal. O prazo para a presentación de solicitudes remata o vindeiro 28 de febreiro de 2018. Podes consultar o texto completo da convocatoria premendo aquí.
19/02/2018. DINAMIZACIóN
Un ano máis, a Asociación de Escritoras e Escritores en Lingua Galega (AELG) convida a centros escolares, institucións, asociacións e a cidadanía en xeral a que o vindeiro 24 de febreiro conmemoren o Día de Rosalía de Castro agasallando un libro en galego e unha flor. A maiores, propón que o alumnado de Infantil e Primaria elabore elementos iconográficos de Rosalía e, xunto cos seus versos, os coloquen no interior dos vidros das fiestras. Para maior difusión, a documentación gráfica debe subirse á rede coa etiqueta #AbrideAFiestra. Para o alumnado de Secundaria e Bacharelato proponse a escenificación e gravación de mostras visibilizadoras da obra rosaliana que sigan o fío do lema #AbrideAFiestra, que despois tamén deben subirse á rede con esta mesma etiqueta. O acto central de homenaxe da AELG terá lugar o 24 de febreiro, ás 12:00 h, no Panteón de Galegos Ilustres, en San Domingos de Bonaval. Para ampliar información sobre a iniciativa e coñecer outros actos de homenaxe programados por concellos e institucións, preme aquí.
19/02/2018. CURSOS E CONGRESOS
O Servizo de Normalización Lingüística da Mancomunidade de Ordes organiza un curso de lingua galega preparatorio para presentarse ás probas de obtención do Celga 2. O curso, de 40 horas de duración, terá lugar do 22 de marzo ao 24 de maio, e as sesións desenvolveranse os luns e os xoves de 10:00 a 12:30 horas. O prazo de inscrición remata o 15 de marzo. Para calquera dúbida sobre o programa ou os trámites de inscrición, podes poñerte en contacto co SNL a través do teléfono 981 680 002 (ext. 120) ou o correo electrónico irene.bravo@mancomunidadeordes.gal. Este curso súmase á oferta formativa anunciada pola Secretaría Xeral de Política Lingüística no DOG do pasado 6 de febreiro.