A Secretaría Xeral de Política Lingüística e a Dirección Xeral de Educación, Formación Profesional e Innovación Educativa convocan os centros de ensino de titularidade pública para que participen en proxectos educativos de innovación en dinamización lingüística durante o curso académico 2017-2018. Entre os proxectos presentados seleccionaranse cinco, considerados como excelentes, que recibirán unha dotación económica de 2000 euros. As experiencias e os materiais didácticos producidos difundiranse a través do sitio web da SXPL. O prazo de presentación de solicitudes remata o 9 de febreiro de 2018. Para consultar o texto completo da convocatoria preme aquí.
20/12/2017. AXUDAS E PREMIOS
20/12/2017. AXUDAS E PREMIOS
A Axencia Galega das Industrias Culturais (Agadic) convoca axudas para o ano 2018 destinadas á creación de obras audiovisuais, en versión orixinal en lingua galega, con decidida vocación artística e cultural. En concreto, subvenciónase a escrita individual de guións en galego, a realización de proxectos de curtametraxes gravadas en versión orixinal galega e a elaboración de proxectos de longametraxes cinematográficas en versión orixinal galega. O prazo para a presentación de solicitudes é dun mes, contado a partir do día seguinte ao da publicación desta convocatoria.
19/12/2017. DINAMIZACIóN
A Secretaría Xeral de Política Lingüística presenta unha nova edición do programa Nadal en Rede, que percorrerá 41 concellos adscritos á Rede de Dinamización Lingüística entre o 16 de decembro de 2017 e o 7 de xaneiro de 2018, co obxectivo de crear espazos de uso para o galego nestas datas festivas. O programa inclúe as seguintes actividades: Os Bolechas. Un conto de Nadal, actividades lúdicas amenizadas polos membros da familia Os Bolechas; O castiñeiro do Apalpador, peza de monicreques da compañía Fantoches Baj; Nadal Novoneyra. Uxía canta a Uxío, concerto de Nadal no que Uxía Senlle interpreta textos do poeta do Courel; Picariño, concerto didáctico con Senén Vaamonde e mais Alfredo e Manuel, músicos da formación A Roda; e Cancións para nenos e nenas, concerto infantil ofrecido por María do Ceo.
19/12/2017. AXUDAS E PREMIOS
A Deputación da Coruña publica no BOP da provincia as bases da convocatoria de axudas dirixida a concellos, agrupacións de concellos, mancomunidades e outras entidades locais da Coruña, destinadas á creación, mantemento ou reforzo de servizos de normalización lingüística. Estas subvencións diríxense a concellos de 5000 habitantes ou máis, así como a agrupacións de concellos e mancomunidades que, entre eles, cheguen ao mesmo número mínimo de habitantes. Tendo en conta a continua perda de galegofalantes nas grandes cidades, os concellos da Coruña, Santiago de Compostela e Ferrol só poderán solicitar a subvención
para persoal técnico de reforzo do SNL xa creado. O prazo de presentación de solicitudes determinarase a partir da publicación no BOP da convocatoria segundo a remisión da Base de Datos Nacional de Subvencións.
para persoal técnico de reforzo do SNL xa creado. O prazo de presentación de solicitudes determinarase a partir da publicación no BOP da convocatoria segundo a remisión da Base de Datos Nacional de Subvencións.
12/12/2017. DINAMIZACIóN
O Foro Enrique Peinador presenta, cola colaboración da Xunta de Galicia, a campaña “Nadal + Galego”, coa que convida a toda a cidadanía a aproveitar estas festas de Nadal para apoiar as marcas que etiquetan os seus produtos en lingua galega. A iniciativa consiste na difusión dun vídeo publicitario que foi presentado publicamente o pasado 7 de decembro no Pazo de San Roque, en Santiago de Compostela. Podes ampliar a información, premendo aquí.
11/12/2017. EMPREGO
A Consellería de Cultura, Educación e Ordenación Universitaria publica as bases da convocatoria pública para cubrir dúas bolsas de formación nos lectorados de lingua, literatura e cultura galegas nas universidades Nova de Lisboa e Federal da Bahia. O prazo de presentación de solicitudes é dun mes, contado a partir do día seguinte ao da publicación da convocatoria.
05/12/2017. DINAMIZACIóN
A Secretaría Xeral de Política Lingüística presenta a iniciativa Toponimízate, que se desenvolverá no marco da Rede de Dinamización Lingüística (RDL) e que ten como obxectivo preservar e difundir o patrimonio toponímico de Galicia. Ao longo dos vindeiros meses o filólogo Vicente Feijoo, coordinador do Proxecto Toponimia da Real Academia Galega, ofrecerá varias conferencias divulgativas en diferentes concellos adscritos á RDL para convidar á veciñanza a colaborar no labor de recollida e xeolocalización dos microtopónimos do seu contorno. Podes coñecer toda a microtoponimia recollida ata o momento no web do Proxecto Toponimia de Galicia, a través do seu buscador avanzado, e en breve poderás descargar tamén desde ese mesmo web a aplicación colaborativa “Galicia nomeada”, coa que calquera cidadán poderá recoller e xeolocalizar aqueles microtopónimos que aínda non están recollidos.
05/12/2017. DINAMIZACIóN
O Portal das Palabras organiza unha nova edición da iniciativa Palabra do ano, co obxectivo de que a sociedade tome conciencia de que o idioma nos representa como pobo e a través das súas palabras podemos definir colectiva e simbolicamente o ano que remata. Todas as persoas interesadas poden enviar as súas propostas ata o vindeiro 17 de decembro. Tras seleccionar os termos máis populares e de maior carga semántica, abrirase unha votación para seleccionar a palabra favorita, que se converterá na Palabra do ano 2017.
05/12/2017. AXUDAS E PREMIOS
A Secretaría Xeral de Política Lingüística e a Dirección Xeral de Educación, Formación Profesional e Innovación Educativa, coa colaboración da CRTVG e de OQOeditora, convocan os VII Premios a curtas de animación en galego "Nós tamén creamos!". O certame está dirixido a alumnado e profesorado de educación infantil e primeiro a cuarto curso de primaria, pertencente a centros de titularidade pública. O prazo de presentación de solicitudes de participación remata o 12 de xaneiro e o de presentación dos traballos o 30 de abril de 2018. Para ampliar esta nova, preme aquí.
01/12/2017. DINAMIZACIóN
Nove concellos galegos, a Deputación da Coruña e as universidades da Coruña, Santiago de Compostela e Vigo presentan a segunda edición do proxecto Youtubeir@s, un concurso de creación de vídeos que nace co obxectivo de incrementar o uso do galego na canle Youtube. O concurso, dirixido a persoas maiores de 14 anos, ten tres categorías: “Vídeo-Facermos”, para vídeo-titoriais en galego nos que se amosen saberes e procesos de elaboración; “Vídeo-Opinarmos”, para vídeos en galego nos que se expoñan opinións ou valoracións sobre un tema; e “Canle”, para unha canle propia con todos os seus vídeos. O prazo de inscrición remata o 15 de marzo de 2018. Outorgaranse diferentes premios en metálico nos que se valorará a calidade técnica, a creatividade, a calidade lingüística e a eficiencia comunicativa das pezas. Podes consultar as bases completas do concurso premendo aquí.
29/11/2017. DINAMIZACIóN
O Servizo de Normalización Lingüística do Concello de Ames presenta a campaña Galeg@ para sempre, deseñada para fomentar o uso do galego no ámbito funerario. Hoxe, 29 de novembro de 2017, ás 19:00 h, no Centro Social de Agrón terá lugar un acto público no que diferentes representantes do mundo do ensino, do deporte, da universidade, da empresa e da cultura asinarán un documento de declaración de vontades no que manifestan o seu desexo de seren recordados en galego na hora do pasamento. Toda a veciñanza que o desexe poderá sumarse á iniciativa. No transcurso do acto presentarase tamén o “Manual de recursos funerarios en galego”, que inclúe suxestións de frases para lápidas, ramos e coroas, así como unha escolma de poesías e textos para as cerimonias laicas. Para ampliar esta nova, preme a aquí.
28/11/2017. AXUDAS E PREMIOS
A Consellería de Cultura, Educación e Ordenación Universitaria publica dúas convocatorias de axudas para a presentación de proxectos de fomento do galego no ámbito do ensino non universitario durante o curso 2017/2018, unha dirixida a centros de titularidade pública e outra a centros de titularidade privada. En ambos os casos, o prazo de presentación de solicitudes remata o 15 de xaneiro de 2018.
22/11/2017. CURSOS E CONGRESOS
O Servizo de Asesoramento Lingüístico do Colexio de Avogados de Santiago de Compostela, en colaboración coa Secretaría Xeral de Política Lingüística, organiza un ano máis a Xornada “Xustiza e Lingua, reflexións para a normalización”, que ten como obxectivo promover a reflexión sobre o proceso de normalización lingüística no ámbito da xustiza. A xornada terá lugar o vindeiro 28 de novembro de 2017, ás 19:00 h, no salón de actos do Colexio de Avogados compostelán. A matrícula é de balde.
20/11/2017. AXUDAS E PREMIOS
A Secretaría Xeral de Política Lingüística, o Parlamento de Galicia e o Foro Enrique Peinador deron a coñecer os gañadores dos XXIV Premios de Publicidade en Galego, cos que se quere recoñecer o labor realizado a prol da normalización lingüística por parte de empresas e entidades que se publicitan nos medios de comunicación. Nesta edición os traballos galardoados foron, na categoría de radio, “Medo a quedar sen datos” (da axencia Bap&Conde, para R Cable e Telecomunicacións); na categoría de televisión, “Imposible sen ti” (da axencia Tex 45 Producións, para Abanca); e na modalidade de Internet, “A túa compra, os teus temazos” (da axencia Nasas, para Gadis). Podes obter máis información sobre este premio premendo aquí.
14/11/2017. CURSOS E CONGRESOS
A Comisión de Normalización Lingüística da Facultade de Matemáticas da Universidade de Santiago organiza a segunda edición das Xornadas de Terminoloxía Matemática, co obxectivo de reflexionar sobre a situación do galego neste ámbito científico. As xornadas terán lugar os días 28 e 29 de novembro de 2017 no Salón de Graos da Facultade de Matemáticas da USC. O prazo para realizar a inscrición, que é de balde, remata o 26 de novembro. Para ampliar información, preme aquí.
14/11/2017. CURSOS E CONGRESOS
Escolas Católicas Galicia organiza, coa colaboración da Secretaría Xeral de Política Lingüística e mais do Consello da Cultura Galega (CCG), as XIII Xornadas de Normalización Lingüística, que terán lugar o 24 de novembro de 2017 na sede do CCG, en Santiago de Compostela. Esta edición centrarase na figura de Mª Victoria Moreno (autora á que se lle dedicará o Día das Letras Galegas no ano 2018), na presentación da base de datos sobre o patrimonio lúdico galego e na integración das aplicacións educativas na práctica docente. A xornada pecharase cunha homenaxe á escritora Marica Campo. O prazo de inscrición remata o 21 de novembro.
14/11/2017. DINAMIZACIóN
O Servizo de Normalización Lingüística do Concello de Zas presenta o concurso PanxoliñaZAS, co obxectivo de promover a creatividade e o uso da tecnoloxía en galego nos espazos lúdicos e festivos propios do Nadal. A iniciativa está dirixida a toda a veciñanza de Zas e consiste nun concurso de vídeos de panxoliñas e cantos de Aninovo e Reis. O prazo para presentar os vídeos remata o 21 de decembro de 2017. O xurado outorgará premios á mellor presentación, ao vídeo que conte con máis fidelidade á tradición da zona e ao mellor vídeo infantil. Tamén se premiará o vídeo máis popular en Facebook.
13/11/2017. INVESTIGACIóN
O Instituto da Lingua Galega (ILG) da Universidade de Santiago de Compostela e o Consello da Cultura Galega (CCG) presentan mañá martes, 14 de novembro de 2017, a obra Estudos sobre o cambio lingüístico no galego actual, unha compilación de investigacións sobre o cambio lingüístico elaboradas desde unha perspectiva multidisciplinar. No acto de presentación, que terá lugar ás 11:30 h na Biblioteca do CCG, intervirán Dolores Vilavedra, coordinadora da sección de Lingua, Literatura e Comunicación do CCG; Ernesto González Seoane, director do ILG; e os editores da publicación, Xosé Luís Regueira e Elisa Fernández Rei.
09/11/2017. DINAMIZACIóN
A Comisión de Normalización Lingüística da Facultade de Matemáticas, a Facultade de Matemáticas e o Instituto de Matemáticas da USC organizan a xornada Matemáticas: habelas, hainas, queremos contarchas!, na que oito investigadores/as ofrecerán cadansúa charla de carácter divulgativo sobre a investigación en matemáticas. As intervencións faranse en galego, para transmitir a mensaxe de que é un idioma tan válido como calquera outro para a transmisión de coñecementos científicos. O acto terá lugar hoxe, 9 de novembro de 2017, ás 16:00 h, na Facultade de Matemáticas. O acceso é libre, mais a organización agradece que previamente se tramite a inscrición a través deste formulario.
08/11/2017. DINAMIZACIóN
Xa está en marcha unha nova edición do Club de Debate, un proxecto colaborativo promovido polos servizos de normalización lingüística de diferentes concellos galegos, que ten como obxectivo a dinamización lingüística e cultural no ámbito educativo, fomentando a fluidez comunicativa en galego, o pensamento crítico e o respecto pola diversidade de opinións. Poden participar equipos mixtos de entre 4 e 10 mozos/as de 3º e 4º de ESO, 1º de Bacharelato e ciclos formativos. Haberá diferentes premios nas fases de zona e o equipo que gañe a fase final será premiado cunha viaxe en grupo. O prazo de inscrición remata o 30 de novembro de 2017.
08/11/2017. EMPREGO
A Universidade de Santiago de Compostela anuncia a convocatoria pública de contratación de persoal para colaborar en actividades de investigación mediante contrato de obra ou servizo determinado. Seleccionarase persoal para os seguintes proxectos do Instituto da Lingua Galega: “Arquivo do Galego Oral (AGO)” e “Léxico patrimonial (Galicia-Portugal-Brasil)”. Os aspirantes deben posuír a Licenciatura ou Grao en Filoloxía Galega / Lingua e Literatura Galegas. Para a primeira praza (AGO) tamén deben estar matriculados/as nun programa de doutoramento na USC. O prazo de presentación de solicitudes remata o 13 de novembro de 2017. Para ampliar información, preme aquí.
06/11/2017. CURSOS E CONGRESOS
Con motivo da estadía en Vigo do Pergamiño Vindel, o Departamento de Filoloxía Galega e Latina da Universidade de Vigo organiza o Simposio internacional E irei madr’a Vigo, que terá lugar os días 23 e 24 de novembro de 2017 no auditorio do Edificio Cambón (Vigo). Ao longo das xornadas haberá dúas conferencias plenarias e varias comunicacións científicas, nas que se analizará o Pergamiño Vindel desde diferentes perspectivas: a histórica, a musicolóxica, a literaria, a lingüística e a grafolóxica. A entrada é libre ata completar a capacidade do auditorio. Podes coñecer o programa completo do simposio premendo aquí.
06/11/2017. DINAMIZACIóN
A Secretaría Xeral de Política Lingüística e a Secretaría Xeral de Cultura convocan o Certame Vindevídeos, coa finalidade de que a xente nova e mais a sociedade en xeral poidan achegarse á cultura trobadoresca a través de producións en soporte audiovisual. O certame establece dúas categorías de participación, unha destinada a alumnado de infantil e primaria; e outra para alumnado de educación secundaria, ensinanzas especiais de grao medio, ensinanzas de adultos e ensinanzas de réxime xeral cursadas fóra de Galicia. O prazo para enviar os vídeos remata o 11 de decembro de 2017.
03/11/2017. AXUDAS E PREMIOS
A Cámara de Comercio e mais o Concello de Santiago de Compostela convocan a décimo oitava edición do Premio Manuel Beiras, que ten como finalidade recoñecer publicamente o compromiso coa normalización lingüística no sector empresarial. O galardón contempla dúas categorías, unha para as empresas que veñen realizando un uso continuado da lingua galega e outra para as que se incorporaron recentemente ao uso do galego. A maiores, o xurado tamén pode outorgar unha distinción especial a persoas ou entidades que destaquen polo labor a prol da normalización do galego na empresa. O prazo para presentar as candidaturas remata o 11 de decembro de 2017. Para ampliar información, preme aquí.
03/11/2017. DINAMIZACIóN
A Consellería de Cultura, Educación e Ordenación Universitaria presentou o manifesto e as actividades do programa Novembro, mes da ciencia en galego nas bibliotecas – 2017, co obxectivo de difundir a divulgación científica en galego en todas as bibliotecas públicas galegas. O programa inclúe obradoiros científicos, sesións de contos, ciclos de cine e charlas divulgativas, entre outras actividades.
02/11/2017. DINAMIZACIóN
O vindeiro 9 de novembro, ás 18:00 h, terá lugar na Sala Capitol de Santiago de Compostela unha nova edición do LGx15, un evento organizado pola Coordinadora de Traballadores/as de Normalización da Lingua, no que a través de charlas breves e amenas, diferentes participantes transmiten argumentos e experiencias para influír no futuro do galego. O acto será presentado por Vicente Mohedano e contará tamén coa actuación musical de MJ Pérez. A entrada custa 6 euros en venda anticipada e 10 euros o mesmo día na billeteira.
02/11/2017. AXUDAS E PREMIOS
A Asociación Cultural O Brado, da Estrada, fixo públicos os galardoados da vixésimo sétima edición dos Premios San Martiño de Normalización Lingüística, convocados anualmente para premiar a persoas e colectivos que destacan polo seu labor de promoción do idioma galego. Os premiados nesta edición son a asociación Codeseda Viva, na modalidade “A Estrada e comarca de Tabeirós-Terra de Montes”; a funcionaria Carme Pérez Vaquero, na categoría de “Galicia enteira” e o escritor Mario Franco Rodríguez, na categoría “Toda unha vida”. A entrega dos galardóns será o 14 de novembro ás 20:30 horas no Teatro Principal de A Estrada. Podes ampliar esta nova premendo aquí.
02/11/2017. CURSOS E CONGRESOS
Os departamentos de Filoloxía Galega e Didácticas Aplicadas da Universidade de Santiago de Compostela organizan as III Xornadas de Lingua e Literatura Galegas no ensino, que nesta edición levan por título “Ensinar galego desde o multilingüismo e a variedade. Enfoques e experiencias”. As xornadas, destinadas preferentemente a profesorado de Ensino Secundario da especialidade de Lingua Galega e Literatura, teñen como obxectivo ofrecer unha oportunidade para a reflexión sobre algúns aspectos da situación sociolingüística e do marco legal educativo que teñen un impacto directo na docencia do galego. As sesións terán lugar os días 17 e 18 de novembro de 2017. Para obter máis información sobre o programa das xornadas e mais os trámites de inscrición, preme aquí.
31/10/2017. AXUDAS E PREMIOS
A Asociación Álvaro das Casas fixo públicos os galardoados da undécima edición dos Premios Bacelos de Prata, pensados para recoñecer o labor de empresas que apostan polo galego como marca de calidade na etiquetaxe dos seus produtos. As empresas galardoadas nesta edición foron a queixería lalinense Hoxe e a adega O Alborexar, ubicada en Castrelo de Miño. A entrega dos premios celebrarase o vindeiro 18 de novembro no Pazo dos Ulloa, en Esposende, Ribadavia.
30/10/2017. CURSOS E CONGRESOS
A Asociación Socio-Pedagóxica Galega organiza as XVIII Xornadas de expresión oral “Tíralle da Lingua”, dirixidas ao profesorado co obxectivo de transmitirlles a importancia do factor oral na recuperación da lingua e proporcionarlles técnicas para traballar a oralidade na aula. As sesións desenvolveranse o 18 de novembro de 2017 no IES As Fontiñas (Santiago de Compostela). O prazo de matrícula (que debe realizarse a través do web da AS-PG) remata o 16 de novembro.