A Xunta de Galicia e a Embaixada da República de Portugal en España asinaron onte, 19 de febreiro de 2015, na sede da Real Academia Galega, un Memorando de entendendo para a adopción do portugués como lingua estranxeira de opción e avaliación curricular no sistema educativo non universitario de Galicia. Con este acordo quérese revitalizar o noso pasado lingüístico común e aproveitar a proximidade dos dous idiomas, galego e portugués, para estreitar as relacións cos países da lusofonía, a sexta comunidade lingüística do mundo por número de falantes, con 250 millóns. Para ampliar esta nova, preme aquí.
20/02/2015. OUTRAS
20/02/2015. DINAMIZACIóN
A Federación Galega de Parques Empresariais (FEGAPE) e a Secretaría Xeral de Política Lingüística presentan Exportar en galego, unha plataforma en liña de apoio á exportación galega aos paises da lusofonía. A plataforma inclúe, entre outros recursos, o Buscador Paz Andrade, un banco de datos con información específica sobre mercados, sectores de actividade e oportunidades de negocio. O acto de presentación pública terá lugar hoxe, 20 de febreiro, ás 11:00 h., na Cámara de Comercio e Navegación de Tui.
19/02/2015. DINAMIZACIóN
O Servizo de Normalización Lingüística do Concello de Melide e a asociación Melide Móvese, coa colaboración da Secretaría Xeral de Política Lingüística, presentan a campaña "Seduce en galego. Goza de Melide". O obxectivo é fomentar e prestixiar o galego entre a mocidade que acode a Melide para gozar do seu ambiente nocturno. No marco desta iniciativa gravaranse espazos radiofónicos en galego e repartiranse carteis e dípticos informativos nos 17 concellos galegos que están conectados con Melide a través da liña nocturna de autobuses. Así mesmo, nos locais nocturnos da asociación Melide Móvese porase música de grupos galegos e en galego. Para ampliar esta nova, preme aquí.
18/02/2015. CURSOS E CONGRESOS
O Servizo de Normalización Lingüística do Concello de Vigo organiza unha nova edición do Curso de auga salgada "Chegou o mar á ribeira", que ten como obxectivo achegarse á lingua galega (léxico, fraseoloxía, toponimia…) empregando como fío condutor a auga salgada. As sesións desenvolverase os días 19, 24, 25 e 26 de febreiro; e 3, 5, 10 e 12 de marzo de 2015 no Centro de Visitantes do Parque Nacional das Illas Atlánticas. A inscrición é de balde e todas as persoas interesadas poden facela enviando os seus datos (nome, apelidos, DNI e teléfono) a actividades.snl@vigo.org.
16/02/2015. OUTRAS
Proxéctate en Galego, espazo de debate promovido polas comisións de normalización lingüística do Campus de Lugo da USC, organiza a mesa redonda “Riqueza lingüística e ensino”, co ánimo de unirse á conmemoración do Día Internacional da Lingua Materna. Na mesa participarán Modesto A. Rodríguez Neira, profesor da Área de Lingüística Xeral da USC; Valentina Formoso Gosende, da Coordinadora Galega de Equipos de Normalización e Dinamización Lingüística; e José María Álvarez Castro, editor do libro Ás voltas coa diversidade cultural. A moderadora será María Xosé Rodríguez Valcárcel, profesora de lingua e literatura galega. O acto terá lugar o 21 de febreiro, a partir das 11,30 h na Casa do Saber (Vicerreitoría do Campus de Lugo).
13/02/2015. AXUDAS E PREMIOS
A Deputación da Coruña publica, no BOP do 13 de febreiro de 2015, a resolución provisional da convocatoria de subvencións a concellos e entidades locais da provincia da Coruña para a creación ou mantemento dos servizos lingüísticos durante o ano 2015. A partir desta publicación, os solicitantes teñen un prazo de 10 días hábiles para aceptar ou renunciar a estas axudas. Para consultar o texto completo da resolución, preme aquí.
13/02/2015. DINAMIZACIóN
O Servizo de Normalización Lingüística (SNL) da Mancomunidade de Ordes presenta a campaña “O galego vende”, co obxectivo de estender o uso da lingua galega no ámbito do comercio. O SNL colaborará coas asociacións de comerciantes para fomentar a oferta positiva do galego na atención á clientela. Así mesmo, contactará cos diferentes establecementos para promover o seu compromiso no uso do galego, tanto na comunicación oral (atención á clientela) como na escrita (tíckets, carteis publicitarios, redes sociais…). Para obter máis información, preme aquí.
12/02/2015. DINAMIZACIóN
O Servizo de Normalización Lingüística do Concello de Carballo e a Mesa pola Normalización Lingüística presentan o videoclip Parabéns para ti!, elaborado coa colaboración do Coro Vagalume. A finalidade desta iniciativa é promover a celebración de aniversarios en galego, fornecendo este recurso musical que pode compartirse nas redes sociais ou empregarse nas festas de aniversario. O SNL do Concello de Carballo encargarase de distribuílo nas escolas infantís, centros de ensino e ludotecas do municipio. Podes ampliar esta información premendo aquí.
12/02/2015. AXUDAS E PREMIOS
O Programa de Creación de Empresas da Universidade de Santiago de Compostela Uniemprende convoca o XV Concurso de Proxectos Empresariais Innovadores da USC, co obxectivo de impulsar a creación de empresas innovadoras promovidas por estudantes, licenciados/as ou investigadores/as, así como a innovación empresarial e a xeración de emprego. Por primeira vez, este concurso inclúe a categoría “Premio á promoción da lingua galega”, impulsada pola Comisión de Normalización Lingüística da Facultade de Económicas. O prazo de presentación de proxectos remata o vindeiro 7 de abril de 2015.
11/02/2015. DINAMIZACIóN
A Coordinadora de Traballadores/as de Normalización da Lingua (CTNL) presenta a campaña Fain@ gozar coa lingua, vinculada á plataforma Agasallo.eu, co obxectivo de vincular o galego co amor e promover a escolla de agasallos para a parella neste idioma. A CTNL convida a toda a cidadanía a difundir a iniciativa a través das redes sociais e a visitar a plataforma Agasallo.eu para escoller o regalo que consideren máis acaído para festexar o vindeiro 14 de febreiro. Para ampliar esta información, preme aquí.
11/02/2015. DINAMIZACIóN
A Comisión de Normalización Lingüística da Facultade de Matemáticas da USC e a Fundación Barrié organizan o concurso Explícoche matemáticas 2.0, co obxectivo de promover o uso do galego como medio de transmisión do coñecemento matemático. O certame está dirixido ao alumnado do Sistema Universitario de Galicia e a estudantes de 3º e 4º de ESO e 1º e 2º de Bacharelato dos centros de educación secundaria de Galicia. Cada participante (ou grupo) debe presentar un vídeo de 2 minutos de duración sobre un tema relacionado coas Matemáticas. Outorgaranse dous premios (un por categoría), que consistirán en material informático, audiovisual ou didáctico. O prazo para enviar os proxectos remata o 8 de abril de 2015.
10/02/2015. AXUDAS E PREMIOS
A Consellería de Cultura, Educación e Ordenación Universitaria publica a convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas. O prazo de presentación de solicitudes é dun mes, contado a partir do día seguinte ao da publicación desta convocatoria.
10/02/2015. DINAMIZACIóN
O Servizo de Normalización Lingüística e a Radio Municipal de Redondela súmanse á iniciativa “Eu son Rosalía“, que promove a Asociación de Escritores en Lingua Galega (AELG). A celebración do Día de Rosalía en Redondela consistirá na gravación en Radio Redondela, entre os días 10 e 20 de febreiro, de lecturas da obra rosaliana e de opinións que, seguindo indicacións da AELG, deben comezar coa frase “Eu son Rosalía porque/cando/para…”. As gravacións emitiranse na semana do 23 ao 27 de febreiro. Para ampliar esta información, preme aquí.
10/02/2015. DINAMIZACIóN
Co gallo da celebración do Día Internacional da Lingua Materna, a Biblioteca Pública de Santiago Ánxel Casal organiza o obradoiro "A miña palabra favorita en galego", deseñado para nenas e nenos de 5 a 12 anos. Ata o vindeiro 20 de febreiro de 2015 todos os nenos e nenas poden depositar na caixa de correos da sala infantil da biblioteca a súa palabra favorita en galego. Posteriormente, o 20 de febreiro terá lugar o obradoiro que consistirá na elaboración de bandeirolas coas palabras escollidas. Podes obter máis información premendo aquí.
09/02/2015. DINAMIZACIóN
A Secretaría Xeral de Política Lingüística e a Dirección Xeral de Xuventude e Voluntariado organizan unha nova edición de Lingua de Namorar, un concurso en liña de mensaxes de amor en lingua galega dirixido a mozos e mozas de 14 a 35 anos. A iniciativa está deseñada para dinamizar o uso do galego nas súas relacións persoais e nas novas tecnoloxías, nomeadamente en internet e na mensaxería instantánea. Outorgaranse tres premios tecnolóxicos por cada unha das categorías de idade establecidas. O prazo para enviar as mensaxes remata o 22 de febreiro de 2015.
06/02/2015. DINAMIZACIóN
O Concello de Teo, coa colaboración da Secretaría Xeral de Política Lingüística e Gadis, convoca o II Certame de canción de autor en galego “Concello de Teo”, co obxectivo de promover a creación artística no noso idioma. Poderán participar os/as cantautores/as maiores de 15 anos que non posúan ningún disco editado. As composicións, de calquera estilo musical, deberán ser orixinais e de creación propia, e as letras terán que estar escritas en galego. O prazo de inscrición remata o 29 de marzo de 2015. Para obter máis información, preme aquí.
05/02/2015. CURSOS E CONGRESOS
A Escola Galega de Administración Pública publica, no DOG núm. 22, do 3 de febreiro de 2015, a convocatoria de actividades de formación continua dirixidas aos empregados públicos da Administración autonómica, agás o persoal docente e sanitario. Na oferta inclúense os seguintes cursos de temática lingüística: “A calidade da redacción administrativa. Técnicas para mellorala”, “Actualización gramatical e ortográfica da lingua galega”, “Desenvolvemento e fomento das habilidades comunicativas na Administración pública” e “Redacción de documentos técnico-xurídicos en galego”. O prazo de solicitudes, que deben tramitarse a través do web da EGAP, remata o vindeiro 13 de febreiro, ás 14:00 h. Para consultar o texto completo da convocatoria, preme aquí.
04/02/2015. INVESTIGACIóN
O Servizo de Normalización Lingüística da Universidade de Santiago analiza no último número d´O Cartafol os datos sobre usos lingüísticos na actividade docente no curso 2014-2015. En termos xerais, impártense en castelán o 73,95% das horas docentes, en galego o 22,20%, en inglés o 1,80%, en portugués o 0,42% e noutras linguas (francés, italiano, alemán) o 1,62%. Tamén se ofrece información detallada sobre usos lingüísticos segundo o tipo de titulación (grao, mestrado, licenciatura), ou o departamento e a categoría do persoal docente e investigador. Así mesmo, podes consultar a evolución dos usos lingüísticos nos últimos doce anos.
02/02/2015. OUTRAS
A Real Academia Galega fixo pública, o pasado 30 de xaneiro, a declaración institucional “O galego dá vida, pola vida do galego”, en reacción aos resultados da última enquisa do IGE. Trátase dun decálogo no se que interpela aos diferentes sectores sociais para que aposten decididamente polo uso do galego e ao goberno galego para que modifique a súa política lingüística, concretamente implementando o Plan Xeral de Normalización da Lingua Galega e derrogando o decreto do plurilingüismo.
02/02/2015. CURSOS E CONGRESOS
A Comisión de Normalización Lingüística da Facultade de Filoloxía da USC organiza o debate “Que fala falas? Gheada, seseo e localismos no uso público?”, que terá lugar o 11 de febreiro de 2015, ás 19:00 h, no Salón de Graos desta facultade. No acto intervirán Xosé Luís Regueira, catedrático de Filoloxía Galega da USC e membro da RAG; Paulino Novo, coordinador lingüístico da CRTVG e doutor en Filoloxía Galega; Lorena Pose, presentadora da TVG e licenciada en Xornalismo, e Federico Pérez, actor e licenciado en Filoloxía Galega. O debate estará moderado por Lois Celeiro, director do Gabinete de Comunicación da USC.
02/02/2015. DINAMIZACIóN
A Biblioteca Pública de Santiago Ánxel Casal convoca o III Concurso de cartas de amor en galego, co obxectivo de fomentar a creatividade e a creación literaria no noso idioma. O certame está dirixido a persoas maiores de 14 anos. O xurado outorgará tres premios e os/as gañadores/as recibirán cadanseu lote de libros. O prazo de presentación dos traballos remata o 14 de febreiro de 2014. Para consultar as bases completas do concurso, preme aquí.
29/01/2015. DINAMIZACIóN
A Concellaría de Normalización Lingüística do Concello de Pontevedra presentou onte o programa Ponte a Europa, que dinamizará o uso da lingua a través de conversas e narracións multimedia entre escolares do rural pontevedrés e universitarios e universitarias europeos.
Despois do éxito acadado con Ponte a Londres, nesta edición os centros de primaria do municipio poderán comunicarse con estudantes de Oxford, Birmingham, Varsovia, Zadar, Berlín, Cork e Helsinki, co obxectivo de impulsar o galego como lingua de comunicación máis alá das nosas fronteiras, así como aprender a valoralo como fonte de riqueza lingüística e de identidade. Coñece a información detallada aquí.
Despois do éxito acadado con Ponte a Londres, nesta edición os centros de primaria do municipio poderán comunicarse con estudantes de Oxford, Birmingham, Varsovia, Zadar, Berlín, Cork e Helsinki, co obxectivo de impulsar o galego como lingua de comunicación máis alá das nosas fronteiras, así como aprender a valoralo como fonte de riqueza lingüística e de identidade. Coñece a información detallada aquí.
28/01/2015. INVESTIGACIóN
O Consello da Cultura Galega e o Instituto da Lingua Galega presentan a publicación Lingua e identidade na fronteira galego-portuguesa, que compila dez contribucións orixinais sobre este tema, froito do simposio homónimo realizado en Santiago de Compostela en 2013. O acto de presentación terá lugar mañá xoves, 29 de xaneiro, ás 12:00 h, na sede do Consello da Cultura Galega.
27/01/2015. DINAMIZACIóN
O Servizo de Normalización Lingüística do Concello de Redondela organiza Dobraxe na Escola, unha actividade lúdico-educativa dirixida ao alumnado de ensino primario redondelán, co obxectivo de mellorar a súa competencia oral en galego a través do mundo da dobraxe. Nos obradoiros, que se desenvolverán en sete centros de ensino desde o 26 de xaneiro ata o 3 de febreiro de 2015, participarán os actores Suso Pando e Manuel Pombal. Para ampliar esta información, preme aquí.
27/01/2015. AXUDAS E PREMIOS
A Secretaría Xeral de Medios da Xunta de Galicia publica a convocatoria de subvencións para empresas que editen publicacións periódicas escritas integramente en galego.
O prazo de presentación de solicitudes é dun mes, contado a partir do día seguinte ao da publicación da convocatoria.
O prazo de presentación de solicitudes é dun mes, contado a partir do día seguinte ao da publicación da convocatoria.
26/01/2015. AXUDAS E PREMIOS
A Secretaría Xeral de Política Lingüística e a Dirección Xeral de Educación, Formación Profesional e Innovación Educativa convocan unha nova edición dos premios a curtas de animación en galego “Nós tamén creamos!”.
A convocatoria, dirixida a todos os centros educativos galegos de infantil e primaria, ten como obxectivo estimular o uso do galego e a creatividade dos máis pequenos/as. Outorgaranse tres premios, segundo o ciclo educativo, e os centros premiados recibirán un lote de libros de OQO, un agasallo da CRTVG e mais unha certificación de Premio de Innovación Educativa. As curtas gañadoras serán emitidas na TVG. O prazo para enviar os traballos remata o 30 de abril de 2015.
A convocatoria, dirixida a todos os centros educativos galegos de infantil e primaria, ten como obxectivo estimular o uso do galego e a creatividade dos máis pequenos/as. Outorgaranse tres premios, segundo o ciclo educativo, e os centros premiados recibirán un lote de libros de OQO, un agasallo da CRTVG e mais unha certificación de Premio de Innovación Educativa. As curtas gañadoras serán emitidas na TVG. O prazo para enviar os traballos remata o 30 de abril de 2015.
23/01/2015. OUTRAS
Xa podes consultar o noso Boletín de Sumarios 2014, produto documental que inclúe os sumarios de 39 números de publicacións periódicas, correspondentes a 21 títulos diferentes, que ingresaron na hemeroteca do CDSG durante o ano 2014. Para consultar a nosa colección completa de seriadas, preme aquí.
23/01/2015. DINAMIZACIóN
A Área de Cultura, Turismo e Normalización Lingüística da Deputación de Lugo e a Asociación Provincial de Empresarios de Perruquería, Estética e Afíns están a desenvolver a campaña “O galego é a túa imaxe”, co obxectivo de crear novos espazos de uso para a cidadanía no ámbito das perruquerías. Para concienciar ao gremio de perruqueiros e perruqueiras sobre a importancia de usar o galego, distribuiranse trípticos e outro material informativo con vocabulario específico da profesión. Podes ampliar esta información premendo aquí.
22/01/2015. DINAMIZACIóN
O alumnado de 5º e 6º de Primaria do Colexio Mª Inmaculada de Silleda, coa colaboración do Equipo de Dinamización da Lingua Galega (EDLG), está a organizar a campaña “Mil barcos por un soño, mil barcos pola paz!”, coa que o centro vai conmemorar o Día da Paz. Co obxectivo de vincular o uso do galego a valores cívicos como a Paz, o vindeiro 30 de xaneiro o patio deste colexio converterase nun mar de barcos de cores. Para conseguilo, convidan a centros de ensino, entidades e particulares a colaborar enviando o seu barco de papel (sinalando o nome e apelidos a babor e un desexo de paz a estribor). Podes obter máis información no Facebook do EDLG “Inmacugaleguízate”.
22/01/2015. DINAMIZACIóN
O Servizo de Normalización Lingüística que comparten os concellos de Melide, Toques, Palas de Rei e Santiso, adscrito á Rede de Dinamización Lingüística, presenta a campaña “Terras de Melide e A Ulloa. Antes e agora en galego”, co obxectivo de poñer en valor entre a cidadanía o patrimonio cultural e lingüístico das comarcas da Terra de Melide e A Ulloa. No marco desta iniciativa distribuiranse 500 calendarios con información sobre o patrimonio medieval artístico e lingüístico dos concellos promotores. Para ampliar esta nova, preme aquí.