Novas da lingua

Rexistros3391 a 3420 de 5280
  1. Inicio
  2. CDSG-CCG
  3. Novas da lingua
10/04/2013. INVESTIGACIóN

As actitudes dos galegos/as cara ao seu idioma propio

O Consello da Cultura Galega presenta a segunda edición, revisada e ampliada, do estudo A(s) lingua(s) a debate. Inquérito sobre opinións, actitudes e expectativas da sociedade galega, agora tamén accesible en rede. O informe, elaborado polo Observatorio da Cultura Galega do CCG, presenta os datos sobre as actitudes que os galegos/as mostran cara á lingua galega e o seu uso nos diferentes ámbitos sociais, obtidos a partir dunha enquisa dirixida á poboación adulta.

Con este estudo o CCG quere contribuír ao proceso de normalización do galego, achegando ferramentas de utilidade para futuros proxectos de planificación lingüística.
10/04/2013. DINAMIZACIóN

Música en galego para homenaxear a Roberto Vidal Bolaño

O vindeiro 16 de maio, véspera do Día das Letras Galegas, terá lugar na Sala Capitol de Santiago de Compostela o festival O Bule-Bule. Son dos chífanos, ideado para homenaxear a Roberto Vidal Bolaño, autor elixido pola RAG para conmemorar en 2013 as Letras Galegas.
10/04/2013. DINAMIZACIóN

Concursos para promover o galego na UDC

As comisións de normalización lingüística da Universidade da Coruña, en colaboración co seu Servizo de Normalización Lingüística, organizan periodicamente diferentes actividades (certames, xornadas, campañas) para promover o uso do galego entre a comunicade universitaria.

O SNL da UDC está a publicitar actualmente dous novos certames. Trátase do II Concurso de Relatos Curtos: Lingua e Empresa, organizado en colaboración da CNL da Facultade de Economía e Empresa, e o III Concurso de Traballos Académicos Redactados en Lingua Galega, organizado en colaboración coas CNL da Escola Politécnica Superior e da Escola Universitaria Politécnica.

No web do SNL da UDC pode obter toda a información sobre a actividade desenvolvida polas comisións de normalización lingüística desta universidade.
09/04/2013. CURSOS E CONGRESOS

XXXIII Xornadas de Lingua e Literatura

A Asociación Socio-Pedagóxica Galega e a CIG-Ensino organizan unha nova edición das Xornadas de Lingua e Literatura, foro de referencia para o debate sobre as principais cuestións que afectan á docencia da Lingua e Literatura Galega no ensino. A xornada, dirixida ao colectivo de profesorado non universitario de Galicia, terá lugar o 27 de abril de 2013 no IES As Fontiñas, en Santiago de Compostela.

O prazo de matrícula estará aberto desde o 10 ata o 25 de abril.
09/04/2013. INVESTIGACIóN

Consulta en liña unha panorámica sociolingüística do período 1992-2008

Xa podes consultar en liña O idioma galego na sociedade. A evolución sociolingüística 1992-2008, editado polo Consello da Cultura Galega e elaborado polo seu Observatorio da Cultura Galega. O estudo presenta os datos sobre lingua inicial, lingua habitual e competencia lingüística no período 1992-2008, obtidos a través da comparación de resultados dos principais estudos sociolingüísticos realizados en Galicia neste período.
09/04/2013. AXUDAS E PREMIOS

A Academia Galega do Audiovisual premia o Xabarín Club

O espazo infantil e xuvenil da Televisión de Galicia “Xabarín Club” recibiu o Premio de Honra Fernando Rey, que lle outorgou a Academia Galega do Audiovisual no marco dos Premios Mestre Mateo 2013. Entre os méritos que valorou o xurado destaca o seu importante papel na normalización do uso do galego entre o público infantil e xuvenil. A gala de entrega dos Premios Mestre Mateo tivo lugar o pasado 6 de abril no Pazo da Ópera da Coruña.
Para ampliar a información, preme aquí.
09/04/2013. DINAMIZACIóN

Os colexios católicos de Galicia festexan a lingua en Ourense

Mañá mércores, 10 de abril de 2013, terá lugar en Ourense a IX Festa da Lingua, iniciativa lúdico- didáctica que organiza anualmente Escolas Católicas Galicia. O programa inclúe obradoiros de ilustración, escritura, música, maxia e animación, que se desenvolverán no Auditorio Municipal de Ourense entre as 10:00 h e as 13:15 h. Así mesmo, no transcurso deste acto festivo entregarase o Premio Literario Frei Marín Sarmiento, organizado tamén por Escolas Católicas Galicia.

Para obter máis información, preme aquí.
08/04/2013. AXUDAS E PREMIOS

Concurso de lemas da Escola Politécnica Superior da USC

A Comisión de Normalización Lingüística da Escola Politécnica Superior (USC) convoca un concurso de lemas en lingua galega para a promoción do centro, co obxectivo de fomentar o uso do galego nas ensinanzas técnicas. O certame está dirixido a todas as persoas maiores de 16 anos residentes en Galicia. O gañador/a recibirá unha tablet valorada en máis de 200 euros. O prazo de presentación de propostas remata o 30 de abril de 2013.
08/04/2013. DINAMIZACIóN

Tres deportistas de elite serán “espello deportivo” no uso do galego

A Secretaría Xeral de Política Lingüística, en colaboración coas deputacións da Coruña e de Ourense, desenvolverá no marco da Rede de Dinamización Lingüística (RDL) a campaña Espello deportivo, que ten como obxectivo promover o uso e o prestixio do galego no ámbito deportivo. Nos vindeiros dous meses, a regatista Sofía Toro, o nadador Chano Rodríguez e o tirador Juan Antonio Saavedra visitarán as escolas deportivas de diferentes concellos adscritos á RDL para compartir co alumnado as súas experiencias deportivas e promover o uso do galego como un valor colectivo que conforma a nosa identidade.

Para ampliar esta información, preme aquí.
08/04/2013. CURSOS E CONGRESOS

V Fiadeiro de localización de software libre

A Comisión de Normalización Lingüística da Escola Técnica Superior de Enxeñaría e mais o Servizo de Normalización Lingüística da USC organizan unha nova edición do Fiadeiro de localización de software libre, que ten como obxectivos fornecer formación técnica para a tradución ao galego de aplicacións de software libre e promover o seu uso entre a comunidade universitaria. As sesións desenvolveranse os días 25 e 27 de abril de 2013.
O prazo de inscrición remata o 22 de abril.
05/04/2013. DINAMIZACIóN

Comeza a segunda edición do programa FalaRedes

A Secretaría Xeral de Política Lingüística (SXPL) presenta a segunda edición de FalaRedes, un programa de cinco actividades lúdicas que ten como obxectivo ampliar a oferta de lecer en galego nos concellos adscritos á Rede de Dinamización Lingüística. O programa inaugúrase este mes de abril cos espectáculos infantís “A nena e o grilo nun barquiño” e “As pombas de Carboeiro”, que combinan música, poesía, teatro e baile en directo para os máis pequenos/as.
Podes ampliar esta información e consultar o calendario das actuacións no propio web da SXPL.
05/04/2013. OUTRAS

Novos avances para o galego no ámbito tecnolóxico

Estes días tivemos coñecemento dalgunhas novidades que demostran que o galego continúa a dar pasos no camiño da súa normalización no ámbito tecnolóxico.
Por unha banda, Tuenti anuncia unha nova aplicación para o Windows Phone que lles permitirá aos usuarios deste sistema operativo acceder desde o seu móbil á rede social Tuenti en galego. Por outro lado, os usuarios do navegador Firefox tamén recibiron boas novas esta semana. O Firefox 20 xa está dispoñible en galego para Windows, Mac e Linux. Así mesmo, grazas ao traballo colaborativo dos propios internautas, neste caso de Antón Méixome, o Buscatermos (base terminolóxica da USC) pode consultarse directamente desde o propio Firefox.
04/04/2013. EMPREGO

Contrato de investigación na Universidade da Coruña

A Facultade de Filoloxía da Universidade da Coruña publica a convocatoria dun contrato de investigación para licenciados/as en Filoloxía Galega ou afíns (Portuguesa, Hispánica ou Románica). O obxecto do contrato é colaborar no proxecto “La producción editorial en Galicia durante la época franquista (1939-1975) ”.

As persoas interesadas deben enviar a documentación requirida (fotocopia do DNI, fotocopia do título académico e currículo) ao enderezo carme@udc.es.
04/04/2013. EMPREGO

Oferta laboral para docentes de galego

O Instituto Tecnolóxico de Formación (INTEC) fai pública unha oferta laboral dirixida a docentes de galego para impartir cursos de lingua galega no ámbito de Galicia. Os/as candidatos/as deberán ter experiencia docente e unha licenciatura que acredite especialización na materia. As persoas interesadas deben enviar os seus currículos ao enderezo rrhh@institutotecnologico.es.

Para obter máis información, preme aquí.
03/04/2013. CURSOS E CONGRESOS

XV Encontros para a Normalización Lingüística

Xa podes consultar en liña o programa dos XV Encontros para a Normalización Lingüística, que terán lugar os vindeiros días 18 e 19 de abril de 2013 no Consello da Cultura Galega. Nesta edición os Encontros van prestar unha especial atención á análise dos 30 anos da Lei de normalización lingüística e ó traballo colaborativo no eido da normalización lingüística, sen esquecer a liña habitual de seguimento de iniciativas actuais, nomeadamente nos ámbitos do ensino e da Administración local.

A inscrición realizarase exclusivamente a través do formulario habilitado no web do CCG. O prazo de inscrición remata o 14 de abril de 2013. O 15 de abril farase pública a listaxe de admitidos/as.
03/04/2013. OUTRAS

O CDSG estrea novo sitio web

O CDSG presenta o seu novo sitio web, cunha imaxe e contidos renovados. Ademais da información sobre o propio centro e dos contidos que xa viñamos ofrecendo, inauguramos dúas novas seccións: o Delicious do CDSG e Lingua en Titulares. No Delicious ofrecemos o noso libro completo de marcadores web para que poidan ser compartidos en rede por toda a comunidade. Lingua en Titulares é un caderno de prensa en liña no que seleccionamos diariamente as novas publicadas sobre lingua en máis de 30 medios dixitais.

Nos vindeiros meses, engadiremos outros produtos documentais nos que estamos a traballar. Convidámoste a que visites o web e nos fagas chegar a túa opinión. Coñecela axudaranos a mellorar o servizo que prestamos.
03/04/2013. CURSOS E CONGRESOS

Cursos de verán de lingua e cultura galegas en Santiago de Compostela

A Real Academia Galega, o Instituto da Lingua Galega (USC) e mais a Secretaría Xeral de Política Lingüística da Xunta de Galicia organizan unha nova edición destes cursos estivais, dirixidos a estranxeiros/as e españois de fóra de Galicia, que se desenvolverán entre os días 4 e 24 de xullo de 2013.
03/04/2013. DINAMIZACIóN

IV Concurso de monólogos en lingua galega “Que me dis!!”

O Servizo de Normalización Lingüística do Concello de Narón organiza a cuarta edición deste concurso de monólogos que ten como obxectivo promover o uso do galego no ámbito do lecer a través das novas tecnoloxías. As persoas participantes deben gravar o seu monólogo en formato vídeo e envialo como arquivo adxunto a través do formulario accesible no propio web do concello, onde se poderán consultar e apoiar. Outorgaranse tres premios en metálico (de 300, 200 e 100 euros) aos tres mellores monologuistas.

O prazo para enviar as gravacións remata o 10 de maio de 2013 (ás 14:30 h).
02/04/2013. OUTRAS

Colaboración entre o Consello da Cultura Galega e a Consellería de Cultura e Educación en materia de normalización lingüística

O conselleiro de Cultura e Educación, Xesús Vázquez, e o presidente do Consello da Cultura Galega (CCG), Ramón Villares, asinaron onte, 1 de abril de 2013, un protocolo de colaboración en materia de normalización lingüística que inclúe un programa de actividades para desenvolver ao longo de 2013, ano no que se cumpren 30 anos da aprobación da Lei de Normalización Lingüística de Galicia (1983).
01/04/2013. CURSOS E CONGRESOS

Curso de verán de toponimia

O Instituto da Lingua Galega organiza o Curso de toponimia: interpretación e actuación, que se desenvolverá entre os días 16 e 19 de xullo de 2013 na Universidade de Santiago de Compostela. O obxectivo do curso é ofrecer formación, desde unha perspectiva multidisciplinaria, nos ámbitos da pescuda etimolóxica, a didáctica da toponimia, a acción normalizadora e o traballo de campo.
01/04/2013. CURSOS E CONGRESOS

Obradoiro de notas de prensa para a difusión de accións de normalización lingüística

A Coordinadora de Traballadores/as de Normalización da Lingua organiza un obradoiro de notas de prensa destinado aos traballadores/as de normalización lingüística, co obxectivo de ofrecerlles os coñecementos prácticos necesarios para elaborar notas de prensa que comuniquen de xeito eficiente as mensaxes que precisan transmitir no marco do seu traballo.
01/04/2013. OUTRAS

Amplíase o prazo de inscrición para as probas do CELGA

A Secretaría Xeral de Política Lingüística anuncia que se amplía o prazo de presentación de solicitudes previsto na Resolución do 28 de decembro de 2012 pola que se convocan as probas para a obtención dos certificados de lingua galega (niveis Celga 1, 2, 3 e 4) no ano 2013. Este novo prazo remata o vindeiro 8 de abril (inclusive).
21/03/2013. DINAMIZACIóN

Santiago convida a mocidade a vivir a Paixón en galego

A Confraría de Estantes, o Concello de Santiago de Compostela e a Secretaría Xeral de Política Lingüística presentan a campaña Vive a Paixón, unha iniciativa dirixida á poboación máis nova co obxectivo de que participen en galego nos ritos propios da Semana Santa e compartan as súas experiencias nas redes sociais.
20/03/2013. AXUDAS E PREMIOS

X Certame Literario Concello de Ames

O Servizo de Normalización Lingüística do Concello de Ames convoca a décima edición deste certame literario que ten como principal obxectivo promover os novos valores da literatura en lingua galega. O certame conta con dúas modalidades (narrativa e poesía) e en cada unha delas establécense tres categorías, segundo a idade dos participantes. Os textos, de tema libre, deben ser inéditos e estar escritos en galego. O prazo de presentación de orixinais remata o 20 de abril de 2013.

Para ampliar esta información, preme aquí.
19/03/2013. AXUDAS E PREMIOS

Premios á edición en lingua galega 2012

A Asociación Galega de Editores deu a coñecer os galardoados/as da oitava edición destes premios que teñen como obxectivo recoñecer o traballo editorial en lingua galega realizado polos seus membros ao longo do ano.
15/03/2013. DINAMIZACIóN

A publicidade comercial en galego ten premio

O Departamento de Lingua Galega do Concello de Santiago organiza o I Concurso de proxectos de publicidade comercial en galego, co obxectivo de fomentar o uso do galego na comunicación publicitaria.
15/03/2013. OUTRAS

O Apalabrados xa ten versión en galego

A empresa Etermax, responsable do coñecido xogo para móbiles Apalabrados anunciou que os/as usuarios/as terán en breve dispoñible a versión en galego. Esta versión foi desenvolvida por Cilenis, que empregou como base o Vocabulario Ortográfico da Lingua Galega (VOLGa).
O Apalabrados consiste en formar palabras sobre un taboleiro a partir dun serie de letras. O usuario/a pode xogar contra unha única persoa (coñecida ou elixida ao chou) ou optar pola modalidade multixogador en liña.
15/03/2013. INVESTIGACIóN

Glosario trilingüe sobre arquitectura de computadores

O Servizo de Normalización Lingüística da USC e mais a Comisión de Normalización Lingüística da Escola Técnica Superior de Enxeñería (ETSE) da USC presentan a obra Termos esenciais da arquitectura de computadores galego-español-inglés.
Con esta publicación, os seus promotores queren colaborar na difusión da terminoloxía técnica en galego e ofrecer ferramentas de utilidade á comunidade educativa da ETSE para o ensino/aprendizaxe na nosa lingua.
13/03/2013. DINAMIZACIóN

Maratón de actividades en Vigo para alumear a nosa lingua

O Concello de Vigo, a través do seu Servizo de Normalización Lingüística, organiza o programa de dinamización lingüística Alumea a túa lingua!, un maratón de actividades que comezou o pasado 22 de febreiro e rematará o vindeiro 17 de maio, día no que se cumpren 150 anos da publicación de Cantares Gallegos, de Rosalía de Castro, nunha imprenta da rúa Real (Vigo).
13/03/2013. DINAMIZACIóN

Falamos?, iniciativa para a aprendizaxe lingüística en tándem

A Asociación Trabalingua, coa colaboración da Área de Normalización Lingüística da Universidade de Vigo, organiza unha nova edición do programa Falamos?, unha iniciativa de aprendizaxe lingüística baseada en tándems ou grupos de conversa entre alumnado galego e estranxeiro. O programa está especialmente deseñado para estudantes de intercambio e galegofalantes interesados en aprender outro idioma. Os/as interesados/as deben enviar un correo a tandemtrabalingua@gmail.com sinalando o seu perfil lingüístico, o idioma que desexan aprender e a modalidade de aprendizaxe (tándem ou conversa múltiple).